᥇ ᤛᤠᤵᤔᤢ᤺ᤴᤎᤢᤶ 15 - LIFOTNTᤔᤠᤱᤜᤢᤵ ᤛᤴᤍᤥᤰᤁᤡᤴ ᤕᤖᤢᤛᤗᤧᤔ ᤔᤧᤎᤠᤰᤋᤢ 1 ᤍᤠᤀᤢᤍᤧᤸᤗᤧ ᤂᤢᤏᤧ᤹ ᤁᤢᤗᤠᤃᤡ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤜᤡᤶᤜᤠ᤹ ᤆᤥᤃᤢᤛᤡ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤗᤠᤃᤡ ᤕᤢᤰᤏᤠᤍᤧᤴ ᤆᤥᤃᤢᤀᤠᤱ ᤂᤧᤸᤗᤧ ᤗᤠᤃᤡ ᤗᤳᤇᤠ ᤛᤠ᤺ᤱᤃᤠᤜᤡᤶ ᤂᤡᤱᤄᤢ॥ 2 ᤂᤧᤴ ᤀᤣᤃᤠᤱ ᤂᤢᤏᤧ᤹ ᤔᤧᤳᤋᤢᤛᤡ. “ᤗᤧᤒᤡᤜᤠ᤹ᤖᤧᤖᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤐᤱᤔᤠ ᤐᤥᤱ᤹ ᤑᤠ᤹ᤀᤠᤱ ᤂᤢᤏᤧ᤹ ᤔᤧᤳᤋᤢᤛᤡ॥ ᤌᤣᤀᤠᤱᤓᤧᤸᤗᤧ ᤂᤧᤴ ᤛᤴᤍᤥᤰᤁᤡᤴ ᤐᤱᤔᤠ ᤏᤢ ᤀᤠᤓᤧᤸᤗᤧᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤵᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤀᤣ ᤔᤧᤛᤣᤃᤢᤛᤡᤀᤠᤱ ᤘᤕᤧ॥” 3 ᤂᤧᤒᤩᤠᤱ ᤂᤧᤸᤗᤧ ᤗᤠᤃᤡ ᤕᤠᤖᤡᤵ ᤔᤧᤈᤥᤃᤢᤒᤠ ᤋᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤌᤠᤰᤔᤠᤖᤧ ᤗᤠᤃᤡ ᤍᤠᤀᤢᤍᤧᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤕᤖᤢᤛᤗᤧ᤺ᤶᤔᤥ ᤑᤢᤰᤂᤢᤛᤡ॥ 4 ᤂᤢᤏᤧ᤹ ᤜᤠᤖᤢᤏᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤏᤢ ᤗᤧᤒᤡᤜᤠ᤹ ᤛᤥᤖᤡᤰ ᤑᤢᤰᤂᤢᤛᤡᤖᤥ— 5 ᤁᤜᤠᤋᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤗᤠᤶ— ᤀᤢᤖᤡᤀᤣᤗ ᤂᤢᤏᤧ᤹ ᤗᤠᤶᤗᤥᤒᤠ ᤏᤢ ᤂᤢᤏᤧ᤹ ᤁᤢᤃᤠ᤹ᤀᤡᤜᤠ᤹ ᥇᥈᥆ ᤔᤧᤘᤕᤧ॥ 6 ᤔᤖᤠᤖᤡᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤗᤠᤶ— ᤀᤛᤠᤕᤠᤜ ᤂᤢᤏᤧ᤹ ᤗᤠᤶᤗᤥᤒᤠ ᤏᤢ ᤂᤢᤏᤧ᤹ ᤁᤢᤃᤠ᤹ᤀᤡᤜᤠ᤹ ᥈᥈᥆ ᤔᤧᤘᤕᤧ॥ 