खाहुन् 29 - लिम्बु1 ये़त्ले़ङ् ये़त्ले़ङ् मे़भे़ःक्तुसाङ् कुभा हादिङ्ङे थक्ने़भग्र, वेःप्मा मे़ङ्घोए थिक्ले़ङ्माल्ले़ खाप्पुथ्यःङ् पोङ्लो॥ 2 साम्योबा मनान् नुॽदाने़भग्र मनाहाॽ मे़सःत्लो, कर ताक्के़भे़ॽबे़ल्ले़ युक् चोगुल्ले़ मनाहाॽ मे़याःत्लो॥ 3 सिक्कुम्निङ्वा कुसिराॽगे़धाङ्बा मनाःल्ले़ कुम्बा कुनिङ्वाॽ तासुरो, कर ये़म्बा हङ्जेनाहाॽनु के़वाॽबे़ल्ले़ याङ्साकुन्धेन् हने़ मे़क्खुरो॥ 4 खासे़न्लाम्बा हाङ्ङिल्ले़ लाजेन् थधप् मे़ल्लॽमनाबा चागुरो, कर सुरुत्याङ् चामा निङ्वाॽ के़जोःक्पे़ल्ले़ खाम्घुःन् खाप्पु चोगुरो॥ 5 खुने़ॽ कुहिम्बेसाङ्बाहाॽ मुर्ले़ःम्बा पान् के़मे़प्पे़ल्ले़ खुन्छिॽ लाङ्हाॽ के़धाबा इजोन् के़सुआङ् ने़रो॥ 6 ताक्के़भे़ॽबाहाॽ खुन्छिॽ लायोल्ले़ चोगुल्ले़ चे़न्नो मे़धारो, कर साम्योबाहाॽ साम्लोमा नु सःप्मा मे़सुक्लो॥ 7 साम्योबाहाॽरे़ याङ्गे़साॽबाहाॽरे़ खुन्छिॽ खासे़न्निन् ओमे़मे़त्तुरो, कर कुॽइगे़भे़म्बाहाॽरे़ खे़ल्ले़ कुयाःम्बेओ निनि मे़ल्लाप्तुन्लो॥ 8 याप्मि कुनामे़न्छाॽ के़मे़प्पाहाॽरे़ ये़क्यक् खाराक् सिक्पोःक्ल मे़याःन्दुरो, कर सिक्कुम्निबा मनाहाॽरे़ सिक्पोःक्मान् नःम्नःम्बा मे़जोगुरो॥ 9 सिक्कुम्निबा मनान् अदङ्ङिन्नु खासे़न्हिम्मो पेःक्ने़भग्र, अदङ् मनान् फक्लःन् हे़क्क्याङ् कुनामे़न्छाॽ मे़त्तुरो, खे़ल्ले़चोगुल्ले़ खे़प्मो पाःन्दङ् मे़बोङ्ने़न्लो॥ 10 माक्खिॽ के़से़बा मनाहाॽरे़ कुदोःप्मा मनान् मे़जिःत्तुरो, हे़क्क्याङ् निरिक्काङ् याःम्बक् के़जोक्पे़न् से़प्मा मे़गोःत्तुरो॥ 11 अदङ् मनाःल्ले़ कुसिक् पोःक्मान् के़रे़क् ओसेःन्धाङ् चोगुरो, कर सिक्कुम्साबा मनान् स्वाःत् मे़त्छिङ्ङाङ् वाॽरो॥ 12 युक्साबा मनाःल्ले़ इङ्ले़क् पाःन्हाॽ खे़प्सुने़भग्र, खे़ल्ले़ के़रे़क् कुसुहाङ्युक्पाहाॽ कुॽइगे़भे़म्बा मे़बोङ्लो॥ 13 याङ्गे़साॽबा नु के़युक्पाहाॽ कुदङ्बासिरो, यहवे दाङ्बे़ल्ले़ खे़ङ्हाॽ ने़प्माङ् मिक्के़निबा चोगुसिरो॥ 14 हाङ्ङिल्ले़ याङ्गे़साॽबे़न् कुदोःप्मा खासे़न् लोःन्दु पिरुने़भग्र, खे़न् हाङ्ङिल्ले़ कुहाङ्युक्नान् सदादिङ् कम्ब्राङ् पोङ्लो॥ 