निङ्वाॽफु साम्लोसुम् 137 - लिम्बुमे़दे़म्सु मे़देॽरुसिबाहाॽरे़ खुनिॽ साम्लो 1 बेबिलोनबा वहःङ्हाॽरे़ कुयाओ युङिगे़रो, यरुसले़ःम्मिन् निङ्वाॽ इःत्तुम्बे़आङ् हाबिगे़रो॥ 2 आनिगे तुःङ्गेहाॽ मुङ्मा ले़प्मनारो, खे़प्मोबा पोरोःक्सिङ्हाॽओ खे़ङ्हाॽ फोःम्मनारो॥ 3 थेआङ्भे़ल्ले़ आनिगे के़दे़म्बा के़देॽबा नु पुङ्लाधाबा के़जोःक्पाहाॽरे़ साम्लोमा मे़बाङ्घिगे़रो, हे़क्क्याङ् आनिगे साॽरिक् तुक्खे के़जाःप्पाहाॽरे़ निङ्वाॽ के़दाबा साम्लो मे़बाङ्घिगे़रो॥ खे़ङ्हाॽरे़ अक्खे मे़मे़त्तिगे़रो, “आनिगे लागि सियोनबा साम्लोहाॽओ लत्छा साम्लोधिक् साम्मे़त्ते़म्मे़ॽ॥” 4 आनिगे़ग माःङ्घाबा लाजेॽओ वयिगे़रो, हे़क्केःल्ले़ खे़न् ते़न्नो यहवे दाङ्बे़ल्ले़ कुसाम्लोन् आक्खेआङ् साम्मे़प्मा सुक्तुम्बे़बे? 5 यरुसले़म ये़क्यक्के, निङ्वाॽ मे़म्भेःन्ने कत्ने़रो, निङ्वाॽ फेःन्ने़ने़भग्र आजुप्साङ् हुक्किल्ले़ तुःङ्गे हिप्मा निङ्वाॽ फेःत्छुररो॥ 6 यरुसले़ःम्मिन् के़रे़क्नुःल्ले़ साॽरिक् आङ्गाॽ आसःप्मादे़न् लेःत्तुङ्लो, हे़क्के मे़इःत्तान्ने़भग्र आङ्गाॽ याम्मो आभे़ल्ले़आङ् साम्लोमा मे़सुक्कान्लरो॥ 7 यहवे दाङ्बाए, यरुसले़म ये़क्यक्किन् निङ्मिहाॽरे़ खुनिॽ हुक्को थ्ये़बा ये़न्नो, एदोमिहाॽरे़ मे़जोगुबा पाःन्हाॽ निङ्वाॽ इःत्ते़ॽओ॥ खे़ङ्हाॽ मे़अःक्ते़र मे़बारे़रो, “खे़न् यन्छे़म्मे़ॽओ, कुबाङ्यक्लाम्बाए थ्यःङ् लुःन्दे़म्देसे़म्मे़ॽओ॥” 8 बेबिलोन ये़क्यक्के खाप्पुथ्यःङ् के़बोङ्लो, खे़ने़ॽ याप्मि थे के़मे़त्ते़आङ् वये़, खे़ल्ले़ कुले़क्वा के़हुङ्बान् मुॽइसाबा पोङ्लो॥ 9 खे़ङ्ग मुॽइसाबारो खे़ल्ले़ खे़ने़ॽ अङे़ःक्वा के़स्साहाॽ ते़म्सुसिरो, हे़क्क्याङ् लुङ्ङो पिर्धाप् पिर्धाप् थाप्सुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.