᥇ ᤛᤠᤵᤔᤢ᤺ᤴᤎᤢᤶ 12 - LIFOTNTᤍᤠᤀᤢᤍᤧᤴᤏᤢ ᤁᤧᤓᤢᤱᤛᤡᤱᤒᤠ ᤌᤰᤗᤡᤜᤠᤱᤜᤠ᤹ 1 ᤁᤡᤛᤖᤧ ᤁᤢᤛ᤻ᤛᤠ ᤛᤠᤀᤢᤗᤗᤠᤶ ᤍᤠᤀᤢᤍᤧᤴ ᤆᤡᤱᤛᤡᤱᤅᤠᤱ ᤘᤕᤧᤸᤗᤧ ᤛᤡᤰᤗᤃᤀᤥ ᤁᤴ ᤔᤢ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤔᤏᤠᤜᤠ᤹ ᤍᤠᤀᤢᤍᤧᤴᤏᤢ ᤑᤢᤱᤛᤡᤱᤛᤧ ᤔᤧᤍᤩᤧ॥ ᤁᤴᤜᤠ᤹ ᤌᤱᤅᤥ ᤔᤢᤰᤁᤧᤃᤢᤒᤠ ᤌᤰᤗᤡᤜᤠᤱ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤌᤱᤅᤥ ᤔᤧᤓᤠ᤹ᤖᤢᤀᤠᤱ ᤘᤕᤧ॥ 2 ᤁᤴᤜᤠ᤹ ᤋᤥᤱ ᤗᤡᤖᤧ ᤁᤠᤵᤋᤢᤛᤡᤒᤠ ᤔᤧᤘᤕᤧ. ᤜᤧᤰᤁᤩᤠᤱ ᤆᤢᤰᤘᤠ ᤀᤡᤃᤪ ᤑᤧᤱᤘᤠ ᤜᤢᤰᤁᤡᤸᤗᤧ ᤀᤷᤍᤥ ᤕᤠᤱᤔᤠ ᤏᤢ ᤋᤥᤱ ᤀᤠᤵᤔᤠ ᤁᤧᤛᤢᤰᤐᤠ ᤔᤧᤘᤕᤧ॥ ᤁᤴᤜᤠ᤹ ᤒᤣᤏᤩᤠᤔᤡᤏᤡ ᤌᤠ᤺ᤰᤁᤥᤒᤠ ᤛᤠᤀᤢᤗᤖᤧ ᤁᤢᤃᤠ᤹ᤀᤡ ᤔᤧᤘᤕᤧᤖᤥ॥ 3 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢᤶ ᤗᤠᤶᤗᤥᤒᤠ ᤀᤜᤡᤀᤣᤈᤣᤖ ᤏᤢ ᤕᤥᤀᤠᤛ ᤘᤕᤧᤛᤡ. (ᤂᤢᤴᤇᤡ᤹ ᤃᤡᤒᤡᤕᤠᤋᤡ ᤛᤣᤔᤠᤜᤖᤧ ᤁᤢᤛ᤻ᤛᤠ ᤘᤕᤧᤛᤡ). ᤀᤈ᤻ᤔᤠᤘᤣᤋᤖᤧ ᤁᤢᤛ᤻ᤛᤠᤜᤠ᤹ ᤕᤈᤡᤀᤣᤗ ᤏᤢ ᤐᤗᤣᤋ. ᤀᤏᤠᤋᤥᤋᤡ ᤒᤖᤠᤁᤠᤜ. ᤕᤣᤜᤢ. 4 ᤃᤡᤒᤥᤏᤡ ᤕᤡᤛ᤻ᤔᤠᤕᤠᤜ. (ᤂᤢᤏᤧ᤹ ᤂᤧᤴ ᤛᤢᤶᤒᤥᤱ ᤔᤏᤠᤜᤠ᤹ᤀᤥᤒᤠ ᤗᤳᤇᤠ ᤔᤢᤰᤁᤧᤃᤢᤒᤠ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢᤶ ᤗᤠᤶᤗᤥᤒᤠ ᤘᤕᤧ). ᤕᤷᤔᤡᤕᤠ. ᤕᤜᤠᤛᤣᤗ. ᤕᤥᤜᤠᤏᤠᤏ ᤏᤢ ᤃᤍᤣᤖᤠᤋᤡ ᤕᤥᤈᤠᤒᤠᤍ. 5 ᤀᤣᤗᤢᤈᤤ. ᤕᤖᤡᤔᤥᤋ. ᤒᤠᤗᤩᤠᤜ. ᤛᤔᤖᤕᤠᤜ. ᤜᤠᤖᤢᤐᤡ ᤛᤐᤋᤩᤠᤜ. 6 ᤀᤣᤸᤁᤠᤏᤠ. ᤕᤡᤛᤩᤠᤜ. ᤀᤈᤪᤣᤗ. ᤕᤥᤀᤣᤈᤣᤖ ᤏᤢ (ᤕᤠᤛᤥᤒᤠᤔ ᤂᤧᤱᤜᤠ᤹ ᤁᤥᤖᤜ ᤌᤠ᤺ᤰ ᤔᤧᤘᤕᤧ). 