7 ᤃᤣᤷᤛᤥᤏᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤗᤠᤶ— ᤕᤥᤀᤣᤗ ᤂᤢᤏᤧ᤹ ᤗᤠᤶᤗᤥᤒᤠ ᤏᤢ ᤂᤢᤏᤧ᤹ ᤁᤢᤃᤠ᤹ᤀᤡᤜᤠ᤹ ᥇᥉᥆ ᤔᤧᤘᤕᤧ॥ 8 ᤀᤣᤗᤡᤈᤠᤐᤠᤏᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤗᤠᤶ— ᤛᤔᤠᤕᤠᤜ ᤂᤢᤏᤧ᤹ ᤗᤠᤶᤗᤥᤒᤠ ᤏᤢ ᤂᤢᤏᤧ᤹ ᤁᤢᤃᤠ᤹ᤀᤡᤜᤠ᤹ ᥈᥆᥆ ᤔᤧᤘᤕᤧ॥ 9 ᤜᤣᤒᤪᤥᤏᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤗᤠᤶ— ᤀᤣᤗᤡᤀᤣᤗ ᤂᤢᤏᤧ᤹ ᤗᤠᤶᤗᤥᤒᤠ ᤏᤢ ᤂᤢᤏᤧ᤹ ᤁᤢᤃᤠ᤹ᤀᤡᤜᤠ᤹ ᥎᥆ ᤔᤧᤘᤕᤧ॥ 10 ᤀᤢᤈ᤻ᤈᤡᤀᤣᤗᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤗᤠᤶ— ᤀᤶᤔᤡᤏᤠᤍᤠᤒ ᤂᤢᤏᤧ᤹ ᤗᤠᤶᤗᤥᤒᤠ ᤏᤢ ᤂᤢᤏᤧ᤹ ᤁᤢᤃᤠ᤹ᤀᤡᤜᤠ᤹ ᥇᥇᥈ ᤔᤧᤘᤕᤧ॥ 11 ᤜᤧᤰᤁᤩᤠᤱ ᤍᤠᤀᤢᤍᤖᤧ ᤛᤠᤍᤥᤁ ᤏᤢ ᤀᤒᤡᤕᤠᤌᤠᤖ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤁᤴ ᤗᤧᤒᤡᤜᤠ᤹ᤏᤢ ᤛᤥᤖᤡᤰ ᤀᤢᤖᤡᤀᤣᤗ. ᤀᤛᤠᤕᤠᤜ. ᤕᤥᤀᤣᤗ. ᤛᤔᤠᤕᤠᤜ. ᤀᤣᤗᤡᤀᤣᤗ. ᤀᤶᤔᤡᤏᤠᤍᤠᤒᤧᤴ ᤀᤢ᤺ᤳᤋᤢᤛᤡ॥ 12 ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱᤜᤠ᤹ᤀᤥᤒᤠ ᤗᤠᤶᤗᤥᤒᤠ ᤂᤡᤏᤡ᤹ᤀᤣᤖᤥ॥ ᤂᤡᤏᤡ᤹ ᤏᤢ ᤂᤡᤏᤡ᤹ ᤁᤠ᤹ᤀᤡᤜᤠ᤹ ᤀᤠᤵᤑᤣᤰ ᤀᤠᤵᤑᤣᤰ ᤛᤢᤳᤌᤥ ᤆᤥ᤺ᤰᤁᤠᤛᤡᤶᤔᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤸᤗᤧ ᤗᤠᤃᤡ ᤕᤠᤖᤡᤵ ᤆᤥᤃᤢᤱᤒᤠ ᤋᤧᤴᤏᤥ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤌᤠᤰᤋᤧᤶᤔᤧ᤹॥ 13 ᤌᤡᤰᤛᤡᤃᤣᤰᤐᤠ ᤗᤧᤱᤅᤥ ᤂᤧᤵᤔᤥ ᤂᤡᤏᤡ᤹ ᤁᤧᤜᤥ᤺ᤵᤋᤡᤒᤠᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤧᤏᤢ ᤁᤢᤛᤠᤰᤁᤧᤴ ᤐᤥᤃᤧ॥ ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤂᤧᤴ ᤔᤠᤱᤜᤢᤵ ᤛᤴᤍᤥᤰᤁᤡᤴ ᤀᤠᤰᤂᤣᤗ᤹ᤖᤡᤰ ᤌᤡᤶ ᤁᤢᤀᤡᤛᤡᤰ ᤌᤠᤰᤔᤠ ᤁᤧᤒᤥᤱᤒᤠ ᤑᤠ᤹ᤀᤠᤱ ᤛᤣ᤺ᤴᤔᤧᤍᤥᤛᤢᤶᤒᤧᤴ॥” 