निङ्वाॽफु साम्लोसुम् 147 - लिम्बुमुक्साम्दाङ्बाल्ले़ कुनारा फोमा 1 यहवे दाङ्बे़ल्ले़ कुनारा फोसे़म्मे़ॽओ! आनिॽ निङ्वाॽफुमाङ्ङिल्ले़ कुनारा फोमार साम्लोमा साॽरिक् नुबा पाःन्लो, खुने़ॽ कुनारा फोमाग चाॽरिक् खे़म्दुलाॽरुरो हे़क्क्याङ् निङ्वाॽ के़दाबा चोक्लो॥ 2 यहवे दाङ्बे़ल्ले़ यरुसले़ःम्मिन् याम्मो चोगुरो, हे़क्क्याङ् वेॽ लाजेॽओ पुङ्लाधाबा के़बोङ्बाआङ् के़बेःक्पाहाॽ सुप्सु तारुसिरो॥ 3 खुने़ॽग कुनिङ्वाॽ के़दुक्पाहाॽ खुन्छिॽ निङ्वाॽ तासु पिरुसिरो, हे़क्क्याङ् खे़ङ्हाॽरे़ खुनिॽ याङ्घेःक्हाॽ सिदाॽपाङ्दाॽ मे़त्तु पिरुसिरो॥ 4 खुने़ॽग खेःम्सिक्पाहाॽ आक्ख्यारिक् मे़बत् फाॽआङ् निरुसिरो, हे़क्क्याङ् थिक्काङ् मेःन्ने के़रे़क् मिङ् वाःत्तुसिरो॥ 5 आनिॽ यहवे दाङ्बान् पयम् यम्बा चोक्लो, खुने़ॽ मुक्साम्साबा चोक्लो हे़क्क्याङ् खुने़ॽ कम्भ्यारिक् सिक्कुम्साबा चोक् फाॽआङ् हाःत्ले़आङ् पाःप्मा मे़सुक्तुल्लो॥ 6 यहवे दाङ्बे़ल्ले़ नःम्नःम्बाहाॽ थाःङ् फोःक्खुसिरो, कर ताक्के़भे़ॽबाहाॽ खाम्बाङ्ङो लाप्फुसुसिरो॥ 7 साम्लोरे़म्मे़ॽर यहवे दाङ्बान् नुगे़न् पिरे़म्मे़ॽओ, तुःङ्गे मुक्खे़म्मे़ॽर आनिॽ निङ्वाॽफुमाङ्ङिल्ले़ कुनारा फोसे़म्मे़ॽओ॥ 8 खुने़ॽग ताङ्साक्पान् खाॽमिःत्तिल्ले़ ते़प्तुरो, हे़क्क्याङ् इक्सा खाम्बेःक्मो वहित् थासुरो, हे़क्क्याङ् थे़गुहाॽओ खुने़ॽ याःन्सुङ् लिङ्ल याःन्दुरो॥ 9 खुने़ॽ थक्साहाॽ कुजा पिरुसिरो, हे़क्क्याङ् साक्मे़न्जा के़युङ्बा काःक्वाःल्ले़ कुस्साहाॽरे़ मे़उःत्तुल्ले़ खुने़ॽ चाउप्तुरुसिरो॥ 10 खुने़ॽग के़धुम्बा अन्हाॽरे़ कुनिङ्वाॽ मे़न्दासुल्लो, हे़क्क्याङ् मुक्के़गुबा मनाहाॽआङ् कुसिराॽ मे़न्धाङ्ने़ल्लो॥ 11 कर यहवे दाङ्बान् मिङ्सो इङ्धाङ् के़बिबाहाॽनु कुनिङ्वाॽ तारो, हे़क्क्याङ् खुने़ॽ चक्मे़ल्लॽए लुङ्माॽ तुक्तुसिबा पाःन्नो निङ्वाॽ के़युङ्बाहाॽनु सःत्लो॥ 12 यरुसले़ःम्मो के़युङ्बासे, यहवे दाङ्बान् मिङ्सो इङ्धाङ् पिरे़म्मे़ॽओ! सियोनओ के़युङ्बासे, निङ्वाॽफुमाङ्ङिल्ले़ कुनारा फोसे़म्मे़ॽओ! 13 थेआङ्भे़ल्ले़ खिनिॽ ये़क्यक्कोबा लाम्धेःप्पाहाॽ थधप् मे़ल्लॽमनाबा चोगु के़बिरिरो, हे़क्क्याङ् सियोन ये़क्यक्को के़वाॽबा मनाहाॽ खुने़ॽ हाङ्वामुॽइ पिरुसिरो॥ 14 खुने़ॽ के़इःन्दोहाॽ कम्ब्राङ् मे़त्तु के़बिरो, हे़क्क्याङ् के़रे़क्नुःल्ले़ नुबा मासिःल्ले़ खे़ने़ॽ के़निङ्वाॽ तासु के़बिरो॥ 15 खुने़ॽ इक्सादिङ् खाम्बेःक्मान् इङ्जाङ् पिरुरो, हे़क्क्याङ् खुने़ॽ कुबाःन्जाक्किल्ले़ खिमो याःम्बक् चोगुरो॥ 16 खुने़ॽग कुभरा खाम्देःत्तिल्ले़ खाम्मिन् ते़प्तुबा कुइसिक् नाःङ् थार याःन्दुरो, हे़क्क्याङ् सेःक्वान् खाप्पु कुइसिक् से़सुरो॥ 17 खुने़ॽ वघोरुङ् हे़क्तङ्बा फःन् थार याःन्दुरो, खुने़ॽ पाङ्घु तासुबा चुङ्ङिन् हाःत्ले़आङ् थम्मा मे़सुक्तुल्लो॥ 18 खुने़ॽ खे़न् नाङ्, सेःक्वाहाॽ योःन्दे़ॽ मे़त्तुल्ले़ योःन्लो, खुने़ॽ सुरित् केजङ् हुर याःन्दुआङ् च्वाःत् वगुमा हेःक्लो॥ 19 खुने़ॽ कुबाःन्जाक्किन् याकुबे़न् पिरुरो, हे़क्क्याङ् कुइङ्जाङ् नु कुधिम्हाॽ इस्राइले़न् ओसेःन्धाक्तुआङ् वाॽरो॥ 20 खुने़ॽ इक्सादिङ् खाम्बेःक्मोबा मे़न्छाम् सुवाङ्हाॽरे़ लागिग अक्तङ्बा याःम्बक्हाॽ मे़न्जोःक्के वाॽरो, खे़ङ्हाॽरे़ खुने़ॽ कुधिम्हाॽ मे़ल्ले़सुल्लो, यहवे दाङ्बे़ल्ले़ कुनारा फोसे़म्मे़ॽओ! |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.