निङ्वाॽफु साम्लोसुम् 17 - लिम्बुफोत्या मेःन्नेबा मनाःल्ले़ कुबेलि दाउदरे़ कुबेलि 1 यहवे दाङ्बाए, आङ्गाॽ फाॽराङ्ङे़ॽ फाॽआङ् यम्बा इक्लाओ अःक्काल्ले़ खे़प्से़ॽओ! आङ्गाॽ कुदोःप्मा खासे़न्निन् खोसुङ्ल फाॽआङ् कुदोःप्माआङ् चोगुङ्बा आबेलिन् खे़प्से़ॽओ॥ 2 फोत्या मेःन्नेबा चोःक्काबा पाःन्निन् खे़ने़ॽए पाःत्ते़ॽओ, थेआङ्भे़ल्ले़ खे़ने़ॽए से़क्खा पाःन्निन् के़निसुरो॥ 3 खे़ने़ॽ आसिक्लुङ्मान् के़निसुरो, हे़क्क्याङ् खे़ने़ॽ से़न्दिक्काङ् के़द्ये़रो हे़क्क्याङ् के़साॽराङ्ङाङ् वाॽआरो॥ हे़क्केसाङ् थेआङ् फोत्या आङ्गाॽओ के़ङ्घोसुल्लो, थेआङ् फे़न्पान् मे़बाःत्तान् के़लॽबा निङ्वाॽ कत्तुङ्लो॥ 4 के़बाःन्जाःक्हाॽ इःत्तुङ् नाःत्तुङ्ङाङ् वाॽआरो, खे़माॽ के़जोःक्पा मनाहाॽ हे़क्के ताप्फे़ःम्बा लाम्मो मे़वाॽआन्लो॥ 5 खे़ने़ॽ ओसेःन्गे़धाक्ताङ्बा लाम्मो नुरिक्काङ् लाङ्घेःक्कार वाॽआरो, हे़क्क्याङ् खे़न् लाम्मिन् आभे़ल्ले़आङ् मे़न्ले़त्ते वाॽआरो॥ 6 निङ्वाॽफुमाङ्ङे, आङ्गाॽ खे़ने़ॽ उःत्ने़रो, थेआङ्भे़ल्ले़ खे़ने़ॽ नुगप् के़बिआरो॥ आङ्गाॽ ले़प्माङ् हिसिङ्ङे़ॽआङ् आङ्गाॽ आबेलिन् खे़प्साङ् पिराङ्ङे़ॽओ॥ 7 निङ्वाॽमार खे़ने़ॽ याप्मि लुङ्माॽ आग्दुक्लो, हे़क्क्याङ् मनाहाॽ खुनिॽ निङ्मिहाॽलाम्बा से़ःप्सिङ्से़ खे़ने़ॽओ मे़दाःल्ले़ के़से़ःप्तुसिरो॥ 8 के़मिक्हाङ्मा कुइसिःक्के से़ःप्ताङ् कत्ताङ्ङे़ॽओ, के़बेसाङ् कत्ताङ्ङे़ॽओ हे़क्केःल्ले़ से़ःप्सिङ्ङारो॥ 9 कुॽइगे़भे़म्बा मनाहाॽलाम् हे़क्क्याङ् याप्मि के़नाप्पा से़प्मा फाॽआङ् याप्मि किर्गप् के़गप्पा नु आङ्गाॽ आनिङ्मिहाॽलाम्बा चिक्खाङ्ङे़ॽओ॥ 10 खे़ङ्हाॽरे़ वेॽहाॽ लुङ्माॽ मे़न्दुक्तुन्सिन्लो, हे़क्क्याङ् मे़हे़न्छिङ्ङाङ् मे़बाःत्लो॥ 11 खे़ङ्हाॽरे़ मे़नाःत्ताङ् मे़नाःत्ताङ्ङाङ् आङ्गाॽ मे़सिॽराङ्ङाङ् वाॽआरो॥ खे़ङ्हाॽरे़ सोःम्मा नु थाम्मा फाॽआङ् आङ्गाॽ मे़सुक्कार मे़वाॽरो॥ 12 खे़ङ्हाॽग साक्किल्ले़ के़यङ्बा केबा हे़क्तङ्बा मे़जोक्लो, खे़ङ्हाॽरे़ थे़ःङ्मा से़प्मा फाॽआङ् आङ्गाॽ मे़सुक्कार मे़वाॽरो॥ 13 यहवे दाङ्बाए त्ये़ॽओ, आनिङ्मिहाॽनु थक्ते़ॽआङ् खे़ङ्हाॽ नाःन्दे़से़ॽओ॥ आबाङे के़दाभेःल्ले़ कुइगे़भे़म्बाहाॽलाम् आङ्गाॽ ताङ्से़ःप्ताङ्ङे़ॽओ॥ 14 यहवे दाङ्बाए, कन् इक्सा खाम्बेःक्को याङ्साकुन्धेःन्ने के़रे़क्नुःल्ले़ यम्बा पान् लॽरिक् के़इःप्पा मनाहाॽलाम्बा के़हुक्किल्ले़ से़ःप्ताङ्ङे़ॽओ॥ कर के़सिराॽ के़धाङ्बा मनाहाॽरे़ खुनिॽ से़त्लाःक्किल्ले़ के़घाःत्तुसिरो, हे़क्क्याङ् खे़ङ्हाॽरे़ खुनिॽ साहाॽरे़ यरिक् मे़घोसुरो॥ खे़ब्याङ् खे़ङ्हाॽरे़ खुनिॽ मे़न्छाॽहाॽरे़ लागिआङ् यरिक् याङ्साकुन्धे मे़सुप्सुआङ् मे़लुप्सुरो॥ 15 हे़क्क्याङ् आङ्गाॽग खे़ने़ॽ निमा सुक्ने़रो थेआङ्भे़ल्ले़ थेआङ् ताप्फे़ःम्बा पान् आङ्गाॽ मे़न्जोःक्के वाॽआरो॥ आङ्गाॽ इम्माआङ् सोआल्ले़ खे़ने़ॽ के़नारान् निसुङ्ङाङ् आनिङ्वाॽ तारो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.