निङ्वाॽफु साम्लोसुम् 35 - लिम्बुकुदोःप्मा खासे़न्ले़ लागि पेलि दाउदरे़ कुसाम्लो 1 यहवे दाङ्बाए, आङ्गाॽ के़अप्पाहाॽ खे़ने़ॽआङ् अत्ते़से़ॽओ, हे़क्क्याङ् आङ्गाॽनु थङ् के़जोःक्पाहाॽनु थक्ते़ॽओ॥ 2 से़ःप्सिङ्मा चाङ् चाक्खे़ॽआङ् खोन् याङ्सिङे़ॽओ, हे़क्क्याङ् आभाॽसे़ ये़म्सिङ्ङे़ॽओ॥ 3 आङ्गाॽ के़नाःप्पाहाॽ थुप्मासि लक्मासिरे़ लागि लाःक् नु ये़न्हाॽ याङ्सिङे़ॽओ, हे़क्क्याङ् आयाम्साम्मिन् मे़त्ते़ॽओ, “आङ्गाॽ के़से़न्लप् दाङ्बाआरो॥” 4 आङ्गाॽ से़प्मा के़गोःप्पाहाॽ सिरिङ्ममो मे़धाररो, हे़क्क्याङ् खुनिॽ चाःत्थि पेःक्लरो॥ आङ्गाॽ इजोओ थामा के़गोःप्पाहाॽ खे़त्छिङ्मा पोङ्लरो हे़क्क्याङ् खे़ङ्हाॽ मे़नाक्लरो॥ 5 खे़ङ्हाॽ सुरित् केजङ्ङिल्ले़ फे़सुबा याॽसिप् कुइसिक् मे़बोङ्लरो, हे़क्क्याङ् यहवे दाङ्बे़ल्ले़ कुमाङ्लाइङ्बाल्ले़ खे़ङ्हाॽ नाःत्तुदेसुसिररो॥ 6 खागे़माक्पा नु के़ले़ःम्बा लाम्मो खे़ङ्हाॽ लाङ्घेःक्मा पोङ्लरो, हे़क्क्याङ् यहवे दाङ्बे़ल्ले़ कुमाङ्लाइङ्बाल्ले़ खे़ङ्हाॽ सावा ये़क्कप् नाःत्तुसिररो॥ 7 खे़ङ्हाॽ थेआङ् मे़म्मे़त्छिङ्ङे इमे़युक्ताङ्लो, हे़क्क्याङ् खे़ङ्हाॽरे़ थेनाधे आङ्गाॽ से़प्मा फाॽआङ् लुम्बात् मे़दयुरो॥ 8 हक्चघत् खे़ङ्हाॽओ सिमा मे़क्मा ताररो, खे़ङ्हाॽरे़ आङ्गाॽ आसे़त्छे़ मे़न्निए मे़युक्ताङ्बा इजोओ आबाङे मे़धाररो, हे़क्क्याङ् आबाङे खे़न् लुम्बाःत्तो मे़धाआङ् मे़मे़क्लरो॥ 9 हे़क्क्याङ् यहवे दाङ्बे़ल्ले़ चोगुल्ले़ आनिङ्वाॽ तारो, हे़क्क्याङ् खुने़ॽ से़ःप्ताङ्बाओ साॽरिक् सःत्तारो॥ 10 आसिक्लुङ्मोलाम् यहवे दाङ्बान् अक्खे मे़त्तुङ्लो, “यहवे दाङ्बाए, खे़ने़ॽ हे़क्तङ्बा हात् वाॽआङ्बे? के़धुम्बाहाॽरे़ मे़न्धुम्मनाबाहाॽ ताप्फे़ःल्लिक् मे़मे़त्तुसिल्ले़ खे़ने़ॽ मे़न्धुम्मनाबाहाॽ के़से़ःप्तुसिरो, हे़क्क्याङ् कुइगे़भे़म्बाहाॽरे़ याङ्गे़साॽबाहाॽ तुक्खे मे़जाःत्तुसिल्ले़ खे़ने़ॽ याङ्गे़साॽबाहाॽ के़नाङुसिरो॥” 11 कुइगे़भे़म्बा मनाहाॽरे़ आङ्गाॽ पाःन्मे़धिक्कारो, हे़क्क्याङ् आनिङ्वाॽरे़ मे़धाप्तुम्बा पाःन्हाॽओ आङ्गाॽ आप्तिक् मे़गुःत्तारो॥ 12 खे़ङ्हाॽरे़ नुबा याःम्बक् चोगुङ्साङ् आङ्गाॽ ताप्फे़ःल्लिक् मे़मे़त्तारो, हे़क्क्याङ् आनिङ्साङ् पुक्ल मे़याःन्नारो॥ 13 हे़क्केसाङ् खे़ङ्हाॽ मे़दुगे़ मे़लाःक्ते़ल्ले़ आङ्गाॽ मे़रिङ् थक्मा चाङ् चाक्सिङ्ङाङ्लो॥ हे़क्क्याङ् तःक्ने़त्तो युङाङ्ङाङ् तुक्खे चाःत्छिङ्ङाङ्लो, आधेगेःक्किन् इर्घुॽ मे़त्तुङ्ङाङ् तुवा चोगाङ्लो॥ 14 आङ्गाॽ आन्जुम् इग्र आन्साॽरे़ कुलागि मे़रिङ् थक्ताङ्बा कुइसिक् आङ्गाॽ मे़रिङ् चोःक्नु लाङ्घेगाङ्लो॥ आबाङे आम्मारे़ कुलागि हाबाङ्बा कुइसिक् आनारान् सोरो मे़त्तुङ्ङाङ् मे़रिङ् थक्ताङ्लो॥ 