निङ्वाॽफु साम्लोसुम् 20 - लिम्बुहाङ्ङिल्ले़ कुलागि पेलि साम्लो के़हुॽबाल्ले़ लागि दाउदरे़ कुसाम्लो 1 ये़त्तुक्खे के़दुमुल्ले़ यहवे दाङ्बे़ल्ले़ के़बेलिन् खे़प्सुररो, याकुबरे़ कुनिङ्वाॽफुमाङ्ङिल्ले़ के़से़ःप्लरो॥ 2 खुने़ॽ कुमाङ्हिम्मोलाम् के़भाॽसे़ युररो, हे़क्क्याङ् सियोन कोःक्माओलाम् के़धुम्बा के़जोःक्लरो॥ 3 के़जोगुबा सिदुङ्जभाहाॽ खुने़ॽ निङ्वाॽ इःत्तुररो, हे़क्क्याङ् के़दोःन्दुबा मिधिङ्मनादेमनाबा ले़त्तिङ् ताःक्तुररो॥ सेला 4 के़निङ्वाॽओ के़इःत्तुबा पाःन्हाॽ खुने़ॽए के़त्तु के़बिररो, हे़क्क्याङ् चोःक्मा के़इःत्तुबा याःम्बक्हाॽ कुलिङ्दो के़त्तु के़बिररो॥ 5 थङ् के़नाःन्दुबाओ सःत्तिगे़र इहुहु लॽरिगे़रो, हे़क्क्याङ् आनिगे निङ्वाॽफुमाङ्ङिल्ले़ कुमिङ्ङो आनिगे निसान थाःङ् फोःक्खुम्बे़रो॥ पेलिगे़न् तुवाओ के़नाःक्तुबा के़रे़क् पाःन्हाॽ यहवे दाङ्बे़ल्ले़ खे़ने़ॽ के़त्तु के़बिररो॥ 6 आल्ल आङ्गाॽ निङ्वाॽ खोसुङ्लो, यहवे दाङ्बे़ल्ले़ खुने़ॽ सेःन्दुबा हाङ्ङिन् फाॽरुरो॥ सेसेबा साङ्ग्राम्पेदाङ्लाम्बा निङ्वाॽफुमाङ्ङिल्ले़ नुगप् पिरुरो, हे़क्क्याङ् से़न्लप् के़बिबा कुजुप्साङ् हुक्किल्ले़ कुमुक्साम्लाम् खुने़ॽ थङ् के़नाःम्बा चोगुरो॥ 7 कुभा मनाहाॽरे़ थक्सुबा नु फे़जुम्भे़याःल्ले़ थङ् नाःन्दे़त् के़लॽबा मे़इःत्तुरो, कर यहवे दाङ्बा निङ्वाॽफुमाङ्ङिल्ले़ कुमुक्साम्लाम् थङ् थक्मा नाःन्दे़त् फाॽआङ् आनिगे इःत्तुम्बे़रो॥ 8 खे़न् थक्सुबाहाॽ खुनिॽ थनाले़ङ्ङाङ् मे़जोन्लो, कर आनिगे़ग थधप्पाङ् मे़ल्लॽए ये़बिगे़रो॥ 9 यहवे दाङ्बाए, हाङ्ङिन् थङ् के़नाःम्बा चोगे़ॽओ, आनिगे आभाॽरे़ फाॽआङ् अःक्तिगे़ल्ले़ खे़प्से़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.