खाहुन् 19 - लिम्बु1 याङ्गे़साॽबा नु आप्तिक् मेःन्नेबा पोङ्माआङ् वाॽमाग आप्तिक्साबा नु अदङ् पोङ्मानुःल्ले़ साॽरिक् नुबारो॥ 2 सिक्कुम्दिङ् निङ्वाॽ मेःन्ने सिक्सम्मा नुबा मे़बोङ्ने़न्लो, हारावरा के़जोःक्पाल्ले़ पान् फेःन्दुरो॥ 3 मनाःल्ले़ आप्फेक् कुअदङ् चोःक्मारे़ कुहिङ्मन् मे़क्लो, हे़क्केसाङ् खे़ल्ले़ कुसिक्कुम्मिल्ले़ यहवे दाङ्बे़न् पाःन्थिक्तुरो॥ 4 याङ्साकुन्धेःल्ले़ यरिक् तेःङ्जुम्हाॽ चोगुसिरो, कर याङ्गे़साॽबा मनाःल्ले़ निःत्ताङ्बा कुन्देङ् कुन्जुम्हाॽरे़आङ् खे़न् मे़ले़रुमे़धआङ् मे़बेःक्लो॥ 5 इङ्ले़क्पा तोःन्दि के़बिबे़न् खुम्दिङ् मेःन्ने पिम्मा मे़घोने़न्लो, हे़क्क्याङ् मे़न्वाॽमना पान् के़सःम्बा मनान् चोःक्युम्भो पोङ्माआङ् पेःक्मा मे़घोने़ल्लो॥ 6 युक्साबे़ल्ले़ नुरिक् मे़त्तिगे़र के़लॽबा यरिक्ले़ मे़गोःत्तुरो, हे़क्क्याङ् मिक्पेॽ के़बिबा के़रे़क् मनाःल्ले़ कुजुम् मे़बोङ्लो॥ 7 याङ्गे़साॽबा मनान् के़रे़क् आप्फेक् कुगाॽइहाॽरे़ मे़नाॽरुरो, खुने़ॽ कुन्देःङ्बाहाॽरे़ग छे़न्ना साॽरिक् लाप्मे़भुसुबिलारो! खुने़ॽ पेलि फाक्तुसिर खे़ङ्हाॽ नाःत्तुसि तिम्दुसिसाङ् खुने़ॽ खे़ङ्हाॽ आत्तिआङ् मे़घोसुसिन्लो॥ 8 सिक्कुम्दिङ् निङ्वाॽ के़घोबे़ल्ले़ कुयाम्साम्मिन् लुङ्माॽ तुक्तुरो, खासिङ्निःप्मा निङ्वान् मिङ्सो इङ्धाङ् के़बिबा मनान् के़नुॽबा के़दाबा पोङ्लो॥ 9 इङ्ले़क् तोःन्दि के़बिबे़न् खुम्दिङ् मेःन्ने पिम्मा मे़घोने़न्लो, हे़क्क्याङ् मे़न्वाॽमनाबा पान् के़सःम्बे़न् मे़क्लो॥ 10 अदङ् मनान् सुक्खेवाओ हिङ्मा मे़घे़म्दुन्लो, योःग्बाःल्ले़ हाङ्साहाॽरे़ खुन्छिॽ सम्धाङ् युक् चोःक्माग आल्लसाङ् साॽरिक् ताप्फे़ःम्बा पाःन्लो! 11 कुसिक्कुम् निङ्वाःल्ले़ मनान् नासिगे़धःप्पा चोगुरो, कुनिङ्वाॽ के़दुक्पा पाःन्नो कुमिक्के़न् इम्मे़प्मा, खुने़ॽ कुलागि हाङ्वा माङ्वा पोङ्लो॥ 12 हाङ्ङिल्ले़ कुसाक्के़न्निङ्ग खिरिङ्बा हुःक्पा हे़क्के लॽरो, कर खुने़ॽ कुनुॽमे़ङ्ग यान् सम्धाङ्बा हिःक्वा हे़क्के लॽरो॥ 13 अदङ् ये़म्बित्छा सान् पानुदिङ् कुम्बारे़ कुलागि मे़क्मारो, हाजे़क्चे़क्मा मेःत्तिन् चक् चक् लॽरिक् वागे़युबाआङ् के़बप्पा च्वाःत् ते़प्पक्वा हे़क्तङ्मारो॥ 14 हिम्धाःङ्हाॽ नु याङ्साकुन्धेहाॽ माबालाम् तारो, कर सिम्सिम् ये़क्ये़क् के़लॽमा मे़ल्लिङ्गे़न् मेःत्ते़ङ्ग यहवे दाङ्बा लाम्बाए के़दामारो॥ 