निङ्वाॽफु साम्लोसुम् 140 - लिम्बुसे़ःप्सिङ्मारे़ लागि पेलि फाक्मा साम्लो के़हुॽबाल्ले़ लागि दाउदरे़ कुसाम्लो 1 यहवे दाङ्बाए, ताक्के़भे़ॽबा मनाहाॽलाम्बा आङ्गाॽ से़ःप्ताङ्ङे़ॽओ॥ आहिप्हिप्पा आधक्धक्पा मनाहाॽलाम् आङ्गाॽ नाङाङ्ङे़ॽओ॥ 2 खे़ङ्हाॽरे़ आभे़ल्ले़साङ् ताप्फे़ःम्बा चोःक्मा निङ्वाॽ मे़इःत्तुरो, हे़क्क्याङ् थिक्याःन्धक् खे़माॽ मे़भोःक्खुरो॥ 3 असेःक्किल्ले़ मनाहाॽ अगुसिबा कुइसिक् खे़ङ्हाॽरे़ पाःन्निल्ले़ मनाहाॽ मे़अगुसिरो, खे़ङ्हाॽरे़ मे़बाःत्तुबा के़रे़क् पाःन्निङ्ग असेःक्किल्ले़ कुनिङ् हे़क्तङ्बा चोक्लो॥ सेला 4 यहवे दाङ्बाए, कुइगे़भे़म्बाहाॽरे़ खुनिॽ हुक्कोनु खे़ने़ॽ आङ्गाॽ से़ःप्ताङ्ङे़ॽओ, आहिप्हिप्पा आधक्धक्पा मनाहाॽलाम् खे़ने़ॽ आङ्गाॽ नाङाङ्ङे़ॽओ, खे़ङ्हाॽरे़ आङ्गाॽ फे़त्लाॽसिर के़लॽबा पाःन्मे़दङ्घुरो॥ 5 आङ्दिङ् के़लॽबा मनाहाॽरे़ इमे़युक्ताङ्ङाङ् ने़रो, खे़ङ्हाॽरे़ खुनिॽ इजोन् मे़गे़सुआङ् ने़रो, हे़क्क्याङ् आङ्गाॽ ते़म्मारे़ लागि आलाम्मो इस्रुप्पा थाक्पान् मे़भत्छुआङ् पत्लो॥ सेला 6 यहवे दाङ्बाए, आङ्गाॽ खे़ने़ॽ मे़त्ने़रो, “खे़ने़ॽग आङ्गाॽ आनिङ्वाॽफुमाङ्ने़रो॥” आनिङ्वाॽफुमाङ्ङे, लुङ्माॽ तुक्ताङ्ङे़ॽओ फाॽआङ् पेलि फाक्ने़बान् खे़प्से़ॽओ॥ 7 यहवे दाङ्बा निङ्वाॽफुमाङ्ङे, खे़ने़ॽग मुक्साम्दाङ्बा आसे़न्लप्दाङ्बाने़रो, ते़न्धङ्ङो आध्गेक्के़न् कम्ब्राङ् के़मे़त्तुॽरो॥ 8 यहवे दाङ्बाए, कुइगे़भे़म्बाहाॽरे़ चोःक्मा मे़इःत्तुबा पाःन्हाॽ खे़ने़ॽ के़प्मा मे़बाङ्घे़न्ने़ॽओ, खे़ङ्हाॽरे़ चोःक्मा मे़गोःत्तुबान् पोङ्मा मे़भाःक्ते़न्ने़ॽओ मेःन्ने़भग्र खे़ङ्हाॽ आङ्दिङ् मे़लॽरो॥ सेला 9 आनिङ्मिहाॽ आङ्गाॽ नाःम्मा मे़भाःक्ते़से़न्ने़ॽओ, खे़ङ्हाॽरे़ आङ्गाॽ “हिप्पा से़त्तासिगे़रो” मे़मे़त्ताङ्बा पाःन्हाॽ खुनिॽ सम्धाङ्ङे चुक्लरो॥ 10 हुरुरुना के़दिःप्पा मिन् खुनिॽ थे़गेःक्को चुक्लरो, खे़ङ्हाॽ मिधुङ्दिङ् मिराःक्को लाप्पुङ् मे़बेःक्लरो, हे़क्क्याङ् खे़ङ्हाॽ पोःक्माए मे़न्छुक्ने़ल्ल थारिक् चिम्लिङ् चिम्लिङ् के़लॽबा वाजिम्बेओ मे़जुक्लरो॥ 11 मना इङ्दो के़मे़प्पाहाॽ इक्सादिङ् खाम्बेःक्मो कुलिङ्दो मे़ङ्गे़त्ने़ल्लरो, मना के़हिप्पा के़से़प्पाहाॽरे़ साॽरिक् के़साक्पा तुक्खे लाक्खे मे़दुमुआङ् मे़मे़क्लरो॥ 12 यहवे दाङ्बे़ल्ले़ याङ्गे़साॽबाहाॽ कुदोःप्मा खासे़न् लोःन्दु पिरुसि के़लॽबान् आङ्गाॽ निसुङ्लो, हे़क्क्याङ् थेआङ् मे़ङ्गप्मनाबाहाॽ कम्ब्राङ् मे़त्तुसिरो॥ 13 से़क्खाए साम्योबाहाॽरे़ के़नारा मे़भोसुरो, हे़क्क्याङ् कुदोःप्मा मनाहाॽ के़दगि मे़वाॽ मे़बेःक्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.