15 कर के़साक्पा तुमाङ्ङिल्ले़ मे़सःत्ते़रो, हे़क्क्याङ् आङ्गाॽ कुनामे़न्छाॽ मे़प्मारे़ लागि खे़ङ्हाॽ आगब्रिङ् मे़जुप्से़रो॥ कुसिङ् मे़निःत्तुङ्सिङ्ङिन्बा मनाहाॽरे़ आङ्गाॽ चक्मे़ल्लॽए मे़हिप्ताङ्लो॥ 16 निङ्वाॽफुमाङ्ङिन् कुसिङ् मे़न्निप्नाबा मना हे़क्के खे़ङ्हाॽरे़ आङ्गाॽ कुनामे़न्छाॽ मे़मे़त्ताङ्लो, खे़ङ्हाॽरे़ खुनिॽ हाबोॽबान् मे़ये़ःक्खुर आङ्गाॽ साॽरिक् मे़जिःत्ताङ्लो॥ 17 यहवे दाङ्बाए, आभे़ल्ले़ थारिक् ओरक्के़मबे? खे़न् केबा हे़क्तङ्बाहाॽरे़ से़प्मा मे़गोःत्तारो, आङ्गाॽ से़ःप्ताङ्ङे़ॽओ॥ 18 हे़क्क्याङ् खे़ने़ॽ से़वा मे़प्मारे़ लागि के़जुम्बा के़रे़क् मनाहाॽरे़ खुनिॽ तगि आङ्गाॽ खे़ने़ॽ नुगे़न् पिने़रो, यरिक् मनाहाॽ लुम्मोलाम् के़नारा फोसुङ्लो॥ 19 मे़न्वाॽमना पान् के़बाःप्पा आनिङ्मिहाॽ आङ्गाॽ हारि ताआल्ले़ सःप्मा मे़ङ्घोने़ल्लरो॥ थेनाधे आङ्गाॽ के़जिःप्पाहाॽरे़ तुक्खे चाआल्ले़ कुनामे़न्छाॽ मे़प्मा मे़ङ्घोआन्लरो॥ 20 खे़ङ्हाॽ तङ्मा पाःन्ने मे़म्बाःत्ने़ल्लो, कर स्वाःत् के़युङ्बा मनाहाॽ मे़न्वाॽमनाबा पान् मे़मे़त्तुसिआङ् इओ मे़धासुसिरो॥ 21 खे़ङ्हाॽरे़ खुनिॽ मुरान् हा मे़मे़त्तुआङ् आङ्गाॽ अक्खेलॽरिक् पाःन्मे़धिक्कारो, “खे़ने़ॽ थे के़जोगु, खे़न् आनिगे निसुम्बे़रो!” 22 यहवे दाङ्बाए, खे़ने़ॽ कन् के़निसुआङ् के़वाॽरो, कल्ले़चोगुल्ले़ दाङ्बे, स्वाःत् मे़युङे़न्ने़ॽओ, आङ्गाॽलाम् माःङ्घा मे़बेगे़न्ने़ॽओ॥ 23 पोगे़ॽओ, दाङ्बे! हे़क्क्याङ् से़ःप्ताङ्ङे़ॽओ, आनिङ्वाॽफुमाङ्ङे! नाङाङ्ङे़ॽर पारे़ॽओ॥ 24 यहवे दाङ्बा आनिङ्वाॽफुमाङ्ङे, खे़ने़ॽ साम्योबा के़जोःक्लो, आङ्गाॽ आआप्तिक् होप् फाॽआङ् आङ्गाॽ ले़प्साङ् खासे़न् लोःन्दाङ् पिराङ्ङे़ॽओ, आनिङ्मिहाॽरे़ कुनामे़न्छाॽ मे़प्मा मे़ङ्घोआन्लरो॥ 25 खे़ङ्हाॽरे़ खुनिॽ निङ्वाॽओ, “लु, चोःक्मा कोःत्तुम्बे़बा पाःन्निन् के़रे़रो” लॽमा मे़ङ्घोने़ल्लरो॥ इग्र “आनिगे खे़न् नाःत्तुम्देसुम्बे़रो!” लॽमा मे़ङ्घोने़ल्लरो॥ 26 आङ्गाॽ के़साक्पा तुमुङ्ङिल्ले़ के़एःप्पाहाॽ के़रे़क् खुनिॽ नाधाररो हे़क्क्याङ् खे़ङ्हाॽ मे़नाक्मे़बेःक्लरो॥ आङ्गाॽ के़नाःम्बाहाॽ के़रे़क् सिरिङ्ममा पोङ्ङाङ् खुनिॽ नाधाररो॥ 27 आत्तिन्हाॽरे़ साम्योबा चोःक्का के़लॽबा निङ्वाॽ मे़इःत्तु खे़ङ्हाॽ मे़सःत्ताङ् मे़अःक्लरो॥ खे़ङ्हाॽरे़ चक्मे़ल्लॽए अक्खे मे़बाःत्तुररो, “यहवे दाङ्बे़ल्ले़ कुनारा पोररो, खुने़ॽ के़से़वारोबान् नुॽदाःल्ले़ कुनिङ्वाॽ तारो॥” 28 आङ्गाॽ खे़ने़ॽ साम्योबा के़जोक् के़लॽबा पाःन्निन् पाःत्तुङ्लो, हे़क्क्याङ् ले़न्दिक् नाम्धाधा के़नारा फोसुङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.