7 ᤕᤥᤀᤣᤗᤜ ᤏᤢ ᤈᤒᤍᤡᤕᤠᤜ (ᤂᤢᤴᤇᤡ᤹ ᤃᤍᤥᤖᤒᤠ ᤕᤖᤥᤜᤠᤔᤖᤧ ᤁᤢᤛ᤻ᤛᤠ ᤘᤕᤧᤛᤡᤖᤥ)॥ ᤍᤠᤀᤢᤍᤧᤴᤏᤢ ᤁᤧᤓᤢᤱᤛᤡᤱᤒᤠ ᤃᤠᤍᤡᤜᤠ᤹ 8 ᤃᤠᤍᤒᤠ ᤁᤢᤓᤠ ᤁᤢᤓᤠ ᤔᤏᤠᤜᤠ᤹ᤀᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤥ ᤁᤧᤏᤧᤒᤠ ᤕᤰᤁᤥ ᤍᤠᤀᤢᤍᤧᤴᤏᤢ ᤑᤢᤱᤛᤡᤱᤛᤧ ᤔᤧᤍᤩᤧ॥ ᤂᤧᤱᤜᤠ᤹ ᤔᤢᤰᤁᤧᤃᤢᤒᤠ ᤌᤰᤗᤡᤜᤠᤱ ᤔᤏᤠᤜᤠ᤹ ᤔᤧᤘᤕᤧ ᤜᤧᤰᤁᤩᤠᤱ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤋᤠᤶᤛᤡᤱ ᤔᤧᤈᤥᤃᤧᤀᤠᤱ ᤔᤧᤘᤕᤧ. ᤂᤧᤱᤜᤠ᤹ᤖᤧ ᤂᤥ ᤏᤢ ᤗᤠ᤺ᤰ ᤕᤠᤱᤔᤠ ᤔᤧᤛᤢᤰᤋᤢ॥ ᤂᤧᤱᤜᤠ᤹ ᤂᤡᤖᤡᤱᤒᤠ ᤁᤢᤀᤡᤛᤡᤰ ᤁᤡᤵᤔᤠ ᤁᤧᤄᤢᤒᤠ ᤏᤢ ᤁᤥ᤺ᤰᤔᤠᤜᤠ᤹ᤀᤥ ᤐᤧ᤺ᤱᤘᤠ ᤜᤧᤰᤁᤣ ᤁᤧᤈᤵᤐᤠ ᤔᤧᤈᤥᤃᤧᤖᤥ॥ 9 ᤀᤣᤛᤣᤖᤧᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢᤶ ᤗᤠᤶᤗᤥᤒᤠ ᤘᤕᤧ. ᤏᤡᤛᤡᤃᤣᤰᤐᤠ ᤀᤥᤒᤍᤡᤕᤠ. ᤛᤢᤶᤛᤡᤃᤣᤰᤐᤠ ᤀᤣᤗᤡᤀᤠᤒ. 10 ᤗᤡᤛᤡᤃᤣᤰᤐᤠ ᤔᤡᤛ᤻ᤔᤴᤏᤠ. ᤅᤠᤛᤡᤃᤣᤰᤐᤠ ᤕᤷᤔᤡᤕᤠ. 11 ᤋᤢᤰᤛᤡᤃᤣᤰᤐᤠ ᤀᤳᤋᤤ. ᤏᤢᤛᤡᤃᤣᤰᤐᤠ ᤀᤣᤗᤡᤀᤣᤗ. 12 ᤕᤧᤳᤇᤡᤃᤣᤰᤐᤠ ᤕᤥᤜᤠᤏᤠᤏ. ᤑᤠᤱᤛᤡᤃᤣᤰᤐᤠ ᤀᤣᤸᤈᤠᤒᤠᤍ. 13 ᤌᤡᤒᤥᤱᤃᤣᤰᤐᤠ ᤕᤷᤔᤡᤕᤠ ᤏᤢ ᤌᤡᤒᤥᤱᤅᤠᤱ ᤌᤡᤰᤛᤡᤃᤣᤰᤐᤠ ᤔᤁᤒᤴᤏᤣ ᤘᤕᤧ॥ 14 ᤁᤴ ᤃᤠᤍᤡᤜᤠ᤹ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤠ ᤔᤧᤘᤕᤧ॥ ᤂᤧᤱᤜᤠ᤹ᤀᤥᤒᤠ ᤁᤧᤖᤧᤰᤏᤢ᤺ᤸᤗᤧ ᤆᤢᤰᤐᤠ ᤁᤡᤵ ᤌᤡᤰ ᤗᤠᤶᤗᤥᤔᤠ ᤁᤧᤛᤢᤰᤐᤠ ᤏᤢ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠᤃ ᤜᤧᤴᤇᤡᤱ ᤌᤡᤰ ᤗᤠᤶᤗᤥᤔᤠ ᤁᤧᤛᤢᤰᤐᤠ ᤔᤧᤘᤕᤧ॥ 15 ᤌᤡᤰᤛᤡᤃᤣᤰᤐᤠ ᤗᤠᤀᤥ ᤀᤠᤸᤗ ᤕᤷᤍᤏ ᤘᤜ᤺ᤱᤅᤡᤴ ᤂᤧᤵᤔᤥᤒᤠ ᤁᤧᤖᤧᤰ ᤁᤢᤕᤠᤀᤥ ᤌᤠᤖᤡᤰ ᤋᤡᤶᤛᤧ ᤌᤠᤅᤧᤸᤗᤧ ᤕᤷᤍᤏ ᤘᤜ᤺ᤱᤅᤡᤴ ᤁᤧᤃᤠ᤺ᤰᤐᤠᤀᤠᤱ ᤂᤧᤵᤔᤥᤒᤠ ᤏᤠᤱᤃᤧᤴ ᤏᤢ ᤏᤠᤶᤎᤠᤒᤠ ᤏᤧᤏᤧᤒᤠᤍᤧᤴᤜᤠ᤹ᤀᤥ ᤁᤧᤕᤢᤱᤒᤠ ᤁᤧᤖᤧᤰ ᤔᤏᤠᤜᤠ᤹ ᤁᤧᤄᤧᤵᤐᤠᤀᤠᤱ ᤁᤧᤏᤠ᤺ᤵᤐᤠ ᤁᤧᤍᤣᤒᤠ ᤜᤠᤒᤠ ᤁᤴ ᤔᤏᤠᤜᤠ᤹ᤀᤣ ᤔᤧᤘᤕᤧᤖᤥ॥ 16 ᤒᤣᤏᤩᤠᤔᤡᤏ ᤏᤢ ᤕᤜᤢᤍᤠ ᤌᤠ᤺ᤰᤁᤥᤗᤠᤶ ᤁᤢᤓᤠ ᤔᤏᤠ ᤛᤢᤶᤜᤠ᤹ᤀᤠᤱ ᤍᤠᤀᤢᤍᤖᤧ ᤁᤢᤕᤰᤁᤥ ᤔᤧᤍᤩᤧ॥ 17 ᤍᤠᤀᤢᤍᤧᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤛᤧ ᤗᤠ᤺ᤰᤁᤠᤳ ᤗ᤺ᤴᤍᤧᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤠᤱᤃᤠ᤹ ᤗᤧᤵᤔᤠᤱ ᤐᤵᤔᤠᤖᤧ ᤗᤠᤃᤡ ᤛᤏᤠᤖᤢᤱᤅᤠᤱ ᤁᤧᤍᤩᤧ᤹ᤀᤡᤒᤠᤏᤧᤓᤃᤪ ᤀᤠᤱᤃᤠ᤹ ᤗᤧᤵᤔᤠᤱ ᤐᤳᤇᤧᤶᤔᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤗᤠᤶᤍᤠ᤺ᤰᤏᤡᤱ᤹॥ ᤁᤖ ᤀᤠᤱᤃᤠ᤹ ᤔᤏᤠ ᤁᤧᤛᤧᤵᤐᤠ ᤌᤣᤀᤠᤱ ᤀᤠᤀᤠᤵᤋᤡᤰ ᤔᤧ᤺ᤴᤏᤣᤛᤠᤱ ᤂᤡᤏᤡ᤹ ᤀᤡᤱᤗᤧᤰ ᤁᤧᤈᤥᤃᤡᤀᤠᤱ ᤀᤠᤱᤃᤠ᤹ ᤀᤠᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤐᤡᤔᤠᤖᤧ ᤗᤠᤃᤡ ᤁᤧᤍᤩᤧ᤹ᤀᤡᤒᤠᤏᤧᤓᤃᤪ. ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴ ᤀᤥᤔᤧᤳᤋᤢᤀᤠᤱ ᤂᤠᤛᤧᤴ ᤆᤥᤃᤢᤖ॥” 18 ᤀᤠᤶᤓᤠ ᤂᤧᤴ ᤕᤧᤶᤔᤥ ᤂᤧᤴ ᤛᤢᤶᤒᤥᤱ ᤔᤏᤠᤜᤠ᤹ᤀᤥᤒᤠ ᤋᤢᤶ ᤗᤠᤶᤗᤥᤒᤠ ᤀᤔᤠᤛᤤᤴ ᤕᤠᤶᤛᤠᤶᤔᤡᤸᤗᤧ ᤌᤢᤰᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ. “ᤍᤠᤀᤢᤍᤀᤣ. ᤀᤠᤍᤠᤱᤒᤠᤏᤢ ᤀᤠᤏᤡᤃᤣ ᤑᤢᤱᤅᤠᤛᤡᤖᤥ᥄ ᤕᤡᤛᤤᤖᤧ ᤁᤢᤛ᤻ᤛᤠᤀᤣ. ᤀᤠᤍᤠᤱᤒᤠᤏᤢ ᤀᤠᤏᤡᤃᤣ ᤘᤕᤡᤃᤧᤖᤥ᥄ ᤀᤠᤍᤠᤱᤒᤠ ᤁᤧᤏᤢ᤹ ᤁᤧᤍᤠᤖᤖᤥ. ᤁᤧᤏᤢ᤹ ᤁᤧᤍᤠᤖᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤓᤠ᤹ᤒᤠᤱᤜᤠ᤹ ᤔᤧᤏᤢ᤹ᤔᤧᤍᤠᤖᤖᤥ. ᤌᤣᤀᤠᤱᤓᤧᤸᤗᤧ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤀᤠᤍᤠᤱᤒᤠᤖᤧ ᤁᤧᤓᤠ᤹ᤒᤠᤱ ᤘᤠ᤹ᤖᤥ॥” ᤁᤸᤗᤧᤆᤥᤃᤢᤸᤗᤧ ᤍᤠᤀᤢᤍᤖᤧ ᤂᤧᤱᤜᤠ᤹ ᤗᤠᤱᤍᤠᤰ ᤔᤧᤳᤋᤢᤛᤡ. ᤜᤧᤰᤁᤩᤠᤱ ᤁᤧᤏᤠᤵᤐᤠ ᤁᤧᤜᤡᤵᤐᤠ ᤁᤢᤔᤏᤠ ᤛᤢᤶᤜᤠ᤹ᤀᤥᤒᤠ ᤗᤠᤶᤗᤥᤒᤠ ᤆᤥᤃᤢᤛᤡᤖᤥ॥ 19 ᤀᤠᤸᤗ ᤍᤠᤀᤢᤍᤧᤴ ᤛᤠᤀᤢᤗᤖᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤌᤰᤛᤧ ᤐᤗᤡᤛ᤻ᤋᤡᤜᤠ᤹ᤏᤢ ᤐᤣ᤺ᤸᤗᤧ ᤔᤏᤛ᤻ᤛᤣᤒᤠ ᤁᤢᤓᤠ ᤔᤏᤠᤜᤠ᤹ ᤍᤠᤀᤢᤍᤧᤴᤏᤢ ᤔᤧᤓᤢᤱᤛᤡᤱ॥ ᤜᤧᤰᤁᤣᤛᤠᤱ ᤛᤧᤰᤂᤠ᤺ᤸᤗᤧ ᤂᤢᤏᤧ᤹ ᤐᤗᤡᤛ᤻ᤋᤡᤜᤠ᤹ ᤗᤧᤵᤔᤠᤱ ᤔᤧᤒᤳᤇᤧᤴᤏᤠᤱ ᤋᤧᤴᤎᤱᤃ ᤔᤧᤈᤥᤃᤧᤴ. ᤌᤣᤀᤠᤱᤓᤧᤸᤗᤧ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤛᤠᤒᤠᤜᤠ᤹ ᤂᤢᤴᤇᤡ᤹ ᤗᤢᤶᤔᤥ ᤀᤰᤋᤱᤒᤠ ᤐᤠ᤺ᤴᤍᤱ ᤔᤧᤈᤥᤃᤧᤀᤠᤱ ᤂᤢᤏᤧ᤹ ᤔᤧᤏᤢ᤺ᤰᤋᤢ ᤔᤧᤍᤣᤛᤢ. “ᤂᤢᤏᤧ᤹ ᤀᤠᤏᤡ᤹ ᤌᤧᤃᤣ᤺ᤰᤜᤠ᤹ ᤑᤢᤴᤍᤢ ᤋᤣ᤹ᤖᤢᤀᤠᤱ ᤁᤢᤴᤍᤠᤱᤒᤠ ᤛᤠᤀᤢᤗᤧᤴᤏᤢ ᤋᤱᤛᤡᤱᤛᤧ ᤐᤣᤰ॥” 