खाहुन् 14 - लिम्बु1 सिक्कुम्सामा मे़न्छुमाःल्ले़ कुहिम्मिन् चोगुरो कर कुने़हि के़होःप्मा मे़न्छुमाःल्ले़ खे़न् आबाङे कुहुक्किल्ले़ यस्सुरो॥ 2 कुदोःप्मा लाङ्गे़घेःक्पे़ल्ले़ यहवे दाङ्बे़न् किरुरो, कर इङ्ले़क्पा लाम्मो लाङ्गे़घेःक्पे़ल्ले़ खुने़ॽ कुनामे़न्छाॽ मे़त्तुरो॥ 3 अदङ् मनाःल्ले़ कुआङ्दिङ् लॽमा पाःन्निल्ले़ आप्फेक् खुने़ॽओ तक्काःत्तिन् थार याःन्दुरो, कर सिक्कुम्साबा मनाःल्ले़ कुबाःन्निल्ले़ खे़न् ताङ्से़ःप्तुरो॥ 4 कुम्बाबा पित्हाॽ के़होप्पादे़न्नो चाधाःङ्हाॽ कुघाले़म् पोङ्लो, कर पित्हाॽरे़ खुन्छिॽ थुम्मे़ल्ले़ सिदत् पोगुगे़न् कुजा मे़सुप्सुरो॥ 5 से़क्खाबा तोःन्दि के़बिबे़ल्ले़ इङ्ले़क् मे़जोगुन्लो, कर इङ्ले़क्पा तोःन्दिल्ले़ इङ्ले़क्के पाःन्हाॽ सःन्दुरो॥ 6 कुनामे़न्छाॽ याप्मि के़मे़प्पा मनाःल्ले़ सिक्कुम्दिङ् निङ्वान् कोःत्तुॽ कर थेआङ् मे़घोसुन्लो, कर खासिङ्गे़निःप्पा मनाःल्ले़ ने़हिनिङ्वाॽ उसुरु खोसुरो॥ 7 अदङ् मनाःन्नु माःङ्घाए वये़ॽओ, थेआङ्भे़ल्ले़ खे़ल्ले़ कुम्ब्राओ ने़हिनिङ्वाॽ खोमे़दे़त्ने़न्लो॥ 8 खासिङ्गे़निःप्पा मनाःल्ले़ कुसिक्कुम्निङ्वाॽल्ले़ खे़न् कुदोःप्मा लाम्मिन् ओसेःन्धाक्तुरो, कर अदङ्हाॽरे़ खुन्छिॽ अदङ् पाःन्ने़ङ्ग इङ्ले़क्लो॥ 9 लायोलाम् हिम्मा पाःन्नो अदङ्हाॽरे़ कुनामे़न्छाॽ मे़बाःत्तुरो, कर कुदोःप्मा के़वाॽबाहाॽरे़ खुन्छिॽ लुम्मो नुबा निङ्वाॽ खोदे़त्लो॥ 10 निङ्वाॽओबा कुजागे़भे़म्बा पाःन्निन् निङ्वाःल्ले़ए निसुरो, हे़क्क्याङ् खे़प्मोबा सःप्मे़न् हाःत्ले़आङ् नुरिक्काङ् कुसिङ् निःप्मा मे़सुक्तुल्लो॥ 11 कुइगे़भे़म्बे़ल्ले़ कुहिम्मिन् मे़लुःन्दु मे़बिरुरो, कर कुदोःप्मे़ल्ले़ कुजिम्हिम्मो नुॽमादामा पोङ्लो॥ 12 कुभा लाम्मिन् मनाःल्ले़ कुनिमो कुदोःप्मा निदे़त्पिला, कर खे़ल्ले़ निन्धासेःक्ओ सिमाओ आगे़त्लो॥ 13 मुराओ एःप्मा युसाङ् सिक्लुङ्मो हाःप्मा युमा सुक्लो, हे़क्क्याङ् सःप्मे़ल्ले़ कुनुप्मे़ङ्ग मे़रिङ्ङो पोङ्मा सुक्लो॥ 14 ताप्के़बे़ॽबा के़बेःक्पाहाॽरे़ खुन्छिॽ ये़प्ले़क्किल्ले़ कुले़क्वा मे़दुमुर पोङ्लो, हे़क्क्याङ् नुबा मनाःल्ले़ कुयाःम्बक्किल्ले़ हाङ्से़म्मिन् मे़बिरुरो॥ 15 कुनिङ्वाॽ के़बाःक्पे़ल्ले़ थे पाःन्निन्छाङ् नसान् चोगुॽरो, कर कुने़हि के़दुम्बा मनाःल्ले़ ये़क्ये़क्काङ् लाङ्गाङ् चत्तुरो॥ 16 सिक्कुम्साबा मनाःल्ले़ यहवे दाङ्बे़न् किरुरो, हे़क्क्याङ् फे़न्याःम्बक् चोःक्मालाम् माःङ्घा वाॽरो, कर अदङ्ङिङ्ग कुसिक् के़जम्बा नु सिङ्सिङ् ये़क्ये़क् मे़ल्लॽए हारावराबा चोक्लो॥ 17 कुसिक् के़जम्बा मनाःल्ले़ अदङ् याःम्बक्हाॽ चोगुरो, हे़क्क्याङ् इस्वाबा मनान् याम्गे़सिङ्बा चोक्लो॥ 18 कुने़हि मे़न्दुम्नाबा मनाःल्ले़ अदङ् पाःन्लक् खोसुरो, कर खासिङ्गे़निःप्पे़ल्ले़ ने़हिनिङ्वाॽरे़ तिचःन् खोसुरो॥ 