खाहुन् 24 - लिम्बुखाहुन् २० 1 ताक्के़भे़ॽबा मनाहाॽ नामे़हे़त्ते़से़न्ने़ॽओ, खे़ङ्हाॽनु तेःङ्जुम् चोःक्मा निङ्वाॽ मे़जोगे़न्ने़ॽओ, 2 थेआङ्भे़ल्ले़ खे़ङ्हाॽरे़ खुन्छिॽ सिक्लुङ्मे़ल्ले़ खार्मे़न्दक् पान् मे़इःत्तुरो, हे़क्क्याङ् खे़ङ्हाॽरे़ खुन्छिॽ मुराःल्ले़ खे़जे़क् पान् मे़बाःत्तुरो॥ खाहुन् २१ 3 सिक्कुम्दिङ् निङ्वाःल्ले़ हिम् चोःक्मा पोङ्लो, हे़क्क्याङ् खासिङ्निःप्मो खे़न् पोःक्लो॥ 4 ने़हिनिङ्वाॽ के़गप्पा हिम्मिन् इमे़ल्लुङ्बा नु नुबा पाःन्हाॽरे़ याक्फाङ्हाॽ सधे़क् के़दिम्बा चोक्लो॥ खाहुन् २२ 5 सिक्कुम्निबा मनाःल्ले़ कुमुक्साम्मिन् पयम् यम्बा चोक्लो, हे़क्क्याङ् ने़हिनिङ्वाॽ के़गप्पा मनाःल्ले़ कुमुक्के़न् पोरो॥ 6 ते़न्धङ् चोःक्मारे़ लागि खे़ने़ॽ लाम्लोमा पान् चाहा के़जोःक्लो, के़नाःम्बा पोङ्मारे़ लागि सुजासाबा चाहा मे़जोक्लो॥ खाहुन् २३ 7 अदङ् मनाहाॽरे़ खुन्छिॽ लागि सिक्कुम्दिङ् निङ्वान् साॽरिक् थोधोक्पा पाःन्लो, लाम्धेःत्तो के़जुम्बा चुम्भोबा मनाहाॽरे़ खुन्छिॽ तगि पाःप्मा पान् खे़ङ्हाॽरे़ थे़माआङ् मे़ङ्गत्तुन्लो॥ खाहुन् २४ 8 आत्तिल्ले़ ताप्फे़ःम्बा याःम्बक् चोःक्मा निङ्वाॽ चोगुॽ, खे़न् चे़म्भन् के़जोःक्पा मिङ्लाम् कुसिङ् निःत्ते़त्लो॥ 9 अदङ्ङिल्ले़ चोःक्मा इःत्तुबा पाःन्हाॽ लायो लासोःत्लो, हे़क्क्याङ् मनाहाॽ याप्मि कुनामे़न्छाॽ के़मे़प्पे़न् कुसिक्ले़ःङ्लो॥ खाहुन् २५ 10 तुक्खेलाक्खेबा ये़म्मो के़लुङ्माॽ फ्याःङ् लॽने़भग्र, खे़ने़ॽ आक्खे़न् साॽरिक् मे़न्धुम्मनाबा के़जोःक्लो! 11 से़त्छे़ मे़देॽरुसिबाहाॽ खे़ने़ॽ से़ःप्ते़से़ॽओ, चे़प्मा से़प्मासिरे़ लागि मे़देॽरुसिबाहाॽ थेःक्ते़से़ॽओ॥ 