᥇ ᤛᤠᤵᤔᤢ᤺ᤴᤎᤢᤶ 10 - LIFOTNT

ᤛᤠᤀᤢᤗ ᤜᤠᤱᤅᤡᤴ ᤔᤠᤛᤡᤱ

¹ ᤀᤠᤸᤗ ᤐᤗᤡᤛ᤻ᤋᤡᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤋᤧᤴᤎᤱ ᤔᤧᤈᤥᤃᤢ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤛᤡᤒᤠ ᤔᤏᤠᤜᤠ᤹ ᤔᤧᤗᤧᤖᤢᤛᤡᤀᤠᤱ ᤃᤡᤸᤒᤥ ᤁᤥ᤺ᤰᤔᤠᤀᤥᤗᤠᤶ ᤔᤧᤄᤧᤳᤇᤡᤱ ᤔᤧᤒᤣ॥

² ᤐᤗᤡᤛ᤻ᤋᤡᤜᤠ᤹ᤖᤧ ᤛᤠᤀᤢᤗᤧᤴ ᤏᤢ ᤁᤢᤛ᤻ᤛᤠᤜᤠ᤹ ᤐᤢᤒᤣᤗᤠᤵᤛᤠ ᤔᤧᤏᤠ᤺ᤳᤋᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤈᤥᤏᤠᤌᤏ. ᤀᤒᤡᤏᤠᤍᤠᤒ ᤏᤢ ᤔᤸᤁᤡᤛᤢᤀ ᤛᤢᤶᤒᤪᤠᤱ ᤔᤧᤛᤧᤖᤢᤛᤡ॥

³ ᤛᤠᤀᤢᤗᤖᤧ ᤁᤢᤗᤠᤃᤡ ᤋᤧᤴᤎᤱᤅᤡᤴ ᤛᤠ᤹ᤖᤡᤰ ᤁᤧᤛᤠᤰᤐᤠ ᤐᤥ᤺ᤰᤂᤧ. ᤌᤣᤀᤠᤱᤓᤧᤸᤗᤧ ᤗᤡ ᤏᤢ ᤋᤥᤱ ᤁᤧᤃᤵᤐᤠᤜᤠ᤹ᤖᤧ ᤂᤢᤏᤧ᤹ ᤔᤧᤛᤡ᤹ᤖᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤄᤠ᤺ᤴᤍᤢ॥

⁴ ᤁᤸᤗᤧᤆᤥᤃᤢᤸᤗᤧ ᤛᤠᤀᤢᤗᤖᤧ ᤁᤢᤓᤧᤈᤢᤶ ᤁᤢᤓᤧᤕᤠ ᤁᤧᤒᤱᤒᤠ ᤔᤏᤠᤴ ᤔᤧᤳᤋᤢ. “ᤁᤧᤍᤠᤓᤣᤴ ᤋᤖᤵ ᤑᤡ᤺ᤰᤂᤧ᤹ᤀᤠᤱ ᤀᤠᤱᤃᤠ᤹ ᤌᤢᤒᤠᤱᤅᤧ᤹ᤀᤠᤱ ᤛᤧᤖᤠᤱᤅᤧ᤹. ᤜᤧᤰᤁᤩᤠᤱ ᤁᤴ ᤜᤷᤍᤥ ᤔᤧᤴᤜᤧᤰᤔᤏᤠᤒᤠᤜᤠ᤹ᤖᤧ ᤀᤠᤱᤃᤠ᤹ ᤔᤧᤍᤧᤶᤔᤠᤀᤠᤱ ᤗᤔᤡᤳᤋᤠ ᤆᤥ᤺ᤰᤔᤠ ᤔᤧᤱᤄᤥᤀᤠᤴᤗ॥” ᤁᤖ ᤂᤧᤴ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠ ᤁᤧᤒᤱᤒᤧᤴ ᤛᤠ᤹ᤖᤡᤰ ᤁᤡᤛᤧᤀᤠᤱ ᤜᤧᤰᤁᤣ ᤆᤥ᤺ᤰᤔᤠ ᤔᤧᤍᤧᤴᤍᤧᤴ॥ ᤁᤸᤗᤧᤆᤥᤃᤢᤸᤗᤧ ᤛᤠᤀᤢᤗᤖᤧ ᤀᤠᤵᤑᤣᤰ ᤁᤢᤍᤠᤓᤣᤴ ᤑᤡ᤺ᤰᤂᤢᤀᤠᤱ ᤜᤠᤰᤋᤢ ᤜᤧᤰᤁᤩᤠᤱ ᤂᤧᤴ ᤛᤶᤎᤠᤱ ᤋᤡ᤺ᤱᤛᤡᤱᤅᤠᤱ ᤛᤩᤧ॥

