᥇ ᤛᤠᤵᤔᤢ᤺ᤴᤎᤢᤶ 14 - LIFOTNT

ᤕᤖᤢᤛᤗᤧᤔ ᤕᤧᤰᤕᤰᤁᤥ ᤍᤠᤀᤢᤍᤖᤧ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹

¹ ᤋᤢᤖᤥᤛᤒᤠ ᤜᤣᤖᤠᤔ ᤜᤠᤱᤅᤡᤸᤗᤧ ᤍᤠᤀᤢᤍᤖᤧᤀᤥ ᤀᤡᤱᤛᤠᤒᤠᤜᤠ᤹ ᤐᤠᤱᤄᤢ ᤕᤢᤛᤢᤛᤡ॥ ᤂᤢᤏᤧ᤹ ᤛᤠᤶᤔᤠᤱᤛᤡᤱ ᤛᤡᤱᤜᤠ᤹ ᤜᤧᤰᤁᤩᤠᤱ ᤗᤢᤱᤃᤠᤶᤒᤠᤜᤠ᤹ ᤏᤢ ᤛᤡᤱᤃᤠᤶᤒᤠᤜᤠ᤹ᤀᤠᤱ ᤍᤠᤀᤢᤍᤖᤧ ᤁᤢᤜᤠᤱᤜᤡᤶ ᤆᤥ᤺ᤰᤛᤧ ᤐᤠᤱᤄᤢ ᤕᤢᤛᤢᤛᤡ॥

² ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤀᤥ ᤜᤠᤱ ᤆᤥᤃᤢ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤁᤢᤜᤠᤱᤕᤢᤰ ᤔᤢᤰᤛᤠᤶᤔᤡᤴ ᤌᤠ᤺ᤱᤎᤠᤰ ᤆᤥᤃᤢ ᤑᤠ᤹ᤀᤠᤱ ᤍᤠᤀᤢᤍᤖᤧ ᤏᤡᤱᤘᤠ᤹ ᤂᤥᤛᤢ॥

³ ᤕᤖᤢᤛᤗᤧ᤺ᤶᤔᤥ ᤍᤠᤀᤢᤍᤖᤧ ᤀᤠᤸᤗᤛᤠᤱ ᤕᤖᤡᤰ ᤔᤣ᤺ᤳᤜᤠ᤹ ᤋᤠᤖᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤘᤣ᤹ ᤕᤖᤡᤰ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠᤜᤠ᤹ ᤔᤧᤘᤕᤧ॥

⁴ ᤕᤖᤢᤛᤗᤧ᤺ᤶᤔᤥ ᤛᤠᤘᤠᤃᤧᤘᤠ᤺ᤴᤇᤡᤱᤒᤠ ᤂᤢᤏᤧ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ—ᤛᤶᤔᤢᤀ. ᤛᤥᤒᤠᤒ. ᤏᤠᤋᤠᤏ. ᤛᤥᤗᤥᤔᤏ.

⁵ ᤕᤡᤓᤠᤖ. ᤀᤣᤗᤡᤛᤢᤀ. ᤀᤣᤗᤡᤐᤣᤗᤣᤋ.

⁶ ᤏᤥᤃᤜ. ᤏᤣᤐᤣᤃ. ᤕᤠᤐᤡ.

