निङ्वाॽफु साम्लोसुम् 30 - लिम्बुनोगे़न् पिमा साम्लो निङ्वाॽफुमाङ्हिम् तोःम्मारे़ लागि दाउदरे़ कुसाम्लो 1 यहवे दाङ्बाए, आङ्गाॽ के़नारा फोसुङ्लो, थेआङ्भे़ल्ले़ आङ्गाॽ यो केःम्बा लुम्बाःत्लाम्बा थाःङ् के़बक्खाङ् के़लःत्ताङ्ङाङ् वाॽआरो, हे़क्क्याङ् हारि त्याङ् फाॽआङ् आङ्गाॽ आनिङ्मिहाॽ सःप्मा के़म्बाङ्घुन्सिल्लो॥ 2 यहवे दाङ्बा आनिङ्वाॽफुमाङ्ङे, आङ्गाॽ फाॽराङ्ङे़ॽ फाॽआङ् आङ्गाॽ अःक्ताङ्ल पेलि फाक्ने़रो, हे़क्क्याङ् आङ्गाॽ के़नुसाङ्लो॥ 3 यहवे दाङ्बाए, इपुङ्लाम्बा के़लःत्ताङ्लो, हे़क्क्याङ् खे़मा यङ्सङ्ङो पेःक्मालाम् के़से़ःप्ताङ्लो॥ 4 यहवे दाङ्बे़ल्ले़ कुसेसे मनासे, साम्लोरे़म्मे़ॽर खुने़ॽ साम्मे़त्ते़म्मे़ॽओ, हे़क्क्याङ् कुसेसे मिङ्ङिन् इङ्धाङ् पिरे़म्मे़ॽर खुने़ॽ कुनारा फोसे़म्मे़ॽओ॥ 5 थेआङ्भे़ल्ले़ खुने़ॽग सप्फाधिक्लक् कुसिक् पोःक्लो, कर आनिॽ हिङ्हिङ् थारिक् खुने़ॽ आभे़ल्ले़साङ् आनिॽ लुङ्माॽ आदुक्लो॥ हे़क्केलॽरिक्के आनिॽ से़न्दिक् आहाःप्साङ् तानाम्ग आनिॽ आसःत्लो॥ 6 आङ्गाॽ नाङ्सिङ्मा थेःक्सिङ्मा चाहाब् मे़न्जोःक्के वयाङ्ङिल्ले़ आभे़ल्ले़आङ् हारि मे़दाआन् लॽरिक् पाःत्तुङ्लो॥ 7 यहवे दाङ्बाए, आङ्गाॽ लुङ्माॽ के़दुक्ताङ्लो, हे़क्क्याङ् के़नाङाङ् के़धेःक्ताङ्लो थे़गु कुइसिक् आङ्गाॽ इदिॽ वदिॽ मे़ल्लॽमना के़जोगाङ्लो, कर आङ्गाॽलाम् के़जिङ्सिङ्ङिल्ले़ किसाङ्लो॥ 8 यहवे दाङ्बाए, आङ्गाॽ खे़ने़ॽ उःत्ने़रो, लुङ्माॽ तुक्ताङे़ॽओ लॽरिक् पेलि फाक्ने़रो॥ 9 “आङ्गाॽ खे़मा यङ्सङ्ङो पेःक्काआङ् आङ्गाॽ मे़क्काल्ले़ थे के़घोसुबे? खाम्बुत्राःल्ले़ खे़ने़ॽ के़नारा फोसुबि? खे़न् खाम्बुत्राःल्ले़ खे़ने़ॽ नसाःन्साबा के़जोक् फाॽआङ् इङ्भोसुबि? 10 यहवे दाङ्बाए, आङ्गाॽ आबेलिगे़न् आबाःन्जाःन्निन् खे़प्से़ॽओ, हे़क्क्याङ् आङ्गाॽ लुङ्माॽ तुक्ताङ्ङे़ॽओ, यहवे दाङ्बाए, नाङाङ्ङे़ॽ थेःक्ताङ्ङे़ॽओ॥” 11 खे़ने़ॽए आङ्गाॽ आमे़रिङ् थक्मान् लाःङ्मा सःप्माओ के़ले़क्खुॽरो, हे़क्क्याङ् इनोगे़न् आदुक्खेन् के़घे़त्तुआङ् आङ्गाॽ कुसिक् के़सम्बा के़जोगाङ्लो॥ 12 हे़क्केलॽरिक् आङ्गाॽ आनिङ्वाॽइल्ले़ चक्मे़ल्लॽए के़नारा फोसुररो॥ यहवे दाङ्बा आनिङ्वाॽफुमाङ्ङे, आङ्गाॽ सदादिङ् खे़ने़ॽ नुगे़न् पिने़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.