निङ्वाॽफु साम्लोसुम् 37 - लिम्बुकुदोःप्मा मनारे़न् मुॽइसाम् दाउदरे़ कुसाम्लो 1 ताक्के़भे़ॽबा मनाहाॽ के़निसुसिल्ले़ के़निङ्वाॽ तुक्खे मे़ज्ये़न्ने़ॽओ, खे़न् ताप्फे़ःम्बा याःम्बक् के़जोःक्पाहाॽ नामे़हे़त्ते़से़न्ने़ॽओ॥ 2 थेआङ्भे़ल्ले़ खे़ङ्हाॽ वहित् मे़धाने़न्निल्ले़ याःन्सुङ्हाॽ हाराए हेबेःक्पा कुइसिक् हाराए मे़मा मे़बेःक्लो, खारक् के़भे़क्पा फुङ्हाॽ इले़म्बेःक्पा कुइसिक् हाराए मे़सिरो॥ 3 यहवे दाङ्बान् ताःक्पो चोगे़ॽआङ् वेॽहाॽ नुरिक् मे़त्ते़से़ॽओ, हे़क्केलॽरिक् लाजेॽओ के़युङ्ङाङ् से़ःप्सिङ्मा के़घोसुरो॥ 4 यहवे दाङ्बाओ खे़ने़ॽ सःत्ते़ॽओ, हे़क्क्याङ् खुने़ॽए निङ्वाॽओ के़इःत्तुबा पाःन्हाॽ के़त्तु के़बिरो॥ 5 के़लाम्मिन् यहवे दाङ्बाओ तोःन्दे़ॽओ हे़क्क्याङ् खुने़ॽए ताःक्पो चोगे़ॽओ, हे़क्क्याङ् खे़न् पाःन्हाॽ चोःक्मा खुने़ॽ के़भाॽरो॥ 6 खे़ने़ॽ साम्योबा के़जोःक्पा पाःन्निन् तानाम्बा नाम् कुइसिक् ओःत्ल याःन्दुरो, हे़क्क्याङ् कुदोःप्मा के़घासे़न्निन् ले़न्दिक्पा नाम् कुइसिक् चोगुरो॥ 7 यहवे दाङ्बे़ल्ले़ कुदगि स्वाःत् युङे़ॽओ हे़क्क्याङ् नासि थःत्ते़ॽर खुने़ॽ हाङ्घे़ॽओ॥ मनाःल्ले़ ताप्फे़ःम्बा लाम् नाःप्मा थाःत्तुल्ले़ हे़क्क्याङ् खे़ल्ले़ ताप्फे़ःम्बा पाःन्हाॽ चोगुल्ले़ खे़ने़ॽ के़निङ्वाॽ तुक्खे मे़ज्ये़न्ने़ॽओ॥ 8 के़याःक् मे़ले़ॽरे़न्ने़ॽ, के़सिक् मे़भोःक्खे़न्ने़ॽओ, मुरा मे़दोसे़न्ने़ॽ, खे़ल्ले़ग ताप्फे़ःम्बा चोःक्मा आबाङ्लो॥ 9 थेआङ्भे़ल्ले़ ताप्फे़ःम्बा याःम्बक् के़जोःक्पाहाॽ मे़मे़क्लो, कर यहवे दाङ्बे़ल्ले़ कुलाम् ओगे़मे़प्पाहाॽरे़ लाजेॽ सिङ्बुङ्हाॽ मे़युक्तुरो॥ 10 सप्फाआङ् कुइगे़भे़म्बाहाॽग खे़प्मो मे़न्वाॽने़ल्लो, खे़ङ्हाॽ खे़ने़ॽ के़गोःत्तुसिसाङ् के़ङ्घोसुन्छिल्लो॥ 11 कर चुङ्जिगे़न् नःम्नःम्बाहाॽरे़ लाजेॽसिङ्बुङ् मे़युक्तुरो, हे़क्क्याङ् साॽरिक् मे़नुॽमे़दाआङ् मे़सःत्लो॥ 12 कुइगे़भे़म्बाहाॽरे़ कुदोःप्मा मनाहाॽ इजोओ थामा मे़गोःत्तुसिरो हे़क्क्याङ् खुनिॽ हाबोॽबान् मे़ये़ःक्खुर साॽरिक् मे़जिःत्तुसिरो॥ 13 कर दाङ्बान् खे़ङ्हाॽ निसुसिआङ् एःत्लो, थेआङ्भे़ल्ले़ खे़ङ्हाॽरे़ खुनिॽ मे़क्मा ये़न् तार पत्लो॥ 