खाहुन् 30 - लिम्बुआगुरे़ल्ले़ कुबाःप्मा पाःन्हाॽ 1 याकेरे़ कुस्सा आगुरे़ल्ले़ कुघाहुन् निङ्वाॽफुमाङ् पाःन्जाःक्— कन् मनाःल्ले़ इथिएल नु युकाले़न् उवा चोगुसिबारो— आङ्गाॽ नासाङ्लो, निङ्वाॽफुमाङ्ङे, कर आङ्गाॽ नाःम्मा सुक्तुङ्लो॥ 2 आङ्गाॽग अदङ् हे़क्दङ्बाआरो, मनाओ वाॽमा के़बोङ्बा खासिङ्निःप्मे़न् मे़गत्तान्लो॥ 3 आङ्गाॽ सिक्कुम् निङ्वाॽ मे़ङ्घोए वाॽआरो, के़रे़क्नुःल्ले़ सेसेबे़ल्ले़ कुने़हिनिङ्वान् मे़गत्तान्लो॥ 4 साङ्ग्राम्पेदाङ् थारिक् हात् थो थोःक्सिङ् पेआङ् वाॽबे? हे़क्क्याङ् यो थासिङ् ये़आङ् वाॽबे? हाःत्ले़ सुरित् केजङ्ङिन् हुक्को ते़म्सुआङ् वाॽबे? हाःत्ले़ च्वाःत्तिन् खाम्देःत्तो कित्तुआङ् वाॽबे? इक्सादिङ् खाम्बेःक्मोबा के़रे़क् पिसाङ् कुनुप्मा थारिक् हाःत्ले़ ने़स्सुआङ् ने़बे? कुमिङ्ङिन् थे़माबे? खम्भ्याङ् खुने़ॽ कुस्साःल्ले़ कुमिङ्ङिन् थेबे? खे़ने़ॽ के़ले़सुने़भग्र आङ्गाॽ मे़त्ताङ्ङे़ॽओ॥ 5 निङ्वाॽफुमाङ्ङिल्ले़ काक् कुबाःन्जाक्हाॽ आप्तिक् मेःन्नेबा चोक्लो, खुने़ॽओ के़इःम्सिङ्बाहाॽरे़ लागि खुने़ॽग खोरो॥ 6 खुने़ॽ कुबाःन्जाक्हाॽओ थेआङ् मे़योॽरे़न्ने़ॽओ, मेःन्ने़भग्र के़भे़ःक् हे़क्क्याङ् इङ्ले़क् के़जोःक्पा के़लेःत्लो॥ वेॽ खाहुन्हाॽ 7 यहवे दाङ्बाए, आदाङ्बा ने़त्छि पान् नाःक्ने़रो, आङ्गाॽ सिमानुःल्ले़ तगि खे़ङ्हाॽ मे़नाॽरे़न्ने़ॽओ॥ 8 मे़न्वाॽमना नु इङ्ले़क् पाःन्हाॽ आङ्गाॽलाम् खे़त्ते़ॽओ, आङ्गाॽ याङ्गे़साॽबाआङ् मे़जोगाङ्ङिन्ने़ॽओ, खे़ब्याङ् याङ्साकुन्धेसाबाआङ् मे़जोगाङ्ङिन्ने़ॽओ॥ कर थिक्याःन्धक्पा कुजा चामारक् पिराङ्ङे़ॽओ॥ 9 मेःन्ने़भग्र आङ्गाॽ यरिक् कत्तुङ्बाल्ले़ चुगुल्ले़ आदाङ्बा नाॽने़आङ् “यहवे दाङ्बे़न्” हाःप्पे लॽआबिलारो, इग्र आङ्गाॽ याङ्साॽआबाल्ले़ चोगुल्ले़ खुःत्ताआङ् यहवे दाङ्बा आनिङ्वाॽफुमाङ्ङिल्ले़ कुमिङ्ङिन् कुनामे़न्छाॽ चोगुङ्बिलारो॥ 10 हिम्दाङ्बाल्ले़ कुदगि से़वारोबान् चे़क्या मे़मे़त्ते़न्ने़ॽओ, मेःन्ने़भग्र खे़ल्ले़ खे़ने़ॽ माङ्दे साङ्ग्रा के़मे़त्लो, खे़ब्याङ् खे़ने़ॽ कुले़क्वा तुम्मा पोङ्लो॥ 