14 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤌᤠᤰᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ ᤀᤠᤵᤑᤣᤰ ᤀᤠᤵᤑᤣᤰ ᤛᤣᤛᤣᤛᤠᤱᤛᤠᤱ ᤔᤧᤈᤥ᤺ᤰᤛᤡᤱ॥ 15 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰ ᤁᤢᤀᤡᤛᤡᤰ ᤔᤥᤛᤠ᤺ᤸᤗᤧ ᤀᤡᤱᤈᤠᤱ ᤐᤡᤖᤢᤛᤡᤀᤠᤱ ᤘᤕᤧᤒᤠ ᤜᤧᤰᤁᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤑᤰᤋᤠᤱᤅᤥ ᤋᤰᤗᤠᤱᤜᤠ᤹ᤖᤧ ᤔᤧᤒᤰᤂᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤧᤓᤥ᤺ᤰᤂᤢ ᤔᤧᤎᤠᤰᤋᤢ॥ 16 ᤂᤧᤴ ᤀᤣᤃᤠᤱ ᤍᤠᤀᤢᤍᤧᤸᤗᤧ ᤀᤴᤔᤣ. ᤋᤢ᤺ᤱᤃᤣ ᤏᤢ ᤛᤠᤵᤑᤱᤃᤠ ᤔᤢᤰᤗᤠ ᤛᤠᤔᤠᤜᤠ᤹ᤗᤠᤶ—ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹ ᤂᤢᤏᤡ᤹ ᤁᤠ᤹ᤀᤡᤜᤠ᤹ ᤏᤡᤱᤘᤠ᤹ ᤁᤧᤍᤠᤒᤠ ᤛᤠᤶᤗᤥ ᤀᤡᤰᤗᤠ ᤗ᤺ᤵᤔᤠᤖᤧ ᤗᤠᤃᤡ ᤕᤢᤰᤋᤡᤱ ᤆᤥᤃᤧᤶᤛᤧ᤹ ᤑᤠ᤹ᤀᤠᤱ ᤔᤢᤖᤠ ᤔᤧᤳᤋᤢᤛᤡ॥ 17 ᤁᤸᤗᤧᤆᤥᤃᤢᤸᤗᤧ ᤗᤧᤒᤡᤜᤠ᤹ᤖᤧ ᤕᤥᤀᤣᤗᤖᤧ ᤁᤢᤛ᤻ᤛᤠ ᤜᤣᤔᤠᤏ. ᤏᤢ ᤂᤢᤏᤧ᤹ ᤁᤢᤃᤠ᤹ᤀᤡᤜᤠ᤹ᤗᤠᤶ ᤒᤣᤖᤣᤁᤩᤠᤜ᤺ᤸᤗᤧ ᤁᤢᤛ᤻ᤛᤠ ᤀᤠᤛᤠᤐ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤠ᤹ᤀᤡ ᤔᤖᤠᤖᤡᤜᤠ᤹ᤗᤠᤶ ᤁᤢᤛᤠᤕᤠᤜᤖᤧ ᤁᤢᤛ᤻ᤛᤠ ᤀᤣᤋᤠᤏ. 18 ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤛᤡᤃᤣᤰᤐᤠ ᤋᤠᤰᤑᤠᤀᤥᤒᤠ ᤁᤠ᤹ᤀᤡᤜᤠ᤹ ᤈᤁᤖᤡᤕᤠ. ᤕᤠᤈᤡᤀᤣᤗ. ᤛᤔᤡᤖᤠᤔᤥᤋ. ᤕᤜᤡᤀᤣᤗ. ᤀᤢᤴᤏᤡ. ᤀᤣᤗᤡᤀᤠᤒ. ᤒᤏᤠᤕᤠᤜ. ᤔᤠᤛᤣᤕᤠᤜ. ᤔᤳᤋᤡᤋᤩᤠᤜ. ᤀᤣᤗᤡᤐᤗᤣᤜᤢ. ᤔᤡᤰᤏᤣᤕᤠᤜ. ᤜᤧᤰᤁᤩᤠᤱ ᤗᤠᤶᤎᤣᤳ ᤁᤧᤃᤥᤒᤠᤜᤠ᤹ ᤀᤥᤒᤣᤍ-ᤀᤣᤍᤥᤔ ᤏᤢ ᤕᤡᤀᤣᤗᤧᤴ ᤕᤢᤰᤋᤡᤱ ᤔᤧᤈᤥᤃᤢᤛᤡ॥ 19 ᤛᤠᤶᤗᤥ ᤀᤡᤰᤗᤠ ᤁᤧᤗ᤺ᤵᤐᤠ ᤜᤣᤔᤠᤏ. ᤀᤠᤛᤠᤐ ᤏᤢ ᤀᤣᤋᤠᤏᤧᤴ ᤁᤠᤛᤠ ᤛᤠᤵᤑᤱᤃᤠᤜᤠ᤹ ᤜᤡᤵᤔᤠᤖᤧ ᤗᤠᤃᤡ ᤕᤢᤰᤋᤡᤱ ᤔᤧᤈᤥᤃᤢᤛᤡ॥ 