⁵ ᤀᤠᤸᤗ ᤂᤧᤴ ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠ ᤁᤧᤒᤱᤒᤧᤸᤗᤧ ᤛᤠᤀᤢᤗᤧᤴ ᤛᤩᤧᤒᤠ ᤏᤡᤛᤢᤀᤠᤱ ᤂᤢᤏᤧ᤹ᤀᤠᤱ ᤀᤠᤵᤑᤣᤰ ᤁᤢᤍᤠᤓᤣᤀᤥ ᤋᤡ᤺ᤱᤛᤡᤱ ᤛᤧᤳᤇᤡᤱ॥

⁶ ᤁᤶᤓᤗ᤹ᤖᤡᤰ ᤛᤠᤀᤢᤗᤧᤴ ᤏᤢ ᤁᤢᤛ᤻ᤛᤠ ᤛᤢᤶᤛᤡ ᤔᤧᤛᤩᤧ॥ ᤂᤢᤏᤧ᤹ ᤁᤧᤖᤧᤰ ᤁᤢᤜᤡᤶᤛᤕᤱᤜᤠ᤹ ᤌᤡᤰᤗᤧᤱᤗᤧ ᤔᤧᤛᤩᤧ॥

⁷ ᤀᤠᤸᤗ ᤏᤧᤏᤧᤒᤠᤍᤧᤴᤏᤥ ᤁᤧᤘᤠ᤹ᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ ᤔᤧᤄᤧᤳᤇᤡᤱᤒᤠ ᤜᤧᤰᤁᤩᤠᤱ ᤛᤠᤀᤢᤗ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤔᤧᤛᤩᤧᤖᤢᤛᤡᤒᤠ ᤔᤧᤏᤡᤛᤢᤛᤡ. ᤂᤧᤒᤩᤠᤱ ᤂᤧᤱᤜᤠ᤹ᤀᤠᤱ ᤜᤠᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤂᤢᤴᤇᤡ᤹ ᤕᤧᤰᤕᤰᤜᤠ᤹ ᤔᤧᤗᤧᤖᤢᤀᤠᤱ ᤔᤧᤄᤧᤳᤇᤡᤱ॥ ᤂᤶᤓᤩᤠᤱ ᤐᤗᤡᤛ᤻ᤋᤡᤜᤠ᤹ ᤂᤧᤵᤔᤥ ᤔᤧᤒᤣᤀᤠᤱ ᤔᤧᤕᤢᤱᤛᤡᤱ॥

⁸ ᤀᤠᤸᤗ ᤁᤢᤍᤠ᤺ᤰᤍᤡᤰᤔᤠ ᤔᤧᤛᤧᤖᤢᤛᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤠᤵᤛᤧ ᤐᤗᤡᤛ᤻ᤋᤡᤜᤠ᤹ ᤔᤧᤃᤧᤖᤧ ᤔᤧᤍᤩᤧ᤺ᤸᤗᤧ ᤂᤧᤱᤜᤠ᤹ᤖᤧ ᤛᤠᤀᤢᤗᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠ ᤛᤢᤶᤛᤡᤜᤠ᤹ ᤃᤡᤸᤒᤥ ᤁᤥ᤺ᤰᤔᤠᤀᤥ ᤔᤧᤛᤩᤧᤀᤠᤱ ᤔᤧᤏᤧᤛ᤻ᤛᤧᤒᤠ ᤔᤧᤏᤡᤛᤢᤛᤡ॥

⁹ ᤂᤧᤱᤜᤠ᤹ᤖᤧ ᤛᤠᤀᤢᤗᤧᤴ ᤗᤧᤰᤆᤠ᤹ᤒᤢᤎᤢᤰ ᤔᤧᤈᤥᤃᤢᤀᤠᤱ ᤂᤢᤏᤧ᤹ ᤁᤢᤎᤧᤃᤣᤰᤐᤠᤴ ᤑᤢ᤹ᤕᤠᤰ ᤔᤧᤓᤢᤴᤍᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤓᤧᤈᤢᤶ ᤁᤢᤓᤧᤕᤠᤜᤠ᤹ ᤔᤧᤍᤣ᤹ᤖᤢ ᤔᤧᤒᤡᤖᤢ॥ ᤂᤧᤴ ᤀᤣᤃᤠᤱ ᤂᤧᤱᤜᤠ᤹ᤖᤧ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤐᤡᤛᤠᤱ ᤂᤢᤴᤇᤡ᤹ ᤏᤠᤘᤠᤀᤡᤳᤗᤠᤜᤠ᤹ ᤏᤢ ᤔᤏᤠᤜᤠ᤹ ᤁᤴ ᤀᤡᤱᤄᤱᤅᤡᤴ ᤆᤧᤰᤔᤠᤛᤡᤖᤧ ᤗᤠᤃᤡ ᤀᤡᤱᤛᤠᤒᤠᤜᤠ᤹ ᤔᤧᤒᤠᤱᤄᤢᤛᤡ॥

