᥇ ᤛᤠᤵᤔᤢ᤺ᤴᤎᤢᤶ 13 - LIFOTNT

ᤁᤡᤷᤕᤋ-ᤕᤠᤖᤡᤔᤗᤠᤶ ᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤧᤍᤣ᤹ᤖᤢ

¹ ᤍᤠᤀᤢᤍᤖᤧ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠ ᤌᤰᤔᤠ. ᤜᤧᤴᤇᤡᤱᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹ ᤏᤢ ᤁᤡᤵᤌᤡᤰᤗᤧ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹ ᤛᤢᤈᤠ ᤏᤠ᤺ᤰᤋᤢᤛᤡ॥

² ᤂᤧᤴ ᤀᤣᤃᤠᤱ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤠᤍᤠᤱᤒᤠᤛᤡ ᤁᤧᤍᤧᤴᤍᤡ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤶ ᤜᤴᤍᤢ ᤀᤠᤒᤡᤀᤠᤱ ᤂᤡᤏᤡ᤹ ᤁᤧᤍᤧᤴᤍᤡᤏᤧᤓᤃᤪ. ᤁᤧᤖᤧᤰ ᤀᤡᤛᤪᤠᤀᤡᤗᤀᤥ ᤁᤧᤕᤢᤱᤒᤠ ᤀᤠᤏᤡ᤹ ᤑᤢ᤹ᤏᤢᤛᤠ᤹ᤜᤠ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰ ᤏᤢ ᤌᤰᤛᤠ ᤆᤠᤖᤠᤶᤍᤧᤴ ᤗᤠᤈᤣ᤹ᤜᤠ᤹ᤀᤥ ᤁᤧᤕᤢᤱᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤜᤧᤰᤁᤩᤠᤱ ᤗᤧᤒᤡᤜᤠ᤹ ᤀᤠᤏᤡ᤹ᤏᤢ ᤑᤢᤱᤛᤡᤱᤛᤧ ᤔᤧᤍᤠᤖ ᤁᤧᤗ᤹ᤒᤠ ᤀᤡᤱᤄᤱ ᤜᤠᤰᤋᤢᤶᤛᤡᤶ᤹॥

³ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤌᤠᤰᤋᤢᤶ᤹. ᤌᤣᤀᤠᤱᤓᤧᤸᤗᤧ ᤛᤠᤀᤢᤗᤖᤧ ᤁᤢᤜᤠᤱᤕᤢᤰ ᤕᤧᤶᤔᤥ ᤀᤠᤏᤡ᤹ ᤂᤧᤴ ᤀᤠᤓᤧᤸᤗᤧᤀᤠᤱ ᤏᤡᤏᤡ ᤂᤧᤶᤄᤧᤶ ᤀᤠᤸᤗᤠᤵᤋᤢᤶᤔᤡᤴ॥”

⁴ ᤂᤧᤒᤩᤠᤱ ᤁᤧᤖᤧᤰ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ᤖᤧ ᤀᤰᤂᤣ ᤆᤥ᤺ᤰᤔᤠ ᤏᤡ᤺ᤴᤎᤥ ᤔᤧᤈᤥᤃᤢ. ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤀᤰᤂᤣ ᤆᤥ᤺ᤰᤔᤠ ᤔᤧᤓᤠ᤺ᤰᤋᤢᤛᤡ॥

⁵ ᤁᤸᤗᤧᤆᤥᤃᤢᤸᤗᤧ ᤁᤡᤷᤕᤋ-ᤕᤠᤖᤡᤔᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤌᤠᤰᤔᤠᤖᤧ ᤗᤠᤃᤡ ᤔᤡᤛᤪ ᤗᤠᤈᤣ᤹ᤒᤠ ᤛᤡᤜᤥᤖ ᤘᤜ᤺ᤱᤅᤥᤏᤢ ᤗᤧᤒᤥ-ᤜᤔᤠᤋ ᤌᤠᤖᤡᤰᤐᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤍᤠᤀᤢᤍᤖᤧ ᤑᤢᤰᤂᤢᤛᤡ॥