12 “कर कल्ले़ कुयाःम्बेओ थेआङ् निङ्वाॽ मे़ङ्घोःम्नारो,” के़लॽरिने़भग्र थे सिक्लुङ्माॽ के़साॽबे़ल्ले़ कन् पाःन्निन् निङ्वाॽओ मे़युक्खुन्नाङ्बि? खे़ने़ॽ के़हिङ्मे़न् ओगे़मे़प्पे़ल्ले़ कन् पाःन्निन् निङ्वाॽ मे़घोसुन्नाङ् बि? थे के़रे़क् मनाहाॽ खुन्छिॽ याःम्बक् कुइसिक् खुने़ॽ कुले़क्वा मे़नुःक्तुन्नाङ्बि? खाहुन् २६ 13 आबुगे़न् आस्साए, सक्वाघुन् च्ये़ॽओ, थेआङ्भे़ल्ले़ खे़न् नुबा पोङ्लो, कुले़क्कोबा सक्साघुःन् के़जःल्ले़ पलिम् लिम्लो॥ 14 कन् पाःन्निन्नाङ् निङ्वाॽओ युक्खे़ॽओ सिक्कुम्दिङ् निङ्वान् के़याम्साम्मिल्ले़ लागि सक्वाघुरो॥ कन् के़घोसुने़भग्र खे़ने़ॽ के़लागि ताये़म्मो निङ्साङ् वाॽरो, हे़क्क्याङ् के़जोगुबा निङ्साङ्ङिन् थेनाधे मे़बोङ्ने़ल्लो॥ खाहुन् २७ 15 साम्योबा मनाःल्ले़ कुहिम्मिन् कुॽइगे़भे़म्बे़ल्ले़ सुगुआङ् युङ्बा हे़क्के खे़ने़ॽ मे़सुगे़न्ने़ॽओ, खे़ल्ले़ कुयुङ्मादे़न्निन् हिम् लिमे़मे़त्ते़न्ने़ॽओ, 16 थेआङ्भे़ल्ले़ साम्योबान् नुसिले़ङ् चोःन्छाङ्, याम्मो पोःक्लो, कर ताक्के़भे़ॽबाहाॽ माङ्दुक्मे़ल्ले़ मे़क्खुसिरो॥ खाहुन् २८ 17 खे़ने़ॽ के़निङ्मिन् के़साक्पो थाःल्ले़ मे़सःत्ते़न्ने़ॽओ, खुने़ॽ चोःन्निल्ले़ खे़ने़ॽ के़सिक्लुङ्मो ये़ये़ मे़लॽरे़न्ने़ॽओ, 18 मेःन्ने़भग्र यहवे दाङ्बे़ल्ले़ निसुआङ् खुने़ॽ मे़दे़न्ने़ल्लो, हे़क्क्याङ् खे़न् लाम्बा खुने़ॽ कुसाक्के़न्निन् खे़त्तुदेसुरो॥ खाहुन् २९ 19 कुॽइगे़भे़म्बाहाॽरे़ मे़जोगुल्ले़ के़निङ्वाॽ मे़दुगे़न्ने़ॽओ, इग्र फे़न्याःम्बक् के़जोःक्पाहाॽ नामे़हे़त्ते़से़न्ने़ॽओ, 20 थेआङ्भे़ल्ले़ ताक्के़भे़बे़ल्ले़ ताये़म्मो कुनिङ्साङ् होप्लो, हे़क्क्याङ् कुॽइगे़भे़म्बे़ल्ले़ कुसेमिन् मे़से़रु मे़बिरुरो॥ खाहुन् ३० 21 आस्साए, यहवे दाङ्बान् हे़क्क्याङ् हाङ्ङिन्नु किसे़ॽओ, हे़क्क्याङ् हाङ्पिफ्युङ् के़जोःक्पाहाॽनु मे़दङ्सिङ्ङिन्ने़ॽओ, 22 थेआङ्भे़ल्ले़ खुन्छिॽ ने़प्माङ्ले़ खे़ङ्हाॽरे़ खुन्छिॽ सम्धाङ् थिक्ले़ङ्ले़ खाप्पुथ्यःङ् पोङ्मे़न् पाङ्घु तासुसिरो॥ हे़क्क्याङ् आक्तङ्बा तुक्खे लाक्खेहाॽ खुन्छिॽ पाङ्घु तासुसि के़लॽबे़न् आत्तिल्ले़ निङ्वाॽ खोसुबे? सिक्कुम्दिङ् निङ्वाॽरे़ आल्लसाङ् वेॽ खाहुन् पाःन्हाॽ 23 कन् पाःन्हाॽआङ् सिक्कुम्निबा मनाःल्ले़ कुघाहुन्लो— खासे़न्लोःम्मे़ल्ले़ एःक् पएःक् चोःक्मा नुबा मेःन्लो॥ 24 आत्तिल्ले़ आप्तिक्साबे़न् “कुदोःप्मा के़जोक्” मे़त्तुॽ, मनाहाॽरे़ खे़न् माङ्दे साङ्ग्रा मे़मे़त्तुरो हे़क्क्याङ् मे़न्छाम् सुवाङ्हाॽरे़ खे़न् चे़क्या मे़मे़त्तुरो॥ 25 कर आप्तिक्साबे़न् आप्तिक्साबाए के़मे़प्पाहाॽ मे़नुॽमे़दारो, खे़ङ्हाॽरे़ खुन्छिॽ सम्धाङ् यरिक् हाङ्वागे़न् मुॽइसाम् थारो॥ 26 कुदोःप्मा नुगप् नुःक्माग चुम्मिन् हे़प्मनाबा कुइसिःक्लो॥ 27 लाकात्पा याःम्बक्हाॽ चोगे़ सुरे़ॽओ, हे़क्क्याङ् इक्ताप्हाॽ यारिप् चोगे़ॽओ, खे़न् एगाङ् खे़ने़ॽ के़हिम्मिन् चोगे़ॽओ॥ 28 खे़ने़ॽ आप्फेक् के़हिम्बेसाङ्बे़ल्ले़ कुदक्ले़ङ्वाओ हने़ थेनाधे साखि मे़बिरे़न्ने़ॽओ, इग्र के़म्ब्रासेॽइन् इङ्ले़क् याःम्बक्ले़ लागि मे़मुन्दे़न्ने़ॽओ॥ 29 खे़ने़ॽ अक्खे मे़बाःत्ते़न्ने़ॽ, “खे़ल्ले़ मे़त्ताङ्बा कुइसिक् आङ्गाॽआङ् खुने़ॽ मे़त्तुङ्लो, खे़न् मनाःल्ले़ आङ्गाॽ मे़त्ताङ्बे़ल्ले़ कुले़क्वा नुःक्तुङ्लो!” 30 आङ्गाॽ ले़म्सुवाबा थिक्ले़ कुइक्ताप्पोलाम् पेगाङ्लो, हे़क्क्याङ् कुऩेहि के़होप्पा थिक्ले़ कुजे़ल्ले़क्सेॽ इक्ताप्लाम् पेगाङ्लो, 31 खे़न् के़रे़क् पिसाङ् तिङ्ग्रेक्हाॽ लिङ्से़आङ् युङे़रो, इक्ताप् कुले़ःम् याःन्सुङ्हाॽ ताबे़आङ् ने़स्से़रो, हे़क्क्याङ् लुङ्धाक्हाॽ चिजि खक्खक् पोःक्खे़आङ् ने़स्से़रो॥ 32 आङ्गाॽ ओमे़त्तुङ्बा पाःन्हाॽ आसिक्लुङ्मो इःत्तुङ्लो, हे़क्क्याङ् निसुङ्बा पाःन्हाॽलाम् निसाम् हुॽसिङ्ङाङ्लो॥ 33 सप्फाधिक् इम्मा नु सम्माजिक् इम्धक्वा लोमारे़, हुक्किन् इभुप्माआङ् सप्फाधिक् नाःम्सिङ्मारे़, 34 याङ्साॽमे़न् खे़ने़ॽओ फाःन्दा कुइसिक् तारो, कुहोःप्मा कुसाक्मे़न् ताभे के़हेबा मना कुइसिक् तारो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.