᥇ ᤛᤠᤵᤔᤢ᤺ᤴᤎᤢᤶ 11 - LIFOTNTᤍᤠᤀᤢᤍᤧᤴ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤒᤠ ᤜᤠᤱ ᤐᤥᤱ᤹ ( ᥈ ᤛᤠᤔᤢ ᥋:᥇-᥇᥆ ) 1 ᤂᤧᤴ ᤀᤣᤃᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤛᤥᤖᤡᤰ ᤔᤧᤒᤥ᤺ᤰᤂᤧᤀᤠᤱ ᤜᤣᤒᤪᤥᤏᤀᤥ ᤍᤠᤀᤢᤍᤖᤧᤀᤥ ᤔᤧᤍᤩᤧ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤏᤡᤃᤧᤃ ᤀᤠᤍᤠᤱᤒᤠᤖᤧᤀᤣ ᤁᤧᤃᤠ᤹ᤀᤡᤍᤡᤃᤧᤖᤥ॥ 2 ᤀᤠᤸᤗ ᤐᤣᤕᤧᤶᤔᤥ ᤛᤠᤀᤢᤗᤧᤴ ᤜᤠᤱ ᤘᤕᤧᤸᤗᤧᤛᤠ ᤀᤠᤍᤠᤱᤒᤠᤖᤧ ᤀᤡᤛᤪᤠᤀᤡᤗᤒᤠ ᤌᤰᤛᤢᤒᤠᤜᤠ᤹ ᤌᤱᤅᤥ ᤋᤃᤡ ᤗᤠᤶᤃᤧᤗᤥᤛᤢᤛᤡ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤍᤠᤱᤒᤠ ᤀᤰᤂᤣ ᤁᤧᤔᤧᤳᤋᤧ. ‘ᤂᤧᤏᤧ᤹ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤔᤧᤸᤗᤢᤰᤁᤶᤒᤠ ᤁᤧᤒᤥᤱ᤹. ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤛᤠᤒᤠ ᤁᤧᤒᤥᤱ᤹॥’” 3 ᤀᤠᤸᤗ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤜᤣᤒᤪᤥᤏᤒᤠ ᤜᤠᤱᤅᤧᤀᤥ ᤔᤧᤍᤩᤧ. ᤂᤧᤒᤩᤠᤱ ᤀᤠᤶᤓᤠ ᤂᤧᤵᤔᤥᤀᤣ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤱᤜᤠ᤹ᤏᤢ ᤔᤠᤱᤜᤢᤵ ᤆᤥᤃᤢ॥ ᤕᤜᤘᤣ ᤍᤠᤱᤒᤧᤸᤗᤧ ᤛᤠᤔᤢᤀᤧᤗᤖᤧ ᤁᤢᤶᤒᤪᤠᤀᤥᤗᤠᤶ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤂᤧᤱᤜᤠ᤹ᤖᤧ ᤍᤠᤀᤢᤍᤧᤴ ᤀᤡᤛᤪᤠᤀᤡᤗᤀᤥ ᤜᤠᤱ ᤐᤥᤱᤔᤠᤖᤧ ᤗᤠᤃᤡ ᤔᤠᤱᤌᤥ᤺ᤰᤏᤠ ᤔᤧᤒᤡᤖᤢᤖᤥ॥ ᤍᤠᤀᤢᤍᤖᤧ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤏᤠ᤺ᤴᤍᤢ ( ᥈ ᤛᤠᤔᤢ ᥈᥉:᥎-᥉᥏ ) 4 ᤍᤠᤀᤢᤍᤧᤴ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤕᤖᤢᤛᤗᤧᤔ ᤔᤧᤒᤣ. ᤁᤴ ᤕᤒᤢᤛᤀᤠᤱ ᤔᤧᤔᤧᤳᤋᤢ॥ ᤂᤧᤵᤔᤥ ᤁᤧᤕᤢᤱᤒᤠ ᤕᤒᤢᤛᤡᤜᤠ᤹ᤖᤧ 5 ᤍᤠᤀᤢᤍᤧᤴ ᤔᤧᤔᤧᤳᤋᤢ. “ᤀᤠᤍᤠᤱᤒᤠ ᤁᤵᤔᤥ ᤀᤠᤓᤧᤸᤗᤧᤀᤠᤱ ᤌᤠᤱᤔᤠ ᤁᤧᤴᤇᤢᤰᤏᤧᤴ॥” ᤜᤧᤰᤁᤣᤛᤠᤱ ᤍᤠᤀᤢᤍᤧᤸᤗᤧ ᤛᤡᤕᤥᤏᤒᤠ ᤕᤰᤁᤡᤴ ᤜᤢᤰᤁᤠᤵ ᤆᤥᤃᤢᤍᤣ᤹ᤖᤢ. ᤂᤧᤴ ᤀᤠᤸᤗᤥ ᤍᤠᤀᤢᤍᤖᤧ ᤁᤢᤕᤧᤰᤕᤰ ᤔᤧᤔᤧᤳᤋᤢ॥ 6 ᤍᤠᤀᤢᤍᤖᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤕᤧ. “ᤕᤒᤢᤛᤡᤜᤠ᤹ ᤌᤱᤅᤥ ᤁᤧᤓᤵᤐᤠ ᤌᤡᤰᤛᤡᤃᤣᤰᤐᤠ ᤔᤏᤠᤴ ᤗᤳᤇᤠ ᤌᤰᤔᤥᤒᤠ ᤐᤥᤱ᤹॥” ᤂᤧᤵᤔᤥ ᤁᤧᤎᤥ᤺ᤰᤛᤡᤱᤒᤠ ᤌᤡᤰᤛᤡᤃᤣᤰᤐᤠ ᤔᤏᤠᤴ ᤛᤖᤢᤕᤠᤜᤖᤧ ᤁᤢᤛ᤻ᤛᤠ ᤕᤥᤀᤠᤒᤧᤴ ᤐᤥ᤺ᤰᤂᤧ॥ ᤁᤸᤗᤧᤆᤥᤃᤢᤸᤗᤧ ᤂᤧᤴ ᤌᤰᤔᤥᤒᤠ ᤐᤥ᤺ᤰᤂᤧ॥ 7 ᤍᤠᤀᤢᤍᤧᤸᤗᤧ ᤂᤧᤴ ᤕᤰᤁᤡᤴᤏᤣ ᤂᤢᤏᤧ᤹ ᤁᤢᤕᤢᤱᤔᤠᤍᤧᤴ ᤆᤥᤃᤢ॥ ᤁᤸᤗᤧ ᤆᤥᤃᤢᤸᤗᤧᤀᤣ ᤔᤏᤠᤜᤠ᤹ᤖᤧ ᤂᤧᤴ ᤍᤠᤀᤢᤍᤖᤧ ᤁᤢᤕᤧᤰᤕᤰ ᤔᤧᤔᤧᤳᤋᤢ॥ 