खाहुन् 16 - लिम्बु1 सिक्लुङ्मोबा निङ्सेःक्हाॽ मे़न्छाम् याप्मिरे़न्लो, कर कुदोःप्मा नुगप्पिङ्ग यहवे दाङ्बे़न् लाम्बाए तारो॥ 2 मनाःल्ले़ के़रे़क् कुलाम्हाॽ आप्तिक् मेःन्नेबा लेःत्तुबिला, कर खे़ल्ले़ थेआङ् हे़क्के चोगु के़लॽबा पाःन्हाॽ यहवे दाङ्बे़ल्ले़ए साॽरुरो॥ 3 खे़ने़ॽ के़जोगुबा आत्तिन् पाःन्निन्छाङ् यहवे दाङ्बे़न् हुक्सुप्ते़ॽओ, हे़क्क्याङ् खे़ने़ॽ के़निङ्सेःक्हाॽ कुलिङ्दो के़त्लो॥ 4 यहवे दाङ्बे़ल्ले़ के़रे़क् पाःन्हाॽ खुने़ॽ कुदारप्ले़ लागि चोगुरो, कुॽइगे़भे़बे़न्नाङ् मे़क्मा ये़न्ले़ लागि खुने़ॽ युक्खुआङ् वाॽरो॥ 5 सिक्लुङ्मो आङ्दिङ् के़लॽबाहाॽ के़रे़क् यहवे दाङ्बे़ल्ले़ कुसिक्ले़ःङ्लो, से़क्खाए खे़ङ्हाॽ खुम्दिङ् मे़ङ्घोए पिम्मा मे़ङ्घोने़न्लो॥ 6 थधप् मे़ल्लॽमनाबा मिःम्जि नु नसाःन्साबालाम् लायोलाम् हिःम्मा पान् पोङ्लो, यहवे दाङ्बे़न् किप्मालाम् मनान् फे़न्पाःन्लाम् लाःत्लाःत् पोङ्लो॥ 7 मनाःल्ले़ कुलाम्हाॽ यहवे दाङ्बे़ल्ले़ कुसिराॽ के़धाङ्बा पोङ्ङिल्ले़, खुने़ॽ खे़ल्ले़ कुनिङ्मिहाॽआङ् खे़न्नु नादङ् चोगुआङ् कत्तुसिरो॥ 8 साम्योबा याःम्बक्किन्नु आजे़ःत्छिक् कप्मनाबे़न्, मे़न्वाॽमनाबालाम् यरिक् थक्मनाबान्नुःल्ले़ नुबारो॥ 9 मनाःल्ले़ कुसिक्लुङ्मो चोःक्मा चामा पाःन्निन् हिसु तङ्घुरो, कर यहवे दाङ्बे़ल्ले़ए खे़ल्ले़ कुलाम्हाॽ निःन्धो चोगुबिरुरो॥ 10 हाङ्ङिल्ले़ कुम्ब्रासेॽइल्ले़ माङ्इङ्घङ् पान् पाःत्तुरो, हे़क्क्याङ् खुने़ॽ कुम्ब्राःल्ले़ के़वाॽबा खासे़न्निन् हान्ति मे़जोगुन्लो॥ 11 के़गे़प्पा कुसिःक्मा नु ते़म्दुरिहाॽ यहवे दाङ्बाल्ले़न्नेरो, के़रे़क् परिक्पा ओगप् के़बोङ्बा कुधाङ्लुङ्हाॽ खुने़ॽए चोगुबारो॥ 12 हाङ्हाॽरे़ ताप्फे़ःम्बा याःम्बक्किन् खुन्छिॽ सिक्ले़ःङ्लो, साम्योबा याःम्बक् लाम्मे हाङ्युक्नान् थधप् मे़ल्लॽमना पोङ्लो॥ 13 हाङ्हाॽ कुदोःप्माहाॽरे़ खुन्छिॽ मुरासेॽहाॽनु निङ्वाॽ ये़ये़ लॽरो, कुत्चाॽ के़बाःप्पा मनान् खे़ङ्हाॽरे़ खुन्छिॽ सिराॽथाङ्लो॥ 14 हाङ्ङिल्ले़ साॽरिक् कुसिक् पोःक्मे़ङ्ग सिमे़ल्ले़ कुइङ्साबारो, कर सिक्कुम्साबा मनाःल्ले़ खे़न् चिजि ये़म्ये़म्बा चोगुरो॥ 15 हाङ्ङिल्ले़ कुनारान् ओःत्तिःल्ले़, खे़ल्ले़ कुबेःङ्ग हिङ्मन्लो, खे़ल्ले़ लुङ्माॽ आदुक्तुक्पा कुलुङ्गुम्मिङ्ग हाङ्वामा ये़म्मोबा वहित्तिल्ले़न् खाॽमित् हे़क्तङ्बारो॥ 16 साम्म्याङ्नुःल्ले़ग सिक्कुम्दिङ् निङ्वाॽ खोमारो, हे़क्क्याङ् युप्पानुःल्ले़ग खासिङ्निःप्मा सेःक्मे़न् साॽरिक् नुबारो॥ 