खाहुन् 15 - लिम्बु1 सेःम्सेःम्बा नुगप्पिल्ले़ सिक्खे़ङ्मान् चिःक्तुर याःन्दुरो, कर के़आःम्बा नुगप्पिल्ले़ सिक्पोःक्मान् फोसुरो॥ 2 सिक्कुम्निबे़ल्ले़ कुल्सोःत्ते़ल्ले़ ने़हिनिङ्वान् नुबा पाःत्तुरो, कर अदङ् मनाःल्ले़ कुअदङ् पाःन्हाॽए फक्सुलःत्तुरो॥ 3 यहवे दाङ्बे़ल्ले़ कुमिक्सान् के़रे़क् पिसाङ् वाॽरो, नुबा नु ताप्फे़ःम्बा ने़प्माङ् खुने़ॽ मिक्चो मे़त्तुसिरो॥ 4 मना के़वेःम्बा ले़सोःत्ते़ङ्ग हिङ्मन्ले़न् सिङ्बुङ्लो, कर इङ्ले़क्स्वा ले़सोःत्ते़ल्ले़ याम्साम्मिन् खाःन्दुरो॥ 5 अदङ्ङिल्ले़ पानुदिङ् कुम्बारे़ कुहे़न्थिम्मिन् नाॽरुरो, फे़ःक्मनाबा पाःन्निन् के़घे़म्बे़ल्ले़ खासिङ् के़निःप्पा पाःन्निन् ओसेःन्धाङ् चोगुरो॥ 6 साम्योबा मनाःल्ले़ कुहिम्मो वे़त्ते़सरे़ याङ्साकुन्धे वाॽरो, कर कुॽइगे़भे़म्बे़ल्ले़ थगुबा याङ्साःल्ले़ तुक्खे तारुरो॥ 7 सिक्कुम्निबे़ल्ले़ कुम्ब्रावसेःल्ले़ ने़हिनिङ्वाॽ फोसुरो, कर अदङ्हाॽरे़ खुन्छिॽ सिक्लुङ्मे़न् हे़क्तङ्बा मे़जोक्ने़ल्लो॥ 8 कुॽइगे़भे़म्बा मनाःल्ले़ वयागे़न् कुसिदुङ्जभान् यहवे दाङ्बे़ल्ले़ कुनिमो सिक्के़ले़ःङ्बा चोक्लो, कर कुदोःप्माआङ् के़वाॽबाल्ले़ कुबेःल्लिःल्ले़ खुने़ॽ सःत्लो॥ 9 ताक्के़भे़ॽबा मनाःल्ले़ कुलाम्मिन् यहवे दाङ्बे़ल्ले़ कुनिमो याम्गे़सिङ्बा चोक्लो, कर साम्योनिमान् के़इःप्पा के़नाःप्पाहाॽ खुने़ॽ लुङ्माॽ तुक्तुसिॽरो॥ 10 आप्फेक् कुलाम् के़ले़प्पे़ल्ले़ के़साक्पा हे़न्थिम् तुमुरो, फे़ःक्मनाबा पाःन्निन् आत्तिल्ले़ चिःत्तुॽ खे़न् सिमा पोङ्लो॥ 11 सिमे़न् नु मे़क्मे़न् यहवे दाङ्बे़ल्ले़ कुदगि नुरिक् निधाःप्लो, मनाःल्ले़ कुयाम्साम्मिन् छे़न्ना साॽरिक् नुरिक् निमे़धाःप्ने़म्बि? 12 कुनामे़न्छाॽ के़जोःक्पे़ल्ले़ तोःम्मा पाःन्निन् कुसिराॽ मे़धाङ्ने़न्लो, हे़क्केलॽरिक्के खे़न् सिक्कुम्निबे़न्लाम् लाःत्लाःत् वाॽरो॥ 13 के़सःप्पा सिक्लुङ्मे़ल्ले़ नारान् के़ओःप्पा चोगुरो, कर सिक्लुङ्मोबा तुक्खेःल्ले़ याम्साम्मिन् खाःन्दुरो॥ 14 खासिङ्गे़निःप्पा सिक्लुङ्मे़ल्ले़ ने़हिनिङ्वाॽ कोःत्तुरो, कर अदङ्ङिल्ले़ कुम्ब्राःल्ले़ अदङ् पाःन्निन्ने़ कुसिराॽथाङ्लो॥ 15 तुक्खे चाःप्मा युःप्माओ के़धाबाहाॽरे़न् ताप्फे़ःल्लिक् मे़मे़त्तुबा खुन्छिॽ हिङ्मे़न् थिक्याःन्धक् तुक्खेवा पोङ्लो, कर के़सःप्पा सिक्लुङ्मे़न् आभे़ल्ले़साङ् नुॽदारो॥ 16 हयङ्किल्लिङ् इसेःङ् वे़त्ते़सरे़ याङ्साकुन्धे कप्मानुःल्ले़ग चबे़ःत्छिक् के़गप्पा पोङ्माआङ् यहवे दाङ्बे़न् किप्मा नुबारो॥ 