8 ᤁᤢᤍᤰᤔᤠ ᤌᤢᤵᤌᤠ᤹ᤜᤠ᤹ᤗᤠᤶ ᤂᤢᤏᤧ᤹ ᤁᤧᤖᤧᤰ ᤐᤡᤛᤠᤱᤒᤠ ᤗᤢᤱᤎᤠᤰᤁᤥ ᤌᤠᤖᤡᤰ ᤕᤰ ᤁᤒᤪᤡᤱ ᤕᤧᤰᤕᤰ ᤆᤥᤃᤢ. ᤜᤧᤰᤁᤩᤠᤱ ᤕᤥᤀᤠᤒᤖᤧ ᤁᤧᤏᤶᤒᤠ ᤕᤧᤰᤕᤰᤁᤡᤴ ᤕᤠᤶᤔᤥ ᤆᤥᤃᤢ॥ 9 ᤜᤧᤰᤁᤩᤠᤱ ᤍᤠᤀᤢᤍᤧᤴ ᤀᤠᤸᤗᤛᤠᤱ ᤛᤠ᤹ᤖᤡᤰ ᤛᤠ᤹ᤖᤡᤰ ᤔᤢᤰᤁᤧᤃᤢᤒᤠ ᤐᤥ᤺ᤰᤂᤧᤖ ᤐᤣ. ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤴ ᤂᤢᤏᤧ᤹ᤏᤢ ᤘᤕᤧᤖᤥ॥ ᤍᤠᤀᤢᤍᤖᤧ ᤔᤢᤰᤁᤧᤃᤢᤒᤠ ᤁᤢᤔᤏᤠᤜᤠ᤹ 10 ᤍᤠᤀᤢᤍᤖᤧ ᤔᤢᤰᤁᤧᤃᤢᤒᤠ ᤋᤢᤶ ᤁᤢᤔᤏᤠᤜᤠ᤹ ᤁᤴᤜᤠ᤹ᤀᤣ ᤔᤧᤘᤕᤧ (ᤕᤜᤘᤣ ᤍᤠᤱᤒᤧᤸᤗᤧ ᤔᤠᤱᤜᤢᤵ ᤆᤥᤃᤢᤒᤠ ᤁᤢᤀᤡᤛᤡᤰ. ᤂᤧᤱᤜᤠ᤹ᤖᤧ ᤂᤢᤏᤧ᤹ ᤜᤠᤱ ᤆᤥ᤺ᤰᤔᤠᤖᤧ ᤗᤠᤃᤡ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤛᤥᤛᤥᤖᤡᤰ ᤔᤧᤓᤠ᤹ᤖᤢ)— 11 ᤜᤰᤔᤥᤏᤡ ᤌᤠ᤺ᤰᤁᤥᤒᤠ ᤕᤠᤛᤠᤒᤠᤔ ᤂᤢᤏᤧ᤹ ᤛᤢᤜᤠᤱᤕᤢᤰᤐᤠᤜᤠ᤹ᤀᤥ ᤋᤢᤶ ᤗᤠᤶᤗᤥᤒᤠ ᤘᤕᤧ॥ ᤌᤡᤰᤗᤧᤱ ᤂᤧᤸᤗᤧ ᤗᤠ᤺ᤰᤁᤡᤴ ᤕᤠᤱᤛᤡᤱᤅᤠᤱ ᤁᤡᤵ ᤛᤢᤶᤛᤡ ᤔᤏᤠᤜᤠ᤹ ᤌᤢᤒᤢ ᤛᤩᤧᤖᤢᤛᤡᤀᤠᤱ ᤘᤕᤧ॥ 12 ᤂᤢᤏᤧ᤹ ᤁᤢᤀᤣᤃᤠᤱ ᤀᤜᤥᤜᤡ ᤌᤠ᤺ᤰᤁᤥᤒᤠ ᤍᤥᤍᤤᤖᤧ ᤁᤢᤛ᤻ᤛᤠ ᤀᤣᤗᤠᤈᤠᤖᤧᤴ ᤂᤧᤴ ᤛᤢᤶᤛᤡ ᤔᤢᤰᤁᤧᤃᤢᤒᤠᤜᤠ᤹ᤀᤥ ᤗᤳᤇᤠ ᤘᤕᤧ॥ 13 ᤂᤢᤏᤧ᤹ ᤍᤠᤀᤢᤍᤧᤴᤏᤢ ᤛᤥᤖᤡᤰ ᤐᤠᤛ-ᤍᤶᤔᤡᤔᤀᤥ ᤘᤕᤧ. ᤂᤧᤵᤔᤥ ᤜ᤺ᤰᤛᤡ ᤀᤡᤰᤋᤠᤵᤐᤥ ᤐᤗᤡᤛ᤻ᤋᤡᤜᤠ᤹ ᤋᤧᤴᤎᤱ ᤆᤥ᤺ᤰᤔᤠᤖᤧ ᤗᤠᤃᤡ ᤔᤧᤈᤢᤵᤛᤧᤀᤠᤱ ᤔᤧᤘᤕᤧ॥ 