14 तुक्खे के़जाबाहाॽ नु याङ्गे़साॽबाहाॽ हे़क्क्याङ् से़क्खाबा लाम्मो लाङ्गे़घेःक्पाहाॽ से़प्मासि फाॽआङ् ताक्के़भे़ॽबाहाॽरे़ ताभेन् मे़भिःक्खुरो हे़क्क्याङ् खे़ङ्हाॽरे़ लिओ तोःङ्ङिन् मे़भत्छुरो॥ 15 कर खे़ङ्हाॽरे़ खुनिॽ ताभेःल्ले़ खुन्छिॽ आप्फेक् लुङ्मान् लस्सुरो, हे़क्क्याङ् खुनिॽ तोङ् लिहाॽ ए़क्लो॥ 16 ताक्के़भे़ॽबाहाॽरे़ मे़गत्तुबा यरिक् याङ्साकुन्धेःन्नुःल्ले़ग साम्योनिबाहाॽरे़ मे़गत्तुबा च्यॽसिक् पाःन्हाॽए नुबारो॥ 17 थेआङ्भे़ल्ले़ ताक्के़भे़ॽबाहाॽरे़ खुनिॽ हुक्हाॽ ए़क्लो कर यहवे दाङ्बे़ल्ले़ साम्योबाहाॽ से़ःप्तुसिरो॥ 18 यहवे दाङ्बे़ल्ले़ कुदोःप्मा मनाहाॽ ओमे़त्तुसिरो, हे़क्क्याङ् खुने़ॽ पिरुसिबा लक्किन् सदादिङ्ले़ लागि खे़ङ्हाॽरे़न् पोङ्लो॥ 19 ये़त्तुक्खे चामा ये़म् ताःल्ले़ खे़ङ्हाॽ सिरिङ्ममो मे़न्धाने़न्लो, हे़क्क्याङ् साक् तासाङ् खे़ङ्हाॽरे़ यरिक् कुजा मे़गत्तुरो॥ 20 कर ताक्के़भे़ॽबाहाॽग मे़सि मे़बेःक्लो, ताम्भुङ्ङोबा फुङ् कुइसिक् यहवे दाङ्बे़ल्ले़ कुनिङ्मिहाॽ मे़मा मे़बेःक्लो, हे़क्क्याङ् खे़ङ्हाॽ मिःक्खुॽ हे़क्के मे़मा मे़बेःक्लो॥ 21 ताक्के़भे़ॽबा मनाहाॽरे़ सिङ्नात् मे़देॽरुआङ् खुन्छिॽ आभे़ल्ले़आङ् मे़न्हुङुन्लो, कर साम्योबा मनाहाॽरे़ खुनिॽ निङ्वाॽ हन्नाङ् वेॽहाॽ मे़बिरुसिरो॥ 22 यहवे दाङ्बे़ल्ले़ मुॽइसाम् पिरुसिबाहाॽरे़ लाजेॽ सिङ्बुङ्हाॽ मे़युक्तुरो, कर खुने़ॽ साङ्ग्रा मे़त्तुसिबाहाॽ मे़मे़क्लो॥ 23 यहवे दाङ्बे़ल्ले़ मे़न्छाम् याप्मिहाॽरे़ मे़नाःत्तुबा लाम्मिन् कुसिराॽ थाङ्ने़भग्र खे़ङ्हाॽ से़ःप्तुसिरो हे़क्क्याङ् खे़ङ्हाॽ मे़न्जोःन्ने़ल्लो॥ 24 खे़ङ्हाॽरे़ खुनिॽ लाङ्हाॽ तोःक्साङ् मे़न्जोःन्ने़ल्लो, थेआङ्भे़ल्ले़ यहवे दाङ्बे़ल्ले़ कुहुक्किन् सन्छुआङ् खे़ङ्हाॽ ते़म्सुसिरो॥ 25 थाङ्बे़न् वयाङ्, आल्ल काप्पो तुम्साङ्ङाङ् वाॽआरो, कर यहवे दाङ्बे़ल्ले़ साम्योबा मनाहाॽ लाप्फुसुसिबा नु खे़ङ्हाॽरे़ खुनिॽ सामे़न्छाॽहाॽरे़ मे़नाःक्तु मे़जबा मे़न्निए वाॽआरो॥ 26 आभे़ल्ले़साङ् खे़ङ्हाॽरे़ खुनिॽ निङ्वाॽ हन्नाङ् वेॽहाॽ मे़सःत्ल थे़त्ला मे़बिरुसिरो॥ हे़क्क्याङ् खे़ङ्हाॽरे़ खुनिॽ सामे़न्छाॽहाॽरे़ हाङ्वामुॽइ मे़घोसुरो॥ 27 ताप्फे़ःम्बा याःम्बक्किन् ले़रे़ॽआङ् नुबा याःम्बक् चोगे़ॽओ, हे़क्क्याङ् के़स्सा के़म्मे़न्छाॽहाॽ लाजेॽओ सदादिङ् मे़युङ्लो॥ 