20 ᤈᤁᤖᤡᤕᤠ. ᤀᤈᤡᤀᤣᤗ. ᤛᤔᤡᤖᤠᤔᤥᤋ. ᤕᤜᤡᤀᤣᤗ. ᤀᤢᤴᤏᤡ. ᤀᤣᤗᤡᤀᤣᤒ. ᤔᤠᤛᤣᤕᤠᤜ ᤏᤢ ᤒᤏᤠᤕᤠᤜᤴ ᤀᤴᤔᤣᤜᤠ᤹ ᤔᤢᤱᤔᤠᤖᤧ ᤗᤠᤃᤡ ᤀᤗᤠᤔᤥᤋ ᤁᤢᤀᤡᤛᤡᤰ ᤀᤡᤰᤗᤠ ᤗ᤺ᤵᤔᤠᤖᤧ ᤗᤠᤃᤡ ᤕᤢᤰᤋᤡᤱ ᤔᤧᤒᤥ᤺ᤰᤂᤧ॥ 21 ᤜᤧᤰᤁᤩᤠᤱ ᤔᤳᤋᤡᤕᤠᤜ. ᤀᤣᤗᤡᤐᤗᤣᤜᤢ. ᤔᤡᤰᤏᤣᤕᤠᤜ. ᤀᤥᤒᤣᤍ-ᤀᤣᤍᤥᤔ. ᤕᤡᤀᤣᤗ ᤏᤢ ᤀᤈᤈᤩᤠᤜᤴ ᤀᤴᤔᤣᤜᤠ᤹ ᤔᤢᤱᤔᤠᤖᤧ ᤗᤠᤃᤡ ᤛᤡᤔᤡᤏᤡᤌ ᤔᤧᤵᤔᤏᤠᤒᤠ ᤀᤡᤰᤗᤠ ᤗ᤺ᤵᤔᤠᤖᤧ ᤗᤠᤃᤡ ᤕᤢᤰᤋᤡᤱ ᤔᤧᤒᤥ᤺ᤰᤂᤧ॥ 22 ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤁᤏᤏᤩᤠᤜᤴ ᤂᤢᤏᤧ᤹ ᤁᤧᤗᤧᤒᤠ ᤁᤧᤏᤡᤒᤠ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤛᤠᤶᤗᤥ ᤀᤡᤰᤗᤠᤖᤧ ᤗᤠᤃᤡ ᤗᤰᤐᤧᤴ ᤔᤧᤒᤡᤖᤢᤀᤠᤱ ᤘᤕᤧ॥ 23 ᤒᤣᤖᤣᤁᤩᤠᤜᤴ ᤏᤢ ᤀᤣᤸᤁᤠᤏᤠᤴ ᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤗᤠᤃᤡ ᤗᤠᤶᤎᤣᤳ ᤁᤧᤃᤥᤒᤠ ᤘᤕᤧᤛᤡ. 24 ᤜᤧᤰᤁᤩᤠᤱ ᤛᤒᤏᤩᤠᤜ. ᤕᤥᤛᤠᤐᤠᤋ. ᤏᤋᤏᤣᤗ. ᤀᤔᤠᤛᤤ. ᤈᤁᤖᤡᤕᤠ. ᤒᤏᤠᤕᤠᤜᤴ ᤜᤧᤰᤁᤩᤠᤱ ᤀᤣᤗᤡᤀᤣᤈᤖ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤍᤃᤡ ᤛᤠᤍᤠᤱᤜᤠ᤹ ᤔᤧᤔᤢ᤺ᤳᤋᤢ॥ ᤀᤥᤒᤣᤍ-ᤀᤣᤍᤥᤔ ᤏᤢ ᤕᤣᤜᤡᤕᤠᤜ᤺ᤴᤏᤠᤱ ᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤗᤠᤃᤡ ᤗᤠᤶᤎᤣᤳ ᤁᤧᤃᤥᤒᤠ ᤘᤕᤧᤛᤡᤖᤥ॥ ᤔᤠᤱᤜᤢᤵ ᤛᤴᤍᤥᤰᤁᤡᤴ ᤕᤖᤢᤛᤗᤧ᤺ᤶᤔᤥ ᤔᤧᤎᤠᤰᤋᤢ ( ᥈ ᤛᤠᤔᤢ ᥌:᥇᥈-᥈᥈ ) 25 ᤂᤧᤒᤩᤠᤱ ᤍᤠᤀᤢᤍᤧᤴ ᤏᤢ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ ᤜᤧᤰᤁᤩᤠᤱ ᤜᤧᤴᤇᤡᤱ ᤜᤧᤴᤇᤡᤱᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰ ᤗᤠᤛᤧ ᤛᤠ᤹ᤖᤡᤰ ᤔᤧᤛ᤺ᤳᤋᤧᤖ ᤕᤥ ᤔᤧᤒᤣᤀᤠᤱ ᤀᤥᤒᤣᤍ-ᤀᤣᤍᤥᤔᤖᤧ ᤁᤢᤜᤡᤶᤔᤥᤗᤠᤶ ᤔᤧᤎᤠᤰᤋᤢ॥ 