15 तोःम्मारे़ लागि याक्मनाबा कसिक्पे़ल्ले़ नु फे़ःक्मनाबा पाःन्निल्ले़ सिक्कुम् निङ्वाॽ आबिरो, कर कुबाःप्पाःत् ले़प्मनाबा साःल्ले़ कुम्मा कुनाधासु पिरुरो॥ 16 ताक्के़भे़ॽबाहाॽ मे़नुॽ मे़दाःल्ले़ लायोःन्नाङ् पोर पेःक्लो, कर साम्योबाहाॽरे़ ताक्के़भे़ॽबाहाॽरे़ खुन्छिॽ मे़क्मे़न् मे़निसुरो॥ 17 खे़ने़ॽ के़स्सा ये़म्बित्छान् हे़न्थिम्मो याक्ते़ॽओ, खे़ब्याङ् खे़ल्ले़ खे़ने़ॽ सनारुङ् के़बोङ्ल चोगुरो खे़ल्ले़ खे़ने़ॽ के़सिक्लुङ्मो साॽरिक् के़निङ्वाॽ तासुरो॥ 18 ताःन्दिगे़न् सुफो के़होप्पादे़न्नो मनाहाॽ ये़मे़न्दङ् मे़बोङ्लो, कर साम्योथिम् इङ्जाङ् के़इःप्पा के़नाःप्पाहाॽ मुॽइसाबासिरो॥ 19 पाःन्निल्ले़रक् से़वारोबाहाॽ तोःम्मा सुक्मे़न्दे़त्ने़न्लो, खे़ङ्हाॽरे़ कुसिङ् मे़निःत्तुसाङ् निङ्वाॽ मे़म्बिरुन्लो॥ 20 हारावरा के़बाःप्पा मनान् थे खे़ने़ॽ के़निसुबि? खे़न्नुःल्ले़ग अदङ्ङिल्ले़ कुलागि यरिक् निङ्साङ् वाॽरो॥ 21 मनाःल्ले़ कुसे़वारोबे़न् चुःक्काङ्धोए ए़ॽसिङ्ल याःन्दुने़भग्र, निन्धासेःक्ओ खे़न् तुक्खे के़जाःप्पा पोङ्ॽ॥ 22 कुयाःक् के़ले़ॽबा मनाःल्ले़ यरिक् खे़माॽ फोःक्खुरो, हे़क्क्याङ् कुसिक् के़जम्बे़ल्ले़ यरिक् लायोहाॽ चोगुरो॥ 23 मनाःल्ले़ कुआङ्दिङ् लॽमे़ल्ले़ खुने़ॽ यो थासुरो, कर नःम्नःम्बा याम्साम् के़गप्पा मनाःल्ले़ इङ्धाङ् खोसुरो॥ 24 खुःन्द्रिक्पाहाॽ चुम्जुम्मोए निङ्मि मे़बोङ्लो, खे़ङ्हाॽ माङ्हे़क्सिङ्मा मे़बाङ्घुसिबे़ल्ले़ चोगुल्ले़ खुन्छिॽ तोःन्दि पिमा मे़न्आःन्छिङ्ङिन्लो॥ 25 मनाःल्ले़ आप्फेक् कुगिमे़न् लत्छा चे़न् हे़क्तङ्बारो, कर यहवे दाङ्बाओ कुनिङ्वाॽ के़युङ्बे़न् कम्ब्राङ्ङो वाॽरो॥ 26 यरिक्ले़ युक्साबे़न्लाम् नोनिङ्वाॽ खोमा मे़गोःत्तुॽ, कर यहवे दाङ्बाल्ले़रक् कुदोःप्मा खासे़न् चोगुरो॥ 27 साम्योबाल्ले़ इङ्ले़क् के़जोक्पे़न् कुसिक्ले़ःङ्लो, कुॽइगे़भे़म्बाल्ले़ साम्योबान् कुसिक्ले़ःङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.