खाहुन् 27 - लिम्बु1 ताःन्दिक्ले़ लागि यम्बा मे़ले़ङ्सिङ्ङिन्ने़ॽओ, थेआङ्भे़ल्ले़ थिक्यान् थिक्ले़ थे पोङ्ॽ, के़लॽबा पाःन्निन् खे़ने़ॽ के़न्निसुन्लो॥ 2 वेॽ मनाहाॽरे़ खे़ने़ॽ के़नारा मे़भोसुररो, खे़ने़ॽ आप्फेक् मेःन्लो, हे़क्क्याङ् खे़ने़ॽए के़म्ब्रासेॽइल्ले़ मेःन्लो कुभा एयाङ्बाहाॽलाम् पोङ्लरो॥ 3 लुङ्ङिन् के़लिःप्पा चोक्लो हे़क्क्याङ् ये़ःङ्घाःन् पलिःप् के़लिःप्पा चोक्लो, कर अदङ् मनाःल्ले़ साक्के़न् फोःक्खुबान् आरसाङ् साॽरिक् पलिःप् के़लिःप्पा चोक्लो॥ 4 सिक्पोःक्माङ्ग साॽरिक् कुॽइगे़भे़म्बा चोक्लो, हे़क्क्याङ् साक्के़न्निङ्ग आसे़से़प्पा के़गुङ्बा च्वाःत् हे़क्तङ्बा चोक्लो, कर नाहे़न्निल्ले़ कुबेसाङ् हात् ये़प्मा सुक्पे? 5 स्वाःत्ताङ् लुङ्माॽ तुक्मासिनुःल्ले़ मे़घे़प्सुरए फे़ःक्मासि तम्मासि नुबारो॥ 6 चुम्मिल्ले़ आघाःम्बान् नसान् चोःक्मा सुक्ते़त्लो, कर निङ्मिःल्ले़ चुप् आमे़प्पे़न् साॽरिक् इङ्ले़क्पाआङ् पोङ्लो॥ 7 पघा के़घाबा मनान् सक्वाघुःल्ले़ कुनिङ्ले़ॽरुरो, कर कुसिक्के़लाःक्पे़ल्ले़ के़घिःक्पान्नाङ् कुजानुॽरो॥ 8 कुहाप्पोलाम् ताप्के़बे़ॽबाआङ् के़बेःक्पा पुःन् हे़क्के हिम्मोलाम् माःङ्घा के़वाॽबा मनान् ताप्के़बे़ॽबा पोङ्लो॥ 9 फुङ्नाम् नु सुक्पाल्ले़ निङ्वाॽ सःत्ल चोगुरो, हे़क्क्याङ् चुम्देङ्लाम् खोगे़दे़प्पा सुम्सुम्बा सुजान् कुजागे़नुॽबा चोक्लो॥ 10 आप्फेक् के़न्देःङ्बे़न् नु आप्फेक् के़म्बारे़ कुन्देःङ्बे़न् खे़ने़ॽ लाप्मे़भुसे़न्ने़ॽओ, तुक्खे लाक्खे के़जाःल्ले़ के़म्भुॽ के़न्साॽहाॽरे़ खुन्छिॽ हिम्मो खे़ने़ॽ मे़बेगे़न्ने़ॽओ, थेआङ्भे़ल्ले़ निःत्ताङ्बा हिम्बेसाङ्बे़न् माःङ्घाबा फुॽनुसाॽहाॽनुःल्ले़ नुबा चोक्लो॥ 11 आस्साए, खे़ने़ॽ सिक्कुम्निबा पोःक्खे़ॽओ, हे़क्क्याङ् आङ्गाॽ आसिक्लुङ्मान् सःत्ल याःन्दे़ॽओ, खे़ब्याङ् आङ्गाॽ चे़ॽया इङ्दो के़मे़प्पा हाःत्छाङ् आङ्गाॽ नुगप् पिमा सुक्तुङ्लो॥ 12 खासिङ्गे़निःप्पे़ल्ले़ ये़त्तुक्खे तार पप्पा निसुरो हे़क्क्याङ् कुभा ते़न्नो से़ःप्सिङ्लो, कर कुनिङ्वाॽ के़बाःक्पा मनान् खे़न् ले़प्माङ्ङे पेःक्लो हे़क्क्याङ् खे़ल्ले़ खुम्दिङ् खोसुरो॥ 