निङ्वाॽफु साम्लोसुम् 33 - लिम्बुनाराफोमा से़वासाम्लो 1 साम्योबासे, यहवे दाङ्बे़ल्ले़ कुलागि खिनिॽ सिक्सम्ल साम्लोरे़म्मे़ॽओ॥ कुदोःप्मा निङ्वाॽ के़गप्पाहाॽरे़ खुने़ॽ कुनारा फोमा लाॽरुरो॥ 2 मुक्ला मुक्खे़म्मे़ॽर यहवे दाङ्बे़ल्ले़ कुनारा फोसे़म्मे़ॽओ, तुङ्ना हिप्ते़म्मे़ॽ हे़क्क्याङ् कुनारा फोसे़म्मे़ॽर साम्लोरे़म्मे़ॽओ॥ 3 खुने़ॽ कुलागि कुसङ् से़वासाम्लोधिक् साम्मे़त्ते़म्मे़ॽओ, नुरिक्काङ् मुक्लाहाॽ मुक्खे़म्मे़ॽआङ् अःक्ते़म्मे़ॽर सःत्ते़म्मे़ॽओ॥ 4 थेआङ्भे़ल्ले़ यहवे दाङ्बे़ल्ले़ कुबाःन्जाक्किन् नसान् चोःक्मा सुक्के़दे़प्पा नु से़क्खाबा चोक्लो, हे़क्क्याङ् कुयाःम्बक्हाॽ के़रे़क् नसाःन्साबा चोक्लो॥ 5 यहवे दाङ्बे़ल्ले़ साम्योबा नु कुदोःप्मा याःम्बक् के़जोःक्पा मनाहाॽ लुङ्माॽ तुक्तुसिरो॥ खुने़ॽ से़क्खाबा कुमिःम्जिःल्ले़ इक्सादिङ् खाम्बेःक्मान् थिम्सुआङ् वाॽरो॥ 6 यहवे दाङ्बे़ल्ले़ कुबाःन्जाक्किल्ले़ तरःङ्गे़न् ताङ्साक्पान् चोगुरो, हे़क्क्याङ् साःङ्गुगे़न् कुसक्माःल्ले़ खेःम्सिक्पाहाॽ चोगुसिरो॥ 7 खुने़ॽ वरक्कोबा च्वाःत्तिन् थिक्ते़न्नो फुक्खुरो, खुने़ॽ कुदिम्बे केःम्बा वरःङ्हाॽ मनाःल्ले़ कुजान् चायाङ्दे़न्नो सुप्सुबा कुइसिःक्के थिक्ते़न्नो लुप्सुरो॥ 8 इक्सादिङ् खाम्बेःक्मोबा के़रे़क् मनाहाॽरे़ यहवे दाङ्बान् से़वा मे़मे़त्तुररो हे़क्क्याङ् खे़प्मो के़युङ्बाहाॽरे़ मिङ्सो इङ्धाङ् मे़बिरुररो॥ 9 थेआङ्भे़ल्ले़ खुने़ॽ पाःत्तुबा पाःन्निल्ले़ के़रे़क् नावागे़न् चइःत् ने़स्सुरो, हे़क्क्याङ् खुने़ॽ कुइङ्जाङ्लाम्बा के़रे़क् पाःन्हाॽ पोःक्खे़रो॥ 10 यहवे दाङ्बे़ल्ले़ इक्सादिङ् खाम्बेःक्मोबा मे़न्छाम् सुवाङ्हाॽरे़ चोःक्मा मे़गोःत्तुबा याःम्बक्हाॽ फोःत्तु पिरुसिरो॥ हे़क्क्याङ् मे़सोःक्तुबा मे़इःत्तुबा पाःन्हाॽ कुसुम् मे़न्दम्मनाबा चोगु पिरुसिरो॥ 11 कर यहवे दाङ्बे़ल्ले़ कुनिङ्सेःक्हाॽ सदादिङ् वाॽरो, हे़क्क्याङ् कुसिक्लुङ्मोबा कुनिङ्वाॽ पाःन्हाॽ आभे़ल्ले़ थारिक्साङ् वाॽरो॥ 12 यहवे दाङ्बान् आनिॽ निङ्वाॽफुमाङ्लो के़लॽबा इक्सादिङ् खाम्बेःक्मोबा मे़न्छाम् सुवाङ्हाॽ मुॽइसाबासिरो, खुने़ॽ कुलक् खोसे़ सेगुसिबाहाॽआङ् मुॽइसाबासिरो॥ 13 यहवे दाङ्बान् साङ्ग्राम्पेदाङ्लाम् यो ओमरो, हे़क्क्याङ् के़रे़क् मे़न्छाम् सुवाङ्हाॽ निसुसिरो॥ 14 खुने़ॽ आबाङे कुयुङ्मादे़न्नोलाम् इक्सादिङ् खाम्बेःक्मो के़युङ्बा के़रे़क् मनाहाॽ ओमे़त्तुसिरो॥ 15 खुने़ॽ के़रे़क्ले़ खुनिॽ निङ्वाॽ के़इःप्पा सिक्लुङ्मान् चोगुरो, हे़क्क्याङ् खे़ङ्हाॽरे़ खुनिॽ याःम्बक्किन् खुने़ॽ कुसिङ् निःत्तुरो॥ 16 हाङ्ङिल्ले़ यरिक् थक्सुबाहाॽ कत्तुसिबाल्ले़रक् थङ् नाःम्मा मे़सुक्तुन्लो, हे़क्क्याङ् थक्सुबान् के़धुम्बा चोःक्साङ् खुने़ॽ से़ःप्सिङ्मा मे़सुक्ने़ल्लो॥ 17 अन्हाॽलाम्बा थङ् चोःक्मा नाःन्दे़त् फाॽआङ् इःप्माग हने़रक्लो, खे़न् अन्हाॽ के़धुम्बा मे़जोःक्साङ् हाःत्ताङ् से़ःप्मा मे़न्छुक्तुल्लो॥ 18 कर यहवे दाङ्बे़ल्ले़ कुइङ्जाङ् के़इःप्पा के़नाःप्पा हे़क्क्याङ् खुने़ॽ से़क्खा लुङ्माॽ आदुक् फाॽआङ् खुने़ॽओ निङ्वाॽ के़युङ्बाहाॽ कम्ब्राङ् मे़त्तुसिरो॥ 19 खुने़ॽ खे़ङ्हाॽ सिमालाम् से़ःप्तुसिरो, हे़क्क्याङ् साक्वाःन्नो कुहिङ्वे़त् कत्तुसिरो॥ 20 यहवे दाङ्बे़ल्ले़ कुलाम्मिन् ओमे़त्तुम्बे़रो, खुने़ॽए आनिगे फाॽरिगे़ हे़क्क्याङ् थेःक्तिगे़रो॥ 21 खुने़ॽ चोगुबा पाःन्हाॽरे़ चोगुल्ले़ सःत्तिगे़रो, थेआङ्भे़ल्ले़ कुसेसे मिङ्ङो ताःक्पो चोगुम्बे़रो॥ 22 यहवे दाङ्बाए, आनिगे खे़ने़ॽओ निङ्साङ् चोगुम्बे़रो, से़क्खाबा के़मिःम्जिन् सदादिङ् आनिगे़नु वाॽररो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.