20 ᤍᤠᤀᤢᤍᤧᤴ ᤛᤡᤰᤗᤃ ᤐᤣ᤺ᤸᤗᤧ ᤂᤢᤏᤧ᤹ᤏᤢ ᤑᤢᤱᤛᤡᤱᤛᤧ ᤁᤧᤍᤠᤒᤠ ᤔᤏᤛ᤻ᤛᤣᤒᤠ ᤔᤏᤠᤜᤠ᤹ ᤀᤠᤶᤓᤠ ᤁᤴᤜᤠ᤹ᤀᤣ ᤔᤧᤘᤕᤧ—ᤀᤍᤏᤠᤜ. ᤕᤥᤈᤠᤒᤠᤍ. ᤕᤣᤍᤡᤀᤣᤗ. ᤔᤡᤂᤠᤀᤣᤗ. ᤕᤥᤈᤠᤒᤠᤍ. ᤀᤣᤗᤡᤜᤢ ᤏᤢ ᤛᤡᤸᤗᤋᤤ॥ ᤁᤴᤜᤠ᤹ ᤔᤏᤛ᤻ᤛᤣᤒᤠ ᤜᤧᤴᤇᤡᤱ ᤌᤡᤰᤌᤡᤰ ᤌᤰᤔᤠᤒᤠ ᤗᤠᤶᤗᤥᤒᤠ ᤔᤧᤘᤕᤧ॥ 21 ᤁᤴᤜᤠ᤹ᤖᤧᤀᤣ ᤁᤧᤏᤠᤵᤐᤠ ᤁᤧᤜᤡᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤍᤠᤀᤢᤍᤧᤴ ᤔᤧᤓᤠ᤹ᤖᤢ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤁᤧᤖᤧᤰ ᤔᤢᤰᤁᤧᤃᤢᤒᤠ ᤌᤰᤗᤡᤜᤠᤱ ᤔᤧᤘᤕᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤍᤠᤀᤢᤍᤖᤧ ᤁᤢᤎᤰᤛᤢᤒᤠᤜᤠ᤹ᤀᤥ ᤕᤠᤱᤛᤥ ᤕᤢᤰᤋᤡᤱ ᤔᤧᤈᤥᤃᤢᤛᤡ॥ 22 ᤍᤠᤀᤢᤍᤖᤧ ᤕᤖᤡᤰ ᤌᤰᤛᤢᤒᤠ ᤛᤢᤶᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤖᤡᤰ ᤁᤢᤎᤰᤛᤢᤒᤠᤜᤠ᤹ ᤜᤧᤰᤋᤱᤒᤠ ᤔᤧᤈᤥᤃᤢᤛᤡᤴᤗ ᤌᤠᤖᤡᤰ ᤔᤏᤠᤜᤠ᤹ ᤌᤡᤰᤕᤠ᤺ᤴᤎᤰᤔᤠ ᤂᤢᤏᤧ᤹ ᤁᤢᤓᤠ᤹ᤛᤧ ᤔᤧᤍᤩᤧᤖᤥ॥ ᤘᤣ᤹ᤜᤠ᤹ ᤜᤣᤒᤪᤥᤏᤀᤥ ᤍᤠᤀᤢᤍᤧᤴᤏᤢ ᤔᤧᤓᤢᤱᤛᤡᤱ 23 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤛᤠᤀᤢᤗᤖᤧ ᤁᤢᤜᤠᤱᤈᤢᤶ ᤕᤢᤰᤁᤡᤴ ᤍᤠᤀᤢᤍᤧᤴ ᤐᤡᤔᤠᤖᤧ ᤗᤠᤃᤡ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠ ᤁᤧᤃᤠᤵᤛᤡᤱᤒᤠᤀᤠᤱ ᤜᤣᤒᤪᤥᤏᤀᤥ ᤍᤠᤀᤢᤍᤧᤴᤏᤢ ᤑᤢᤱᤛᤡᤱᤛᤧ ᤁᤧᤍᤠᤒᤠ ᤔᤏᤠᤛᤢᤶᤜᤠ᤹ᤖᤧ ᤂᤢᤴᤇᤡ᤹ ᤂᤠᤏᤡ᤺ᤳᤋᤡᤴ ᤜᤠᤒᤠ ᤁᤴᤗᤥ— 24 ᤕᤜᤢᤍᤠᤗᤠᤶ—ᤂᤥ ᤁᤧᤒᤱᤒᤠᤀᤠᤱ ᤗᤠ᤺ᤰ ᤁᤧᤕᤠᤱᤒᤠ ᥌.᥎᥆᥆ ᤌᤰᤗᤡᤜᤠᤱ ᤔᤏᤠᤜᤠ᤹॥ 25 ᤛᤡᤔᤡᤕᤥᤏᤗᤠᤶ—ᤋᤧᤴᤎᤱ ᤆᤥ᤺ᤰᤔᤠ ᤁᤧᤛᤢᤰᤐᤠ ᥍.᥇᥆᥆ ᤌᤰᤗᤡᤜᤠᤱᤜᤠ᤹॥ 26 ᤗᤧᤒᤡᤗᤠᤶ—᥊.᥌᥆᥆. 27 ᤂᤧᤴᤏᤢ ᤛᤥᤖᤡᤰ ᤜᤠᤖᤢᤏᤖᤧ ᤁᤢᤜᤡᤶᤛᤕᤱᤒᤠ ᤗᤠᤶᤗᤥᤒᤠ ᤕᤜᤥᤕᤠᤍᤠᤴᤏᤢ ᤛᤥᤖᤡᤰ ᥉.᥍᥆᥆ ᤔᤏᤠᤜᤠ᤹ ᤔᤧᤘᤕᤧ. 28 ᤜᤧᤰᤁᤩᤠᤱ ᤔᤢᤰᤁᤧᤃᤢᤒᤠ ᤌᤠᤱᤒᤧᤴ ᤛᤠᤍᤥᤁᤧᤴᤏᤢ ᤛᤥᤖᤡᤰ ᤀᤠᤒᤠᤅᤣ ᤁᤢᤜᤡᤶᤛᤕᤱᤅᤥᤒᤠ ᥈᥈ ᤛᤢᤜᤠᤱᤕᤢᤰᤐᤠᤜᤠ᤹ ᤔᤧᤘᤕᤧ॥ 29 ᤛᤠᤀᤢᤗᤖᤧ ᤁᤢᤃᤠ᤹ᤀᤡ ᤒᤣᤏᤩᤠᤔᤡᤏᤗᤠᤶ—᥉.᥆᥆᥆॥ ᤂᤧᤱᤜᤠ᤹ᤀᤥᤗᤠᤶ ᤕᤖᤡᤰ ᤁᤢᤛᤡᤱ ᤂᤧᤴ ᤕᤧᤶᤔᤥ ᤌᤠᤖᤡᤰ ᤛᤠᤀᤢᤗᤖᤧ ᤁᤢᤜᤡᤶᤛᤕᤱᤅᤥ ᤔᤧᤄᤧ᤺ᤶᤛᤡᤱᤅᤠᤱ ᤔᤧᤘᤕᤧ॥ 30 ᤀᤣᤑᤪᤠᤀᤡᤔᤗᤠᤶ—᥈᥆.᥎᥆᥆ ᤔᤢᤰᤁᤧᤃᤢᤒᤠ ᤌᤰᤗᤡᤜᤠᤱ ᤔᤏᤠᤜᤠ᤹. ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤜᤡᤶᤛᤕᤱᤅᤥ ᤂᤢᤴᤇᤡ᤹ ᤔᤡᤱ ᤁᤧᤀᤡᤱᤒᤠ ᤔᤧᤘᤕᤧ॥ 31 ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤁᤢᤎᤠ᤺ᤰᤁᤥᤗᤠᤶ—᥇᥎.᥆᥆᥆॥ ᤍᤠᤀᤢᤍᤧᤴ ᤜᤠᤱ ᤆᤥ᤺ᤰᤔᤠᤖᤧ ᤗᤠᤃᤡ ᤁᤴᤜᤠ᤹ᤀᤣ ᤔᤧᤛᤣᤃᤢᤛᤡᤀᤠᤱ ᤔᤧᤘᤕᤧ॥ 