निङ्वाॽफु साम्लोसुम् 2 - लिम्बुनिङ्वाॽफुमाङ्ङिल्ले़ सेगुबा हाङ् 1 थेआङ् इक्सादिङ् खाम्बेःक्मोबा मे़न्छाम् सुवाङ्हाॽरे़ खुनिॽ सिक् पोःक्पाबे? थेआङ् खे़न् मनाहाॽ हने़बा चे़म्भन् मे़जोःक्पाबे? 2 इक्सादिङ् खाम्बेःक्मोबा हाङ्हाॽ थिक्हुप् मे़बोःक्खे़आङ् इङ्मे़दङ्घुरो हे़क्क्याङ् यहवे दाङ्बा नु खुने़ॽ सेगुबा कुहाङ्ङिल्ले़ कुदक्ले़ङ्वाओ हाङ्बिफ्युङ् मे़जोगुरो॥ 3 खे़ङ्हाॽरे़ अक्खे मे़बाःत्तुरो, “खुन्छिॽ युक्कोलाम् चोःक्युम्भोबा पोःक्खिरो, इआम्घेःक्खे़बा इघेःङ्हाॽ फुॽरुम्लो॥” 4 साङ्ग्राम्पेदाङ्बा हाङ्युक्नाओ के़युङ्बा यहवे दाङ्बे़ल्ले़ खे़ङ्हाॽ खे़प्सुसिरो, हे़क्क्याङ् मे़न्छाम् सुवाङ्हाॽरे़ खुनिॽ हने़बा चे़म्भन्निन् निसुआङ् एःत्लो॥ 5 हे़क्क्याङ् कुसिक् पोःक्मो खे़ङ्हाॽ फे़ःक्तुसिरो, साॽरिक् कुसिक् पोःक्मो खे़ङ्हाॽ मे़गिर याःन्दुसिरो॥ 6 यहवे दाङ्बे़ल्ले़ इङ्भन् चोगुरो, “आङ्गाॽ आहाङ्ङिन् आसेसे कोःक्मा यरुसले़ःम्मो हाङ् चोगुङ्ङाङ् वाॽरो॥” 7 यहवे दाङ्बे़ल्ले़ कुइङ्जाङ्ङिन् आङ्गाॽ इङ्भोसुङ्लो, “खे़ने़ॽग आबुगे़न् आस्साने़रो, आइन् आङ्गाॽ पानुदिङ् के़म्बा पोःक्खाङ्ङाङ् वाॽआ लॽरिक् खुने़ॽ मे़त्ताङ्लो॥ 8 आङ्गाॽ खे़ने़ॽ नाःक्ताङ्ङे़ॽओ, इक्सादिङ् खाम्बेःक्मोबा सुवाङ्हाॽ के़लक् चोगुङ्सिङ् पिने़रो, हे़क्क्याङ् काक् इक्सा खाम्बेःक्किन् खे़ने़ॽइन् चोगुङ् पिने़रो॥ 9 फे़न्जेॽ तक्काःत्नु खे़ङ्हाॽ युक् के़जोगुसिरो, फुजिक्किन् कुइसिक् खे़ङ्हाॽ के़यःप्सुसिॽरो॥” 10 खे़ल्ले़चोगुल्ले़, आल्ल हाङ्से, सिक्कुम्साबा पोःक्खे़म्मे़ॽओ, कन् इक्साओ हाङ्गे़जोःक्पासे, सिङ्सिङ् ये़क्ये़क् लॽरे़म्मे़ॽओ॥ 11 किसे़म्मे़ॽर यहवे दाङ्बे़ल्ले़ कुसे़वा चोगे़म्मे़ॽओ, हे़क्क्याङ् यक्खे़म्मे़ॽर ओमु लॽरे़म्मे़ॽओ॥ 12 आबुगे़न् कुस्सान् मिङ्सो इङ्धाङ् पिरे़म्मे़ॽओ, मेःन्ने़भग्र यहवे दाङ्बे़ल्ले़ कुसाक्के़न् पोःक्काङ् हक्चघत् खिनिॽ मे़म्भै के़जोगिरो॥ कर से़ःप्सिङ्से़ खुने़ॽओ के़बेःक्पाहाॽ के़रे़क् मुॽइसाबासिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.