निङ्वाॽफु साम्लोसुम् 144 - लिम्बुथङ् नाःम्मारे़ लागि पेलि दाउदरे़ कुसाम्लो 1 आङ्गाॽ याप्मि कम्ब्राङ् के़मे़प्पा याक्पेॽ, यहवे दाङ्बे़ल्ले़ कुनारा फोसे़म्मे़ॽओ॥ थङ् चोःक्मारे़ लागि आङ्गाॽ खुने़ॽए हुॽआरो, हे़क्क्याङ् थङ् थक्मारे़ लागि यारिप् चोःक्कारो॥ 2 खुने़ॽग आङ्गाॽ याप्मि लुङ्माॽ के़दुक्पा आनिङ्वाॽफुमाङ्लो, हे़क्क्याङ् आङ्गाॽ आइःम्सिङ्मादे़न् आमाङ्गे़न्ना यक् नु आसे़न्लप्दाङ्बारो॥ खे़ब्याङ् खुने़ॽग आङ्गाॽ याप्मि के़से़ःप्पा आघोरो॥ खुने़ॽ इक्सादिङ् खाम्बेःक्मोबा मे़न्छाम् सुवाङ्हाॽ आयुक्को तारुसिरो॥ 3 यहवे दाङ्बाए, मे़न्छाम् याप्मिहाॽ थेसिआङ् खे़ङ्हाॽ कम्ब्राङ् के़मे़त्तुसिर पोङ्बाबे? नासिङ्गे़न् थक्लाओ के़वाॽबा मे़न्छाम्साहाॽ हाःत्छिआङ् खे़ङ्हाॽ निङ्वाॽ के़इःत्तुसिर पोङ्बाबे? 4 मनाहाॽग हे़ङ्गे़ःक्पा सक्मा हे़क्तङ्बासिरक्लो, खे़ङ्हाॽरे़ खुनिॽ ये़म्मिङ्ग के़माबा के़बेःक्पा साम्म्रिःप्पा हे़क्केरक् लॽरो॥ 5 यहवे दाङ्बाए, के़साङ्ग्राम्पेदाङ्ङिन् हन्दे़ॽआङ् यो थ्ये़ॽओ, थे़गुहाॽ सुसे़ॽओ, हे़क्क्याङ् खे़प्मोलाम्बा मिःक्खोॽ लःन्धाङ्लरो॥ 6 खे़ने़ॽ साःम्भे ले़क्ल याःन्दे़ॽओ हे़क्क्याङ् आङ्गाॽ आनिङ्मिहाॽ फुल्लुम् थ्यःङ् से़से़देसे़से़ॽओ॥ खे़ने़ॽ के़दोःङ्ङिल्ले़ खे़ङ्हाॽ आबे़से़ॽआङ् पुबेलाप्सा नाःत्ते़से़ॽ॥ 7 थोलाम्बा खे़ने़ॽ के़हुक्किन् सःन्छे़ॽओ, हे़क्क्याङ् कुदिम्बे केःम्बा च्वाःत्तोनु उःक्खाङ् लःत्ताङ्ङे़ॽआङ् से़ःप्ताङ्ङे़ॽओ, वेॽ लाजेॽबा आनिङ्मिहाॽलाम्बा से़न्दाङ्ङे़ॽओ॥ 8 खे़ङ्हाॽ आप्फाल्ले़आङ् से़क्खाबा पान् मे़म्बाःत्ने़ल्लो, माङ्मे़हे़क्सिङ्ङाङ्साङ् इङ्ले़क् मे़बाःत्लो॥ 9 निङ्वाॽफुमाङ्ङे, खे़ने़ॽओ आङ्गाॽ लत्छा कुसङ् साम्लोधिक् साम्मे़त्तुङ्लो, अन्मे खिङ्मनाबा मुक्लाःन् हिप्तुङ्ल आङ्गाॽ के़नारा फोसुङ्लो॥ 10 खे़ने़ॽ हाङ्हाॽ थङ् के़नाःम्बा के़जोगुसिरो, हे़क्क्याङ् के़से़वारोबा दाउद हाङ्ङिन् किप्मा के़घुबा ताभेलाम्बा के़से़ःप्तुरो॥ 11 आजे़ःत्छिक्काङ् कुलुङ्माॽ स्याःत् मे़ल्लॽमनाबा वेॽ लाजेॽबा आनिङ्मिहाॽलाम्बा से़न्दाङ्ङे़ॽओ, हे़क्क्याङ् माङ्मे़हे़क्सिङ्ङाङ्साङ् खे़ङ्हाॽ इङ्ले़क् मे़बाःत्लो॥ 12 हे़क्केःल्ले़ के़बोबार के़बप्पा आनिगे ये़म्बित्छासाहाॽ के़हुःक्पा के़धाङ्बा सिङ्बुङ् कुइसिक् मे़बोमे़धाङ्लो, हे़क्क्याङ् आनिगे मे़न्छुमा साहाॽ हाङ्हिम्मो फुङ्लक्मानाबा के़घे़म्सिङ्बा सित्लाङ् कुइसिक् मे़बोङ्लो॥ 13 आनिगे चायाङ्मा थाःङ्हाॽ के़रे़क् परिक्पा चाहाॽरे़ तिम्लो, आनिगे मे़ल्लुक्हाॽ हे़न्छिङ् हे़न्छिङ् यारिक् मे़बोङ्लो हे़क्क्याङ् आनिगे इक्ताप्हाॽओ मे़वाॽरो॥ 14 आनिगे पित्हाॽरे़ सामे़ल्ले़म्मे यरिक् मे़धाप्तुसिरो॥ आनिगे ये़क्यक्कोबा लुङ्धाक्हाॽ मे़धुप्ने़ल्लो, हे़क्क्याङ् आनिगे पुङ्लाधाबा पोङ्माआङ् पेःक्मा मे़बोङ्ने़ल्लो, आनिगे माराम्हाॽओ के़हाःप्पा के़जिङ्बाआङ् खे़म्मे़न्दे़त्ने़ल्लो॥ 15 हे़क्तङ्बा मनाहाॽग मुॽइसाबासिरो॥ यहवे दाङ्बान् खे़ङ्हाॽरे़ खुनिॽ निङ्वाॽफुमाङ्लो, खे़ङ्हाॽ मुॽइसाबासिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.