निङ्वाॽफु साम्लोसुम् 130 - लिम्बुकुभाॽ नु लुङ्मा तुक्मा पेलि लाम्दिक् चोःक्मा साम्लो 1 यहवे दाङ्बाए, आङ्गाॽग साॽरिक् इनोगे़न् तुक्खेओ वाॽआरो, हे़क्केःल्ले़ आङ्गाॽ पेलि फाक्ने़रो॥ 2 यहवे दाङ्बाए, आबेलिन् खे़प्से़ॽओ, आङ्गाॽ लुङ्माॽ तुक्ताङ्ङे़ॽ फाॽआङ् मे़त्ने़बा पाःन्नो निङ्वाॽ पिरे़ॽओ॥ 3 यहवे दाङ्बाए, आनिगे लायोरे़ खाराःत्तिन् के़युक्खुबा होःप्ते़रो, मेःन्निल्ले़ग हाःत्ताङ् खुम्दिङ् मे़ङ्घोए खे़त्छिङ्मा मे़सुक्ते़म्बारो॥ 4 कर खे़ने़ॽग आनिगे लायोलाम् ले़प्मि आगे़बिरो, खे़ल्ले़चोगुल्ले़ए आनिगे मिङ्सो इङ्धाङ् पिआसिगे़र खे़ने़ॽ के़दगि ये़प्मा सुक्तिगे़रो॥ 5 आङ्गाॽग आनिङ्वाॽ इगेःक्काङ् यहवे दाङ्बे़ल्ले़ फाॽआर फाॽआङ् आङ्गाॽ खुने़ॽ कुलाम् ओमे़त्तुङ्लो, हे़क्क्याङ् खुने़ॽ कुबाःन्जाःक्को आङ्गाॽ आनिङ्वाॽ युक्खुङ्लो॥ 6 हिम्गे़गोबाल्ले़ तानाम्बा खाओःप्मान् हाङ्घुरो, खे़न्नुःल्ले़आङ् साॽरिक् आङ्गाॽ यहवे दाङ्बान् ओमे़त्तुङ्लो॥ 7 इस्राइलए, यहवे दाङ्बाओ के़निङ्वाॽ युक्खे़ॽओ, थेआङ्भे़ल्ले़ यहवे दाङ्बे़ल्ले़ चक्मे़ल्लॽए लुङ्माॽ आदुक्लो, हे़क्क्याङ् आनिॽ ताङ्से़ःप्मारे़ लागि खुने़ॽ आप्फाल्ले़साङ् यारिप् वाॽरो॥ 8 खुने़ॽ आबाङे मे़ल्लुङ् हुङुरो, हे़क्क्याङ् इस्राइलबा कुमनाहाॽ खुनिॽ के़रे़क् लायोलाम् से़ःप्तुसिॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.