खाहुन् 25 - लिम्बुसोलोमनरे़ आल्लसाङ् वेॽ यरिक् कुघाहुन्हाॽ 1 सोलोमनरे़ कन् कुघाहुन्हाॽ यहुदाबा हाङ् हिजकियाःल्ले़ कुमनाहाॽरे़ मे़लिङ्घुबारो— 2 कुभा पाःन्हाॽ स्वाःत् कप्मे़ल्ले़ निङ्वाॽफुमाङ्ङिल्ले़ कुमिमिदिङ् पोङ्लो, कुभा पाःन्हाॽ कोःप्मा लःप्मे़ल्ले़ हाङ्हाॽरे़ खुन्छिॽ मिमिदिङ् पोङ्लो॥ 3 आक्खेलॽरिक् साङ्ग्राम्पेदाङ्हाॽ थाःङ्धाक् पत्, हे़क्क्याङ् योॽबान् कुदिम्बे केःम्बा चोक्लो, हे़क्केलॽरिक्के हाङ्हाॽरे़ खुन्छिॽ सिक्लुङ्मान् कोःप्मा हङ्मा सुक्मे़न्दे़प्मनाबा चोक्लो॥ 4 खे़ने़ॽ युप्पाःल्ले़ कुहिःन् लःत्ते़देसे़ॽओ, हे़क्क्याङ्लक् कार्बोबाल्ले़ कुलागि याःम्बक् के़बिबा नुबा चिगक्वा लःम्मा सुक्लो॥ 5 हाङ्ङिल्ले़ कुदगिलाम् कुॽइगे़भे़म्बा सुहाङ्युक्पाहाॽ खे़ने़ॽ लःत्ते़देसे़ॽओ, हे़क्क्याङ्लक् खुने़ॽ कुहाङ्युक्नान् साम्योनिमालाम् युक्सिङ् पोङ्लो॥ 6 हाङ्ङिल्ले़ कुदगि यम्बा मना मे़हे़न्छिङ्ङिन्ने़ॽओ, हे़क्क्याङ् यम्बा तुम्म्याङ्हाङ्हाॽरे़ खुन्छिॽ लुम्मो खे़ने़ॽ युङ्मा युक् मे़गोःत्ते़न्ने़ॽओ॥ 7 यम्बा मनाहाॽरे़ खुन्छिॽ तगि खे़ङ्हाॽरे़ खे़ने़ॽ यो थामानुःल्ले़ तगि, खे़ङ्हाॽरे़ आप्फेक् “खे़ने़ॽ कत्थो थाङे़ॽओ॥” के़म्मे़प्पे़न् के़लागि नुबा पोङ्लो॥ 8 खे़ने़ॽ के़मिक्किल्ले़ थेःन् निसुआङ् वाॽ, खे़न् हारावरा कुभाङ्हिम्मो मे़देॽरे़न्ने़ॽओ, थेआङ्भे़ल्ले़ निन्धासेःक्ओ के़हिम्बेसाङ्बे़ल्ले़ के़नाधासुल्ले़ थे के़जोगुबे? 9 के़हिम्बेसाङ्बे़न्नु खे़माॽ तुःन्देॽहाॽ पाःन्धङ् के़जोगुल्ले़, वेॽ मनाःल्ले़ कुनिःन्धो पाःन्नो इङ्ले़क् मे़मे़त्ते़न्ने़ॽओ॥ 10 मेःन्ने़भग्र खे़न् के़घे़म्बे़ल्ले़ खे़ने़ॽ सिरिङ्ममो के़धारो, हे़क्क्याङ् ताप्फे़ःम्बा के़मिङ्ङिन् आभे़ल्ले़आङ् मे़माने़ल्लो॥ 11 नुरिक्काङ् पाःप्मनाबा पाःन्निङ्ग युप्पा च्ये़त्थ्याओ साम्म्याङ् नाङ्सेॽहाॽ तोःम्मनाबा हे़क्तङ्बारो॥ 12 साम्म्याङ् कुन्दुल्लो इग्र साम्म्याङ् इसेःङ्बा वाःत्ति हे़क्के सिक्कुम्साबा मनाःल्ले़ आभे़ःक्पान् के़घे़म्बाल्ले़लागि पोङ्लो॥ 13 पोगुगे़न् कुजा सुम्मा ये़म्मो के़सेःम्बा च्वाःत् थुङ्मनाबा हे़क्के निङ्वाॽइरे़ खोःप्तुबा इङ्घङ्साबे़न् खुने़ॽ के़बाङ्बाहाॽरे़ लागि पोङ्लो, खे़ल्ले़ खुने़ॽ कुन्दाङ्बे़ल्ले़ कुयाम्साम्मिन् चाङ्जाङ् चोगुरो॥ 