32 ᤀᤡᤛ᤻ᤛᤠᤂᤠᤖᤗᤠᤶ—ᤂᤧᤴ ᤌᤠ᤺ᤰᤁᤥᤒᤠ ᤔᤏᤠᤜᤠ᤹ᤖᤧ ᤕᤧᤶᤔᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤖᤧ ᤀᤠᤳᤋᤡᤴ ᤗᤠᤶᤔᤡᤴ ᤏᤠ᤺ᤵᤔᤠ ᤋᤡᤶᤔᤠ ᤁᤧᤒᤥᤱᤒᤠ ᤘᤠ᤹ ᤑᤠ᤹ᤀᤠᤱ ᤁᤧᤗᤧᤒᤠ ᥈᥆᥆ ᤔᤏᤠᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤃᤧᤄᤧᤶᤒᤠ ᤁᤠ᤹ᤀᤡᤜᤠ᤹ ᤔᤧᤍᤩᤧ॥ 33 ᤈᤒᤢᤗᤢᤏᤗᤠᤶ—ᤋᤧᤴᤎᤱᤗᤧ ᤗᤠᤃᤡ ᤕᤠᤖᤡᤵ ᤁᤧᤒᤥᤱᤒᤠ ᤁᤧᤖᤧᤰ ᤐᤖᤡᤰᤐᤠ ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠ ᤕᤠᤱᤔᤠ ᤁᤧᤛᤢᤰᤐᤠ ᤋᤃᤡᤀᤠᤱ ᤁᤧᤎᤠᤒᤠ. ᤁᤢᤃᤡᤔᤠ ᤁᤧᤜᤥᤵᤐᤠ ᤏᤢ ᤏᤡᤱᤘᤠ᤹ ᤌᤧᤀᤡ᤹ ᤁᤧᤒᤵᤐᤠ ᥋᥆.᥆᥆᥆ ᤌᤰᤗᤡᤜᤠᤱᤜᤠ᤹॥ 34 ᤏᤵᤋᤠᤗᤡᤗᤠᤶ—᥇.᥆᥆᥆ ᤛᤢᤜᤠᤱᤕᤢᤰᤐᤠᤜᤠ᤹. ᤜᤧᤰᤁᤩᤠᤱ ᤂᤥ ᤏᤢ ᤗᤠ᤺ᤰ ᤁᤧᤒᤱᤒᤠ ᥉᥍.᥆᥆᥆ ᤔᤏᤠᤜᤠ᤹॥ 35 ᤍᤠᤏᤗᤠᤶ—ᤌᤱᤗᤧ ᤗᤠᤃᤡ ᤕᤠᤖᤡᤵ ᤁᤧᤒᤥᤱᤒᤠ ᥈᥎.᥌᥆᥆ ᤔᤏᤠᤜᤠ᤹॥ 36 ᤀᤠᤛᤣᤖᤗᤠᤶ—ᤌᤱᤗᤧ ᤗᤠᤃᤡ ᤕᤠᤖᤡᤵ ᤁᤧᤒᤥᤱᤒᤠ ᤋᤃᤡ ᤁᤧᤎᤠᤒᤠ ᥊᥆.᥆᥆᥆ ᤌᤰᤗᤡᤜᤠᤱᤜᤠ᤹॥ 37 ᤜᤧᤰᤁᤩᤠᤱ ᤖᤢᤒᤣᤏ. ᤃᤠᤍ ᤏᤢ ᤕᤷᤍᤏ ᤏᤠᤱᤃᤧᤴ ᤐᤡᤛᤠᤱᤒᤠ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤌᤠ᤺ᤰᤗᤠᤶ—ᤁᤧᤖᤧᤰ ᤐᤖᤡᤰᤐᤠ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠᤖᤧ ᤁᤠᤵᤋᤢᤛᤡᤒᤠ ᥇.᥈᥆.᥆᥆᥆ ᤔᤏᤠᤜᤠ᤹॥ 38 ᤁᤴ ᤌᤰᤗᤡᤜᤠᤱᤜᤠ᤹. ᤋᤧᤴᤎᤱ ᤆᤥ᤺ᤰᤔᤠ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠᤖᤧ ᤁᤠᤵᤋᤢᤛᤡᤒᤠ ᤔᤏᤠᤜᤠ᤹ ᤁᤧᤖᤧᤰ ᤀᤡᤛᤪᤠᤀᤡᤗᤀᤥ ᤍᤠᤀᤢᤍᤧᤴ ᤜᤠᤱᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤜᤣᤒᤪᤥᤏᤀᤥ ᤔᤧᤍᤩᤧ॥ ᤘᤣ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧᤀᤠᤱ ᤂᤢᤏᤧ᤹ ᤜᤠᤱᤆᤥ᤺ᤰᤔᤠ ᤁᤧᤗ᤹ᤒᤠ ᤗᤳᤇᤠ ᤏᤡᤱᤘᤠ᤹ ᤘᤕᤧ॥ 39 ᤂᤧᤱᤜᤠ᤹ᤖᤧ ᤂᤧᤵᤔᤥ ᤔᤧᤈᤖ ᤔᤧᤎᤢᤅᤢᤖ ᤛᤢᤶᤕᤠᤴ ᤌᤠᤖᤡᤰ ᤍᤠᤀᤢᤍᤧᤴᤏᤢ ᤔᤧᤘᤕᤧ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤠ᤹ᤀᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤆᤠᤔᤠ ᤌᤢᤱᤔᤠ ᤔᤧᤜᤡᤛᤢ ᤔᤧᤍᤱᤄᤢᤀᤠᤱ ᤘᤕᤧ॥ 40 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤐᤡᤛᤠᤱᤒᤠ ᤜᤡᤶᤒᤣᤛᤠᤱᤒᤠᤜᤠ᤹ᤖᤧ ᤀᤡᤛ᤻ᤛᤠᤂᤠᤖ. ᤈᤒᤢᤗᤢᤏ ᤏᤢ ᤏᤵᤋᤠᤗᤡ ᤌᤠᤖᤡᤰ ᤔᤠ᤺ᤱᤄᤠᤗᤠᤶ ᤀᤢᤔᤣ. ᤀᤴᤕᤥᤰ. ᤐᤡᤳᤜᤠ᤹ ᤔᤧᤃᤢ᤺ᤳᤋᤢᤛᤡᤀᤠᤱ ᤆᤠᤔᤠ ᤁᤢᤈᤠ ᤔᤧᤍᤠᤖᤢ॥ ᤕᤖᤡᤰ ᤑᤣ᤹ᤖᤢᤶ. ᤐ᤺ᤳᤇᤣ᤹ ᤁᤠᤰᤔᤠ. ᤔᤧᤄᤧᤰᤛᤢᤒᤠ ᤆᤧᤸᤗᤧᤰᤛᤣ᤹ ᤁᤢᤒᤈᤠ. ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ. ᤏᤡ᤺ᤱᤃᤣ᤹. ᤁᤢᤶᤔᤠᤔᤠ ᤁᤢᤶᤒᤠᤒᤠ ᤐᤡᤳᤜᤠ᤹. ᤔᤧᤸᤗᤢᤰᤜᤠ᤹ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤔᤧᤘᤕᤧ. ᤂᤧᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤀᤥ ᤏᤡᤱᤘᤠ᤹ ᤋᤠᤔᤠᤖᤧ ᤁᤢᤎᤡᤶ ᤐᤥ᤺ᤰᤂᤧᤀᤠᤱ ᤏᤧᤛ᤻ᤛᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.