17 कुदोःप्मे़ल्ले़ कुमाराम्मिन् फे़न्पान् लाम्बा लाःत्लाःत् पोङ्लो, आत्तिल्ले़ कुलाम्मिन् सिङ्सिङ् ये़क्ये़क्काङ् ओमे़त्तुॽ, खे़ल्ले़ कुहिङ्मन् ताङ्से़ःप्तुरो॥ 18 मे़क्मानुःल्ले़ तगि आङ्दिङ् लॽमान् नु खाप्पुथ्यःङ् पोङ्मानुःल्ले़ तगि यम्बा हे़न्छिङ्मा याम्साम् तारो॥ 19 मे़युक्तुसिबाहाॽरे़ खुन्छिॽ लुम्मो याम्साम्मो नःम्नःम्माङ् वाॽमाग नाप्मनाबा चिगक्वाहाॽ के़हे़न्छिङ्बाहाॽनु हामानुःल्ले़ नुबारो॥ 20 खाहुन् पान् नुरिक् के़घे़म्बा मनान् के़नुॽबा के़दाबा पोङ्लो, हे़क्क्याङ् यहवे दाङ्बे़न् नागे़साॽबा मनान् मुॽइसाबारो॥ 21 सिक्लुङ्मो सिक्कुम्साबा के़बोङ्बाहाॽ ये़क्ये़क्पा मे़मे़त्तुसिरो, हे़क्क्याङ् कुजागे़नुॽबा पाःन्हाॽरे़ निसाम् फोसुरो॥ 22 खासिङ्गे़निःप्मा निङ्वाॽ के़गप्पाल्ले़ कुलागि कन् हिङ्मन्ले़ कुबुन्लो, कर अदङ्ङिल्ले़ कुअदङ् पाःन्निल्ले़ चोगुल्ले़ए खुम्दिङ् खोसुरो॥ 23 सिक्कुम्साबे़ल्ले़ कुसिक्लुङ्मे़ल्ले़ आबाङे कुम्ब्रान् खासिङ्गे़निःप्पा चोगुरो, हे़क्क्याङ् खे़ल्ले़ कुम्ब्रासेॽइल्ले़ निसाम् फोसुरो॥ 24 कुजागे़नुॽबा पाःन्हाॽग सक्वाघुःल्ले़ कुलेक् हे़क्तङ्बारो, खे़ल्ले़ग याम्साम्मिन् चाङ्जाङ् नु ये़त् लुङ्सिहाॽ वेःन्दुरो॥ 25 कुभा लाम्मिन् मनाःल्ले़ कुनिमो कुदोःप्मा निदे़त्पिला, कर खे़ल्ले़ निन्धासेःक्ओ सिमाओ के़प्मा सुक्तुरो॥ 26 याःम्बुदिक्पान् कुसाक्पोःक्पाल्ले़ए याःम्बक् चोःक्मा पाङ्घुरो, खे़ल्ले़ कुसिक्लाःक्मे़ल्ले़ए खे़न् कुसिक् एःप्तुर याःन्दुरो॥ 27 खार्मे़न्दक् के़जोःक्पा मनाःल्ले़ फे़न्याःम्बक् चोःक्मा इःत्तुरो, हे़क्क्याङ् खे़ल्ले़ कुबाःन्छेःक्वान् आओॽओॽबा मि हे़क्के लॽरो॥ 28 फे़क्के़लाॽबा मनाःल्ले़ खे़जे़क् पान् फोःक्खुरो, हे़क्क्याङ् आजे़ङ्जे़ङ्बे़ल्ले़ आदङ्दङ्बा तेःङ्जुम्हाॽओ से़मे़न् तारुरो॥ 29 कुॽइगे़भे़म्बा मनाःल्ले़ आप्फेक् कुहिम्बेसाङ्बे़न् लाम् फोःत्तुरो, हे़क्क्याङ् खे़ल्ले़ खुने़ॽ ताप्फे़ःम्बा लाम् ले़प्माङ् तेॽरुरो॥ 30 कुमिक् चिघिम् चिघिम् के़मे़प्पे़ल्ले़ चे़म्भन् चोगुरो, कुम्ब्रासेॽ के़वे़बे़ल्ले़ कुये़प्ले़क्किन् ताप्फे़ःम्बा चोक्लो॥ 31 के़भुप्पा थे़गेःक्किन् मिङ्सो इङ्धाङ्ले़न् तिचरो, साम्योबा हिङ्मन् लाम्बा कन् खोदे़त्लो॥ 32 नासिगे़धःप्पा मना पोङ्माग थङ्गे़धक्पा पोङ्मानुःल्ले़आङ् नुबारो, सिक्पोःक्मान् युक्को कप्माग ये़क्यक्किन्ने हुक्को थामानुःल्ले़ नुबारो॥ 33 तॽयाःन्सोन्निन् तॽयाःन्सोन् के़मादे़न्नो मे़गे़सुरो, कर खे़ल्ले़न् के़रे़क् पाःन्निन् यहवे दाङ्बे़ल्ले़ए निःन्धो चोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.