खाहुन् 31 - लिम्बुलमुएल हाङ्ङिल्ले़ पाःत्तुबा पाःन्हाॽ 1 लमुएल हाङ्ङिन् कुम्मारे़ हुॽरुबा खाहुन् पाःन्जाःक्हाॽ हाबा कन्लो— 2 आस्साए खे़प्से़ॽओ! आसाप्पोःक्को लाम्बाबा आस्साए खे़प्से़ॽओ! आस्साए खे़प्से़ॽओ, आङ्गाॽ चोगुङ्बा आमाङ्हुप्पे़ल्ले़ कुनुगप्पे! 3 के़धुम्मिन् मे़न्छुमाहाॽ मे़बिरे़से़न्ने़ॽआङ् मे़माःन्दे़न्ने़ॽओ, खे़ने़ॽ के़मुक्साम्मिन् खे़ङ्हाॽओ मे़देसे़न्ने़ॽओ खे़ङ्हाॽरे़ हाङ्हाॽ मे़मे़क्खुसिआङ् वाॽरो॥ 4 लमुएलए, हाङ्हाॽरे़ चे़ल्ले़क्सेॽ थि यरिक् थुङ्मा मे़नुॽने़न्लो, कङ्ग हाङ्हाॽरे़ खुन्छिॽ लागि मेःन्लो, युक्साबाहाॽरे़ थि सिराॽथाङ्मा मे़नुॽने़न्लो॥ 5 मेःन्ने़भग्र खे़ङ्हाॽरे़ मे़धुङुॽ हे़क्क्याङ् खासे़न्-कुभाङ्हाॽ निङ्वाॽ मे़भेःत्छुरो, हम्भ्याङ् मे़युक्तुसिबा तुक्खे मे़जाःत्तुसिबाहाॽ के़रे़क् युक् मे़ङ्घोम्नाबा मे़जोगुसिरो॥ 6 के़मे़क्पार के़बप्पाहाॽरे़ थि मे़धुङुररो, मुदोखाम्दो के़बोङ्बाहाॽरे़ चे़ल्ले़क्सेॽ थि मे़धुङुररो॥ 7 खे़ङ्हाॽरे़ मे़धुङुआङ् खुन्छिॽ याङ्साॽमान् निङ्वाॽ मे़भेःत्छुररो, हे़क्केःल्ले़ खुन्छिॽ तुक्खेन् याम्मो निङ्वाॽ मे़न्इःत्तुन्लरो॥ 8 पाःप्मा मे़न्छुक्मनाबाहाॽरे़ खुन्छिॽ लागि पारे़ॽओ, थेआङ् मे़ङ्गप्मनाबाहाॽरे़ खुन्छिॽ युक्ले़ लागि पारे़ॽओ॥ 9 पारे़ॽआङ् के़वाॽबा खासे़न् लोःन्दे़ॽओ, याङ्गे़साॽबा नु तुक्खे के़जाबाहाॽरे़ खुन्छिॽ युक्किन् से़ःप्ते़ॽओ॥ सुम्बोधासामा मे़ल्लिङ्गे़न् मेःत् 10 सुम्बोधासामा मे़ल्लिङ्गे़न् मेःत् हाःत्ले़ खोमा सुक्तुबे? खुने़ॽग मुधिङ् लुङ्नुःल्ले़आङ् यरिक् इमे़ल्लुङ्मा चोक्लो॥ 11 कुये़म्बाःल्ले़ खुने़ॽ साॽरिक् नासाॽरुरो, हे़क्क्याङ् खे़ल्ले़ नुबा पान् खोमा के़साक्पा मे़दुमुन्लो॥ 12 खुने़ॽ कुहिङ्हिङ् कुये़म्बाःन् नुबा पान् चोगु पिरुरो हे़क्क्याङ् आप्फाल्ले़आङ् थेआङ् हान्ति मे़जोगुन्लो॥ 13 खुने़ॽग मे़ल्लुक् मुरिक् नु खिःन् तेत् थाक्मारे़ लागि सेगुरो हे़क्क्याङ् स्याङ्मे़न्दाङ् याःम्बक्को पत्लो॥ 14 ले़ङ्हङ् के़जोःक्पा वालाधाःल्ले़ कुइसिक्, खे़ल्ले़ माःङ्घालाम्बा हिम्मो कुजा तारुरो॥ 15 खुने़ॽ खामे़न्ओःत्ते से़न्दिक्सा पोःक्लो, खुने़ॽ कुहिम्सयङ्ले़ लागि चामा थुङ्मा थोःक्तुरो, हे़क्क्याङ् चुक्मा चुक्मा कुसे़वारोमाहाॽ हाःत्तुसिरो॥ 16 खुने़ॽ साॽरिक् निङ्वाॽ इःत्छिङ्ङाङ् इक्ताप्थिक् इङुरो, हे़क्क्याङ् थगुबा याङ्ङिल्ले़ चे़ल्ले़क्सेॽ इक्ताप् याक्तुरो॥ 