निङ्वाॽफु साम्लोसुम् 24 - लिम्बुपयम् यम्बा हाङ् दाउदरे़ कुसाम्लो 1 इक्सादिङ् खाम्बेःक्मान् नु कॽयो के़वाॽबा के़रे़क् पाःन्हाॽ यहवे दाङ्बे़ल्ले़न्लो हे़क्क्याङ् इक्सादिङ् खाम्बेःक्मोबा के़रे़क् मे़न्छाम् याप्मिहाॽ खुने़ॽ कुमनासिरो॥ 2 इक्सादिङ् खाम्बेःक्मान् वरःङ्सम्धाङ् ने़स्सुआङ् ने़रो, कुदिम्बे केःम्बा च्वाःत् सिगाङ् कल्ले़ कुबुङ् युक्खुआङ् युङ्लो॥ 3 यहवे दाङ्बे़ल्ले़ कुगोःक्माओ आत्तिन् थाःङ् पेःक्मा सुक्पे? हे़क्क्याङ् कुसेसेदे़न्नो हात् ये़प्मा सुक्पे? 4 आत्तिन्हाॽरे़ नुबा याःम्बक् मे़जोगु, निङ्वाॽ सेसे मे़गत्तु हे़क्क्याङ् नावाइत्लाहाॽ से़वा मे़म्मे़त्तुन्छिन्, इङ्ले़क्पा पाःन्नो माङ्मे़न्हे़क्सिङ्ङिन् हाबा खे़ङ्हाॽए थाःङ् पेःक्माआङ् ये़प्मा मे़सुक्लो! 5 यहवे दाङ्बे़ल्ले़ खे़ङ्हाॽ मुॽइसाम् पिरुसिरो, हे़क्क्याङ् खुनिॽ से़न्लप्दाङ्बा निङ्वाॽफुमाङ्ङिल्ले़ खे़ङ्हाॽ साम्योबासि फाॽआङ् मे़त्तुसिरो॥ सेला 6 अक्तङ्बा मनाहाॽरे़ निङ्वाॽफुमाङ्ङिन् मे़गोःत्तुरो, खे़ङ्हाॽ याकुबरे़ कुनिङ्वाॽफुमाङ्ङिल्ले़ कुदगि मे़दारो॥ सेला 7 ताःक्हन्हाॽ हरे़म्मे़ॽ! उनाहुरिबा लाम्धेःप्पाहाॽ हरे़म्मे़ॽओ, मिमिदिङ्गे़न् पयम् हाङ्ङिन् खे़प्मोलाम्बा लाःत्लरो॥ 8 मिमिदिङ्गे़न् पयम् हाङ्ङिन् हाःप्पे? खुने़ॽग थङ् के़नाःम्बा मुक्साम्दाङ्बा नु मुक्के़गुबा आनिॽ यहवे दाङ्बान्लो॥ 9 ताःक्हन्हाॽ हरे़म्मे़ॽ! उनाहुरिबा लाम्धेःप्पाहाॽ हरे़म्मे़ॽओ, मिमिदिङ्गे़न् पयम् हाङ्ङिन् खे़प्मोलाम्बा लाःत्लरो॥ 10 मिमिदिङ्गे़न् पयम् हाङ्ङिन् हाःप्पे? के़रे़क्नुःल्ले़ मुक्साम्दाङ्बा यहवे दाङ्बान्ने मिमिदिङ्गे़न् पयम् हाङ्लो॥ सेला |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.