11 अक्तङ्बा मनाआङ् मे़वाॽ खे़ङ्हाॽरे़ खुन्छिॽ पानुदिङ् पान् माङ्दे साक्मुरा मे़मे़त्तुरो, हे़क्क्याङ् खुन्छिॽ माहाॽ मुॽइसामा मे़म्मे़त्तुन्सिन्लो, 12 खे़ङ्हाॽ आप्फेक् खुन्छिॽ निमो सुत्थो मे़जोक्लो कर खुन्छिॽ आप्फेक् चिःन्जिःन्घुमालाम् सेसे मे़म्बोङ्ने़न्लो, 13 खे़ङ्हाॽरे़ खुन्छिॽ मिक्हाॽ साॽरिक् के़हे़न्छिङ्बा चोक्लो, खुन्छिॽ ओमे़प्मान् चाॽरिक् सिक्के़ले़ःङ्बा चोक्लो, 14 खे़ङ्हाॽरे़ खुन्छिॽ हाबोॽबाहाॽ ताभेनु कुदङ्बा चोक्लो, खे़ङ्हाॽरे़ खुन्छिॽ केःङ्हाॽ फे़जानु कुदङ्बा चोक्लो॥ इक्सादिङ् खाम्बेःक्मोलाम् याङ्गे़साॽबाहाॽ मे़लरुसिरो, हे़क्क्याङ् मे़न्छाम् सुवाङ्लुम्मो चाहाबओ के़धाबाहाॽ मे़लरुसिरो॥ 15 तोदिमा लाःक्फे़त्तिल्ले़ ने़त्छि कुस्सा मे़न्छुमा वाॽसिरो, खे़न् ने़प्माङ्ले़ अक्खे पाःत्छु, “आन्छिगे याप्मि आबिरे़ॽओ!” सुम्सि पाःन्हाॽ वाॽ, खे़ङ्हाॽ आप्फाल्ले़आङ् मे़ङ्घाने़न्लो, लिसि पाःन्हाॽ वाॽ खे़ङ्हाॽ आभे़ल्ले़आङ् “याःक्तु” मे़ल्लॽने़न्लो॥ 16 इपुङ्ङिन् हे़क्क्याङ् कुस्सा मे़न्वाॽमनामा साप्पोःक्किन्, खाम्बेःक्किन्, च्वाःत्तिल्ले़ आभे़ल्ले़आङ् मे़दिम्ने़न्लो, खे़ब्याङ् मिःन्, आभे़ल्ले़आङ् “याःक्तु” मे़लॽने़न्लो॥ 17 आप्फेक् कुम्बा कुनामे़न्छाॽ के़मे़प्पे़ल्ले़, हे़क्क्याङ् खदाक्मि कुम्मारे़ मुरा मे़त्तुबान् के़जिःप्पे़ल्ले़, कुमिक्किन् सेःङ्घाबा आःक्वाहाॽरे़ मे़अगु मे़लःत्तुरो, हे़क्क्याङ् किःत्थहाॽरे़ खे़न् मे़जरो॥ 18 सुम्सि पाःन्हाॽ वाॽ, आङ्गाॽ आलागि खे़ङ्हाॽ साॽरिक् निङ्वाॽ के़माबा चोक्लो लिसि पाःन्हाॽ वाॽ, खे़ल्ले़ कुबेन् आङ्गाॽ कुसिङ् निःप्मा मे़सुक्कान्लो— 19 ताङ्साक्पो कक्कफिःक्मे़ल्ले़ कुबे़मान्, याक्पेॽ सम्धाङ् असेःक्पाल्ले़ कुसःन्छिङ्मान्, तुङ्गोदिङ् वरःङ्ङो वालाधाःल्ले़ कुजाःक्मान् हे़क्क्याङ् मे़न्छ्याःन्नु सोरिक् ये़म्बित्छाःल्ले़ कुवाॽमान्॥ 