खाहुन् 17 - लिम्बु1 खे़माॽ के़बोङ्बा हिम्मो सा नु तःक् चामानुःल्ले़ग चिजि ये़म्ये़म् नु स्वाःत्ताङ् कुनुॽमा मेःन्ने उम्धिक् कुजा चामा नुबारो॥ 2 सिक्कुम्साबा से़वारोबे़ल्ले़ कुन्दाङ्बे़ल्ले़ सुम्बोधासाबा मेःन्नेबा कुस्सान् युक्को कत्तुरो, हे़क्क्याङ् फुॽनुसाॽहाॽनु कुदङ्बा पालाम्बाबा याङ्साकुन्धेःल्ले़ कुलक् खे़ल्ले़ खोसुदेॽरुरो॥ 3 युप्पा योःम्मा खप्प्या नु साम्म्याङ् साङ्मा मिदःत् वाॽरो, कर सिक्कुम् निङ्वाॽ के़साॽबाग यहवे दाङ्बे़न्ने वाॽरो॥ 4 ताक्के़भे़ॽबा मनाःल्ले़ ताप्फे़ःम्बा पाःन्हाॽ खे़प्सुरो, इङ्ले़क्स्वाबे़ल्ले़ मे़क्मा पाःन्निन् निङ्वाॽ पिरुरो॥ 5 आत्तिल्ले़ याङ्गे़साॽबे़न् किनाःन्दि पिरुॽ, खे़ल्ले़ खे़ङ्हाॽरे़ खुन्छिॽ नावागे़न् चइःत्दाङ्बे़न् कुनामे़न्छाॽ मे़प्मा याःम्बक् चोगुरो॥ वेॽइल्ले़ कुदुक्खे कुलाक्खेओ के़सःप्पा आत्तिन्छाङ् खुम्दिङ् मे़ङ्घोए पिम्मा पेःक्मा मे़घोने़न्लो॥ 6 मे़न्छाॽ मे़न्छाॽमाहाॽग काप्पो तुम्साहाॽरे़ खुन्छिॽ तिचःसिरो, हे़क्क्याङ् माबाहाॽग साहाॽरे़ खुन्छिॽ ने़बो पप्मा पाःन्छिरो॥ 7 नुबा पाःन्निन् अदङ्ङिल्ले़ कुम्ब्रासेॽओ मे़घे़म्दुन्लो, युक्साबे़ल्ले़ कुम्ब्राओ इङ्ले़क् पाःन्निन् छे़न्ना साॽरिक् मे़लाॽरुन्लो॥ 8 आत्तिल्ले़ सुरुत्याङ् चामा पिरुसिॽ, खे़ङ्ग खुने़ॽ कुलागि कित्चाक् हे़क्तङ्बारो, कुलिङ्दो के़प्मान् आत्ति पेःक्मासाङ् पोङ्ॽ फाॽआङ् खे़ङ्हाॽरे़ निङ्वाॽ मे़इःत्तुरो॥ 9 लुङ्हाःत्छिङ्मा पान् के़माॽबे़ल्ले़ मिःम्जि फोसुरो, कर ये़त्ले़ङ् पान् के़गिम्बा आत्तिल्ले़साङ् आदङ्दङ्बा तेःङ्जुम्हाॽ लुम्मो आसेर चोगुरो॥ 10 अदङ्ङिन् किप्थिक्ले़ङ् ते़ःम्भुक् याक्मनाबान्नुःल्ले़ग खासिङ् के़निःप्पा मनान् थिक्ले़ङ्धिक् फे़ःक्मे़ल्ले़ याःन्दुरो॥ 11 कुॽइगे़भे़म्बा मनान् पिफ्युङ् चोःक्मा ले़प्माङ्लक् पत्लो, खे़ल्ले़ कुदक्ले़ङ्वाओ लत्छा के़आःप्पा इङ्साबान् मे़बाङ्घुरो॥ 12 अदङ्ङिन् खे़ल्ले़ कुअदङ् चोःक्मा पाःन्नो तुम्मानुःल्ले़ग कुस्सा मे़नाप्तुमा कुम्मामा माःॽयुःन् तुम्मा नुबा पोङ्लो॥ 13 कुभा मनाःल्ले़ नुबा चोगु पिरुबाल्ले़ कुले़क्वा नुबा चोःक्मा पिमा के़बोङ्बा पाःन्नो ताप्फे़ःम्बा चोगुने़भग्र, ताप्फे़ःम्बा पाःन्निल्ले़ खे़ल्ले़ कुहिम्मिन् आप्फाल्ले़आङ् मे़ले़रुन्लो॥ 