26 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰ ᤁᤧᤒᤱᤒᤠ ᤗᤧᤒᤡᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤠ᤹ᤖᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤏᤢᤛᤡ ᤁᤢᤶᤒᤠᤒᤠ ᤐᤡᤳ ᤏᤢ ᤏᤢᤛᤡ ᤌᤢ᤺ᤶᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤛᤡ॥ 27 ᤍᤠᤀᤢᤍᤧᤴ ᤏᤢ ᤔᤠᤱᤜᤢᤵ ᤛᤴᤍᤥᤰ ᤁᤧᤒᤱᤒᤠ ᤁᤧᤖᤧᤰ ᤗᤧᤒᤡᤜᤠ᤹. ᤛᤠᤶᤃᤧᤗᤥᤒᤠᤜᤠ᤹ ᤏᤢ ᤛᤠᤶᤃᤧᤗᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤁᤏᤏᤩᤠᤜᤖᤧ ᤐᤠᤖᤠᤴᤗᤠ ᤆᤠᤱ ᤔᤧᤈᤠᤰᤂᤢᤀᤠᤱ ᤘᤕᤧ॥ ᤍᤠᤀᤢᤍᤖᤧᤀᤠᤱ ᤐᤠᤖᤠᤴᤗᤠ ᤀᤣᤐᤥᤍ ᤋᤣ᤺ᤳᤋᤡᤴ ᤆᤠᤰᤂᤢᤀᤠᤱ ᤘᤕᤧ॥ 28 ᤁᤶᤓᤗ᤹ᤖᤡᤰ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤋᤡᤕᤠᤜᤠ ᤗ᤹ᤏᤢ. ᤔᤧᤸᤗᤢᤰ ᤋᤠᤱᤜᤠ᤹ ᤏᤢ ᤌᤢᤳᤌᤢᤖᤡ᤺ᤵᤐᤠᤜᤠ᤹ ᤔᤧᤔᤢ᤺ᤳᤋᤢᤖ. ᤜᤧᤰᤁᤩᤠᤱ ᤛᤠᤵᤑᤱᤃᤠᤜᤠ᤹ ᤔᤧᤜᤡᤵᤋᤢᤖ. ᤀᤴᤔᤣ ᤏᤢ ᤋᤢ᤺ᤱᤃᤣ ᤔᤧᤔᤢᤰᤂᤢᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤧᤎᤠᤰᤋᤢᤀᤠᤱ ᤔᤧᤎᤠᤅᤧ॥ 29 ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤧᤎᤠᤰᤋᤢᤀᤠᤱ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤔᤧᤗᤠᤛᤧᤖ ᤔᤧᤒᤳᤇᤧᤸᤗᤧ ᤛᤠᤀᤢᤗᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤔᤡᤁᤗᤖᤧ ᤐᤣᤎᤠ᤺ᤵᤐᤥᤗᤠᤶ ᤀᤥᤔᤧᤳᤋᤢᤛᤡ. ᤜᤧᤰᤁᤩᤠᤱ ᤍᤠᤀᤢᤍ ᤜᤠᤱᤅᤡᤴ ᤗᤠ᤺ᤰᤂᤧᤖ ᤑᤧᤖᤧᤒᤠ ᤏᤢ ᤛ᤺ᤳᤋᤧᤒᤠ ᤏᤡᤛᤢᤀᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ᤀᤥ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.