निङ्वाॽफु साम्लोसुम् 31 - लिम्बुये़त्तुक्खे आदुम्मिल्ले़बा पेलि साम्लो के़हुॽबाल्ले़ लागि दाउदरे़ कुसाम्लो 1 यहवे दाङ्बाए, आङ्गाॽ खे़ने़ॽओ इःम्सिङ्से़ त्याङ्ङाङ् वाॽआरो॥ आङ्गाॽग आभे़ल्ले़आङ् सिरिङ्ममा मे़बोङ्ने़ल्लरो, साम्योबा निङ्वाॽफुमाङ्ङे से़ःप्ताङ्ङे़ॽओ॥ 2 आङ्गाॽ पेलि फाक्ने़बान् खे़प्से़ॽओ, हे़क्क्याङ् खिमो से़ःप्ताङ्ङे़ॽओ॥ खे़ने़ॽ कम्ब्राङ् के़मे़प्पा नु याप्मि आधेःक्थेःक्पा यक् पोःक्खे़ॽओ॥ खे़ने़ॽए याक्पेॽ कुइसिक् आङ्गाॽ से़ःप्ताङ्ङे़ॽ थेःक्ताङ्ङे़ॽओ॥ 3 खे़ने़ॽए आङ्गाॽ आयाक्पेॽ नु आङ्गाॽ आसे़ःप्सिङ्मा यक्ने़रो॥ के़मिङ्सो इङ्धाङ्ले़ लागि आङ्गाॽ लाम्लोसाङ्ङे़ॽ लाङ्घेःक्खाङ्ङे़ॽओ॥ 4 आङ्गाॽ आनिङ्मिहाॽरे़ मे़युक्ताङ्बा इजोओलाम् आङ्गाॽ लःत्ताङ्ङे़ॽओ, थेआङ्भे़ल्ले़ खे़ने़ॽए आइःम्सिङ्मा ते़न्ने़रो॥ 5 आङ्गाॽ आयाम्साम्मिन् खे़ने़ॽ हुक्सुप्ने़रो॥ यहवे दाङ्बाए, से़क्खाबा निङ्वाॽफुमाङ्ङे, आङ्गाॽ से़ःप्ताङ्ङे़ॽओ॥ 6 हने़बा नावाइत्ला माङ्गे़घबाहाॽ चिःत्तुङ्सिङ्लो, कर आङ्गाॽग यहवे दाङ्बान्ने ताःक्पो चोगुङ्लो॥ 7 चक्मे़ल्लॽए लुङ्माॽ के़दुक्काबाल्ले़ चोगुल्ले़ साॽरिक् आनिङ्वाॽ ताःॽ हे़क्क्याङ् सःत्तारो, थेआङ्भे़ल्ले़ आदुक्खे आलाक्खेहाॽ के़निसुआङ् वाॽरो, हे़क्क्याङ् आनिङ्वाॽ तुक्खे चाबे़न्नाङ् के़निसुरो॥ 8 खे़ने़ॽग आङ्गाॽ आनिङ्मिहाॽरे़ खुनिॽ हुक्को थामा के़म्बाङ्घाङ्ङिल्लो, कर ताम्दाम्बा ते़न्नो के़ये़प्साङ्ङाङ् वाॽआरो॥ 9 यहवे दाङ्बाए, आङ्गाॽ लुङ्माॽ तुक्ताङ्ङे़ॽओ थेआङ्भे़ल्ले़ आङ्गाॽ पयम् यम्बा तुक्खेओ थ्याङ्ङाङ् वाॽआरो॥ मे़रिङ् थक्मारे़ आमिक्किन् खादाप्तुआङ् वाॽरो, आनिङ्वाॽसाम्मो नु नासिङ्गे़न् आधक्को साॽरिक् नासाङ्ङाङ् वाॽआरो॥ 10 निङ्वाॽ तुक्खे चामारे़ नासाङ्ङाङ् वाॽआरो, हे़क्क्याङ् हाःप्मारे़ हाःप्मारे़ आङ्गाॽ आधाक् सॽरे़आङ् वाॽरो॥ आङ्गाॽ आदुक्खेःल्ले़ चोगुल्ले़ कुस्साॽइ मे़न्याक्मनाबा पोःक्खाङ्ङाङ् वाॽरो, हे़क्क्याङ् आये़प्पाहाॽआङ् यरे़बेआङ् वाॽरो॥ 11 के़रे़क् आनिङ्मिहाॽरे़ कुनामे़न्छाॽ मे़मे़त्तारो हे़क्क्याङ् आबाङ्भेॽसाबाहाॽरे़आङ् आङ्गाॽ कुसुम्मे़न्दम्मना मे़मे़त्तारो॥ आङ्गाॽ आदुक्खेःल्ले़ चोगुल्ले़ आन्जुम्हाॽरे़आङ् मे़गित्तारो॥ लाम्लाम्मो मनाहाॽरे़ मे़दुम्माल्ले़ खे़ङ्हाॽ मे़घे़त्छिङ् मे़बेःक्लो॥ 12 आङ्गाॽ स्याङ्ङाङ् होःप्पाबा कुइसिक् के़रे़क्ले़ निङ्वाॽ मे़भेःत्छाङ्लो, आङ्गाॽग के़हे़ःप्पा खेःक्या ते़रे़ङ् हे़क्के पोःक्खाङ्ङाङ् वाॽआरो॥ 