13 कुसिङ् मे़न्निःत्तेबा मनाःल्ले़ कुसिङ्नात्तो तोःन्दि के़युङ्सिङ्बा मनाःल्ले़ कुदेःत्तिन्नाङ् नाप्ते़ॽओ, ताप्के़बे़ॽमा मे़न्छुमाःल्ले़ लागि हे़क्के चोगुबाने़भग्र, खे़ल्ले़ तिक् युक्खुबान् युक्खे़ॽओ॥ 14 कुभारे़ खुने़ॽ कुहिम्बेसाङ्बे़न् आन्देन् तानाम्सा यम्बा इक्लाओ हाङ्वागे़न् मुॽइसाम् पिरुने़भग्र, खे़ङ्ग साक्मुरा माङ्दे मे़त्तुबा हे़क्के पोङ्लो॥ 15 खे़माॽ के़जोःक्मा मेःत्ते़न् वहित् थामा ये़म्मो तिबेलाबे के़धाबाआङ् के़बप्पा च्वाःत् ते़प्पक्वा हे़क्तङ्मारो॥ 16 खे़न् युक्को कप्माग सुरिःत्तिन् युक्को कप्मानु कुदङ्बारो, इग्र हुक्किल्ले़ निङ्गेःन् पुप्मनाबा कुइसिःक्लो॥ 17 फे़न्जेल्ले़ फे़न्जेन् याराप्तुबा कुइसिक् मनाःल्ले़ वेॽ मनान् चाःप्पा चोगुरो॥ 18 पत्छेॽबुङ्मान् ओगे़मे़प्पा के़जोःक्पे़ल्ले़ खे़ल्ले़ कुजाॽइन् चरो, हे़क्क्याङ् कुन्दाङ्बा कम्ब्राङ् के़मे़प्पा से़वारोबे़न् मिङ्सो इङ्धाःङ्साबा पोङ्लो॥ 19 च्वाःत्तिल्ले़ मना नारान् ओसेःन्धाङ् चोगुरो, हे़क्केलॽरिक्के सिक्लुङ्मे़ल्ले़ ये़प्ले़क्किन् निधाःप्सुरो॥ 20 सिमे़न् नु मे़क्मे़ल्ले़ आप्फाल्ले़आङ् कुनिङ्वाॽ मे़दाने़न्लो, मनाःल्ले़ कुमिक्के़न्नाङ् आप्फाल्ले़आङ् मे़घाने़न्लो॥ 21 युप्पा योःम्मा खप्प्या नु साम्म्याङ् साङ्मा मिदःत् वाॽरो, हे़क्केलॽरिक्के मनान् कुनारा मे़भोसुबा लाम् साॽमा सुक्ते़त्लो॥ 22 अदङ् मनान् सुम्बाङ्ङो थे़क्माआङ् हाक्मासाङ्, लुङ्सुम्मो चाःन् याक्माआङ् युःप्मनाबा हे़क्के चोःक्मासाङ्, खे़ने़ॽ खे़ल्ले़ कुअदङ् चोःक्मान् खुने़ॽलाम् के़ल्लःत्तुन्लो॥ 23 खे़ने़ॽ के़मे़ल्लुक्हाॽ आक्खे मे़लॽ नुरिक् निङ्वाॽ खोसे़ॽओ, के़धक्सा लुप्हाॽ नुरिक्काङ् यारजोगे़से़ॽओ॥ 24 थेआङ्भे़ल्ले़ याङ्साकुन्धेन् सदादिङ् मे़वाॽने़न्लो, हे़क्क्याङ् तिचःन्नाङ् काक् थाःक्हाॽरे़ लागि मे़वाॽने़न्लो॥ 25 याॽलाङ्ङिन् इःङ्मादेमाआङ् खारक् के़लिङ्बा कुनःक् चाभे़त्लाःन् निधाःप्लो, हे़क्क्याङ् कोःक्माहाॽओलाम् याःन्सुङ्हाॽ फुङ्मा पोङ्लो, 26 खे़ब्याङ् खे़ने़ॽ मे़ल्लुक्हाॽरे़ चाङ्मा तेत् के़म्बिरो, हे़क्क्याङ् इक्ताप् इङ्मा याङ्ङिन् मे़ःन्दाहाॽलाम् तारो॥ 27 मे़ःन्दाःल्ले़ कुनुःल्ले़ खे़ने़ॽ नु के़हिम्सयङ्हाॽ चामा के़योरिरो, हे़क्क्याङ् के़से़वारोमाहाॽ चाःप्मासिरे़ लागि पोङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.