15 ले़म्सुवाबा पोङ्मे़ल्ले़ मुरुक् खारुक् मिक्युमा तारुरो, के़ले़म्बा मनान् साक्मे़न्जा वमे़न्धुङ् वाॽमा पोङ्लो॥ 16 खाहुन् पान् खे़म्मा के़दे़म्बे़ल्ले़ कुहिङ्मे़न् से़ःप्तुरो, कर खे़न् कुनामे़न्छाॽ के़मे़प्पे़न् सिरो॥ 17 याङ्गे़साॽबे़न् लुङ्माॽ तुक्माग यहवे दाङ्बे़न् थे़त्लङ् पिमनाबारो, हे़क्क्याङ् खे़ल्ले़ चोगुबाल्ले़ कुले़क्वा खुने़ॽ खे़न् थुम्घो पिरुरो॥ 18 खे़ने़ॽ के़स्सा के़एहाॽ हे़न्थिम् याक्ते़से़ॽओ, थेआङ्भे़ल्ले़ खे़ङ्हाॽओ निङ्साङ् वाॽरो, खे़ङ्हाॽरे़ खुन्छिॽ फे़त्लाॽमाओ खे़ने़ॽ आप्फेक् ये़ये़ लॽरिक् लक्के़घोबा मे़बोःक्खे़न्ने़ॽओ॥ 19 कुसिक् के़जम्बा मनाःल्ले़ खुम्दिङ् खोमाए पोङ्लो, खे़न् खे़ने़ॽ के़नाङुने़भग्र खे़ने़ॽ खे़न् याम्मो ए़त्ले़ङ् ए़त्ले़ङ् के़नाङुरए पोङ्लो॥ 20 सुजाहाॽ खे़प्से़ॽ, हे़क्क्याङ् खाहुन्हाॽ खे़म्मा ते़न्दे़ॽओ, हे़क्क्याङ् कुनुप्मो खे़ने़ॽ सिक्कुम्साबा के़बोङ्लो॥ 21 मनाःल्ले़ कुसिक्लुङ्मो यरिक् चोःक्मा पाःप्मा पान् याक्लो, कर यहवे दाङ्बे़ल्ले़ चोःक्मा कोःत्तुबा पाःन्निल्ले़ए नाःन्दुरो॥ 22 मनाःल्ले़ आप्फाल्ले़साङ् के़वाॽबा मिःम्जिन् खोमा निङ्वाॽ चोगुरो, मे़न्वाॽमनाबा पान् पाःप्मानुःल्ले़ग याङ्गे़साॽबा पोङ्माए नुबारो॥ 23 यहवे दाङ्बे़न्नु किमा पाःन्निल्ले़ हिङ्मन्नो लाम्आलोरो, खे़ब्याङ् मनान् कुनिङ्वाॽ तादा वाॽरो, हे़क्क्याङ् तुक्खे लाक्खेःल्ले़ खे़न् मे़सुसुन्लो॥ 24 कुले़म्मा के़युबे़ल्ले़ कुहुक्किन् च्ये़त्थ्याओ लेःत्तुरो, कर खुने़ॽ कुहुक्किन् कुम्ब्राओआङ् मे़धे़क्तुन्लो! 25 मना कुनामे़न्छाॽ याप्मि के़मे़प्पे़न् ते़ःम्भुक् याक्मारो, खे़ब्याङ् खादाःक्पा मनान् सिक्कुम् निङ्वाॽ हुॽसिङ्लो॥ खासिङ्गे़निःप्पा मनान् फे़ःक्मारो, खम्भ्याङ् खे़ल्ले़ कुने़हि कुनिङ्वान् फोसुरो॥ 26 कुम्बा के़नाप्पा नु कुम्मा लाःक्कात् के़लःप्पा के़देबा ये़म्बित्छासाःल्ले़ चाःत्थि पेःक्मा नु सिरिङ्ममा तारुरो॥ 27 आबुगे़न् आस्साए! खे़ने़ॽ खाहुन् खे़म्मा के़ले़रुने़भग्र, खे़ने़ॽ ने़हिनिङ्वाॽ पाःन्हाॽलाम् ताप्के़बे़ॽ के़बेःक्लो॥ 28 फे़क्के़लाॽबा तोःन्दिःल्ले़ खासे़न्निन् कुनामे़न्छाॽ मे़त्तुरो, हे़क्क्याङ् ताक्के़भे़बे़ल्ले़ कुम्ब्राःल्ले़ ताप्फे़ःम्बान् लरुदेसुरो॥ 29 खुम्दिङ्हाॽग कुनामे़न्छाॽ के़जोःक्पाहाॽरे़ लागिए यारिप् पोङ्लो, हे़क्क्याङ् ते़ःम्भुक्के़ङ्ग अदङ्हाॽरे़ खुन्छिॽ एःक्थाःक्मे़ल्ले़ लागिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.