खाहुन् 23 - लिम्बुखाहुन् ७ 1 खे़ने़ॽ युक्साबे़न्नु कुजा चासे़ के़युङ्सिङ्ङे़ल्ले़, खे़ने़ॽ के़दगि थेधे मे़युक्खुआङ् युङ् खे़न् मिक्चो पोॽरे़ओ, 2 खे़ने़ॽ यरिक् कुजाघे़ चोःक्मा ये़प्ले़क् के़गत्तुने़भग्र, खे़ने़ॽ के़दत्लुम्बेःप्मो फे़जाःन् फत्छे़ॽओ॥ 3 कुजागे़नुॽबा खे़ल्ले़ कुजान् चाङ्गो मे़लॽरे़न्ने़ॽओ, थेआङ्भे़ल्ले़ खे़न् कुजान् इङ्आले़क्ले़क्पा चोक्लो॥ खाहुन् ८ 4 याङ्साकुन्धेसाबा पोङ्से़ साॽरिक् मे़युःत्छिङ्ङे़न्ने़ॽओ, आभे़ल्ले़ याःन्धालाम् अङ्सिङ्मा के़लॽबा पाःन्नो सिक्कुम्साबा पोःक्खे़ॽओ॥ 5 के़याङ्साकुन्धेन् मिक्चिराप्पो खोदे़त्लो, हे़क्क्याङ् खे़न् पेःक्खे़त् थेआङ्भे़ल्ले़ खे़ल्ले़ कुलाप् लिङ्लो, खम्भ्याङ् ताङ्साङ्बो ले़प्माङ् मुया हे़क्के पे़बेःक्लो॥ खाहुन् ९ 6 खिःम्जक्वा मनाःल्ले़ कुजान् खे़ने़ॽ मे़जे़न्ने़ॽओ, खे़ल्ले़ कुजागे़नुॽबा कुजान् चामा निङ्वाॽ मे़जोगे़ने़ॽओ, 7 थेआङ्भे़ल्ले़ खे़ङ्ग कन् परिक्पा मनारो, खे़ल्ले़ आक्ख्याक् कुमे़ल्लुङ् मासुङ् फाॽआङ् आभे़ल्ले़साङ् निङ्वाॽ इःत्तुरो॥ खे़ल्ले़ खे़ने़ॽ “चे़ॽ थुङे़ॽ,” के़मे़त्लो, कर खे़ल्ले़ कुनिङ्वान् खे़ने़ॽनु होप्लो॥ 8 खे़ने़ॽ चबे़ःत्छिक्लक् के़जबान्नाङ् के़बे़सुरो, हे़क्क्याङ् खे़ने़ॽ खे़न् के़जमुबे़न् हने़ चासोक्लो॥ खाहुन् १० 9 अदङ् मनाहाॽनु खे़ने़ॽ मे़बारे़न्ने़ॽओ, थेआङ्भे़ल्ले़ खे़ङ्हाॽरे़ खे़ने़ॽ के़बाःन्जाःक्किल्ले़ खासिङ्निःप्मान् कुनामे़न्छाॽ मे़मे़त्तुरो॥ खाहुन् ११ 10 उनाहुरिआङ्धोबा लुङ् इःन्दोहाॽ मे़जत्ते़न्ने़ॽओ, इग्र ये़त्छा होॽदोक्हाॽरे़ खुन्छिॽ इक्ताप्हाॽ मे़युक्ते़न्ने़ॽओ, 11 थेआङ्भे़ल्ले़ खे़न्हाॽरे़ खुन्छिॽ के़धे़ॽबे़न् मुक्साम्साबा चोक्लो, के़दक्ले़ङ्वाओ खुने़ॽ खे़ङ्हाॽरे़ खुन्छिॽ तुःन्देन् फोःक्खुरो॥ खाहुन् १२ 12 खे़ने़ॽ के़सिक्लुङ्मे़न् खाहुन् ले़प्माङ् हिसे़ॽओ, हे़क्क्याङ् के़न्भाक्हाॽरे़ ने़हिनिङ्वाॽ पान् खे़प्से़ॽओ॥ खाहुन् १३ 13 अङे़ःक्वान् हे़न्थिम् याक्मा मे़ले़रे़न्ने़ॽओ, कसिक्पा के़याक्तुआङ् खुम्दिङ् के़बिरुल्ले़ खे़न् मे़सिने़न्लो॥ 14 कसिक्पा याक्ते़ॽआङ् खुने़ॽ खुम्से़ॽओ, हे़क्क्याङ् खुने़ॽ सिमालाम् ताङ्घे़ॽओ॥ खाहुन् १४ 15 आस्साए, के़सिक्लुङ्मे़न् सिक्कुम्निबा चोःक्ने़भग्र, आङ्गाॽ आसिक्लुङ्मे़न् से़क्खाए सःत्लो॥ 16 खे़ने़ॽ के़म्ब्रासेॽइल्ले़ के़वाॽबा पान् के़बाःत्तुल्ले़ आङ्गाॽ आसिक्लुङ्मे़न् खे़न् ये़म्मो सःत्लो॥ खाहुन् १५ 17 खे़ने़ॽ के़सिक्लुङ्मे़ल्ले़ लायोबाहाॽ नामे़हे़त्तुसिन्लरो, कर आभे़ल्ले़साङ् यहवे दाङ्बे़न् किमा मे़ले़रे़न्ने़ॽओ॥ 18 से़क्खाए ताये़म्मो खे़ने़ॽ के़लागि निङ्साङ् वाॽरो, हे़क्क्याङ् के़जोगुबा निङ्साङ्ङिन् हने़ मे़बोङ्ने़न्लो॥ खाहुन् १६ 19 आस्साए, खे़प्से़ॽआङ् सिक्कुम्साबा पोःक्खे़ॽओ, खे़ब्याङ् के़सिक्लुङ्मे़न् कुदोःप्मा लाम्मो कत्ते़ॽओ॥ 