14 खे़माॽ हेःक्सिङ्माङ्ग थे़ङ्मनाबा च्वाःत्तिन् हबा कुइसिःक्लो, खे़ल्ले़चोगुल्ले़ पाःन्धङ् पोङ्मानुःल्ले़ तगि खे़न् चिप्ल याःन्दे़ॽओ॥ 15 आप्तिक्साबे़न् आप्तिक् मे़ङ्गुःप्नाबा नु आप्तिक् मे़ःन्नेबान् आप्तिक् के़गुःप्पा ने़प्माङ् यहवे दाङ्बे़ल्ले़ कुसिक्मे़ले़ःङ्लो॥ 16 अदङ्ङिल्ले़ कुहुक्को याङ्ङिन् थे़मा याःम्बक् पोङ्ङाङ्बे? थेआङ्भे़ल्ले़ सिक्कुम् निङ्वाॽ खोमा खे़ल्ले़ निङ्वाॽ मे़गत्तुन्लो॥ 17 लत्छा चुम्मिल्ले़ आभे़ल्ले़साङ् लुङ्माॽ आदुक्लो, फुॽनुसाॽहाॽग तुक्खेलाक्खेबा ये़म्ले़ लागि सामे़वाःन्छिङ्लो॥ 18 कुऩेहि के़होप्पा मनाःल्ले़ माङ्हे़क् चोगुरो, हे़क्क्याङ् कुहिम्बेसाङ्बे़ल्ले़ कुसिङ्नात्तो तोःन्दि युङ्लो॥ 19 खे़माॽ कुसिराॽ के़धाङ्बे़ल्ले़ लायोन् कुसिराॽथाङ्लो, के़हे़न्छिङ्बा मनाःल्ले़ मे़क्मान् तारुरो॥ 20 ताप्फे़ःम्बा सिक्लुङ्माॽ के़गप्पे़ल्ले़ योरु ते़प्तुर मे़गत्तुन्लो, आत्तिल्ले़ इङ्ले़क्पा ले़सोत् कत्तुॽ, खे़न् तुक्खेओ थारो॥ 21 अदङ् ये़म्बित्छासा के़गप्पे़ल्ले़ कुनिङ्वाॽ तुक्खे चारो, खरमे़न्दक्पे़ल्ले़ कुम्बान् मे़सःत्ने़न्लो॥ 22 ये़ये़बा सिक्लुङ्मे़ङ्ग नुबा सिदाॽ पाङ्दाॽरो, कर आयुक्युक्पा याम्साम्मिल्ले़ ये़प्पा लुङ्सि हेसुरो॥ 23 कुॽइगे़भे़म्बा मनाःल्ले़ खासे़न्निन् फे़त्लाःम्मारे़ लागि स्वाःत्ताङ् सुरुत्याङ् ताःक्तु चरो॥ 24 खासिङ्गे़निःप्पा मनान् खुने़ॽ कुनिमो सिक्कुम् निङ्वाॽ के़गप्पा पोङ्लो, कर अदङ्ङिल्ले़ कुमिक्के़न् योॽबाःल्ले़ कुनुप्मो थे़म्बा ताक्कन्लो॥ 25 अदङ् ये़म्बित्छासाःल्ले़ कुम्बान् निङ्वाॽ तुक्मो थासुरो, हे़क्क्याङ् खुने़ॽ के़गप्मा कुम्मा कुनिङ्वाॽ ताॽजे़ङ्ल याःन्दुरो॥ 26 कुआप्तिक् के़होप्पा मनान् साम्बान् कुःप्मा नुबा मेःन्लो, इग्र कुदोःप्मा सुहाङ्युक्पाहाॽ ते़ःम्भुक् याक्मासि नुबा मेःन्लो॥ 27 कुने़हि के़वाॽबा मनाःल्ले़ सिङ्सिङ्ङाङ् पाःन्सुत्लाहाॽ पाःत्तुरो, खासिङ्गे़निःप्पा मनान् कुसिक् ने़ने़ लॽरो॥ 28 स्वाःत् के़युङ्बा अदङ्ङिन्नाङ् सिक्कुम्साबा मे़लेःत्तुरो, हे़क्क्याङ् खे़ल्ले़ कुल्सोःत्ते़न् से़ःप्तुने़भग्र खासिङ्गे़निःप्पा मे़मे़त्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.