14 ᤔᤏᤠᤜᤠ᤹ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤗᤠᤶ ᤔᤧᤄᤧᤳᤇᤡᤱ. ᤁᤖ ᤂᤢᤏᤧ᤹ ᤏᤢ ᤍᤠᤀᤢᤍᤧᤴ ᤗᤰ ᤂᤧᤴ ᤀᤡᤰᤋᤠᤵᤐᤡᤸᤗᤧ ᤁᤢᤗᤢᤶᤔᤥ ᤌᤰᤋᤧᤛᤡᤖ ᤕᤠᤃᤧᤛᤡ. ᤜᤧᤰᤁᤩᤠᤱ ᤂᤧᤴ ᤀᤡᤰᤋᤠᤵᤐᤡᤴ ᤛᤧ᤺ᤵᤋᤧᤛᤢᤀᤠᤱ ᤂᤢᤴᤇᤡ᤹ ᤐᤗᤡᤛ᤻ᤋᤡᤜᤠ᤹ ᤏᤠ᤺ᤴᤍᤧᤛᤢᤛᤡ॥ ᤁᤶᤓᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤗᤳᤇᤠ ᤕᤶᤒᤠ ᤌᤱ ᤁᤧᤏᤠ᤺ᤶᤒᤠ ᤆᤥᤃᤢᤛᤡ॥ 15 ᤂᤧᤴ ᤛᤢᤶᤒᤥᤱ ᤁᤢᤎᤧᤃᤣᤰ ᤔᤏᤠᤜᤠ᤹ᤀᤥᤗᤠᤶ ᤛᤢᤶᤛᤡ ᤔᤏᤠ ᤀᤍᤢᤸᤗᤠᤔ ᤕᤠᤰᤐᤣ᤺ᤸᤗᤧ ᤁᤢᤒᤣᤛᤠᤱ ᤗᤢᤱᤑᤢᤰᤁᤥᤀᤥᤒᤠ ᤕᤠᤰᤁᤣ᤺ᤰᤁᤥ ᤍᤠᤀᤢᤍᤧᤴᤏᤢ ᤑᤢᤱᤛᤡᤱᤔᤠᤖᤧ ᤗᤠᤃᤡ ᤔᤧᤒᤣᤀᤠᤱ ᤔᤧᤘᤕᤧ॥ ᤂᤧᤴ ᤕᤧᤶᤔᤥ ᤖᤐᤠᤀᤡᤒᤠ ᤏᤧᤏᤧᤒᤠᤍᤧᤴᤏᤥ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤳᤇᤠ ᤔᤏᤠᤛᤢᤶᤜᤠ᤹ᤖᤧ ᤛᤠ᤺ᤱᤃᤠᤜᤡᤶᤜᤠ᤹ ᤔᤧᤄᤡᤱᤄᤢᤀᤠᤱ ᤔᤧᤕᤢᤅᤧ॥ 16 ᤂᤧᤴ ᤕᤧᤶᤔᤥ ᤍᤠᤀᤢᤍᤧᤴ ᤗᤳᤇᤠ ᤁᤶᤒᤪᤠᤱᤒᤠ ᤕᤰᤁᤥ ᤘᤕᤧ ᤜᤧᤰᤁᤩᤠᤱ ᤐᤗᤡᤛ᤻ᤋᤡᤒᤠ ᤌᤰᤛᤢᤒᤠᤜᤠ᤹ ᤒᤣᤌᤗᤧᤜᤧᤔᤀᤥ ᤔᤧᤘᤕᤧ॥ 17 ᤍᤠᤀᤢᤍᤧᤴ ᤆᤠ᤹ᤖᤡᤰ ᤁᤢᤘᤠᤔᤡᤛᤧᤀᤠᤱ ᤂᤢᤏᤧ᤹ ᤐᤠ᤺ᤳᤋᤢ. “ᤀᤣ᥄ ᤒᤣᤌᤗᤧᤜᤧᤔᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤘᤒᤠᤰᤁᤥᤒᤠ ᤆᤫᤠ᤺ᤳᤋᤡᤴ ᤌᤢᤱᤔᤠ ᤂᤥᤛᤢᤱᤅᤡᤸᤗᤧᤃ ᤏᤢᤖᤧᤒᤠᤔᤧᤴ᥄” 18 ᤁᤸᤗᤧᤆᤥᤃᤢᤸᤗᤧ ᤂᤧᤴ ᤛᤢᤶᤛᤡ ᤔᤢᤰᤁᤧᤃᤢᤒᤠᤜᤠ᤹ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤋᤡ᤺ᤰᤗᤠᤀᤥᤗᤠᤶ ᤔᤧᤓᤡ᤺ᤴᤇᤡᤱ ᤔᤧᤒᤣ ᤜᤧᤰᤁᤩᤠᤱ ᤒᤣᤌᤗᤧᤜᤧᤔ ᤗᤠᤶᤎᤣᤳ ᤁᤢᤒᤣᤛᤠᤱᤒᤠ ᤘᤠᤒᤠᤰᤁᤥᤗᤠᤶ ᤆᤫᤠ᤺ᤳᤋᤡᤴ ᤔᤧᤕᤢᤖᤢᤀᤠᤱ ᤍᤠᤀᤢᤍᤧᤴ ᤔᤧᤒᤡᤖᤢ॥ ᤁᤖ ᤂᤧᤴ ᤆᤫᤠ᤺ᤳᤋᤡᤴ ᤍᤠᤀᤢᤍᤧᤴ ᤌᤢᤱᤔᤠ ᤔᤧᤍᤧᤴᤍᤧᤴ॥ ᤐᤖᤢᤔᤠᤸᤗᤧ ᤂᤢᤏᤧ᤹ ᤂᤧᤴ ᤆᤫᤠ᤺ᤳᤋᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤜᤢᤰᤂᤢᤍᤣᤛᤢᤀᤠᤱ ᤐᤠ᤺ᤳᤋᤢ. 19 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤋᤱᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤗᤠᤶ ᤀᤠᤱᤃᤠ᤹ ᤌᤣ᤺ᤰᤁᤠᤖ᥄ “ᤂᤢᤴᤇᤡ᤹ ᤜᤡᤱᤔᤴᤏᤡᤴ ᤁᤧᤛᤠᤰᤐᤥ ᤁᤧᤎᤠᤒᤠ ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡᤴ ᤌᤣ ᤀᤠᤱᤃᤠ᤹ ᤌᤢᤅᤢᤱᤒᤠᤒᤡ᥅” ᤂᤧᤱᤜᤠ᤹ᤖᤧᤃ ᤁᤴ ᤆᤫᤠ᤺ᤳᤋᤡᤴ ᤂᤢᤴᤇᤡ᤹ ᤜᤡᤱᤔᤧᤴ ᤁᤧᤛᤠᤰᤐᤥ ᤔᤧᤎᤠᤛᤢᤀᤠᤱ ᤔᤧᤕᤢᤖᤢᤒᤠᤖᤥ᥄ ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤂᤧᤴ ᤆᤫᤠ᤺ᤳᤋᤡᤴ ᤌᤢᤱᤔᤠ ᤔᤧᤍᤧᤴᤍᤧᤴ॥ ᤁᤴ ᤛᤢᤶᤛᤡ ᤔᤢᤰᤁᤧᤃᤢᤒᤠ ᤕᤧᤶᤒᤡᤳᤇᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤔᤢᤰᤛᤠᤶᤒᤠ ᤕᤠ᤺ᤶᤒᤰᤁᤧᤴ ᤀᤰᤋᤱᤒᤠᤀᤣ ᤘᤕᤧ॥ 20 ᤕᤥᤀᤠᤒᤖᤧ ᤁᤢᤴᤛᤠ᤹ ᤀᤒᤡᤛᤤᤴ ᤂᤧᤴ ᤛᤢᤶᤛᤡᤜᤠ᤹ᤀᤥ ᤗᤠᤶᤗᤥᤒᤠ ᤘᤕᤧ॥ ᤌᤡᤰᤗᤧᤱ ᤂᤢᤏᤧ᤹ ᤁᤡᤵ ᤛᤢᤶᤛᤡ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤗᤠ᤺ᤰᤁᤡᤴ ᤕᤠᤅᤢᤀᤠᤱ ᤂᤧᤱᤜᤠ᤹ ᤌᤢᤒᤢ ᤛᤧᤖᤢᤛᤡ. ᤜᤧᤰᤁᤩᤠᤱ ᤁᤶᤓᤗ᤹ᤖᤡᤰ ᤂᤧᤴ ᤛᤢᤶᤛᤡ ᤔᤏᤠᤜᤠ᤹ ᤁᤢᤀᤡᤛᤡᤰ ᤂᤢᤏᤧ᤹ ᤁᤢᤔᤡᤱ ᤁᤧᤀᤡᤱᤒᤠ ᤐᤥ᤺ᤰᤂᤧ॥ 21 ᤂᤧᤴ ᤛᤢᤶᤛᤡ ᤔᤏᤠᤜᤠ᤹ᤏᤢ᤺ᤸᤗᤧ ᤕᤖᤡᤰ ᤂᤢᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤂᤥᤛᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤐᤣᤒᤠ ᤐᤥ᤺ᤰᤂᤧ. ᤁᤖᤛᤠᤱ ᤂᤢᤏᤧ᤹ ᤂᤧᤴ ᤛᤢᤶᤛᤡ ᤔᤏᤠᤜᤠ᤹ ᤕᤠᤖᤡᤰ ᤁᤢᤔᤡᤱ ᤔᤧᤀᤡᤅᤧᤴ॥ 22 ᤕᤜᤥᤕᤠᤍᤠᤖᤧ ᤁᤢᤛ᤻ᤛᤠ ᤁᤒ᤻ᤛᤣᤗᤒᤠ ᤒᤏᤠᤕᤠᤜᤴ ᤕᤖᤡᤰ ᤐᤕᤶ ᤕᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤗᤳᤇᤠ ᤁᤧᤍᤶᤒᤠ ᤌᤰᤗᤡᤜᤠ᤹ ᤐᤥ᤺ᤰᤂᤧ॥ ᤔᤥᤀᤠᤒᤒᤠ ᤏᤧᤳᤇᤡ ᤔᤢᤰᤛᤠᤶᤒᤠ ᤔᤏᤠ ᤁᤧᤛᤧᤵᤐᤠ ᤂᤢᤏᤧ᤹ᤀᤣ ᤘᤕᤧ॥ ᤏᤠ᤺ᤱ ᤌᤩᤧᤒᤠ ᤕᤧᤴᤏᤥ ᤂᤢᤏᤧ᤹ ᤗᤳᤇᤠ ᤗᤢᤶᤒᤠ᤺ᤳᤋᤥ ᤗᤠᤛᤧᤀᤠᤱ ᤂᤡᤖᤡᤱᤒᤠ ᤌᤡᤰ ᤛᤩᤧᤖᤢᤀᤠᤱ ᤘᤕᤧ॥ 23 ᤂᤢᤏᤧ᤹ ᤜᤢᤰᤛᤡᤰ ᤅᤠᤛᤡ ᤕᤠᤖᤡᤰ ᤁᤣ᤺ᤶᤒᤠ ᤔᤡᤛᤪᤒᤠ ᤜᤥᤖᤢᤎᤡᤰ ᤛᤩᤧᤖᤢ. ᤂᤧᤴ ᤔᤡᤛᤪᤒᤠ ᤜᤥᤖᤢ᤺ᤸᤗᤧ ᤁᤢᤗᤠ᤺ᤰᤁᤡᤴ ᤌᤠᤰ ᤁᤡᤵᤔᤠ ᤛᤡᤱᤗ᤺ᤱᤛᤠ ᤕᤠ᤺ᤵᤐᤠ ᤆᤥᤃᤧ॥ ᤒᤏᤠᤕᤠᤜ᤺ᤸᤗᤧ ᤁᤢᤜᤢᤰᤁᤥ ᤋᤰᤁᤠᤳ ᤌᤡᤰ ᤕᤠᤱᤛᤡᤱᤅᤠᤱ ᤌᤰᤛᤧ ᤐᤣ. ᤜᤧᤰᤁᤩᤠᤱ ᤂᤧᤴ ᤔᤡᤛᤪᤡ᤺ᤸᤗᤧ ᤁᤢᤜᤢᤰᤁᤥᤗᤠᤶ ᤗᤠ᤺ᤰᤁᤡᤴ ᤏᤠᤵᤋᤢᤀᤠᤱ ᤜᤠᤒᤠ ᤂᤧᤴ ᤗᤠ᤺ᤰᤁᤡᤸᤗᤧ ᤑᤏ᤹ ᤌᤢᤒᤢ ᤛᤧᤖᤢᤀᤠᤱ ᤘᤕᤧ॥ 24 ᤕᤜᤥᤕᤠᤍᤠ᤺ᤸᤗᤧ ᤁᤢᤛ᤻ᤛᤠ ᤒᤏᤠᤕᤠᤜ᤺ᤸᤗᤧ ᤁᤢᤕᤠ᤺ᤶᤒᤰ ᤜᤠᤒᤠ ᤀᤰᤋᤱᤒᤠᤀᤣ ᤘᤕᤧ॥ ᤂᤧᤴ ᤛᤢᤶᤛᤡ ᤔᤏᤠᤜᤠ᤹ ᤜᤧᤰᤁᤣᤀᤣ ᤂᤢᤏᤧ᤹ ᤁᤢᤔᤡᤱ ᤁᤧᤀᤡᤱᤒᤠ ᤐᤥ᤺ᤰᤂᤧ॥ 25 ᤂᤧᤴ ᤛᤢᤶᤒᤥᤱ ᤔᤏᤠᤜᤠ᤹ᤏᤢ᤺ᤸᤗᤧ ᤕᤖᤡᤰ ᤂᤢᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤂᤥᤛᤢ. ᤁᤖᤛᤠᤱ ᤂᤢᤏᤧ᤹ ᤂᤧᤴ ᤛᤢᤶᤛᤡ ᤔᤏᤠᤜᤠ᤹ ᤕᤠᤖᤡᤰ ᤁᤢᤔᤡᤱ ᤔᤧᤀᤡᤅᤧᤴ॥ ᤍᤠᤀᤢᤍᤧᤸᤗᤧ ᤂᤧᤴ ᤂᤢᤏᤧ᤹ ᤁᤢᤎᤰ ᤁᤶᤒᤪᤠᤱ ᤁᤧᤔᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤆᤥᤃᤢᤖᤥ॥ 26 ᤍᤠᤀᤢᤍᤖᤧ ᤔᤢᤰᤁᤧᤃᤢᤒᤠ ᤁᤢᤔᤏᤠᤜᤠ᤹ ᤁᤴᤜᤠ᤹ᤀᤣ ᤔᤧᤘᤕᤧᤖᤥ— ᤕᤥᤀᤠᤒᤖᤧ ᤁᤢᤴᤛᤠ᤹ ᤀᤛᤠᤜᤣᤗ. ᤒᤣᤌᤗᤧᤜᤧᤔᤒᤠ ᤍᤥᤍᤤᤖᤧ ᤁᤢᤛ᤻ᤛᤠ ᤀᤣᤸᤜᤠᤏᤠᤏ. 27 ᤜᤠᤖᤥᤖᤡ ᤛᤶᤔᤥᤋ. ᤐᤣᤗᤥᤏᤡ ᤜᤣᤗᤣᤛ. 28 ᤋᤁᤥᤒᤠ ᤀᤡᤰᤁᤣᤛᤖᤧ ᤁᤢᤛ᤻ᤛᤠ ᤀᤡᤖᤠ. ᤀᤏᤠᤋᤥᤋᤒᤠ ᤀᤒᤡᤀᤣᤈᤣᤖ. 29 ᤜᤢᤛᤠᤋᤡ ᤛᤡᤒ᤻ᤒᤁᤤ. ᤀᤜᤥᤜᤡ ᤀᤡᤗᤤ. 30 ᤏᤋᤥᤐᤠᤋᤡ ᤔᤜᤖᤤ. ᤏᤋᤥᤐᤠᤋᤡ ᤒᤠᤏᤠᤜᤖᤧ ᤁᤢᤛ᤻ᤛᤠ ᤜᤣᤗᤣᤍ. 31 ᤒᤣᤏᤩᤠᤔᤡᤏ ᤃᤡᤒᤠᤒᤠ ᤖᤡᤒᤤᤖᤧ ᤁᤢᤛ᤻ᤛᤠ ᤀᤡᤌᤤ. ᤐᤡᤖᤠᤋᤥᤏᤡ ᤒᤏᤠᤕᤠᤜ. 32 ᤃᤠᤛᤒᤠ ᤜ᤺ᤱᤃᤢᤜᤠ᤹ᤀᤥᤒᤠ ᤜᤢᤖᤤ. ᤀᤷᤒᤠᤋᤡ ᤀᤒᤡᤀᤣᤗ. 33 ᤒᤜᤢᤖᤡᤔᤡ ᤀᤈ᤻ᤔᤠᤘᤣᤋ. ᤛᤠᤸᤒᤥᤏᤡ ᤀᤣᤗᤩᤠᤜᤒᤠ. 