¹⁰ ᤂᤧᤱᤜᤠ᤹ᤖᤧ ᤛᤠᤀᤢᤗᤖᤧ ᤁᤢᤓᤧᤈᤢᤶ ᤁᤢᤓᤧᤕᤠᤜᤠ᤹ ᤂᤢᤴᤇᤡ᤹ ᤔᤠᤱᤜᤠ᤹ᤖᤧᤴ ᤔᤠᤱᤜᤡᤶᤔᤥ ᤔᤧᤏᤧᤛ᤻ᤛᤢ. ᤜᤧᤰᤁᤩᤠᤱ ᤁᤢᤎᤧᤃᤣᤰᤐᤠᤴ ᤍᤠᤃᤥᤏ ᤔᤠᤱᤜᤡᤶᤔᤥ ᤔᤧᤓᤥᤴᤍᤢ॥

¹¹ ᤀᤠᤸᤗ ᤐᤗᤡᤛ᤻ᤋᤡᤜᤠ᤹ᤖᤧ ᤛᤠᤀᤢᤗᤧᤴ ᤂᤢᤴᤇᤡ᤹ ᤐᤠ᤺ᤵᤐᤠ᤺ᤳ ᤔᤧᤔᤧᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤠᤒᤣᤛ ᤃᤡᤗᤠᤍᤒᤠ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢ.

¹² ᤂᤧᤒᤩᤠᤱ ᤛᤠᤀᤢᤗᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤌᤠᤰᤔᤠᤖᤧ ᤗᤠᤃᤡ ᤂᤢᤴᤇᤡ᤹ ᤁᤧᤖᤧᤰ ᤁᤧᤎᤢᤶᤒᤠ ᤁᤧᤎᤢᤶᤒᤠ ᤔᤏᤠᤜᤠ᤹ ᤛᤥᤛᤥᤖᤡᤰ ᤔᤧᤒᤣ॥ ᤂᤧᤱᤜᤠ᤹ᤖᤧ ᤂᤧᤴ ᤆᤣᤜᤠ᤹ ᤕᤠᤒᤣᤛ ᤔᤧᤎᤠᤰᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤵᤐᤠᤜᤠ᤹ ᤜᤠᤒᤠ ᤂᤧᤴ ᤜᤢᤶᤒᤧᤵᤐᤠ ᤕᤜᤡᤒᤠ ᤛᤡᤱᤒᤢᤱ ᤛᤡᤃᤠᤱ ᤔᤧᤗᤢᤵᤋᤢ. ᤜᤧᤰᤁᤩᤠᤱ ᤏᤢᤛᤡ ᤕᤧᤴ ᤌᤠᤖᤡᤰ ᤔᤧᤖᤡᤱᤅᤥ ᤏᤧᤳ ᤔᤧᤕᤢᤅᤧ॥

¹³ ᤛᤠᤀᤢᤗᤧᤴ ᤕᤜᤘᤣ ᤍᤠᤱᤒᤠᤀᤥ ᤏᤛᤠ᤺ᤴᤛᤠᤒᤠ ᤔᤧᤒᤥ᤺ᤰᤂᤧᤶᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤛᤡᤔᤠ ᤁᤧᤒᤥᤱᤒᤠ ᤐᤥ᤺ᤰᤂᤧ॥ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤏᤡᤴ ᤂᤧᤶᤔᤠ ᤔᤧᤍᤧᤴᤍᤧᤴᤏᤠᤱ ᤛᤠᤶᤔᤠᤱᤆᤩᤠ᤺ᤱ ᤁᤧᤕᤠᤱᤔᤧᤴ ᤛᤢᤈᤠ ᤏᤠ᤺ᤰᤋᤢᤀᤠᤱ ᤘᤕᤧ॥

¹⁴ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤴ ᤛᤢᤈᤠ ᤔᤧᤏᤠ᤺ᤰᤋᤢᤴ॥ ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤛᤠᤀᤢᤗᤧᤴ ᤔᤧᤰᤂᤢ. ᤜᤧᤰᤁᤩᤠᤱ ᤜᤠᤱᤈᤢᤶᤔᤡᤴ ᤕᤡᤛᤤᤖᤧ ᤁᤢᤛ᤻ᤛᤠ ᤍᤠᤀᤢᤍᤧᤴ ᤜᤢᤰᤛᤢᤵᤋᤢᤖᤥ॥