17 पजिःत् चिःत्छिङ्मादे़न्नो के़सोबा सा चामानुःल्ले़ग लुङ्माॽ तुक्सिङ्मादे़न्नो नुधिसाक्चिरक् चामा नुबारो॥ 18 हारा कुसिक् के़बोःक्पा मनाःल्ले़ खे़माॽ फोःक्खुरो, कर नासिगे़धःप्पा मनाःल्ले़ खे़जे़क्किन् चिजि ये़म्ये़म् चोगुरो॥ 19 ले़म्सुवाबे़ल्ले़ कुलाम्मिन् तिङ्ङिल्ले़ थेःक्तुबा चोक्लो, कर कुदोःप्मा मनाःल्ले़ कुलाम्मिङ्ग माराम्लो॥ 20 सिक्कुम्साबा साःल्ले़ कुम्बा कुनिङ्वाॽ तासुरो, कर अदङ् साःल्ले़ कुम्मा तुक्खे चाःत्तुरो॥ 21 कुऩेहि के़होप्पा मनान् अदङ् पाःन्नो कुनिङ्वाॽ तारो, कर इःत्छिङ्साम् के़गप्पा मनान् कुदोःप्मा पाःन्नो कुदोःप्मा लाम्मो पोरो॥ 22 सुजा होःप्मारे़ चोगुल्ले़ निङ्सेःक्हाॽ कुलिङ्दो मे़गे़त्ने़न्लो, कर यरिक् सुजादाङ्बाहाॽरे़ मे़जोगुल्ले़ खे़ङ्हाॽ कुलिङ्दो के़त्लो॥ 23 के़लाॽबा पान् नुःक्मा खोसुल्ले़ मनान् कुनिङ्वाॽ तारो, हे़क्क्याङ् के़याङ्बा ये़म्मो पाःप्मनाबान् साॽरिक् नुबा चोक्लो! 24 हिङ्मन्नोबा लाम्मिल्ले़ खासिङ्गे़निःप्पे़न् थो ले़प्माङ् लाम्लोसुरो, खे़ल्ले़ खुने़ॽ खे़माॽयङ्सङ् ले़प्माङ् पेःक्मालाम् से़ःप्तुरो॥ 25 आङ्दिङ् के़लॽबे़ल्ले़ कुहिम्मे़न् यहवे दाङ्बे़ल्ले़ लुःन्दु पिरुरो, कर मेमेदुमाल्ले़ कुइःन्दोन् खुने़ॽ मे़न्जत्ते ने़स्सु पिरुरो॥ 26 यहवे दाङ्बे़ल्ले़ कुॽइगे़भे़म्बाल्ले़ इःत्तुबा पाःन्हाॽ कुसिक्ले़ःङ्लो, कर सुत्थोबा मनाःल्ले़ इःत्तुबा पाःन्हाॽओ खुने़ॽ कुनिङ्वाॽ तारो॥ 27 के़घिःम्बा मनाःल्ले़ कुहिम्सयङ्ङो तुक्खे लाक्खे तारुरो, कर आत्तिल्ले़ सुरुत्याङ्ङिन् चिःत्तुॽ खे़न् हिङ्लो॥ 28 साम्योनिबे़ल्ले़ कुसिक्लुङ्मे़ल्ले़ नुगप् पाःन्हाॽ साॽरुरो, कर ताक्के़भे़ॽबे़ल्ले़ कुम्ब्राःल्ले़ ताप्फे़ःम्बा पाःन्हाॽ फक्सुलःत्तुरो॥ 29 यहवे दाङ्बे़न् कुॽइगे़भे़म्बे़न् लाम्बा लाःत्लाःत् वाॽरो, कर खुने़ॽ साम्योनिबे़ल्ले़ कुबेलिन् खे़प्सुरो॥ 30 मुसुम् के़एःप्पा नाराःल्ले़ सिक्लुङ्मे़न् सःत्ल याःन्दुरो, हे़क्क्याङ् सुनाइङ्ङिल्ले़ ये़प्पाहाॽ के़धुम्बा चोगुरो॥ 31 आत्तिल्ले़ हिङ्मन् के़बिबा पाःन्नो फे़ःक्मनाबे़न् खे़प्सुॽ, खे़ल्ले़ सिक्कुम्साबाहाॽरे़ खुन्छिॽ लुम्मो तङ्जुम् खोसुरो॥ 32 फे़ःक्मनाबा पाःन्निन् के़जिःप्पे़ल्ले़ आप्फेक् चिःत्छिङ्लो, कर तोःम्मा पाःन्नो निङ्वाॽ के़बिबे़ल्ले़ इःत्छिङ्साम् खोसुरो॥ 33 यहवे दाङ्बे़न् कुगिप्मे़ल्ले़ए सिक्कुम्दिङ् निङ्वाॽ आहुॽरो, इङ्धाङ् खोमानुःल्ले़ तगि नःम्नःम् लॽमे़न् तारो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.