खाहुन् 20 - लिम्बु1 चे़ल्ले़क्सेॽ थिन् कुनामे़न्छाॽ के़मे़प्पा चोक्लो, हे़क्क्याङ् थिःङ्ग हयङ् किल्लिङ् के़भोङ्बा चोक्लो, कन् पाःन्हाॽओ के़हम्बाहाॽ सिक्कुम्साबा मे़न्जोःक्ने़न्लो॥ 2 हाङ्ङिल्ले़ कुसाक्के़न्निङ्ग खिरिङ्बा के़हुःक्पा हे़क्के लॽरो, खे़न् कुसिक् के़भोःङ्बे़ल्ले़ खुने़ॽ कुहिङ्मे़न् मासुरो॥ 3 खे़माॽ सिराॽ मे़न्धाङ्मे़न् मनाःल्ले़ कुलागि इङ्धाङ्बा पाःन्लो, कर के़रे़क् अदङ्हाॽ खे़जे़क् चोःक्मा मे़जात्लो॥ 4 ले़म्सुवाबे़ल्ले़ याक्वा थामा ये़म्मो कुइक्ताप्पिन् मे़दोःक्खुन्लो खे़ल्ले़चोगुल्ले़ चासुम्मा ये़म्मो कोःत्तुॽ कर थेआङ् मे़घोसुन्लो॥ 5 मनाःल्ले़ कुसिक्लुङ्मो के़याक्पा निङ्सेःक्हाॽ कुदिम्बे केःम्बा च्वाःत् हे़क्तङ्बारो, कर खासिङ्गे़निःप्पा मनाःल्ले़ खे़न् उःक्खु लःत्तुरो॥ 6 यरिक् मनाहाॽरे़ आप्फेक् खुन्छिॽओ आप्फाल्ले़साङ् थधप् मे़न्लॽमनाबा मिःम्जि कत्तुम्बे़ फाॽआङ् यम्बा पान् मे़बाःत्तुरो, कर हे़क्तङ्बा से़क्खाबा मना आत्ति खोमा सुक्ते़प्पे? 7 साम्योबा मनान् आप्तिक् मेःन्नेबा हिङ्मन्नो वाॽरो, खुने़ॽ कुएगाङ् के़वाॽबा कुस्साहाॽ मुॽइसाबासिरो॥ 8 हाङ्ङिन् हाङ्युक्नाओ खासे़न् लोःन्छे़ युङ्सिङ्ङिल्ले़, खुने़ॽ कुमिक्किल्ले़ के़रे़क् ताप्फे़ःम्बा पाःन्निन् से़न्दुरो॥ 9 आत्तिल्ले़ अक्खेलॽरिक् पाःप्मा सुक्तुबे? “आङ्गाॽ आसिक्लुङ्मे़न् सुत्थो कत्तुङ्लो, आङ्गाॽ सुत्थो नु लायो मेःन्नेबा चोःक्कारो॥” 10 वेॽ के़से़म्बा मे़न्दङ्मनाबा कुधाङ्माहाॽ नु कुसिःक्माहाॽ यहवे दाङ्बे़ल्ले़ कुसिक्ले़ःङ्लो॥ 11 लत्छा अङे़ःक्वाःन्नाङ् खुने़ॽ कुयाःम्बक्हाॽलाम् खुने़ॽ कुये़प्ले़क्हाॽ सुत्थो नु कुदोःप्मा फाॽआङ् निङ्वाॽ खोमा सुक्ते़त्लो॥ 12 नागे़घे़म्बा ने़क्खोॽइन् नु के़निबा मिक्के़न् ने़प्माङ् यहवे दाङ्बे़ल्ले़ए चोगुबारो॥ 13 खे़ने़ॽ मिक्युमे़न् के़सिराॽ मे़धाङे़न्ने़ॽओ, खे़ल्ले़ खे़ने़ॽ आल्लसाङ् याङ्गे़साॽबा के़जोःक्लो, खे़ने़ॽ मे़न्इम्मे चाङ्जाङ्ङाङ् युङे़ॽओ हे़क्क्याङ् खे़ने़ॽ पोगुगे़न् कुजा के़गेःक्सु के़गत्तुरो॥ 14 के़इङ्बे़ल्ले़ पाःत्तुॽ, “कन् नुबा मे़जोक्ने़न्, कन् नुबा मे़जोक्ने़न्!” खे़ब्याङ् नानाक् पेःक्काङ् इङुबा पाःन्नो खे़न् हे़न्छिङ्लो॥ 15 साम्म्याङ् वाॽ, हे़ःक्कङ्गङ्बा मुधिङ्लुङ्हाॽ वे़त्ते़सरे़ वाॽरो, कर ने़हिनिङ्वाॽरे़ पान् के़बाःप्पाहाॽग खोमा के़साक्पा मुधिङ्सिरो॥ 