निङ्वाॽफु साम्लोसुम् 136 - लिम्बुनुगे़न् तोःम्मा साम्लो 1 यहवे दाङ्बान् नुगे़न् पिरे़म्मे़ॽओ, थेआङ्भे़ल्ले़ खुने़ॽ के़नुॽबा चोक्लो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 2 माङ्साम्माङ्हाॽनुःल्ले़ पयम् यम्बा निङ्वाॽफुमाङ्ङिन् नुगे़न् पिरे़म्मे़ॽओ, खुने़ॽ चक्मे़ल्लॽए सदादिङ् लुङ्माॽ आदुक्लो॥ 3 दाङ्बाहाॽरे़ खुनिॽ दाङ्बा यहवे दाङ्बान् नुगे़न् पिरे़म्मे़ॽओ, खुने़ॽ चक्मे़ल्लॽए सदादिङ् लुङ्माॽ आदुक्लो॥ 4 खुने़ॽरक् निङ्वाॽ के़माबा याःम्बक्हाॽ चोगुरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 5 खुने़ॽ कुसिक्कुम् निङ्वाॽरे़ साङ्ग्राम्पेदाङ्ङिन् चोगुबारो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 6 खुने़ॽग तुङ्गोदिङ् वरःङ्सम्धाङ् इक्सादिङ् खाम्बेःक्मान् युक्खुरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 7 खुने़ॽग नाम् नु लाबा चोगुसिरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 8 ले़न्दिक् ओःत्ल फाॽआङ् खुने़ॽ नाम्मिन् चोगुरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 9 से़न्दिक् ओःत्ल फाॽआङ् खुने़ॽ लाबान् नु खेःम्सिक्पाहाॽ चोगुसिरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 10 खुने़ॽग मिस्र लाजेॽबा तुम्बा साहाॽ से़रुसिरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 11 खुने़ॽ इस्राइलिहाॽ मिस्रबा मनाहाॽरे़ खुनिॽ लुम्मोलाम्बा लःत्तु फे़त्तुसिरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 12 खुने़ॽ मुक्साम्बा नु के़धुम्बा कुहुक्किन् सन्छुरो हे़क्क्याङ् खे़ङ्हाॽ मिस्र लाजेॽलाम्बा लःत्तु फे़त्तुसिरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 13 खुने़ॽ हे़ःत्ताङ्बा वहःङ्ङिन् कुलुम्मो हर्गे़ॽ फःक्खुरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 14 खुने़ॽ इस्राइलिहाॽ खे़प्मोलाम् नाधाःम्बि लःत्तुसिरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 15 कर खुने़ॽ फारो हाङ्ङिन् नु कुधक्सुबा तुराहाॽ हे़ःत्ताङ्बा वरःङ्ङो वादेःन्दुदेसुसिरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 16 खुने़ॽ आबाङे कुमनाहाॽ मुरे़क् खारे़क् थेआङ् के़होःप्पादे़न्नोलाम् लाम्लोसुसिरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 17 खुने़ॽग यम्बयम्बा हाङ्हाॽ से़रुसिरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 18 खुने़ॽग कुमिङ् के़इङ्बा हाङ्हाॽ से़रुसिरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 19 खुने़ॽ एमोरिहाॽरे़ खुनिॽ हाङ् सिहोने़न् से़रुरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 20 खुने़ॽ बासानबा हाङ् ओगे़न् से़रुरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 21 खे़ङ्हाॽरे़ खुनिॽ लाजेन् खुने़ॽ कुमनाहाॽ हुक्सुप्तुसिरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 22 खुने़ॽ खे़न् लाजेन् कुसे़वारोबा इस्राइले़न् पिरुरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 23 आनिॽ ये़त्तुक्खे आदुमे़ल्ले़ खुने़ॽ निङ्वाॽ आइःत्ते़रो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 24 खुने़ॽग आनिॽ निङ्मिहाॽलाम्बा ताङ्आसे़ःप्ते़रो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 25 खुने़ॽग कुसक्मा के़याक्पा के़रे़क् कुजा पिरुसिरो, खुने़ॽ चक्मे़ल्लॽए सदादिङ् लुङ्माॽ आदुक्लो॥ 26 साङ्ग्राम्पेदाङ्ङोबा निङ्वाॽफुमाङ्ङिन् नुगे़न् पिरे़म्मे़ॽओ, खुने़ॽ चक्मे़ल्लॽए सदादिङ् लुङ्माॽ आदुक्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.