खाहुन् 13 - लिम्बु1 सिक्कुम्साबा साःल्ले़ कुम्बारे़ खाहुन् पिरुबान् खे़प्सुरो, कुनामे़न्छाॽ के़जोःक्पे़ल्ले़ फे़ःक्मनाबे़न् मे़घे़प्सुन्लो॥ 2 मनाःल्ले़ कुम्ब्राःल्ले़ पाःत्तुबा पाःन्हाॽ लाम्बाए खुने़ॽ नुबा पाःन्हाॽरे़न् हाङ्से़म् खोसुरो, कर निङ्वाॽइरे़ मे़घोप्तुम्बा मनाःल्ले़ हिप्सिङ्मा थक्सिङ्मा याःम्बक्किन् खुने़ॽ कुसिराॽथाङ्लो॥ 3 कुम्ब्रान् सिङ्सिङ् ये़क्ये़क् के़गप्पा मनाःल्ले़ खुने़ॽ कुहिङ्मन्निन् ताप्थेक् याम्धेक्को कत्तुरो, कर सिङ्सिङ् ये़क्ये़क् मे़ल्लॽमनाबा पाःन्निल्ले़ मे़क्मा तारुरो॥ 4 ले़म्सुवाबे़ल्ले़ कुभा पाःन्हाॽ खोमा निङ्वाॽ चोगुरो हे़क्क्याङ् खे़ल्ले़ थेआङ् मे़घोसुन्लो, कर याःम्बुदिक्पे़ल्ले़ खोमा निङ्वाॽ चोगुबा के़रे़क् पाःन्हाॽ वे़त्ते़सरे़ खोसुरो॥ 5 साम्योबा मनाःल्ले़ इङ्ले़क् पाःन्निन् चिःत्तुरो, कर ताक्के़भे़ॽबाल्ले़ सिरिङ्ममा नु चाःत्थि पेःक्मा तारुरो॥ 6 साम्योबा पाःन्निल्ले़ आप्तिक् मे़ःन्नेबान् ताङ्से़ःप्तुरो, कर कुॽइभे़म्माल्ले़ लायोबे़न् थ्यःङ् मे़क्खुरो॥ 7 कुभा मनान् के़गप्पा के़जाबा ले़ङ्सिङ्लो, हे़क्केसाङ् खे़ल्ले़ थेधिक्काङ् मे़गत्तुन्लो, कुभा मनान् याङ्गे़साॽबा ले़ङ्सिङ्लो, करसाङ् खे़ल्ले़ वे़त्ते़सरे़ याङ्साकुन्धे कत्तुरो॥ 8 याङ्साकुन्धेःल्ले़ मनाःल्ले़ कुहिङ्मे़न् निङ्मिःल्ले़लाम् ताङ्से़ःप्मा सुक्तुबिला, कर याङ्गे़साॽबे़ल्ले़ यङ्मासे़प्मान् खे़म्मा मे़बोङ्ने़न्लो॥ 9 साम्योबा मनाःल्ले़ कुहिङ्मन्निल्ले़ सेमिन् सेसे लॽरिक् ओःत्लो, कर ताक्के़भे़बे़ल्ले़ कुहिङ्मन्निल्ले़ सेमिन् मे़से़रुरो॥ 10 आङ्दिङ् लॽमारे़ खे़माॽरक् फोःक्खुरो, कर सुजा के़नाःक्पाहाॽलाम् सिक्कुम्दिङ् निङ्वाॽ खोदे़त्लो॥ 11 इङ्ले़क् लाम्बा थक्मनाबा याङ्साकुन्धेन् युम्लबेःक्लो, कर आजे़त् आजे़त् चोःक्मार सुम्मनाबा याङ्साकुन्धेन् पोरबेःक्लो॥ 12 निङ्वाॽ चोःक्मनाबे़न् सुःल्ले़ निङ्वान्नाङ् सिरो, कर खोमा निङ्वाॽ पाःन्निन् के़प्माग हिङ्मे़ल्ले़न् सिङ्बुङ्लो॥ 13 खाहुन् खे़म्मा मे़म्दे़म्मनाबे़ल्ले़ खे़ल्ले़ कुले़क्वा हुङ्मा पोङ्लो, कर इङ्जाङ्ङिन् इङ्धाङ् के़बिबे़ल्ले़ हाङ्से़म् खोसुॽरो॥ 