निङ्वाॽफु साम्लोसुम् 145 - लिम्बुनाराफोमा साम्लो दाउदरे़ कुसाम्लो 1 निङ्वाॽफुमाङ् आहाङ्ङे, पयम् यम्बा के़जोक् फाॽआङ् के़मिङ्सो के़धाःङ्सो चोगुङ्लो, आङ्गाॽ सदादिङ् खे़ने़ॽ के़नारा फोसुङ्लो॥ 2 थिक्याःन्धक् आङ्गाॽ के़नारा फोसुङ्लो, हे़क्क्याङ् आङ्गाॽ साम्लोआर सदादिङ् के़मिङ्सो के़धाःङ्सो चोगुङ्लो॥ 3 यहवे दाङ्बान् पयम् यम्बा चोक्लो, हे़क्क्याङ् कुनारा फोमा साॽरिक् लाॽरुरो॥ खुने़ॽ कम्भ्यारिक् यम्बा चोक् फाॽआङ् हाःत्ले़आङ् कुसिङ् निःप्मा मे़सुक्तुल्लो॥ 4 थिक् थाःक्लाम् के़दाबाहाॽरे़ ताःन्दि के़दाबा वेॽसमा थाःक्हाॽ के़याःम्बक्किन् नुबा चोक् फाॽआङ् मे़मे़त्तुसिरो, खे़ङ्हाॽरे़ मुक्साम्साबा के़याःम्बक्किन् साॽरिक् मिङ्सो इङ्धाङ् मे़बिरुरो॥ 5 खे़ङ्हाॽरे़ के़मिमिदिङ् नु के़हाङ्वा के़माङ्वारे़ पाःन्हाॽ मे़जे़क्खु मे़बाःत्तुरो, हे़क्क्याङ् आङ्गाॽ निङ्वाॽ के़माबा के़याःम्बक्हाॽ आमिक्किन् इम् मे़त्तुङ्ङाङ् निङ्वाॽ इःत्तुङ्लो॥ 6 के़रे़क् मे़न्छाम् सुवाङ्हाॽरे़ मुक्साम्साबा के़याःम्बक्हाॽ मे़जे़क्खु मे़बाःत्तुरो, हे़क्क्याङ् आङ्गाॽ पयम् यम्बा के़याःम्बक्हाॽ यम्बा इक्लाओ पोधक् चोगुङ्लो॥ 7 खे़ने़ॽ साॽरिक् के़नुॽबा के़जोःक्पा पाःन्निन् खे़ङ्हाॽरे़ मे़सःत्ल मे़बाःत्तुरो, हे़क्क्याङ् खे़ने़ॽ साम्योबा के़जोःक्पा पाःन्नो खे़ङ्हाॽ तियाहा मे़लॽर साम्मे़लोरो॥ 8 यहवे दाङ्बान् के़नुॽबा नु लुङ्माॽ आदुक्दुक्पा चोक्लो, हारा कुसाक्के़न् मे़न्जम्मनाबा नु आभे़ल्ले़साङ् याप्मि मिःम्जि आमे़प्मे़प्पा चोक्लो॥ 9 यहवे दाङ्बान् के़रे़क् सम्धाङ् नुॽमादामा के़दाःप्पा चोक्लो, हे़क्क्याङ् खुने़ॽ नावागे़न् चइःत् चोगुसिबाहाॽ के़रे़क् कुलुङ्माॽ मे़दुक्लो॥ 10 यहवे दाङ्बाए, खे़ने़ॽ नावागे़न् चइःत् के़जोगुसिबा के़रे़क्ले़ के़नारा मे़भोसुरो, हे़क्क्याङ् खे़ने़ॽ के़सेसे मनाहाॽरे़ मिङ्सो इङ्धाङ् के़म्बिरो॥ 11 के़हाङ्जुम्मोबा मिमिदिङ्ङिन् खे़ङ्हाॽरे़ मे़जे़क्खु मे़बाःत्तुरो, हे़क्क्याङ् के़मुक्साम्मिन् पोधक् मे़जोगुरो॥ 12 हे़क्केलॽरिक् के़रे़क् मे़न्छाम् सुवाङ्हाॽरे़ मुक्साम्साबा के़याःम्बक्हाॽ निङ्वाॽ मे़घोसुरो, हे़क्क्याङ् के़हाङ्जुम्मोबा मिमिदिङ्गे़न् हाङ्वा माङ्वान् कुसिङ् मे़निःत्तुरो॥ 13 खे़ने़ॽ के़हाङ्जुम्मिन् आप्फाल्ले़आङ् मे़न्नुप्मनाबा चोक्लो, हे़क्क्याङ् के़हाङ्युक्किन् थाःक्थाःक्को थारिक् वाॽरो॥ यहवे दाङ्बान् कुमाङ्हुप् पाःन्नो नसाःन्साबा चोक्लो, हे़क्क्याङ् खुने़ॽ चोगुसिबा नावागे़न् चइःत्हाॽ लुङ्माॽ तुक्तुसिरो॥ 14 यहवे दाङ्बे़ल्ले़ तुक्खे के़जाबाहाॽ के़रे़क् फाॽरुसिरो, कक्किल्ले़ के़प्तुसिबाहाॽ के़रे़क् फोःक्खुसिरो॥ 15 कुहिङ्वे़त् के़रे़क्ले़ खे़ने़ॽ ओगे़म्मे़त्लो, हे़क्क्याङ् खे़ङ्हाॽ चाहाब् मे़जोःक्किल्ले़ खे़ने़ॽ कुजा के़बिरुसिरो॥ 16 खे़ने़ॽ के़हुक्किन् के़भाःक्खुरो, हे़क्क्याङ् खे़ने़ॽ के़घाःत्तुसिआङ् खे़ङ्हाॽरे़ खुनिॽ सिक्एःप्तुरो॥ 17 खुने़ॽ चोगुबा के़रे़क् कुबाःन्नो यहवे दाङ्बान् साम्योबा चोक्लो, हे़क्क्याङ् खुने़ॽ चोगुसिबा के़रे़क् नावागे़न् चइःत्हाॽ लुङ्माॽ तुक्तुसिरो॥ 18 यहवे दाङ्बाङ्ग खुने़ॽ पेलि के़भाक्पाहाॽरे़ खुनिॽ पेसाङ् वाॽरो, हे़क्क्याङ् कुदोःप्माआङ् खुने़ॽ के़उःप्पाहाॽरे़ खुन्छिॽ निःत्ताङ् खुने़ॽ वाॽरो॥ 19 खुने़ॽ मिङ्सो इङ्धाङ् के़बिबाहाॽरे़ मे़इःत्तुबा के़रे़क् पाःन्हाॽ के़त्तु पिरुसिरो॥ खे़ङ्हाॽरे़ खुने़ॽ पेलि मे़भाक्तुबान् खे़प्सुरो, हे़क्क्याङ् खे़ङ्हाॽ खुने़ॽ से़ःप्तुसिरो॥ 20 यहवे दाङ्बान् मिःम्जि के़मे़प्पाहाॽ के़रे़क् खुने़ॽ कम्ब्राङ् मे़त्तुसिरो, कर ताक्के़भे़ॽबाहाॽ के़रे़क् खुने़ॽ मे़क्खुसिरो॥ 21 आङ्गाॽ आप्फाल्ले़साङ् यहवे दाङ्बान् कुनारा फोसुङ्लो, खुने़ॽ नावागे़न् चइःत् चोगुसिबा के़रे़क्ले़ कुसेसे मिङ्ङिन् सदादिङ् मिङ्सो इङ्धाङ् मे़बिरुररो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.