13 यरिक् आनिङ्मिहाॽरे़ चे़ॽया मे़मे़त्ताङ्बा आङ्गाॽ खे़प्सुङ्सिङ्ङाङ् वाॽआरो, आत्तिसाङ् किमा यङ्मारक् वाॽरो॥ खे़ङ्हाॽ मे़दङ्ङाङ् चे़म्भन् मे़जोक्लो, हे़क्क्याङ् आङ्गाॽ से़प्मा फाॽआङ् स्वाःत्ताङ् पाःन्मे़दङ्घुरो॥ 14 कर यहवे दाङ्बाए, आङ्गाॽग खे़ने़ॽए ताःक्पो चोःक्ने़रो, हे़क्क्याङ् पाःत्तुङ्लो, “खे़ने़ॽए आनिङ्वाॽफुमाङ्ने़रो॥” 15 आङ्गाॽ सदादिङ् के़हुक्को वाॽआरो, आङ्गाॽ तुक्खे के़जाःप्पा आनिङ्मिहाॽलाम् से़ःप्ताङ्ङे़ॽओ॥ 16 खे़ने़ॽ के़नाराःल्ले़ के़से़वारोबाहाॽ थोॽरुसिररो, हे़क्क्याङ् चक्मे़ल्लॽए आङ्गाॽ लुङ्माॽ के़दुक्काबाल्ले़ चोगुल्ले़ से़ःप्ताङ्ङे़ॽओ॥ 17 यहवे दाङ्बाए, आङ्गाॽ उःत्ने़रो, आङ्गाॽ सिरिङ्ममा मे़बोङ्ने़ल्लरो॥ कर फे़न्याःम्बक् के़जोःक्पाहाॽरे़ खुनिॽ नाधाररो, हे़क्क्याङ् खे़ङ्हाॽ खे़मा यङ्सङ्ङो मे़बेःक्काङ् मे़म्बाःत्ते मे़युङ्लरो॥ 18 इङ्ले़क् के़बाःप्पाहाॽरे़ खुनिॽ मुरान् चुप्लरो, थेआङ्भे़ल्ले़ खे़ङ्हाॽ आङ्दिङ् मे़लॽआङ् साम्योबाहाॽ नामे़न्छाॽ मे़मे़त्तुसिरो॥ 19 खे़ने़ॽ के़नुॽबा के़जोःक्पा पाःन्निन् से़क्खाए पयम् यम्बा चोक्लो, खे़ङ्ग खे़ने़ॽ मिङ्सो इङ्धाङ् के़बिबाहाॽरे़ खुन्छिॽ लागि के़दाङ्घुआङ् वाॽरो, हे़क्क्याङ् खे़ङ्ग खे़ने़ॽओ इःम्सिङ्से़ के़दाबाहाॽ मना तगि के़बिरुसिरो॥ 20 खे़ने़ॽ के़वाॽमादे़न्नो खे़ङ्हाॽ के़जिक्खुसिरो, मनाहाॽरे़ खुनिॽ चे़म्भन्नो थामा के़म्बाङ्घुन्सिन्लो पान् के़धिक्पा मनाहाॽलाम् खे़ङ्हाॽ लाःत्लाःत् के़गत्तुसिआङ् के़से़ःप्तुसिरो॥ 21 यहवे दाङ्बे़ल्ले़ कुनारा पोररो, थेआङ्भे़ल्ले़ निङ्मिहाॽरे़ थ्यःङ् चोःक्मा फाॽआङ् मे़गबुबा ये़क्यक्को आङ्गाॽ वयाङ्ङिल्ले़ खुने़ॽ साॽरिक् लुङ्माॽ तुक्ताङ्बा पाःन्निन् ओसेःन्धाक्ताङ्लो॥ 22 आङ्गाॽग यहवे दाङ्बे़ल्ले़ ले़राङ्देसाङ्बि लॽराङ्ङाङ् आयङ्मा के़रे़रो॥ कर फाॽराङ्ङे़ॽओ फाॽआङ् पेलि फाक्तुङ्ङिल्ले़ खुने़ॽ लुङ्माॽ तुक्ताङ्ङाङ् आबेलिन् खे़प्सुरो॥ 23 यहवे दाङ्बे़ल्ले़ कुसेसे मनासे, खुने़ॽ मिःम् मे़त्ते़म्मे़ॽओ! नसान् के़जोःक्पाहाॽ यहवे दाङ्बे़ल्ले़ से़ःप्तुसिरो, कर आङ्दिङ् के़लॽबाहाॽग खुने़ॽ खुम्दिङ् पिरुसिरो॥ 24 यहवे दाङ्बाओ निङ्साङ् के़जोःक्पासे, के़धुम्बा पोःक्खे़म्मे़ॽ, हे़क्क्याङ् हाङ्हाङ् लॽरे़म्मे़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.