14 सिक्कुम्साबे़ल्ले़ कुनिसाम्मिन् हिङ्मे़ल्ले़ कुबुन्लो, खे़न् लाम्बा मनान् सिमे़ल्ले़न् चे़न्नोलाम् फिःन्छिङ्लो॥ 15 खासिङ्गे़निःप्पा नुबा मनाःल्ले़ नुरिक् मे़प्मान् खोसुरो, कर निङ्वाॽइरे़ मे़घोप्तुम्बा मनाःल्ले़ कुलाम्मिङ्ग के़साक्पा चोक्लो॥ 16 खासिङ्गे़निःप्पा के़रे़क् मनाहाॽ खुन्छिॽ आप्फेक् ने़हिनिङ्वाॽलाम् याःम्बक् मे़जोक्लो, कर अदङ् मनाहाॽरे़ खुन्छिॽ आप्फेक् अदङ् पाःन्निन् ओसेःन्धाङ् मे़जोगुरो॥ 17 निङ्वाॽइरे़ मे़घोप्तुम्बा इङ्घङ्साबे़न् तुक्खेलाक्खेओ थारो, कर नसाःन्साबा इङ्घङ्साबाल्ले़ वेःप्मान् तारुरो॥ 18 हे़न्थिम्मिन् निनि खे़म्घे़म् मे़ल्लाप्मनाबे़ल्ले़ कुसम्धाङ् याङ्साॽमा नु सिरिङ्ममान् इदारो, तोःम्मारे़ लागि फे़ःक्मनाबा पान् के़घे़म्बा मनाःल्ले़ मिङ्सो इङ्धाङ् खोसुरो॥ 19 निङ्वाॽ चोःक्मनाबा पाःन्निन् के़त्तिल्ले़ याम्साम्मो सिक्एःप्तुरो, कर अदङ्हाॽ फे़न्याःम्बक्लाम् नुःङ्मा खुन्छिॽ सिक्ले़ःङ्लो॥ 20 सिक्कुम्साबा मनाहाॽनु लाङ्गे़घेःक्पे़न् सिक्कुम्साबाए पोङ्लो, कर अदङ्हाॽनु तेःङ्जुम् के़मे़त्छिङ्बे़न् हान्ति पोङ्लो॥ 21 लायोबाहाॽ तुक्खे लाक्खेःल्ले़ नाःत्तुसिरो, कर साम्योबाहाॽरे़ नुबा पाःन्निल्ले़न् हाङ्से़न् मे़घोसुरो॥ 22 के़नुॽबा मनाहाॽरे़ खुन्छिॽ सामे़न्छाॽहाॽरे़ लागि पालाम्बाबा याङ्साकुन्धे मे़ले़रु मे़धाॽरुसिरो, कर लायोबाहाॽरे़ खुन्छिॽ याङ्साकुन्धेन् साम्योबाहाॽरे़ खुन्छिॽ लागि मे़लुप्सुरो॥ 23 मे़न्धोङ् मे़न्जोःक्के के़ने़बा खाम्मिल्ले़ याङ्गे़साॽबे़ल्ले़ कुलागि वे़त्ते़सरे़ पोगुगे़न् कुजा फत्छु पिरुबिलारो, कर कुदोःप्मा खासे़न् मे़ल्लोम्मनाबे़ल्ले़ खे़न् नाप्तुदेॽरुरो॥ 24 कसिक्पा मे़न्याक्मनाबा पाःल्ले़ कुस्सान् चिःत्तुरो, कर कुस्सान् लुङ्माॽ के़दुक्पा पाःल्ले़ सिङ्सिङ् ये़क्ये़क्काङ् खे़न् हे़न्थिम् याक्तुरो॥ 25 साम्योबाहाॽरे़ खुन्छिॽ खाघा चामा मे़गत्तुरो, कर ताक्के़भे़ॽबाहाॽरे़ खुन्छिॽ साप्पोक्के़न् साक्मे़न्जा पोङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.