⁶ ᤂᤧᤒᤩᤠᤱ ᤍᤠᤀᤢᤍ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤕᤜᤢᤍᤠᤀᤥ ᤁᤧᤏᤧᤒᤠ ᤒᤠᤗᤠ. ᤁᤡᤷᤕᤋ-ᤕᤠᤖᤡᤔᤀᤥ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤧᤕᤢᤱᤒᤠ ᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤱᤅᤥᤒᤠ ᤔᤠᤱᤜᤢᤵ ᤛᤴᤍᤥᤰ ᤌᤠᤰᤛᤧ ᤔᤧᤒᤣ॥

⁷ ᤂᤧᤱᤜᤠ᤹ᤖᤧ ᤀᤒᤡᤏᤠᤍᤠᤒᤖᤧ ᤁᤢᤜᤡᤶᤔᤥᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤧᤕᤠᤱᤛᤡᤱᤅᤠᤱ ᤗᤳᤇᤠ ᤁᤢᤛᤱ ᤐᤡᤳᤗᤠᤎᤠᤀᤥ ᤔᤧᤕᤢᤰᤂᤢ. ᤜᤧᤰᤁᤩᤠᤱ ᤀᤢᤈ᤻ᤈᤠᤜ ᤏᤢ ᤀᤜᤡᤕᤥ᤺ᤸᤗᤧ ᤂᤧᤴ ᤐᤡᤳᤗᤠᤎᤠᤴ ᤗᤥ᤺ᤰᤂᤧᤛᤢᤖ ᤋᤣ᤹ᤖᤧᤇᤢ॥

⁸ ᤍᤠᤀᤢᤍᤧᤴ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤂᤢᤴᤇᤡ᤹ ᤛᤢᤰᤛᤢᤰ ᤛᤠᤶᤗᤥ. ᤀᤴᤔᤣ ᤂᤡᤱᤔᤏᤠᤒᤠ ᤔᤢᤰᤗᤠ. ᤋᤢ᤺ᤱᤃᤣ. ᤋᤠᤜᤡᤵ. ᤛᤠᤵᤑᤱᤃᤠ ᤜᤧᤰᤁᤩᤠᤱ ᤛᤠᤍᤠᤱᤜᤠ᤹ᤏᤢ ᤛᤥᤛᤥᤖᤡᤰ ᤛᤠ᤹ᤖᤡᤰ ᤂᤢᤴᤇᤡ᤹ ᤛᤡᤰᤛᤔᤧᤀᤠᤱ ᤔᤧᤛ᤺ᤳᤋᤧ॥

⁹ ᤂᤧᤱᤜᤠ᤹ ᤁᤡᤍᤥᤏᤒᤠ ᤆᤠᤎᤠᤶᤍᤧᤴᤏᤥ ᤔᤧᤃᤧᤖᤧ ᤔᤧᤍᤩᤧ᤺ᤸᤗᤧ ᤂᤧᤱ ᤐᤡᤳᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤜᤠ᤹ ᤋᤥ᤺ᤰᤋᤧ. ᤜᤧᤰᤁᤩᤠᤱ ᤀᤢᤈ᤻ᤈᤠᤜ᤺ᤸᤗᤧ ᤔᤠᤱᤜᤢᤵ ᤛᤴᤍᤥᤰᤁᤡᤴ ᤋᤧᤶᤔᤠᤖᤧ ᤗᤠᤃᤡ ᤁᤢᤜᤢᤰᤁᤡᤴ ᤛᤴᤇᤢ॥

