निङ्वाॽफु साम्लोसुम् 26 - लिम्बुकुदोःप्मा मनाःल्ले़ चोगुबा पेलि दाउदरे़ कुसाम्लो 1 यहवे दाङ्बाए, आङ्गाॽ आप्तिक् मेःन्नेबा चोःक्का फाॽआङ् इःत्ताङ्ङे़ॽओ, थेआङ्भे़ल्ले़ आङ्गाॽ कुदोःप्मा लाम्मो वाॽआरो॥ आङ्गाॽ अयाक् मे़न्लॽए यहवे दाङ्बाओ आनिङ्वाॽ युक्खुङ्ङाङ् वाॽआरो॥ 2 यहवे दाङ्बाए, आसिक्लुङ्मान् नु आङ्गाॽ आनिङ्वाॽइन् साॽरे़ओ॥ हे़क्क्याङ् आङ्गाॽ आक्तङ्बा चोःक्का फाॽआङ् साॽराङ्ङे़ॽओ॥ 3 थेआङ्भे़ल्ले़ आङ्गाॽ सदादिङ् खे़ने़ॽ लुङ्माॽ के़दुक्काबान् निङ्वाॽ इःत्तुङ्लो, हे़क्क्याङ् के़से़क्खाबा लाम्मो आङ्गाॽ चक्मे़ल्लॽए लाङ्घेःक्कारो॥ 4 आङ्गाॽ इङ्ले़क्क्या मनाहाॽनु मे़वाॽआन्लो, हे़क्क्याङ् कुनिङ्वाॽ के़जिःप्पाहाॽनुआङ् मे़वाॽआन्लो॥ 5 फे़न्याःम्बक् के़जोःक्पाहाॽ मे़जुम्बा ते़न्नो मे़जुम्मान्लो, हे़क्क्याङ् कुइगे़भे़म्बाहाॽनुआङ् सोरिक् मे़युङ्ङान्लो॥ 6 यहवे दाङ्बाए, आङ्गाॽ आआप्तिक् होप् फाॽआङ् आहुक्हाॽ वाहप्तुङ्लो, हे़क्क्याङ् खे़ने़ॽओ ले़त्ति तोःम्मादे़न्निन् कब्रिङ् कबुङ्लो॥ 7 नुगे़न् साम्लोन् साम्मे़त्तुङ्ल आङ्गाॽ के़जोगुबा निङ्वाॽ के़माबा याःम्बक्हाॽ मनाहाॽ चे़क्तुङ्सिङ्ल लाङ्घेःक्कारो॥ 8 यहवे दाङ्बाए, खे़ने़ॽ के़वाॽमा हिम्मिन् नु के़मिमिदिङ् ओःप्पादे़न्निन् आसिराॽधाङ्लो॥ 9 लायोबाहाॽनु सोरिक् मे़मे़क्खाङ्ङे़न्ने़ॽओ, हे़क्क्याङ् मना के़से़प्पाहाॽ खुम्दिङ् के़बिरुसिबा हे़क्के मे़मे़त्ताङ्ङिन्ने़ॽओ॥ 10 खे़न् मना के़से़प्पाहाॽ आभे़ल्ले़साङ् फे़न्याःम्बक् मे़जोक्लो, हे़क्क्याङ् स्वाःत्ताङ् याङ् मे़जरो॥ 11 कर आङ्गाॽग आप्तिक्को मे़न्धाए हिङ्ङारो, लुङ्माॽ तुक्ताङ्ङे़ॽआङ् से़ःप्ताङ्ङे़ॽओ॥ 12 यहवे दाङ्बाए, आङ्गाॽग ने़ने़बादे़न्नो ये़प्पारो, के़मनाहाॽ मे़जुम्बालुम्मो के़नारा फोसुङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.