20 याम्बोःप्मा याःम्बक् के़जोःक्मा मे़न्छुमाःल्ले़ कुये़प्ले़क्किन् अक्तङ्बा चोक्लो— खे़ल्ले़ ये़म्बित्छान् लरुदेसुआङ् कुम्ब्रान् तुगुॽ हे़क्क्याङ् अक्खे पाःत्तुरो, “आङ्गाॽ थेआङ् मे़म्भेःन्ने वाॽए़रो!” 21 सुम्सि पान् वाॽ, खे़ल्ले़ खाम्बेःक्मान् यक्खुरो, लिसि पान् वाॽ खे़न् थम्माए मे़सुक्तुन्लो— 22 योःग्बे़न् हाङ् पोङ्बा, अदङ् मनाःल्ले़ कुघाघा चामा खोसुबा, 23 नामे़न्नुॽरुम्मा मे़न्छुमाःल्ले़ मेःक्खिम् चोगुबान् हे़क्क्याङ् कुहिम्दाङ्मान् खे़त्तुआङ् आप्फेक् हिम्दाङ्मा के़बोङ्मा योःग्मान्॥ 24 इक्सादिङ् खाम्बेःक्मो लिसि पाःन्हाॽ चुक्सा वाॽरो, करसाङ् खे़ङ्हाॽ चाॽरिक् सिक्कुम्निबा चोक्लो— 25 सिक्चोबाहाॽ मे़न्धुम्मनाबा साॽरिक् चुक्सा थक्सासिरो करसाङ् हाङ्वामा ये़म्मो खे़ङ्हाॽरे़ चामा कुजा याङ्मे़घोःत्तुरो, 26 कुमि के़होप्पा सुबाहाॽ मे़न्धुमनाबा थक्सासिरो करसाङ् खे़ङ्हाॽरे़ खुन्छिॽ हिम् याक्पेॽओ मे़जोगुरो, 27 निःङ्घुक्वाहाॽरे़ खुन्छिॽ हाङ् होप्लो, हे़क्केसाङ् खे़ङ्हाॽ मे़हुप्सिङ्ङाङ् थक्सुबाहाॽ हे़क्के कुलुप् कुलुप् लाङ्मे़घेःक्लो, 28 हन्दगेःक्के़न् हुक्किल्ले़ ते़म्मा सुक्ते़त्लो करसाङ् हाङ्हिम्मो खे़न् खोदे़त्लो॥ 29 सुम्सि पाःन्हाॽ वाॽ, खे़ङ्हाॽ लाङ्मे़घेःक्किल्ले़ चाङ्जाङ् मे़लॽरो, लिसि खे़ङ्हाॽ मे़हे़न्छिङ्ल ना नु कत्ना लाङ्मे़घेःक्लो— 30 खिरिङ्बान् थक्साहाॽओ के़रे़क्नुःल्ले़ के़धुम्बा चोक्लो, खे़न् आत्तिन् पाःन्निल्ले़ कुदगाङ्ङाङ् मे़गिने़न्लो, 31 ए़ःत्ले़ॽआङ् ए़ःत्ले़ॽ लाङ्गे़घेःक्पा इङ्वा, मे़ःन्दाबका नु, थक्सुबाहाॽ कुगब्रिङ् के़ये़म्बाआङ् लाङ्गे़घेःक्पा हाङ्॥ 32 खे़ने़ॽ अदङ् लाम्मिन् के़नाःत्तुआङ् आप्फेक् के़जम्सिङ्ने़भग्र, इग्र खे़ने़ॽ ताप्फे़ःम्बा चोःक्मा निङ्वाॽ के़जोगुआङ् वाॽने़भग्र, खे़ने़ॽ के़म्ब्राःन् के़हुक्हाॽरे़ आल्लो ते़प्ते़ॽओ! 33 थेआङ्भे़ल्ले़ पित्नुन् इःङ्माआङ् ख्युॽ लःन्लो, हे़क्क्याङ् ने़बोःन् नुक्मे़ल्ले़ माक्खिॽ वयुरो, हे़क्केलॽरिक्के सिक् फोःङ्मे़ल्ले़ खे़माॽ पोङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.