⁷ ᤀᤣᤗᤡᤛᤠᤔᤠ. ᤒᤣᤗᤡᤕᤠᤍᤠ ᤏᤢ ᤀᤣᤗᤡᤐᤣᤗᤣᤋ ᤔᤧᤘᤕᤧᤖᤥ॥

ᤍᤠᤀᤢᤍᤖᤧ ᤐᤗᤡᤛ᤻ᤋᤡᤜᤠ᤹ ᤏᤠ᤺ᤴᤍᤢᤛᤡ

⁸ ᤍᤠᤀᤢᤍᤧᤴ ᤁᤧᤖᤧᤰ ᤀᤡᤛᤪᤠᤀᤡᤗᤀᤥ ᤜᤠᤱ ᤔᤠᤱᤌᤥ᤺ᤰᤏᤠ ᤐᤥ᤺ᤰᤂᤧ ᤑᤠ᤹ᤀᤠᤱ ᤀᤠᤸᤗ ᤐᤗᤡᤛ᤻ᤋᤡᤜᤠ᤹ᤖᤧ ᤔᤧᤄᤧᤵᤛᤢ. ᤂᤧᤒᤩᤠᤱ ᤐᤗᤡᤛ᤻ᤋᤡᤜᤠ᤹ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤔᤧᤃᤠᤵᤛᤡᤱᤅᤠᤱ ᤂᤢᤏᤧ᤹ ᤁᤢᤃᤥ᤺ᤳᤇᤧ ᤔᤧᤗ᤺ᤴᤍᤧ॥ ᤍᤠᤀᤢᤍᤖᤧ ᤁᤴ ᤂᤧᤵᤛᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤛᤧ ᤗ᤺ᤴᤍᤧ॥

⁹ ᤀᤠᤸᤗ ᤐᤗᤡᤛ᤻ᤋᤡᤜᤠ᤹ ᤖᤐᤠᤀᤡᤒᤠ ᤏᤧᤏᤧᤒᤠᤍᤧᤴᤏᤥ ᤔᤧᤓᤧᤖᤧᤀᤠᤱ ᤔᤧᤘᤕᤧ ᤜᤧᤰᤁᤩᤠᤱ ᤜᤡᤵᤔᤠ ᤏᤠᤵᤔᤠ ᤔᤧᤜᤣ᤺ᤰᤋᤢᤛᤡ॥

¹⁰ ᤁᤸᤗᤧᤆᤥᤃᤢᤸᤗᤧ ᤍᤠᤀᤢᤍᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣ᤺ᤴᤍᤥᤛᤢ. “ᤌᤣ ᤀᤠᤱᤃᤠ᤹ ᤐᤗᤡᤛ᤻ᤋᤡᤜᤠ᤹ ᤌᤱᤅᤥ ᤑᤳᤋᤢᤱᤛᤡᤱᤒᤡ᥅ ᤌᤣ ᤀᤠᤍᤠᤱᤒᤠᤖᤧ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤜᤢᤰᤁᤥ ᤁᤧᤎᤠᤛᤢᤛᤡᤒᤡ᥅” ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤏᤢᤃᤵ ᤐᤡᤖᤢ. “ᤑᤳᤋᤧᤛᤧ᤹. ᤀᤠᤱᤃᤠ᤹ ᤂᤧᤱᤜᤠ᤹ ᤂᤧᤏᤧ᤹ ᤁᤧᤜᤢᤰᤁᤥ ᤌᤠᤛᤢᤱᤛᤡᤱ᤹॥”

¹¹ ᤁᤸᤗᤧᤆᤥᤃᤢᤸᤗᤧ ᤍᤠᤀᤢᤍ ᤏᤢ ᤂᤢᤏᤧ᤹ ᤁᤢᤈᤢᤶᤜᤠ᤹ ᤌᤥ ᤔᤧᤎᤥ᤺ᤰᤛᤡᤱ ᤜᤧᤰᤁᤩᤠᤱ ᤂᤧᤱᤜᤠ᤹ ᤒᤠᤗ-ᤐᤖᤠᤈᤡᤔᤀᤥ ᤔᤧᤓᤳᤋᤢᤛᤡᤀᤠᤱ ᤔᤧᤏᤠ᤺ᤴᤍᤢᤛᤡ॥ ᤍᤠᤀᤢᤍᤧᤸᤗᤧ ᤐᤠ᤺ᤳᤋᤢ. “ᤘᤜ᤺ᤱᤅᤡᤸᤗᤧ ᤁᤢᤕᤠᤴ ᤌᤢᤵᤛᤢᤒᤠ ᤁᤢᤀᤡᤛᤡ᤺ᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ᤗᤠᤶ ᤌᤧ᤺ᤰᤐᤧᤳ ᤁᤧᤕᤧᤵᤐᤠ ᤀᤠᤏᤡᤱᤔᤡᤜᤠ᤹ ᤔᤧᤰᤂᤢᤛᤡ॥” ᤁᤸᤗᤧᤆᤥᤃᤢᤸᤗᤧ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤒᤠᤗ-ᤐᤖᤠᤈᤡᤔ ᤕᤢᤰᤂᤢ॥

