निङ्वाॽफु साम्लोसुम् 34 - लिम्बुयहवे दाङ्बान् के़नुॽबा चोक् दाउदरे़ कुसाम्लो 1 आभे़ल्ले़साङ् यहवे दाङ्बान् नुगे़न् पिरुङ्लो, चक्मे़ल्लॽए कुनारा फोसुङ्लो॥ 2 आङ्गाॽग खुने़ॽ चोगुबा याःम्बक्किल्ले़ लागि कुनारा फोसुङ्लो॥ तुक्खे लाक्खे के़जाबाहाॽरे़ कुनारा फोसुङ्बान् मे़घे़प्सुआङ् मे़सःत्लरो॥ 3 आङ्गाॽनु सोरिक् यहवे दाङ्बान् मिमिदिङ् पिरे़म्मे़ॽओ हे़क्क्याङ् आनिॽ सोसोरिक् कुमिङ्ङिन् थाःङ् फोःक्खुम्लो॥ 4 आङ्गाॽ यहवे दाङ्बान् कोःत्तुङ्लो, हे़क्क्याङ् खुने़ॽ नुगप् पिराङ्लो, के़रे़क् आगिमा आयङ्माहाॽ खे़त्तुदेसुरो॥ 5 खुने़ॽ ओगे़मे़प्पाहाॽरे़ खुनिॽ नारान् सःप्मारे़ चाङ्जाङ् लॽरो, हे़क्क्याङ् आभे़ल्ले़आङ् खे़ङ्हाॽरे़ खुनिॽ नारान् नाधामाल्ले़ सोरो मे़लॽने़ल्लो॥ 6 चुङ्जिगे़न् ये़त्छा साहाॽरे़ यहवे दाङ्बान् पेलि मे़भाक्तुबे़न् खे़प्सुरो, हे़क्क्याङ् खे़ङ्हाॽरे़ के़रे़क् खुनिॽ तुक्खे लाक्खेहाॽ खे़त्तुदेसु पिरुसिआङ् से़ःप्तुसिरो॥ 7 यहवे दाङ्बान् मिङ्सो इङ्धाङ् के़बिबाहाॽ खुने़ॽ कुमाङ्लाइङ्बाल्ले़ कब्रिङ् कबुसिरो, हे़क्क्याङ् यहवे दाङ्बे़ल्ले़ खे़ङ्हाॽ से़ःप्तुसिरो॥ 8 यहवे दाङ्बान् साॽरिक् के़नुॽबा चोःक्पा पाःन्निन् खे़ने़ॽ आबाङे साॽरे़आङ् ओमे़त्ते़ॽओ, खुने़ॽओ के़इःम्सिङ्बाहाॽ मुॽइसाबासिरो॥ 9 यहवे दाङ्बे़ल्ले़ कुसेसे मनासे, खुने़ॽ मिङ्सो इङ्धाङ् पिरे़म्मे़ॽओ, थेआङ्भे़ल्ले़ खुने़ॽ मिङ्सो इङ्धाङ् के़बिबाहाॽरे़ चाहाब् के़जोःक्पा के़रे़क् पाःन्हाॽ मे़घोसुरो॥ 10 के़धुम्बा केबाहाॽ साक्मे़न्जा पोङ्मा मे़सुक्लो, कर यहवे दाङ्बान् के़गोःप्पाहाॽग आक्तङ्बा नुबा पाःन्हाॽ खोमा के़बोङ्बा वाॽसाङ् के़साक्पो मे़न्धाने़न्लो॥ 11 आस्सासे, त्ये़म्मे़ॽआङ् आबाःन्निन् खे़प्से़म्मे़ॽओ, यहवे दाङ्बान् मिङ्सो इङ्धाङ् पिमा हुॽनिङ्लो॥ 12 खिनिॽ लुम्मो हाःत्ले़ यरिक् हिङ्मा कुसिराॽथाङ्बे हे़क्क्याङ् नुॽमादामा निङ्वाॽ चोगुबे? 13 खे़न् ताप्फे़ःम्बा पान् मे़बाःत्ने़ल्लरो हे़क्क्याङ् इङ्ले़क् पाःन्नाङ् मे़बाःत्ने़ल्लरो॥ 14 ताप्फे़ःम्बा याःम्बक् चोःक्मालाम् नुःक्खे़ॽआङ् नुबा याःम्बक् चोगे़ॽओ, हे़क्क्याङ् वेॽहाॽनु सनारुङ्ङो वये़ॽओ॥ 15 यहवे दाङ्बे़ल्ले़ साम्योबाहाॽ ओमे़त्तुसिरो, हे़क्क्याङ् खे़ङ्हाॽरे़ मे़जोगुबा पेलिन् खे़प्सुरो॥ 16 कर यहवे दाङ्बे़ल्ले़ ताप्फे़ःम्बा याःम्बक् के़जोःक्पाहाॽ अत्तुसिरो, हे़क्क्याङ् खे़ङ्हाॽ निङ्वाॽआङ् मे़न्याक्के थारिक् इक्सा खाम्बेःक्कोलाम् मासुसिरो॥ 17 साम्योबाहाॽरे़ यहवे दाङ्बान् पेलि मे़भाक्तुल्ले़ खुने़ॽ खे़प्सुरो, हे़क्क्याङ् खे़ङ्हाॽरे़ खुनिॽ के़रे़क् तुक्खे लाक्खेहाॽ खे़त्तुदेसुआङ् से़ःप्तुसिॽरो॥ 18 कुनिङ्वाॽ के़दुक्पाहाॽरे़ खुनिॽ पेसाङ् यहवे दाङ्बान् वाॽरो, हे़क्क्याङ् कुनिङ्साङ् के़बुक्पाहाॽ के़रे़क् खुने़ॽ से़ःप्तुसिरो॥ 19 साम्योबा मनान् यरिक् इनोगे़न् तुक्खे लाक्खेरे़ ते़त्तुसाङ् यहवे दाङ्बे़ल्ले़ के़रे़क् पिसाङ्लाम् खे़न् से़ःप्तुरो॥ 20 यहवे दाङ्बे़ल्ले़ खे़ल्ले़ के़रे़क् कुये़प्पाहाॽ से़ःप्तुरो, खे़न् कुये़प्पाहाॽ थिक्काङ् मे़जे़क्ने़ल्लो॥ 21 कुइगे़भे़म्बा मनाहाॽ खुनिॽ आबाङे फे़न्याःम्बक्किल्ले़ मे़क्खुसिरो, हे़क्क्याङ् साम्योबा मना के़जिःप्पाहाॽरे़ खुम्दिङ् मे़घोसुरो॥ 22 यहवे दाङ्बे़ल्ले़ कुसे़वारोबाहाॽ से़ःप्तुसिरो, खुने़ॽओ इःम्सिङ्से़ के़दाबाहाॽ मे़दाङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.