20 यरिक् चे़ल्ले़क्से थि के़धुङ्बा इग्र साॽरिक् सागे़जाबा हे़क्तङ्बा मे़बोःक्खे़न्ने़ॽओ, 21 थेआङ्भे़ल्ले़ थिमसाङ्हाॽ नु तःक्थे़ःक्के़हाॽ याङ्मे़साॽरो, हे़क्क्याङ् के़जाबा नु के़इम्बारक् के़बोङ्ने़भग्र हारा कुद्रे़क् तेत् के़जाक्खुआङ् लाङ्गे़घेःक्लो॥ खाहुन् १७ 22 खे़ने़ॽ सागे़वाःन्छिङ्ल के़याःन्दे़बा के़म्बारे़ कुबाःन्निन् खे़प्से़ॽओ, हे़क्क्याङ् के़म्मा काप्मुमा तुम्मिल्ले़ ताप्फे़ःल्लिक् मे़मे़त्ते़न्ने़ॽओ॥ 23 से़क्खान् इङे़ॽ, हे़क्क्याङ् खे़न् मे़सङ्घे़न्ने़ॽओ, सिक्कुम्दिङ् निङ्वाॽ, हे़न्थिम् नु खासिङ्निःप्मान् खोसे़ॽओ, 24 साम्योबा मनाःल्ले़ कुम्बा साॽरिक् सःत्लो, सिक्कुम्साबा सा के़गप्पा पान् कुस्साःन्नु कुनिङ्वाॽ तारो॥ 25 पानुदिङ् के़म्बा नु मानुदिङ् के़म्मा हाङ्हाङ् लॽसिररो, खे़ने़ॽ के़गप्मा मानुदिङ् के़म्मा पसःत् सःत्लरो॥ खाहुन् १८ 26 आबुगे़न् आस्साए, खे़ने़ॽ के़सिक्लुङ्मे़न् पिराङ्ङे़ॽओ, हे़क्क्याङ् के़मिक्किल्ले़ आङ्गाॽ आलाम्मिन् तिम्दुररो, 27 थेआङ्भे़ल्ले़ के़त्निमा मे़न्छुमान् लत्छा कुदिःम्बे केःम्बा किप्मा के़घुबा लुम्बात् हे़क्तङ्मारो, हे़क्क्याङ् याम्गे़बोःप्मा मे़न्छुमान् लःम्मे़न्दे़प्नाबा चिहुॽहुॽबा वाबाक् हे़क्तङ्मारो॥ 28 खे़ल्ले़ फाःन्दा कुइसिक् मना सुक्काङ् युङ्लो, हे़क्क्याङ् ये़म्बित्छाहाॽरे़ खुन्छिॽ लुम्मो निङ्वाॽइरे़ मे़घोप्तुम्बाहाॽरे़ खुन्छिॽ खानिःत्तिन् यरिक् फोसुरो॥ खाहुन् १९ 29 हाःत्ले़ तुक्खे तुमुबे? हात् निङ्वाॽ तुक्मो थाबे? हात् खे़माॽओ थाबे? हात् लुङ्हाःप्मो थाबे? हात् हने़ आत्तातान्ने साॽरिक् काःम्बे? हाःत्ले़ कुमिक्हाॽ माक्खिॽ हे़क्के हे़ःत्ताङ्बा पोङ्बे? 30 खे़ङ्हाॽ के़दुम्बा चे़ल्ले़क्से थि थुङ्मोए मे़नाक्काङ् मे़याक्लो, खे़ङ्हाॽरे़ मारुक् फःम्मनाबा के़दुम्बा चे़ल्ले़क्से थि के़याक्पा चल्लाङ्ना खोर्यान् मे़साॽरुरो॥ 31 हे़ःत्ताङ्बा चे़ल्ले़क्सेॽ थिन् अदक्तक् ओमे़मे़त्ते़न्ने़ॽओ, चल्लाङ्ना खोर्याओ खे़न् लिङ्मे़ल्ले़ कुबुःत्थुङ्वा लःन्लो, खे़न् उसुरु कुदोःप्मा यो सरक् लाःप्पेःक्लो! 32 निन्धासेःक्ओ खे़ल्ले़ याङ्हःक् कुइसिक् के़अःक्लो, हे़क्क्याङ् याङ्हःके़न् हे़क्के कुनिङ्ङिन् याक्तु के़बिरो॥ 33 के़मिक्किल्ले़ निङ्वाॽ के़माबा नियाराहाॽ निसुरो, हे़क्क्याङ् के़निङ्वाःल्ले़ आनाक्नाक्पा पाःन्हाॽ इःत्तुरो॥ 34 खे़ने़ॽ तुङ्गोदिङ् वरःङ्ङो के़इम्माङ् के़ने़बा हे़क्के लॽरो, वालाधा सित्लाङ्ङोबा इदाःक्को के़भोःन्छिङ्बा हे़क्के लॽरो॥ 35 खे़ने़ॽ के़बाःत्तुॽ, “खे़ङ्हाॽरे़ आङ्गाॽ मे़हिप्पारो, कर आङ्गाॽ मे़गाःन्नान्लो! खे़ङ्हाॽरे़ मे़धक्कारो, कर निङ्वाॽए मे़घोआन्लो! आभे़ल्ले़ सोआआङ् आल्लसाङ् यरिक् थुङ्मा सुक्तुङ्बे?” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.