खाहुन् 18 - लिम्बु1 ये़मे़न्दङ् मनान् आबाङेरक् चोगुङ्जाङ् के़लॽबा पिसाङ् लाःत्लो, खे़न् के़रे़क् कुदोःप्मा पाःन्निल्ले़ कुदक्ले़ङ्वाओ पोःक्लो॥ 2 अदङ् मनाहाॽरे़ खासिङ्निःप्मा पाःन्नो खुन्छिॽ निङ्वाॽ मे़दाने़न्लो, कर आप्फेक् मे़इःत्तुबा पाःन्निन् पाःप्मा मे़घोसुल्ले़ मे़सःत्लो॥ 3 ताप्फे़ःम्बा पाःन्ने़न् ताःल्ले़, ताप्फे़ःल्लिक् मे़त्छिङ्मे़न्नाङ् तारो, सिरिङ्ममे़न्नु सोसोरिक् चाःत्थि पेःक्मे़न्नाङ् पोङ्दारो॥ 4 मनाःल्ले़ कुबाःन्हाॽ सिक्कुम्दिङ् निङ्वाॽल्ले़ कुबुङ् पोङ्मा सुक्लो, वरःङ् कुइसिक् कुदिःम्बे केःम्बा, के़गुङ्बा सेसेबा वाहःङ् कुइसिःक्लो॥ 5 ताक्के़भे़ॽबा ले़प्माङ् पप्मा, इग्र कुआप्तिक् मेःन्नेबा कुदोःप्मा मनान् खासे़न् मे़ल्लोःम्मा मे़म्बिमा नुबा मेःन्लो॥ 6 अदङ्ङिल्ले़ कुम्ब्रासेॽइल्ले़ आप्फेक् खुने़ॽओ खे़माॽ तारुरो, हे़क्क्याङ् खे़ल्ले़ कुम्ब्राःल्ले़ खुने़ॽ ते़ःम्भुक् चाःत्तुरो॥ 7 अदङ् मनाःल्ले़ कुम्ब्राःन्ने खे़ल्ले़ कुमे़क्मा पोङ्लो, हे़क्क्याङ् कुम्ब्रासेॽइल्ले़ कुहिङ्मन्ने़न् इजोओ थासुरो॥ 8 पान् के़बङ्बा मनाःल्ले़ कुबाःन्छेःक्वाहाॽ कुजागे़नुॽबा कुजा उम् हे़क्के लॽरो, खे़ङ्हाॽ मनाःल्ले़ कुसिक्लुङ्मो थारिक् के़त्लो॥ 9 आप्फेक् कुयाःम्बक् चोःक्मा कुले़म्के़युबा मनान् थ्यःङ् आमे़ङ्मे़ङ्बे़ल्ले़ कुन्साॽ हे़क्तङ्बारो॥ 10 यहवे दाङ्बे़ल्ले़ कुमिङ्ङिन् लत्छा के़धुम्बा चङ्हिम्लो, साम्योबा मनाहाॽ खे़प्मो मे़लोःक्ल मे़बेःक्लो खम्भ्याङ् खे़ङ्हाॽरे़ ताङ्से़ःप्सिङ्मा मे़घोसुरो॥ 11 याङ्साकुन्धेसाबे़ल्ले़ कुयाङ्साकुन्धेःन्ने़ खे़ङ्हाॽरे़ खुन्छिॽ लागि कब्रिङ् से़ःप्मनाबा हाङ्यक्लो, खे़ङ्हाॽरे़ कन् लिङ्मा सुक्मे़न्दे़प्मनाबा लुङ्धाक् मे़इःत्तुरो॥ 12 मे़क्मानुःल्ले़ तगि मनाःल्ले़ कुसिक्लुङ्मे़न् आङ्दिङ् लॽरो, कर मिङ्सो थाङ्सो तामानुःल्ले़ तगि चुङ्जिगे़न् तारो॥ 13 आत्तिल्ले़ खे़म्मानुःल्ले़ तगिए नुगप् पाःन्निन् नुःक्तुॽ, खे़ङ्ग खुने़ॽ कुअदङ् पान् नु कुसिरिङ्ममा पाःन्लो॥ 14 मनाःल्ले़ कुयाम्साम्मिल्ले़ खुने़ॽ कुयाम्दुक्किल्ले़ थःप्मा सुक्तुरो, कर तुक्खे के़जाबा याम्साम्मिल्ले़ कुदुक्मान् हाःत्ले़ थःप्मा सुक्तुबे? 15 खासिङ्गे़निःप्पा सिक्लुङ्मे़ल्ले़ ने़हिनिङ्वाॽ खोसुरो, थेआङ्भे़ल्ले़ सिक्कुम्साबा ने़भाक्किल्ले़ खे़न् कोःत्तु लःत्तुरो॥ 16 चासुङ्ङिल्ले़ आबिबिबाल्ले़ कुलाम् कुगोहाॽ हन्दुरो, हे़क्क्याङ् खे़ल्ले़ यम् यम्बा मना के़वाॽबादे़न्नो आगे़त्लो॥ 17 निसिगेक्पा मनान् तगि ताआङ् पान् से़ःन्आन्दोने़ल्ल थारिक्, तुःन्दे के़गुःप्पा थिक्सिगेक्पा मनाःन्ने कुदोःप्मा निदे़त्लो॥ 18 तॽयाःन्सोन् के़मे़ल्ले़ के़बोःक्पा पाःन्धङ्हाॽ तङ्लो, हे़क्क्याङ् के़धुम्बा अत्के़बाङ्बाहाॽ खेमा मे़नाॽरो॥ 19 कम्ब्राङ् मे़मे़त्तुबा ये़क्यक्किन् हुक्को थामानुःल्ले़ कुनिङ्वाॽ तुक्ल याःम्मनाबा नुसाॽइन् ले़म्मा साॽरिक् साक्लो, हे़क्क्याङ् खे़माॽ चोःक्माग ए़प्मना फम्मनाबा यक्कोबा लाम्धेःत्हाॽ कुइसिःक्लो॥ 20 मनान् खुने़ॽ कुम्ब्राओबा पाःन्निल्ले़ कुसाप्पोक् तिम्लो, खे़ल्ले़ कुम्ब्रासेॽलाम् सुप्सुबा पाःन्छेःक्वाःल्ले़ कुसिक्एःत्तुरो॥ 21 हिङ्मन् नु सिमे़ल्ले़ मुक्साम्मिन् ले़सोःत्तो पत्लो, खे़न् पाःप्मा कुसिराॽ के़धाङ्बे़ल्ले़ हाबा खे़न् तुमुरो॥ 22 मे़ल्लिङ्गे़न् मेःत् के़घोबाल्ले़ नुबा पान् खोसुरो, हे़क्क्याङ् यहवे दाङ्बे़न् खे़न्नु कुनिङ्वाॽ तारो॥ 23 याङ्गे़साॽबे़ल्ले़ लुङ्माॽ तुक्मारे़ लागि पेलि फाक्तुरो, कर याङ्साकुन्धेसाबा मनाःल्ले़ आलक्लक्पा पान् नुःक्तुरो॥ 24 कुन्देङ् कुन्जुम् यरिक् के़वाॽबा मनाःन्नाङ् हदॽ मे़क्मा सुक्लो, कर कुभा तेःङ्जुम्हाॽग फुॽनुसाॽनुःल्ले़आङ् निःत्ताङ् मे़घिम्सिङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.