17 खुने़ॽ चाःत्चाःत् लॽरिक् कुयाःम्बक्किन् चोगुरो, खुने़ॽ कुयाःम्बक्ले़ लागि कुहुक्हाॽ के़धुम्बा चोक्लो॥ 18 खुने़ॽ चोगुबा याःम्बक्किन् पोरबेःक्पा निसुरो, हे़क्क्याङ् खुने़ॽ कुसेमिन् से़न्दिक् मे़सिने़न्लो॥ 19 खुने़ॽ कुहुक्किल्ले़ अःत्ताःल्ले़ कुलान् याङ्सिङ्लो, हे़क्क्याङ् खुने़ॽ आप्फेक् कुहुक्किल्ले़ कुइमे़न् ते़म्सुरो॥ 20 खुने़ॽ याङ्गे़साॽबाहाॽ कुहुक्पक् यम्बा चोगुआङ् पिरुसिरो, हे़क्क्याङ् थेआङ् मे़ङ्गप्मनाबाहाॽरे़ लागि कुहुक्किन् सन्छुरो॥ 21 नाःङ् थाःल्ले़ खुने़ॽ कुस्सा कुएहाॽरे़ लागि मे़गिने़न्लो, थेआङ्भे़ल्ले़ खे़ङ्हाॽ के़रे़क्ले़ हे़ःक्कङ्गङ्बा के़गोबा चाङ् मे़जाक्खुरो॥ 22 खुने़ॽ ने़त्नाओ फे़मारे़ लागि खाम्देःत् लोःम्भेःत् थागुरो, खुने़ॽ नैनासुत् नु परान्ला चाङ् चाक्खुरो॥ 23 खुने़ॽ कुये़म्बाःन् ये़क्यक्कोबा यम्बा लाम्धेःत्तोए इङ्धाङ् मे़बिरुरो, खे़प्मो खुने़ॽ लाजेॽओबा लाम्लोबा तुम्भाक्साहाॽनु युङ्गन्लो॥ 24 खुने़ॽ नैनासुत् चिरिक्के़न् चाङ्देःत्हाॽ तयुरो हे़क्क्याङ् खुने़ॽ खे़न् तेत्चाङ्हाॽ सङ्घुरो, खे़ब्याङ् फॽइहाॽ ले़ङ्हङ् के़जोःक्पाहाॽरो सङ्घुरो॥ 25 खुने़ॽ के़धुम्मा नु मिङ्सो इङ्धाङ्सामा पोङ्लो, हे़क्क्याङ् के़दाबा ये़न्हाॽरे़ लागि मुये़ङ् एःप्मा सुक्लो॥ 26 खुने़ॽ सिक्कुम्दिङ् निङ्वाॽरे़ पान् पाःत्लो, हे़क्क्याङ् खुने़ॽ थधप् मे़न्लॽमनाबा मिःम्जिःल्ले़ कुयाःम्बेओ हुॽरुसिरो॥ 27 खुने़ॽ कुहिम्सयङ्ले़ लागि चाहाब् के़जोःक्पा पाःन्हाॽ ओमे़त्तुरो, हे़क्क्याङ् खुने़ॽ आफाल्ले़आङ् कुले़म्मे़युने़न्लो॥ 28 खुने़ॽ कुस्सा कुएहाॽ मे़ये़म्सिङ्ङाङ् कुनारा मे़भोसुरो, खुने़ॽ कुये़म्बाःल्ले़आङ् अक्खे पाःत्तुआङ् कुन्बो फोसुरो, 29 “यरिक् मे़न्छुमाहाॽरे़ साॽरिक् सुम्बोधाबा पाःन्हाॽ मे़जोगुरो, कर खे़ङ्हाॽ के़रे़क् खे़ने़ॽ के़नाःन्दुसिआङ् वाॽरो॥” 30 नुबा नारुम्भुङ्ङिन् इङ्आले़क्ले़क्पा चोक्लो, हे़क्क्याङ् खे़म्सिङ्मान् इगे़ले़म्बा के़बेःक्पा चोक्लो, कर यहवे दाङ्बे़न्नु के़गिमा मे़न्छुमान्ने कुनारा फोमा पोङ्लो॥ 31 स्याङ्मे़न्दाङ् याःम्बक् चोगुबाओ खुने़ॽए मिङ्सो पिरे़ॽओ, हे़क्क्याङ् खे़ल्ले़ कुयाःम्बक्किल्ले़ ये़क्यक्कोबा यम्बा लाम्धेःत्तोए खुने़ॽ इङ्धाङ् के़घोमा चोगुररो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.