16 कुसिङ् मे़न्निःत्तेबा मनाःल्ले़ कुसिङ्नात्तो तोःन्दि के़युङ्सिङ्बा मनाःल्ले़ कुदेःत्तिन्नाङ् नाप्ते़ॽओ, खे़ल्ले़ ताप्के़बे़ॽमा मे़न्छुमाःल्ले़ कुलागि हे़क्के चोगुबाग्र, खे़न् कुदेःत् कुजाङ्ङिन् तिक् युङ्मा पोङ्लो॥ 17 मनाःल्ले़ इङ्ले़क्लाम् खोसुबा कुजान् कुलागि कुजानुॽरो, कर कुनुप्मोग कुम्ब्रा कुले़ःम् लुङ्जिगेःक् याक्तुबा हे़क्के लॽरो॥ 18 नुबा सुजापान् नाःक्ते़से़ॽआङ् निङ्सेःक्हाॽ चोगे़ॽओ, थङ् चोःक्मा वाॽने़भग्र लाम्लो पाःन्हाॽ खोसे़ॽओ॥ 19 पान् के़बङ्बे़ल्ले़ स्वाःप्पा पाःन्नो इङ्ले़क् चोगुरो, खे़ल्ले़चोगुल्ले़ कुम्ब्रा के़इःप्पा मनालाम्बा माःङ्घा वये़ॽओ॥ 20 कुभारे़ आप्फेक् कुम्बा इग्र कुम्मा साक्मुरा माङ्दे मे़त्तुने़भग्र, सेमिन् माक्सिःङ्ग्याःप्पा खामाक्मो मे़से़रुबाहे़क्के खे़ल्ले़ कुहिङ्मन्ले़न् सेमिन् मे़से़रुरो॥ 21 हाराए खोगे़दे़प्पा लक्खोमान् कुनुप्मो हाङ्वागे़न् मुॽइसाम् मे़बोङ्ने़न्लो॥ 22 अक्खे मे़ल्लॽए़ॽ, “के़भे़न्याःम्बक्किल्ले़ कुले़क्वा नुःक्तुङ्लो!” खे़ने़ॽ यहवे दाङ्बे़न् हाङ्घे़ॽ, हे़क्क्याङ् खुने़ॽ ताङ्गे़से़ःप्लो॥ 23 मे़ङ्गे़प्मनाबा कुसिःक्मा कुधाङ्माहाॽ यहवे दाङ्बे़ल्ले़ कुसिक्ले़ःङ्लो, हे़क्क्याङ् इङ्ले़क्पा ते़म्दुरिःल्ले़ खुने़ॽ कुनिङ्वाॽ मे़दासुन्लो॥ 24 मनाःल्ले़ कुलाङ्गाःङ्हाॽ यहवे दाङ्बालाम्मे सेःक्युक् पोङ्लो, मनाःल्ले़ आक्खेलॽरिक् आप्फेक् कुलाम्हाॽ कुसिङ् निःत्तुबे? 25 सिङ्सिङ् मे़ल्लॽए कुभा पाःन्हाॽ निङ्वाॽफुमाङ्ङो तोःम्मा सुःप्माआङ् माङ्हे़क् चोःक्मनाबे़न् याङ्सिरक् निङ्वाॽ इःप्माग मनाःल्ले़ कुलागि चे़ङ्घ्रङ्बा पोङ्लो॥ 26 सिक्कुम्निबा हाङ्ङिल्ले़ ताक्के़भे़ॽबाहाॽ याएप्तुसिरो, खुने़ॽ खे़ङ्हाॽरे़ सम्धाङ् चानुक्मा काप्लोःक्के़न् इसुरो॥ 27 यहवे दाङ्बे़ल्ले़ कुसेमिःल्ले़ मनाःल्ले़ कुयाम्साम्मिन् कोःत्तुरो, खे़ल्ले़ खुने़ॽ कुसिगाङ्बा कुसिक्लुङ्मे़न् कोःत्तु लःत्तुरो॥ 28 थधप् मे़ल्लॽमनाबा मिःम्जि नु नसाःन्साबा चोःक्मे़ल्ले़ हाङ्ङिन् कम्ब्राङ् मे़प्तुरो, लुङ्माॽ तुक्सिङ्मा लाम्बाए खुने़ॽ कुहाङ्युक्नान् ताङ्से़ःप्तुरो॥ 29 नालिगे़न् थाङ्बे़न्हाॽरे़ खुन्छिॽ मिमिदिङ्ङिन् खुन्छिॽ थुम्मे़न्लो, के़भुप्पा थे़गेःक्किन् काप्पोबाहाॽरे़ खुन्छिॽ हाङ्वा माङ्वारो॥ 30 हुक्पुत्हाॽ नु काःम्माहाॽरे़ ताप्फे़ःम्बा पाःन्हाॽ इःक्सुदेॽरुरो, हे़क्क्याङ् ते़ःम्भुक्किल्ले़ सिक्लुङ्मे़न् सुत्थो पोङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.