14 आप्फेक् माङ्हुप् के़जोःक्पाआङ् मिक्तोक् मे़न्दाःप्मनाबा मनान् यम्बा पान् पाःत्लो, खे़ङ्ग वहित् मेःन्नेबा खाॽमित् नु सुरित् केजङ् हे़क्तङ्बारो॥ 15 नासिथःप्मा पाःन्निल्ले़ युक्साबे़न् ले़म्मा सुक्ते़त्लो, हे़क्क्याङ् सुम्सुम्बा ले़सोःत्ते़ल्ले़ ये़प् लुङ्सि यःम्मा सुक्तुरो॥ 16 सक्वाघुन् के़याङ्घुने़भग्र के़योयोरक् च्ये़ॽओ, कन् यरिक् के़जने़भग्र खे़ने़ॽ के़ॽबे़प्माःत् के़त्लो॥ 17 के़हिम्बेसाङ्बे़ल्ले़ कुहिम्मो कुभा ये़म्मोरक् पेगे़ॽओ, खे़ने़ॽ ये़त्ले़ङ् के़बेःक्ने़भग्र खे़ल्ले़ के़जिःत्लो॥ 18 कुहिम्बेसाङ्बे़ल्ले़ कुदक्ले़ङ्वाओ इङ्ले़क् तोःन्दि के़बिबे़न् तक्कात् इग्र ताभे किग्र हासम्सम्बा तोङ् हे़क्तङ्बा मनारो॥ 19 तुक्खेवा ये़म्मो निङ्वाॽइरे़ मे़घोप्तुम्बा मनान् नासाॽमाग के़दुक्पा हाबोॽबा इग्र के़सक्पा लाङ् पप्पा कुइसिःक्लो॥ 20 निङ्वाॽ तुक्खेओ के़धाबे़ल्ले़ लागि साम्गे़लोबा मनान् चुङ्सिःक्मा ये़न्नो खाम्देःत्तिन् के़नाप्पागे़देॽबा हे़क्के इग्र याङ्घेःक्ओ के़सुःप्पे़न् हुङ्मना केःप्मना हे़क्के पोङ्लो॥ 21 के़निङ्मिन् साक्मे़न्जा वाॽने़भग्र, चामा कुजा पिरे़ॽओ, कुवामिःक्काङ् वाॽने़भग्र, थुङ्मा च्वाःत् पिरे़ॽओ॥ 22 हे़क्के के़जोगुल्ले़ खे़ने़ॽ खे़ल्ले़ कुधे़गेःक्पो सिरिङ्मःमे़ल्ले़न् मिदःत्ते़न् के़हुक्खुबा हे़क्के पोङ्लो, हे़क्क्याङ् यहवे दाङ्बे़ल्ले़ खे़ने़ॽ हाङ्से़म् के़बिरो॥ 23 थाङ्गे़त् ले़प्माङ्बा सुरित्ते़ल्ले़ वाहित् थासुबा हे़क्के इङ्ले़क्स्वा ले़सोःत्ते़ल्ले़ नारान् माङ्घ्रु मे़त्तु तारुरो॥ 24 खे़माॽ के़जोःक्मा मेःत्तिन्नु लत्थिक् हिम्मो युङ्मानुःल्ले़ग कौसिःल्ले़ लत्छा कुसुक्पो युङ्मा नुबा पोङ्लो॥ 25 के़नाबा याम्साम्मिल्ले़ लागि के़सेःम्बा च्वाःत् हे़क्के माःङ्घा लाजेॽलाम् के़गे़प्पा नुबा इङ्घङ्ङिन् पोङ्लो॥ 26 ताक्के़भे़बे़ल्ले़ कुनिङ्वाॽ कुइसिक् चोःक्मा के़बाङ्बा साम्योबा मनान् माक्खुन्द्या च्वाःत्ते़ल्ले़ वबुन्दाक्किन् फे़त्लाःन्दुबा हे़क्तङ्बारो॥ 27 साॽरिक् यरिक् सक्वाघु चामा नुबा मेःन्लो, हे़क्केलॽरिक्के आप्फेक् चम्सिङ्मान्नाङ् नुबा मेःन्लो॥ 28 कुसिक् थम्मा मे़न्छुक्मना मनाःङ्ग लुङ्धाक्हाॽ के़लुःम्बा के़बेःक्पा ये़क्यक् कुभाॽबाङ् के़होप्पा हे़क्तङ्बारो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.