निङ्वाॽफु साम्लोसुम् 36 - लिम्बुयहवे दाङ्बान् कुसुत्ना के़नुॽबा चोक् साम्लो के़हुॽबाल्ले़ लागि यहवे दाङ्बे़ल्ले़ कुसे़वारोबा दाउदरे़ कुसाम्लो 1 ताक्के़भे़ॽबा मनाःल्ले़ कुसिक्लुङ्मो फे़न्निङ्वाॽ इःत्तुरो, खे़ल्ले़ निङ्वाॽफुमाङ्ङिन् मिङ्सो इङ्धाङ् मे़बिरुन्लो॥ 2 खे़न् आबाङे साॽरिक् चम्सिङ्बाल्ले़ चोगुल्ले़ निङ्वाॽफुमाङ्ङिल्ले़ आलायोन् मे़निसुन्लो हे़क्क्याङ् आप्तिक्काङ् मे़गुःत्तान् के़लॽबा निङ्वाॽ इःत्तुरो॥ 3 खे़ल्ले़ पाःत्तुबा पाःन्हाॽ ताप्फे़ःम्बा नु इङ्ले़क्क्या चोक्लो, खे़ल्ले़ सिक्कुम् निङ्वाॽ नु नुबा याःम्बक् चोःक्मा ले़रुदेसुआङ् वाॽरो॥ 4 खे़न् कुने़त्नाओ ने़ःल्ले़ फे़न् पाःन्हाॽ चोःक्मा निङ्वाॽ चोगुरो, खे़ल्ले़ नुबा याःम्बक् मे़जोगुल्लो, हे़क्क्याङ् फे़न्याःम्बक् चोःक्मा आभे़ल्ले़आङ् मे़ले़रुन्लो॥ निङ्वाॽफुमाङ्ङिन् के़नुॽबा चोक् 5 यहवे दाङ्बाए, चक्मे़ल्लॽए मनाहाॽ लुङ्माॽ के़दुक्तुसिबा पाःन्निन् साङ्ग्राम्पेदाङ् थारिक् के़रे़आङ् वाॽरो॥ हे़क्क्याङ् नसाःन्साबा के़जोःक्पा पाःन्निन् ताङ्साक्पो थारिक् से़रे़आङ् वाॽरो॥ 6 के़साम्योबा याःम्बक्किन् माःङ्घालाम् निगे़दे़प्पा केःम्बा कोःक्मा कुइसिक् चोक्लो, हे़क्क्याङ् के़घासे़न् चोःक्मा याःम्बक्किन् केःम्बा वरःङ् कुइसिक् चोक्लो॥ यहवे दाङ्बाए, खे़ने़ॽए मे़न्छाम् याप्मिहाॽ नु थक्साहाॽ के़से़ःप्तुसिरो॥ 7 खे़ने़ॽ चक्मे़ल्लॽए मनाहाॽ लुङ्माॽ के़दुक्तुसिबा पाःन्निन् साॽरिक् इमे़ल्लुङ्बा चोक्लो! मे़न्छाम् याप्मिसाहाॽरे़ के़लाप्हाॽओ इःम्सिङ्मा मे़घोसुरो॥ 8 के़हिम्मो वे़त्ते़सरे़ के़वाॽबा यरिक् कुजाहाॽ खे़ङ्हाॽ चामा के़बिरुसिरो, हे़क्क्याङ् वहःङ् कुइसिक् के़गुङ्बा के़युबा के़नुॽमा के़दामालाम् खे़ङ्हाॽ च्वाःत् के़धुङ्घुसिरो॥ 9 थेआङ्भे़ल्ले़ खे़ने़ॽए के़रे़क् ने़त्तिगे़न् हिङ्मन्ले़ कुबुन्ने़रो, के़ओःत्तिःल्ले़ आनिगे थोॽरिगे़आङ् निसुम्बे़रो॥ 10 आत्तिन्हाॽरे़ खे़ने़ॽ कुसिङ् के़म्निःत् खे़ङ्हाॽ खे़ने़ॽ लुङ्माॽ तुक्ते़से़ॽओ, हे़क्क्याङ् के़साम्योबा कुदोःप्मा निङ्वाॽ के़गप्पाहाॽ मे़नुॽमे़दार याःन्दे़से़ॽओ॥ 11 आङ्दिङ् के़लॽबा मनाहाॽरे़ लाःक्मा मे़ङ्घोआन्लरो, हे़क्क्याङ् कुइगे़भे़म्बाहाॽरे़ नाःप्मादेमा मे़ङ्घोआन्लरो॥ 12 फे़न्याःम्बक् के़जोःक्पाहाॽ मे़जोःन्दे़आङ् सल्लिक् मे़स्सरे़आङ् मे़ने़रो, खे़ङ्हाॽग पोःक्मै मे़न्छुक्के थारिक् मे़धाम्सिङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.