निङ्वाॽफु साम्लोसुम् 27 - लिम्बुनिङ्वाॽफुमाङ्ङिन् नसान् चोःक्मा दाउदरे़ कुसाम्लो 1 यहवे दाङ्बान् आओःत्ति नु आसे़न्लप्दाङ्बारो, हे़क्केःल्ले़ आत्तिन्हाॽआङ् मे़गिरुङ्सिङ्ङिन्लो, यहवे दाङ्बे़ल्ले़ किप्मा के़घुबा पाःन्हाॽओ थामालाम् से़ःप्पारो, हे़क्केःल्ले़ आङ्गाॽ आभे़ल्ले़आङ् मे़गिआन्लो॥ 2 कुइगे़भे़म्बा मनाहाॽरे़ से़प्मा मे़गोःत्ताल्ले़, हे़क्क्याङ् आदक्ले़ङ्वाओ के़बोःक्पा आङ्गाॽ आनिङ्मिहाॽरे़ मे़भत्ताल्ले़, खे़ङ्हाॽ मे़भत्छिङ्ङाङ् मे़गे़ङ्लो॥ 3 यरिक् थक्सुबाहाॽरे़ कब्रिङ् मे़गप्पासाङ् आङ्गाॽ चिजिङ्ङाङ् मे़लॽआन्लो, हे़क्क्याङ् खे़ङ्हाॽरे़ मे़भत्तासाङ् निङ्वाॽफुमाङ्ङो आनिङ्वाॽ युक्खुङ्लो॥ 4 यहवे दाङ्बान् लत्थिक् पान् नाःक्तुङ्लो, साॽरिक्के निङ्वाॽ चोगुङ्ङाङ् कोःत्तुङ्बा पाःन्निङ्ग यहवे दाङ्बे़ल्ले़ कुहिम्मो आहिङ्हिङ् थारिक् वाॽमा, खुने़ॽ साॽरिक् के़नुॽबा चोःक्पा पाःन्निन् ओमे़प्मा हे़क्क्याङ् कुमाङ्हिम्मो तुवा चोःक्मा खोसुङ्लरो॥ 5 थेआङ्भे़ल्ले़ तुक्खे लाक्खेहाॽ ताःल्ले़ खुने़ॽ कुयुङ्मादे़न्नो आङ्गाॽ नाङ्ङा थेःक्कारो, सेसे कुयुङ्मादे़न्नो आङ्गाॽ चिङ्ङारो, हे़क्क्याङ् पयम् यम्बा लुङ् सम्धाङ् युङ्ङारो॥ 6 हे़क्क्याङ् आङ्गाॽ आगब्रिङ् के़वाॽबा आङ्गाॽ आनिङ्मिहाॽ नाःन्दुङ्सिङ्लो खे़ब्याङ् सेसे कुयुङ्मादे़न्नो आङ्गाॽ आसिक् पसम्सम्ल सिदुङ्जभा चोगुङ्लो, आङ्गाॽ से़वासाम्लो साम्मे़त्तुङ्ल यहवे दाङ्बे़ल्ले़ कुनारा फोसुङ्लो॥ 7 यहवे दाङ्बाए, खे़ने़ॽ पेलि फाक्ने़ल्ले़ खे़प्से़ॽओ, लुङ्माॽ तुक्ताङ्ङे़ॽआङ् पेलिलाम्बा आङ्गाॽ नाःक्तुङ्बा पाःन्हाॽ पिराङ्ङे़ॽओ॥ 8 आसिक्लुङ्माल्ले़ के़याःम्बेओ “खुने़ॽ से़वा मे़त्ते़ॽ” पाःत्तुरो, यहवे दाङ्बाए, आङ्गाॽ से़वा मे़त्ने़रो॥ 9 के़निआल्ले़ के़नारान् मे़जिक्खे़न्ने़ॽओ, के़सिक्पोःक्किल्ले़ मे़नाःत्ताङ् मे़देसाङ्ङिन्ने़ॽओ॥ खे़ने़ॽग आभे़ल्ले़साङ् आङ्गाॽ के़भाॽआरो, आसे़न्लप्दाङ्बा, निङ्वाॽफुमाङ्ङे, आङ्गाॽ मेले़राङ्ङिन्ने़ॽ, मे़नाॽराङ्ङिन्ने़ॽओ॥ 10 आम्मा आम्बासिरे़ आङ्गाॽ मे़ले़त्तासाङ् यहवे दाङ्बे़ल्ले़ आङ्गाॽ कत्तारो॥ 11 यहवे दाङ्बाए, के़लाम्मो लाङ्घेःक्मा हुॽराङ्ङे़ॽओ, आनिङ्मिहाॽरे़ आङ्गाॽ मे़सुक्काबाल्ले़ चोगुल्ले़ कुदोःप्मा लाम्मो आङ्गाॽ लाम्लोसाङ्ङे़ॽओ॥ 12 आङ्गाॽ आनिङ्मिहाॽरे़ खुनिॽ हुक्को आङ्गाॽ थामा मे़बाघाङ्ङिन्ने़ॽओ, थेआङ्भे़ल्ले़ खे़ङ्हाॽरे़ आङ्गाॽ फे़न्याःम्बक् के़जोःक्पा फाॽआङ् आङ्गाॽ पाःन्मे़धिक्कारो हे़क्क्याङ् से़त्तासिगे़ लॽरिक् मे़भे़ःक्कारो॥ 13 आल्लो कुहिङ्वे़त्हाॽरे़ खुनिॽ लाजेॽओ वाॽआल्ले़ के़नुॽबा यहवे दाङ्बान् निसुङ् के़लॽबा आनिङ्वाॽ वाॽरो॥ 14 यहवे दाङ्बान् हाङ्घे़ॽओ॥ के़धुम्बा पोःक्खे़ॽओ, हे़क्क्याङ् के़सिक्लुङ्मो हाङ्हाङ् लॽरे़र आःन्छिङ्ङे़ॽओ॥ यहवे दाङ्बान् हाङ्घे़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.