निङ्वाॽफु साम्लोसुम् 32 - लिम्बुले़प्मि के़घोबाहाॽ मुॽइसाबासिरो मस्किल मे़प्मनाबा दाउदरे़ कुसाम्लो 1 कुलायो ले़प्मि के़बोङ्बा मनान् मुॽइसाबारो, थेआङ्भे़ल्ले़ खे़ल्ले़ कुभे़न् याःम्बक्हाॽ ले़प्मि पोःक्खे़आङ् वाॽरो॥ 2 यहवे दाङ्बे़ल्ले़ आप्तिक् मेःन्नेबा इःत्तुबा मनाःङ्ग मुॽइसाबारो, थेआङ्भे़ल्ले़ खे़ल्ले़ कुनिङ्वाॽओ ताप्फे़ःम्बा होप्लो॥ 3 लायो चोगुङ्ङाङ् ले़प्मि मे़न्नाःक्के आङ्गाॽ स्वाःत् युङाङ्ङिल्ले़ हे़क्क्याङ् ले़न्दिक् नाम्धाधा हाबाङ्ङिल्ले़ आङ्गाॽ आये़प्पाहाॽ यरे़रो॥ 4 से़न्दिक् ले़न्दिक् आङ्गाॽ खुम्दिङ् के़बिराङ्लो, हाङ्वासे़ःल्ले़ च्वाःत्तिन् हेबा कुइसिक् कुस्साॽइ मे़न्याक्मनाबा पोःक्खाङ्ङाङ् वाॽआरो॥ सेला 5 हे़क्क्याङ् लायो चोगुङ्बा पाःन्हाॽ के़दगि पाःत्तुङ्लो॥ फे़न्याःम्बक् चोगुङ्बा पाःन्हाॽ मे़म्माॽबारो, कर आङ्गाॽ आलायोहाॽ नु आभे़न् याःम्बक्हाॽ के़दगि पाःप्मा निङ्वाॽ चोगुङ्लो हे़क्क्याङ् आङ्गाॽ आलायोहाॽ के़घे़त्तु के़देसुआङ् ले़प्मि के़बिराङ्लो॥ सेला 6 खे़ल्ले़चोगुल्ले़ के़रे़क् से़वासाम्बाहाॽरे़, ये़म्मिन् वाॽर थारिक् पेलिगे़न् तुवा के़म्जोःक्लरो॥ हे़क्क्याङ् वाभे़ल्ले़ङ् हे़क्तङ्बा तुक्खे लाक्खेहाॽ खे़ङ्हाॽओ तामा मे़सुक्ने़ल्लो॥ 7 खे़ने़ॽग आङ्गाॽ आजिङ्सिङ्मा ते़न्ने़रो, खे़ने़ॽग तुक्खेलाक्खेओ के़से़ःप्पारो, आङ्गाॽ के़से़ःप्ताङ्बाल्ले़ चोगुल्ले़ यम्बा इक्लाओ साम्लोआरो॥ सेला 8 यहवे दाङ्बे़ल्ले़ पाःत्तुरो, “खे़ने़ॽ लाङ्घेःक्मा के़बोङ्बा लाम्मिन् आङ्गाॽ ओसेःन्धाक्ने़रो खे़ने़ॽ सुजा पिने़आङ् ओमे़त्ने़रो॥ 9 कुने़हि के़होप्पा अन् इग्र अदङ् हे़क्तङ्बा मे़बोःक्खे़न्ने़ॽओ, खे़ङ्हाॽ खुम्मासिरे़ लागि करेलि नु कुउःङ्मा कुदे़म्मा चाहाब् चोक्लो मेःन्ने़भग्र खे़ङ्हाॽ के़हुक्को मे़न्दाने़न्लो॥” 10 कुइगे़भे़म्बा मनाहाॽरे़ यरिक् तुक्खे लाक्खेहाॽ मे़दुमुरो, कर यहवे दाङ्बाओ ताःक्पो के़जोःक्पाहाॽग खुने़ॽ चक्मे़ल्लॽए लुङ्माॽ तुक्तुसिरो॥ 11 साम्योबासे, यहवे दाङ्बे़ल्ले़ चोगुबा पाःन्हाॽरे़ चोगुल्ले़ सःत्ते़म्मे़ॽआङ् निङ्वाॽ तासे़म्मे़ॽओ॥ कुदोःप्मा निङ्वाॽ के़गप्पासे, खिनिॽ के़रे़क् सःत्ते़म्मे़ॽआङ् सिक्सम्ल अःक्ते़म्मे़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.