निङ्वाॽफु साम्लोसुम् 28 - लिम्बुनुगे़न् नु पेलिगे़न् तुवा दाउदरे़ कुसाम्लो 1 यहवे दाङ्बाए, खे़ने़ॽग आङ्गाॽ याप्मि कम्ब्राङ् के़मे़प्पा आयाक्पेॽने़रो, आङ्गाॽ पेलि फाक्ने़ल्ले़ खे़प्से़ॽओ॥ खे़ने़ॽ आङ्गाॽ आबाःन्निन् के़ङ्घे़प्सुन्ने़भग्र आङ्गाॽआङ् खे़मादिङ् यङ्सङ्ङो के़बेःक्पाहाॽ कुइसिक् पोङ्ङारो॥ 2 हे़क्क्याङ् फाॽराङ्ङे़ॽओ फाॽआङ् अःक्काल्ले़ खे़ब्याङ् पयम् यम्बा के़सेसेदे़न् ले़प्माङ् आङ्गाॽ आहुक्हाॽ सन्छुङ्ङिल्ले़ चोगुङ्बा पेलिगे़न् आदुवान् खे़प्से़ॽओ॥ 3 आङ्गाॽ कुइगे़भे़म्बा मनाहाॽ हे़क्क्याङ् फे़न्याःम्बक् के़जोःक्पाहाॽनु आङ्गाॽ सिसे़ मे़देॽराङ्ङिन्ने़ॽओ॥ खे़ङ्हाॽ खुनिॽ पाङ्भेॽसाबाहाॽनु नुरिक्काङ् मे़बाःत्लो कर खुनिॽ निङ्वाॽओ नुबा होप्लो॥ 4 खे़ङ्हाॽरे़ मे़जोगुबा याःम्बक्किल्ले़ कुले़क्वा पिरे़से़ॽओ, हे़क्क्याङ् फे़न् याःम्बक् मे़जोगुबाल्ले़ कुले़क्वा खे़ङ्हाॽ साम्बान् चाःत्ते़से़ॽओ, हे़क्क्याङ् खुन्छिॽ खोमा मे़यारुबा खुम्दिङ्ङिन् पिरे़से़ॽओ॥ 5 खे़ङ्हाॽरे़ यहवे दाङ्बे़ल्ले़ कुयाःम्बक्किन् नु खुने़ॽ आबाङे कुहुक्किल्ले़ चोगुबा पाःन्हाॽ खे़ङ्हाॽरे़ निङ्वाॽ मे़न्इःत्तुन्लो खे़ल्ले़चोगुल्ले़ खुने़ॽ खे़ङ्हाॽ मे़क्खुसिरो, हे़क्क्याङ् याम्मो मे़भोःक्खुन्सिन्लो॥ 6 यहवे दाङ्बे़ल्ले़ कुनारा पोररो, थेआङ्भे़ल्ले़ लुङ्माॽ तुक्ताङ्ङे़ॽ फाॽआङ् पेलि फाक्तुङ्बान् खे़प्सुआङ् वाॽरो॥ 7 यहवे दाङ्बान् आङ्गाॽ आमुक्साम् नु आङ्गाॽ आधेःक्सिङ्मा आघोरो, आङ्गाॽ खुने़ॽओ आनिङ्वाॽ युक्खुङ्लो॥ हे़क्केःल्ले़ खुने़ॽ आङ्गाॽ फाॽआरो हे़क्क्याङ् आसिक् समे़आङ् वाॽरो, हे़क्क्याङ् से़वासाम्लोलाम्बा खुने़ॽ नुगे़न् पिरुङ्लो॥ 8 यहवे दाङ्बे़ल्ले़ कुमनाहाॽ के़धुम्बा चोगुसिरो, हे़क्क्याङ् सेःन्दुबा हाङ्ङिन् थेःक्तुआङ् से़ःप्तुरो॥ 9 खे़ने़ॽ के़मनाहाॽ से़ःप्ते़से़ॽओ, हे़क्क्याङ् खे़ने़ॽ के़मुॽइदाङ्साहाॽ हाङ्वागे़न् मुॽइसाम् थासे़ पिरे़से़ॽओ॥ हे़क्क्याङ् खे़ङ्हाॽ के़गम्बा पोःक्खे़ॽआङ् सदादिङ् ओमे़त्ते़से़ कत्ते़से़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.