28 थेआङ्भे़ल्ले़ यहवे दाङ्बे़ल्ले़ कुदोःप्मा खासे़न्निन् कुसिराॽ थाङ्लो, हे़क्क्याङ् कुसेसे मनाहाॽ आभे़ल्ले़आङ् मे़ले़रुन्सिन्लो॥ खे़ङ्हाॽ सदादिङ् खुने़ॽ से़ःप्तुसिआङ् मे़वाॽरो, कर ताक्के़भे़ॽबाल्ले़ कुस्साहाॽग मे़मे़क्लो॥ 29 साम्योबाहाॽरे़ लाजेॽसिङ्बुङ् मे़युक्तुरो, हे़क्क्याङ् खे़प्मो सदादिङ् मे़युङ्लो॥ 30 साम्योबाहाॽ सिक्कुम्दिङ् निङ्वाॽ पान् मे़बाःत्लो, हे़क्क्याङ् खे़ङ्हाॽ कुदोःप्मा खासे़न् पान् मे़बाःत्लो॥ 31 निङ्वाॽफुमाङ्ङिल्ले़ कुसाम्योथिम्हाॽ खे़ल्ले़ कुनिङ्वाॽओ युक्खुरो, हे़क्क्याङ् निङ्वाॽफुमाङ्ङिल्ले़ कुलाम्मोलाम् खे़न् आभे़ल्ले़आङ् मे़ले़ःङ्ने़ल्लो॥ 32 कुइगे़भे़म्बाहाॽरे़ साम्योबा मनाहाॽ से़प्मासिरे़ लागि मे़सुगुसिआङ् मे़युङ्लो॥ 33 कर यहवे दाङ्बे़ल्ले़ कुमनाहाॽ खुनिॽ निङ्मिहाॽरे़ हुक्को थामा मे़बाङ्घुसिन्लो, हे़क्क्याङ् खे़ङ्हाॽ खासे़न्नो मे़धाःल्ले़ आप्तिक् कुःप्मा मे़बाङ्घुसिन्लो॥ 34 यहवे दाङ्बान् हाङ्घाम्मे़ॽओ, हे़क्क्याङ् खुने़ॽ कुलाम्मो लाङ्घेगे़म्मे़ॽओ॥ लाजेॽ सिङ्बुङ्हाॽ युक्मारे़ लागि खुने़ॽ थाःङ् के़भोक्खिरो, कुइगे़भे़म्बा मनान् मे़क्पा खिनिॽ मिक्किल्ले़ए निसुरो॥ 35 थिक्ले़ङ् कुइगे़भे़म्बा मनाधिक् आङ्गाॽ कुसिङ् निःत्तुङ्ङाङ् वये़रो, खे़ल्ले़ याप्मिहाॽ साॽरिक् तुक्खे चाःत्तुसिरो, खे़ङ्ग नुबा खाम्मो के़लिङ्बा केःम्बा सिङ्बुङ् कुइसिक् चोगे़रो॥ 36 कर खे़न् हाराए स्ये़आङ् होःप्ते़रो! आङ्गाॽ कोःत्तुङ्साङ् खोमा मे़न्छुक्पारो॥ 37 आप्तिक् मेःन्नेबा मनान् निङ्वाॽ इःत्ते़ॽओ, हे़क्क्याङ् कुदोःप्मा मनान् ओमे़त्ते़ॽओ, मे़ङ्घेमना मे़न्धक्मना मनाःल्ले़ कुस्साकुए मे़वाॽरो॥ 38 कर लायो के़जोःक्पाहाॽ के़रे़क् मे़मे़क्लो, हे़क्क्याङ् खे़ङ्हाॽरे़ खुनिॽ साहाॽरे़ मिङ् मारो॥ 39 यहवे दाङ्बे़ल्ले़ साम्योबा मनाहाॽ से़ःप्तुसिरो, हे़क्क्याङ् तुक्खे लाक्खे मे़दुम्मिल्ले़ थेःक्तुसि से़ःप्तुसिरो॥ 40 यहवे दाङ्बे़ल्ले़ खे़ङ्हाॽ फाॽरुसि हे़क्क्याङ् से़ःप्तुसिरो, खुने़ॽ खे़ङ्हाॽ कुइगे़भे़म्बाहाॽलाम् से़न्दुसिरो, थेआङ्भे़ल्ले़ खे़ङ्हाॽ खुने़ॽओ इःम्सिङ्से़ मे़बेःक्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.