34 ᤃᤡᤈᤥᤏᤡ ᤜᤠᤛᤣᤔ. ᤜᤖᤠᤖᤡ ᤛᤠᤃᤣᤖᤧ ᤁᤢᤛ᤻ᤛᤠ ᤈᤥᤏᤠᤌᤏ. 35 ᤜᤖᤠᤖᤡ ᤛᤠᤁᤠᤖᤖᤧ ᤁᤢᤛ᤻ᤛᤠ ᤀᤜᤡᤀᤠᤔ. ᤀᤢᤖᤖᤧ ᤁᤢᤛ᤻ᤛᤠ ᤀᤣᤗᤡᤐᤠᤗ. 36 ᤔᤁᤣᤖᤠᤋᤡ ᤜᤣᤐᤣᤖ. ᤐᤣᤗᤥᤏᤡ ᤀᤜᤡᤕᤠᤜ. 37 ᤁᤷᤔᤣᤗᤡ ᤜᤣᤛᤪᤥ. ᤀᤣᤈ᤻ᤒᤤᤖᤧ ᤁᤢᤛ᤻ᤛᤠ ᤏᤠᤖᤤ. 38 ᤏᤠᤋᤠᤏᤖᤧ ᤁᤢᤴᤛᤠ᤹ ᤕᤥᤀᤣᤗ. ᤜᤃᤪᤡᤖᤧ ᤁᤢᤛ᤻ᤛᤠ ᤔᤡᤓᤠᤖ. 39 ᤀᤶᤔᤥᤏᤡ ᤛᤣᤗᤣᤁ. ᤒᤣᤖᤥᤋᤡ ᤏᤜᤖᤤ. ᤂᤧᤴ ᤛᤖᤢᤕᤠᤜᤖᤧ ᤁᤢᤛ᤻ᤛᤠ ᤕᤥᤀᤠᤒᤖᤧ ᤁᤢᤓᤧᤈᤢᤶ ᤁᤢᤓᤧᤕᤠ ᤁᤧᤒᤱᤒᤠ ᤘᤕᤧ. 40 ᤕᤡᤋᤪᤡ ᤀᤡᤖᤠ. ᤕᤡᤋᤪᤡ ᤃᤠᤖᤣᤒ. 41 ᤜᤡᤳᤋᤡ ᤀᤢᤖᤡᤕᤠᤜ. ᤀᤜᤗᤤᤖᤧ ᤁᤢᤛ᤻ᤛᤠ ᤈᤠᤒᤠᤍ. 42 ᤖᤢᤒᤣᤏᤡ ᤛᤡᤈᤠᤖᤧ ᤁᤢᤛ᤻ᤛᤠ ᤀᤍᤡᤏᤠ. ᤂᤧᤴ ᤖᤢᤒᤣᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤳᤇᤠ ᤗᤠᤶᤗᤥᤒᤠ ᤘᤕᤧ. ᤂᤢᤏᤧ᤹ᤏᤢ ᤛᤢᤶᤒᤥᤱ ᤔᤏᤠᤜᤠ᤹ ᤔᤧᤘᤕᤧ. 43 ᤔᤠᤁᤠᤖᤧ ᤁᤢᤛ᤻ᤛᤠ ᤜᤠᤏᤠᤏ. ᤔᤡᤳᤏᤡ ᤕᤥᤛᤠᤐᤠᤋ. 44 ᤀᤛ᤻ᤋᤣᤖᤠᤋᤡ ᤀᤢᤈ᤻ᤈᤡᤕᤠ. ᤀᤖᤥᤀᤣᤖᤡ ᤜᤥᤋᤠᤔᤖᤧ ᤁᤢᤛ᤻ᤛᤠᤜᤠ᤹ ᤛᤔᤠ ᤏᤢ ᤕᤡᤀᤣᤗ. 45 ᤛᤡᤔᤪᤡᤖᤧ ᤁᤢᤛ᤻ᤛᤠ ᤕᤣᤍᤡᤀᤣᤗ. ᤂᤢᤏᤧ᤹ ᤁᤢᤴᤛᤠ᤹ ᤋᤡᤈᤡ ᤕᤥᤜᤠ. 46 ᤔᤜᤠᤒᤡ ᤀᤣᤗᤡᤀᤣᤗ. ᤀᤣᤸᤏᤠᤔᤖᤧ ᤁᤢᤛ᤻ᤛᤠᤜᤠ᤹ ᤕᤖᤡᤒᤤ ᤏᤢ ᤕᤥᤛᤒᤩᤠᤜ. ᤔᤥᤀᤠᤒᤡ ᤕᤡᤳᤔᤠ. 47 ᤀᤣᤗᤡᤀᤣᤗ. ᤀᤥᤒᤣᤍ ᤏᤢ ᤔᤣᤈᤥᤒᤡ ᤕᤠᤛᤡᤀᤣᤗ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.