निङ्वाॽफु साम्लोसुम् 29 - लिम्बुसुरित् केजङ्ङो दाङ्बे़ल्ले़ कुइक्ला दाउदरे़ कुसाम्लो 1 माङ्लाइङ्बासे, यहवे दाङ्बे़ल्ले़ कुनारा फोसे़म्मे़ॽओ, यहवे दाङ्बान् कुमिमिदिङ् नु कुमुक्साम्मिल्ले़ लागि इङ्धाङ् पिरे़म्मे़ॽओ॥ 2 मिमिदिङ् पिमा यारुबा यहवे दाङ्बे़ल्ले़ कुमिङ्ङिन् खिनिॽ इङ्धाङ् पिरे़म्मे़ॽओ॥ सेसेबा कुसुत्नाःल्ले़ काप्पासिम्मे़ॽआङ् यहवे दाङ्बान् से़वा मे़त्ते़म्मे़ॽओ॥ 3 यहवे दाङ्बे़ल्ले़ कुइक्लान् च्वाःत् सम्धाङ् खे़म्दे़त्लो, मिमिदिङ्गे़न् निङ्वाॽफुमाङ्ङिन् खे़रे़ङ्घुरुङ् लॽरो॥ हे़क्क्याङ् यहवे दाङ्बे़ल्ले़ खे़रे़ङ्घुरुङ् के़लॽबा कुइक्लाःल्ले़ वरःङ्हाॽआङ् लोःक्खुरो॥ 4 यहवे दाङ्बे़ल्ले़ कुइक्लान् मुक्साम्साबा चोक्लो, यहवे दाङ्बान् पाःत्तिल्ले़ कुहाङ्वा कुमाङ्वा याक्लो॥ 5 यहवे दाङ्बे़ल्ले़ कुइक्लाःल्ले़ साम्माङ्सिङ्हाॽ हर्गे़ॽ हर्गे़ॽ खे़रुरो॥ यहवे दाङ्बे़ल्ले़ लेबनान कोःक्माओबा साम्माङ्सिङ्हाॽ फल्लाक् फल्लाक् ए़क्खुरो॥ 6 खुने़ॽग ले़बनानबा कोःक्मा फाङ्जङ्हाॽ पित्सात् पिम्बा कुइसिक् मुन्दुरो, हे़क्क्याङ् हेर्मोन थे़गुन् कुम्बाबा साम्बित्तिन् पिम्बा कुइसिक् मुन्दुरो॥ 7 यहवे दाङ्बे़ल्ले़ कुइक्लाःल्ले़ साःम्भे ले़क्लो॥ 8 यहवे दाङ्बे़ल्ले़ कुइक्लाःल्ले़ मुरे़क् खारे़क्पा ये़ःङ्घादे़न्निन् यक्खुरो, यहवे दाङ्बे़ल्ले़ कादेस लाजेॽबा मुरे़क् खारे़क् थेआङ् के़होप्पा ये़ःङ्घादे़न्निन् यक्खुरो॥ 9 यहवे दाङ्बे़ल्ले़ कुइक्लाःल्ले़ यहिबा सिङ्हाॽ थुःक्खुरो, हे़क्क्याङ् ताम्भुङ् सिङ्लाहाॽ सिमुक् सिमुक् मुक्खुआङ् मुरे़क् खारे़क् चोगुरो॥ कुहिम्मो के़वाॽबाहाॽ निङ्वाॽफुमाङ्ङिल्ले़ कुमिमिदिङ् पोङ्लरो लॽरिक् के़रे़क् मे़अःक्लो॥ 10 यहवे दाङ्बे़ल्ले़ वदप्मा सम्धाङ् युक् चोगुरो, यहवे दाङ्बान् सदादिङ् हाङ्चोक्लो॥ 11 यहवे दाङ्बे़ल्ले़ आबाङे कुमनाहाॽ मुक्साम् पिरुसिरो, हे़क्क्याङ् यहवे दाङ्बे़ल्ले़ आबाङे कुमनाहाॽ सनारुङ् हाङ्वागे़न् मुॽइसाम् पिरुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.