19 ताक्के़भे़ॽबा मनाहाॽ नुबा मनाहाॽरे़ खुन्छिॽ तगि हे़क्क्याङ् कुॽइगे़भे़म्बा मनाहाॽ साम्योबाहाॽरे़ खुन्छिॽ लाम्धेःत्तिल्ले़ कुदगाङ् अःक्खुम् पप्मा पोङ्लो॥ 20 आप्फेक् हिम्बेसाङ्बाहाॽरे़ए याङ्गे़साॽबाहाॽ मे़नाॽरुसिरो, कर के़गप्पा के़जाबाहाॽरे़ग यरिक् तेःङ्जुम् मे़गत्तुसिरो॥ 21 आप्फेक् हिम्बेसाङ्बान् कुनामे़न्छाॽ के़मे़प्पे़ल्ले़ लायो चोगुरो, कर कुधेआङ् के़होप्पाहाॽ लुङ्माॽ के़दुक्पा मनान् मुॽइसाबारो॥ 22 थे ताप्फे़ःम्बा चोःक्मा निङ्वाॽ के़इःप्पाहाॽ ताप्मे़म्बे़ॽने़म्बि? कर नुबा चोःक्मा निङ्वाॽ के़जोःक्पाहाॽरे़ थधप् मे़ल्लॽमनाबा मिःम्जिन् हे़क्क्याङ् कुदोःप्मा चोःक्मान् मे़घोसुरो॥ 23 के़रे़क् स्याङ्मे़न्दाङ् याःम्बक्किल्ले़ इन्धा पोङ्लो, कर पाःन्लक् के़बाःप्पे़ङ्ग याङसाॽमो थारो॥ 24 सिक्कुम्निबाहाॽरे़ खुन्छिॽ याङ्साकुन्धेन् खुन्छिॽ तिचरो, कर अदङ्हाॽरे़ खुन्छिॽ खादाःक्पा पाःन्निल्ले़ अदङ्ङे पोङ्लो॥ 25 से़क्खाबा तोःन्दि पाःन्निल्ले़ हिङ्मे़न् ताङ्से़ःप्तुरो, कर इङ्ले़क्पा तोःन्दिल्ले़ इङ्ले़क् पाःन्हाॽ तोःन्दुरो॥ 26 आत्तिल्ले़ यहवे दाङ्बे़न् किरुॽ, खे़ल्ले़ कुयक्किन् ताप्थेक् याम्धेक्पा चोक्लो, हे़क्क्याङ् खुने़ॽ कुस्सा कुएहाॽरे़ लागि कन् लत्छा ताङ्से़ःप्सिङ्मादे़न् पोङ्लो॥ 27 यहवे दाङ्बे़न्नु किमाग हिङ्मे़ल्ले़ कुबुन्लो, खे़न् लाम्बा मनान् सिमे़ल्ले़ चे़न्हाॽओलाम् पिन्लो॥ 28 यरिक् योभोॽबा खानिःत्तिल्ले़ हाङ्ङिल्ले़ कुमिमिदिङ् पोङ्लो, योभोॽबा मेःन्नेबा युक्साबे़न् थेआङ् मेःन्लो॥ 29 नासि के़धःप्पा मनाःल्ले़ कुइत्छिङ् साम्मिन् यम्बा चोक्लो, कर कुसिक् के़जम्बा मनाःल्ले़ कुअदङ् पाःन्निन् ओसेःन्धाङ् चोगुरो॥ 30 चिजि ये़म्ये़म्बा सिक्लुङ्मे़ल्ले़ थक्किन् हिङ्मन् पिरुरो, कर नाहे़न् मिक्सोःल्ले़ ये़प्पा लुङ्सिहाॽ यःत्छुरो॥ 31 याङ्गे़साॽबान् तुक्खे के़जाःप्पाहाॽरे़ खुन्छिॽ नावागे़न् चइःत्दाङ्बे़न् कुनामे़न्छाॽ मे़मे़त्तुबा ओसेःन्धाङ् पोङ्लो, कर थेआङ् मे़ङ्गप्मनाबान् लुङ्माॽ के़दुक्पे़ल्ले़ यहवे दाङ्बे़न् मिङ्सो इङ्धाङ् पिरुबा पोङ्लो॥ 32 तुक्खे लाक्खे पोङ्दाःल्ले़ ताक्के़भे़ॽबाहाॽ मे़मे़क्लो, कर साम्योनिबे़ल्ले़ग सिमाओआङ् इःम्सिङ्मादे़न् खोसुरो॥ 33 सिङ्सिङ् ये़क्ये़क् के़लॽबे़ल्ले़ कुसिक्लुङ्मो सिक्कुम्दिङ् निङ्वान् याङ्धोक्लो, कर अदङ् मनाहाॽरे़ खुन्छिॽ लुम्मोआङ् सिक्कुम्दिङ् निङ्वान् ओसेःन्धाङ् चोःक्सिङ्लो॥ 34 साम्योबा पाःन्निल्ले़ लाजेन् थाःङ् फोःक्खुरो, कर लायो चोःक्माग आत्तिन् मे़न्छाम् सुवाङ्ले़ लागिसाङ् चाःत्थि पेःक्मा पाःन्लो॥ 35 हाङ्ङिन् सिक्कुम्साबा से़वाराबे़न्नुए कुनिङ्वाॽ तारो, कर सिरिङ्ममा के़दाःप्पा से़वारोबे़ल्ले़ खुने़ॽ कुसिक्के़न् फोःक्खुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.