¹² ᤐᤗᤡᤛ᤻ᤋᤡᤜᤠ᤹ᤖᤧ ᤂᤧᤵᤔᤥ ᤂᤢᤴᤇᤡ᤹ ᤔᤠᤱᤜᤠ᤹ ᤔᤧᤗᤧᤖᤢ ᤔᤧᤎᤛᤡ. ᤜᤧᤰᤁᤩᤠᤱ ᤍᤠᤀᤢᤍᤧᤸᤗᤧ ᤂᤧᤱᤜᤠ᤹ ᤔᤡᤎᤡᤰᤂᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤔᤢᤖᤠ ᤔᤧᤳᤋᤢᤛᤡ॥

¹³ ᤐᤗᤡᤛ᤻ᤋᤡᤜᤠ᤹ᤖᤧ ᤕᤠᤶᤔᤥ ᤌᤡᤰᤗᤧᤱ ᤏᤧᤏᤧᤒᤠᤍᤧᤴᤏᤥ ᤔᤧᤏᤠᤵᤋᤢ ᤔᤧᤜᤡᤵᤋᤢᤛᤡ॥

¹⁴ ᤕᤠᤶᤔᤥ ᤍᤠᤀᤢᤍᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣ᤺ᤴᤍᤥᤛᤢ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤁᤴᤇᤢᤶᤔᤥ ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤣ᤺ᤰ ᤗᤧᤵᤔᤠᤱ ᤔᤧᤒᤣᤃᤧᤴᤏᤧ᤹॥ ᤁᤖ ᤂᤧᤴᤜᤠ᤹ ᤁᤒᤧᤛᤧ᤹ᤀᤠᤱ ᤐᤡᤐᤥᤖ ᤛᤡᤱᤒᤢᤱᤅᤡᤸᤗᤧ ᤁᤢᤍᤃᤡᤗᤠᤶ ᤑᤳᤋᤧᤛᤧ᤹॥

¹⁵ ᤂᤧᤴ ᤀᤣᤃᤠᤱ ᤐᤡᤐᤥᤖ ᤛᤡᤱᤒᤢᤱᤜᤠ᤹ᤖᤧ ᤁᤢᤛᤶ ᤁᤢᤛᤶᤔᤥ ᤜᤢᤖᤢᤜᤢᤖᤢ ᤗ᤹ᤖᤡᤰ ᤛ᤺ᤰᤏᤢᤔᤧ᤺ᤴᤏᤣ ᤂᤧᤱᤜᤠ᤹ᤏᤢ ᤌᤱ ᤌᤰᤋᤧ᤹. ᤌᤣᤀᤠᤱᤓᤧᤸᤗᤧ ᤐᤗᤡᤛ᤻ᤋᤡ ᤌᤰᤛᤢᤒᤠᤜᤠ᤹ ᤌᤰᤔᤠᤛᤡᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤃᤡᤋᤃᤡ ᤐᤣ᤺ᤰ॥”

¹⁶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤈᤠᤱ ᤐᤡᤖᤢᤒᤠ ᤁᤢᤀᤡᤛᤡᤰ ᤍᤠᤀᤢᤍᤖᤧ ᤆᤥᤃᤢ. ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤐᤗᤡᤛ᤻ᤋᤡ ᤌᤰᤛᤢᤒᤠᤜᤠ᤹ ᤃᤡᤒᤥᤏᤗᤠᤶ ᤃᤣᤈᤣᤖ ᤌᤠᤖᤡᤰᤁᤣ ᤔᤧᤎᤃᤢ ᤔᤧᤛᤩᤧᤖᤢᤛᤡ॥

¹⁷ ᤁᤸᤗᤧᤆᤥᤃᤢᤸᤗᤧ ᤍᤠᤀᤢᤍᤖᤧ ᤁᤢᤔᤡᤱᤛᤥ ᤁᤢᤎᤠ᤺ᤱᤛᤥ ᤁᤧᤖᤧᤰ ᤗᤠᤈᤣ᤹ᤜᤠ᤹ᤀᤥ ᤀᤡᤅᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤁᤡᤔᤠ ᤕᤱᤔᤠ ᤌᤧᤰᤋᤢ ᤐᤡᤖᤢᤛᤡᤖᤥ॥