निङ्वाॽफु साम्लोसुम् 138 - लिम्बुनुगे़न् तोःम्मा पेलि दाउदरे़ कुसाम्लो 1 यहवे दाङ्बाए, आसिक्लुङ्मोलाम्मे आङ्गाॽ खे़ने़ॽ के़नारा फोसुङ्लो, साङ्ग्राम्पेदाङ्बा माङ्लाइङ्बाहाॽरे़ खुनिॽ तगिआङ् आङ्गाॽ के़नारा फोसुङ्ल साम्लोआरो॥ 2 आङ्गाॽ के़सेसे हिम्ले़प्माङ् हिसिङ्ङाआङ् से़वा चोःक्कारो, हे़क्क्याङ् खे़ने़ॽ चक्मे़ल्लॽए आनिगे याप्मि लुङ्माॽ के़दुक्पा नु नसाःन्साबा के़जोःक्पाल्ले़ चोगुल्ले़ आङ्गाॽ मिङ्सो इङ्धाङ् पिने़रो, थेआङ्भे़ल्ले़ खे़ने़ॽ के़मिङ्ङिन् नु के़बाःन्जाःक्किन् के़रे़क् पाःन्हाॽनुःल्ले़आङ् यम्बा चोक् फाॽआङ् खे़ने़ॽ ओसेःन्दाङ् के़जोगुआङ् वाॽरो॥ 3 खे़ने़ॽ पाःन्छाःत्ने़ल्ले़ नोगप् पिराङ्ङे़ॽओ॥ खे़ने़ॽ के़धुम्बा के़जोक् हे़क्क्याङ् हाङ्हाङ् के़मे़त्ताङ्लो॥ 4 यहवे दाङ्बाए, इक्सादिङ् खाम्बेःक्कोबा के़रे़क् हाङ्हाॽरे़ खे़ने़ॽ के़नारा मे़भोसुरो, थेआङ्भे़ल्ले़ खे़ङ्हाॽरे़ खे़ने़ॽ के़बाःन्जाःक्किन् मे़घे़प्सुआङ् वाॽरो॥ 5 यहवे दाङ्बे़ल्ले़ के़जोगुबा पाःन्हाॽरे़ कुयाःम्बेओ खे़ङ्हाॽ साम्मे़लोरो, थेआङ्भे़ल्ले़ कुमिमिदिङ्ङिन् पयम् यम्बा चोक्लो॥ 6 यहवे दाङ्बान् के़रे़क्नुःल्ले़ थाःङ् युङ्लो, हे़क्केसाङ् चुङ्जिगे़न् नःम्नःम्बाहाॽ ओमे़त्तुसिरो, कर आङ्दिङ् के़लॽबाहाॽ खुने़ॽ माःङ्घा लाम्बाए कुसिङ् निःत्तुसिरो॥ 7 आङ्गाॽ ये़त्तुक्खे तुमुङ्ङाङ् वाॽआसाङ् खे़ने़ॽ के़से़ःप्पारो॥ कुसिक् के़बोःक्पा आङ्गाॽ आनिङ्मिहाॽ खे़ने़ॽ के़अत्तुसिरो, हे़क्क्याङ् के़मुक्साम्मिल्ले़ के़से़ःप्पारो॥ 8 यहवे दाङ्बाए, खे़ने़ॽ माङ्हुप् के़जोगुबा के़रे़क् पाःन्हाॽ के़गे़त्तु के़बिआरो, खे़ने़ॽ चक्मे़ल्लॽए सदादिङ् के़मनाहाॽ लुङ्माॽ के़दुक्तुसिरो॥ चोःक्मा के़हेःक्तुबा याःम्बक्हाॽ चोगे़ सुरे़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.