¹⁰ ᤁᤖ ᤕᤜᤘᤣ ᤍᤠᤱᤒᤧᤴ ᤀᤢᤈ᤻ᤈᤠᤜ᤺ᤴᤏᤢ ᤛᤠ᤹ᤖᤡᤰ ᤁᤢᤛᤠᤰᤁᤧᤴ ᤐᤥᤃᤧᤀᤠᤱ ᤂᤢᤏᤧ᤹ ᤜᤷᤈᤢ᤹ ᤆᤥ᤺ᤴᤍᤧᤖ ᤜᤡᤵᤋᤢᤎᤠᤛᤢ॥ ᤁᤸᤗᤧᤆᤥᤃᤢᤸᤗᤧ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤀᤠᤶᤓᤠ ᤂᤧᤵᤔᤥᤀᤣ ᤜᤍ᤹ ᤛᤩᤧ॥ ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤜᤢᤰᤁᤡᤴ ᤛᤸᤗᤡᤰ ᤛᤴᤇᤢᤀᤠᤱ ᤔᤠᤱᤜᤢᤵ ᤛᤴᤍᤥᤰᤁᤡᤴ ᤛᤢᤛᤢ॥

¹¹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤡᤴ ᤀᤢᤈ᤻ᤈᤠᤜᤀᤥ ᤌᤩᤧᤒᤠᤸᤗᤧ ᤆᤥᤃᤢᤸᤗᤧ ᤍᤠᤀᤢᤍᤧᤴ ᤁᤢᤏᤡᤱᤘᤠ᤹ ᤐᤅᤧ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤋᤧᤴᤏᤡᤴ ᤑᤠᤖᤣᤛ ᤀᤢᤈ᤻ᤈᤠᤜ ᤔᤡᤱ ᤘᤠ᤺ᤳᤋᤢ॥ ᤂᤧᤴ ᤋᤧᤴᤏᤡᤴ ᤁᤢᤔᤡᤱ ᤀᤠᤸᤗᤥᤛᤠᤱ ᤏᤧᤖᤥ॥

¹² ᤂᤧᤴ ᤕᤧᤴ ᤍᤠᤀᤢᤍᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤡᤛᤧᤀᤠᤱ ᤛᤣ᤺ᤴᤍᤥᤛᤢᤛᤡ. “ᤜᤧᤰᤁᤣᤏᤧᤓᤃᤪ ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤀᤠᤗᤰᤐᤧᤴᤏᤥ ᤀᤠᤰᤂᤣᤀᤠᤱ ᤌᤠᤰᤔᤠ ᤛᤢᤰᤋᤢᤱᤒᤣ᥅”

¹³ ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤛᤴᤍᤥᤰᤁᤡᤴ ᤂᤢᤏᤧ᤹ᤏᤢ ᤛᤥᤖᤡᤰ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤔᤧᤍᤣ᤹ᤖᤢᤴ. ᤁᤖ ᤌᤡᤰᤏᤠᤜᤠᤱ ᤗᤧᤵᤔᤠᤱ ᤐᤣᤀᤠᤱ ᤃᤠᤋ ᤁᤧᤕᤢᤱᤒᤠ ᤀᤥᤒᤣᤍ-ᤀᤣᤍᤥᤔᤖᤧ ᤁᤢᤜᤡᤶᤔᤥ ᤋᤣ᤹ᤖᤢ॥

¹⁴ ᤁᤶᤓᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤀᤥᤒᤣᤍ-ᤀᤣᤍᤥᤔᤖᤧ ᤁᤢᤜᤡᤶᤛᤕᤱᤏᤢ ᤛᤥᤖᤡᤰ ᤂᤢᤏᤧ᤹ᤀᤣ ᤁᤢᤜᤡᤶᤔᤥ ᤗᤠ ᤛᤢᤶᤛᤡ ᤌᤠᤖᤡᤰ ᤕᤢᤅᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤏᤢ ᤁᤢᤜᤡᤶᤛᤕᤱᤅᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤀᤥ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤌᤠᤛᤢᤖᤥ॥