निङ्वाॽफु साम्लोसुम् 135 - लिम्बुयहवे दाङ्बे़ल्ले़ पयम्बा कुयाःम्बक्हाॽ 1 यहवे दाङ्बे़ल्ले़ कुनारा फोसे़म्मे़ॽओ! यहवे दाङ्बे़ल्ले़ कुमिङ्ङिन् खिनिॽ इङ्धाङ् पिरे़म्मे़ॽओ, यहवे दाङ्बे़ल्ले़ कुसे़वारोबासे, खुने़ॽ कुनारा फोसे़म्मे़ॽओ, 2 खिनिॽग यहवे दाङ्बा आनिॽ निङ्वाॽफुमाङ्ङिल्ले़ कुहिम्मो से़वा के़जोगिरो॥ 3 यहवे दाङ्बे़ल्ले़ कुनारा फोसे़म्मे़ॽओ, थेआङ्भे़ल्ले़ खुने़ॽ के़नुॽबा चोक्लो, खुने़ॽ कुमिङ्ङो साम्लोरे़म्मे़ॽओ, थेआङ्भे़ल्ले़ खुने़ॽ लुङ्माॽ आदुक्तुक्पा चोक्लो॥ 4 थेआङ्भे़ल्ले़ यहवे दाङ्बे़ल्ले़ याकुबे़न् आबाङे कुमना चोगुरो, हे़क्क्याङ् इस्राइले़न् आबाङे कुयाङ्सा कुन्धे चोःक्मारे़ लागि सेगुआङ् वाॽरो॥ 5 यहवे दाङ्बान् पयम् यम्बा चोक् फाॽआङ् आङ्गाॽ निसुङ्लो, हे़क्क्याङ् आनिॽ यहवे दाङ्बान् के़रे़क् माङ् साम्माङ्हाॽनुःल्ले़आङ् खुने़ॽ पयम् यम्बा चोक्लो॥ 6 यहवे दाङ्बे़ल्ले़ कुनिङ्वाॽ के़दाबा पाःन्हाॽ खुने़ॽ साङ्ग्राम्पेदाङ्ङो चोगुरो, हे़क्क्याङ् इक्सादिङ् खाम्बेःक्मो, वरःङ्हाॽओ नु सिगाङ्बा कुदिम्बे केःम्बा ते़न्हाॽओ खुने़ॽ कुनिङ्वाॽ हे़क्के चोगुरो॥ 7 खुने़ॽ इक्सादिङ् खाम्बेःक्माल्ले़ कुयाओलाम् खाॽमिःत्तिन् फोःक्खुरो॥ वहित् साम्मिःत् खइक् खइक् इक्सिङ्ल फाॽआङ् खुने़ॽ साःम्भे ले़क्ल याःन्दुरो, हे़क्क्याङ् सुरित् केजङ् युक्खुबादे़न्नोलाम् सुरित् केजङ् पाङ्घु तासुरो॥ 8 मिस्र लाजेॽओ खुने़ॽ मनाहाॽरे़ खुनिॽ तुम्बा साहाॽ से़रुसिरो, हे़क्क्याङ् तगि के़धाप्पा थक्साहाॽआङ् मे़क्खुसिरो॥ 9 मिस्र लाजेॽओ खुने़ॽ निङ्वाॽ के़माबा याःम्बक् नु मिक्सेन् ओसेःन्धाङ् चोगुरो, हे़क्क्याङ् फारोन् नु के़रे़क् कुयाःम्बक् के़जोःक्पाहाॽ खुम्दिङ् पिरुसिरो॥ 10 खुने़ॽ इक्सादिङ् खाम्बेःक्मोबा यरिक् मे़न्छाम् सुवाङ्हाॽ मे़क्खुसिरो, हे़क्क्याङ् यरिक् मुक्के़गुबा हाङ्हाॽ से़रुसिरो॥ 11 खुने़ॽ एमोरिहाॽरे़ खुनिॽ हाङ् सिहोने़न् नु बासानबा हाङ् ओगे़न् से़रुसिरो, खे़ब्याङ् कनानबा के़रे़क् हाङ्हाॽआङ् से़रुसिरो॥ 12 हे़क्क्याङ् खे़ङ्हाॽरे़ खुनिॽ लाजेॽहाॽ खुने़ॽ कुमनाहाॽ हुक्सुप्तुसिरो, खे़न् आबाङे खुन्छिॽइन् पोङ्ल फाॽआङ् कुमना इस्राइलिहाॽ पिरुसिरो॥ 13 यहवे दाङ्बाए, के़रे़क् थाःक्हाॽरे़ खे़ने़ॽ निङ्वाॽ के़म्इःत्लो, हे़क्क्याङ् सादाङिङ् के़वाॽबा निङ्वाॽफुमाङ्ने़ फाॽआङ् इङ्भन् मे़जोगुरो॥ 14 थेआङ्भे़ल्ले़ यहवे दाङ्बे़ल्ले़ कुमनाहाॽ खुनिॽ ले़प्माङ् खासे़न् लोःन्दु पिरुसिरो, हे़क्क्याङ् खुने़ॽ कुसे़वारोबाहाॽ लुङ्माॽ तुक्तुसिरो॥ 15 इक्सादिङ् खाम्बेःक्मोबा मे़न्छाम् सुवाङ्हाॽरे़ खुनिॽ नावाइत्लाहाॽग साम्म्याङ् युप्पासिरक्लो, खे़ङ्हाॽ के़रे़क् मनारे़ए मे़जोगुसिबारो॥ 16 खे़न् नावाइत्लाहाॽरे़ खुनिॽ मुरा पत्छाङ् पाःप्मा मे़न्छुक्ने़ल्लो, मिक् पत्छाङ् खानिमा मे़न्छुक्ने़ल्लो॥ 17 खे़न् नावाइत्लाहाॽरे़ खुनिॽ ने़क्खोॽ पत् करसाङ् खे़म्मा मे़न्छुक्तुल्लो, हे़क्क्याङ् खुनिॽ मुरा पत् करसाङ् सक्मा सोःम्मा मे़न्छुक्ने़ल्लो॥ 18 खे़न् नावाइत्ला के़जोःक्पा मनाहाॽआङ् हाबा खे़न् नावाइत्ला हे़क्तङ्बाए मे़बोङ्लो, हे़क्क्याङ् खे़न् नावाइत्लाहाॽओ नसान् के़जोःक्पाहाॽआङ् आम्भा हे़क्तङ्बाए मे़बोङ्लो॥ 19 इस्राइलसमा मनासे, यहवे दाङ्बे़ल्ले़ कुनारा फोसे़म्मे़ॽओ॥ हारुनरे़ कुधाःक्सासे, यहवे दाङ्बे़ल्ले़ कुनारा फोसे़म्मे़ॽओ॥ 20 ले़बिरे़ कुधाःक्सासे, यहवे दाङ्बे़ल्ले़ कुनारा फोसे़म्मे़ॽओ॥ यहवे दाङ्बाओ से़वा के़जोःक्पासे, यहवे दाङ्बाल्ले़ कुनारा फोसे़म्मे़ॽओ॥ 21 सियोनलाम्बा यहवे दाङ्बे़ल्ले़ कुनारा पोररो, यरुसले़ःम्मो के़युङ्बाल्ले़ कुनारा पोररो॥ यहवे दाङ्बे़ल्ले़ कुनारा फोसे़म्मे़ॽओ! |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.