खाहुन् 12 - लिम्बु1 हे़न्थिम्मिन् कुसिराॽ के़धाङ्बा मनाःल्ले़ ने़हिनिङ्वान् कुसिराॽ थाङ्लो, कर कुदोःम्मा पाःन्निन् के़जिःप्पा मनान् अदङ्लो॥ 2 यहवे दाङ्बे़न् कुदोःप्मा मनाःन्नु सःत्लो, कर ताप्फे़ःम्बा पान् चे़म्भःन् के़जोःक्पाहाॽ खुने़ॽ आप्तिक्साबा लेःत्तुसिरो॥ 3 ताप्फे़ःम्बा याःम्बक्किल्ले़ मनान् ये़प्मा मे़सुक्ने़न्लो, कर साम्योनिबे़न् आःङ्मा सुक्मे़दे़त्ने़ल्लो॥ 4 सुम्बोधासामा मेःत्तिन् कुये़म्बाःल्ले़ कुदिःत्चरो, कर कुनामे़न्छाॽ पान् के़दाःप्मा मेःत्ते़ङ्ग कुये़म्बाःल्ले़ कुये़त् के़यःप्पा हे़क्तङ्मारो॥ 5 साम्योबे़ल्ले़ चोःक्मा कोःत्तुबा पाःन्हाॽ के़वाॽबाए चोक्लो, कर ताक्के़भे़बे़ल्ले़ कुसुजाहाॽ इङ्आले़क्ले़क्पा चोक्लो॥ 6 कुॽइगे़भे़म्बा मनाःल्ले़ कुबाःन्निल्ले़ग कुभारे़ कुमाक्खिॽ से़मारे़ लागि सुगुआङ् युङ्लो, कर साम्योनिबे़ल्ले़ कुबाःन्निल्ले़ खे़ङ्हाॽ ताङ्से़ःप्तुसिरो॥ 7 ताक्के़भे़ॽबा मनाहाॽ लाप्पुङ्साःङ्गा मे़बेःक्लो हे़क्क्याङ् खे़ङ्हाॽ मे़न्वाॽने़न् मे़ङ्गन्ने़न्लो, कर साम्योनिबे़ल्ले़ कुहिम्सयङ्ङिन् मे़म्मुन्ने युङ्गन्लो॥ 8 मनान् खुने़ॽ कुघासिङ् निःप्मा निङ्वाॽ कुइसिक् कुनारा मे़भोसुरो, कर पे़र्गे़क् वर्गे़क् निङ्वाॽ के़गप्पा मनान् हिनाःम् पोङ्लो॥ 9 आप्फेक् नुबा निङ्वाॽ के़गप्पा ले़ङ्सिङ्माआङ् चामा थुङ्माए मे़ङ्गप्मान्नुःल्ले़ग आप्फेक् हाःत्ताआङ् मेःन्ना लॽमाआङ् लत्छा से़वारोबा कप्माए साॽरिक् नुबारो॥ 10 साम्योबा मनाःल्ले़ कुधक्साहाॽ कम्ब्राङ् मे़त्तुसिरो, कर ताक्के़भे़ॽबे़ल्ले़ग के़रे़क्नुःल्ले़ नुबा कुयाःम्बक्किन्नाङ् साॽरिक् साॽरिक् ताप्फे़ःल्लिक् आमे़प्मे़प्पा पोङ्लो॥ 11 कुइक्ताप् के़अःक्पा के़धोःङ्बे़ल्ले़ वे़त्ते़सरे़ कुजा कत्तुरो, कर निङ्वाॽ इःप्मा पाःन्नो के़बप्पे़न् कुने़हि के़होप्पा पोङ्लो॥ 12 कुॽइगे़भे़म्बे़ल्ले़ कुॽइगे़भे़म्बा मनाहाॽरे़ मे़नाप्तुसिबा सामा चिगक्वाहाॽओ मिक् मिक्केःत्तुरो, कर साम्योनिबे़न् खाःम्बा लेःत्छिङ्ङाङ् युङ्लो॥ 13 कुॽइगे़भे़म्बा मनान् आप्फेक् लायोबा कुबाःन्निल्ले़ खुने़ॽ इजोओ थासुसिरो, कर साम्योबा मनान् तुक्खे लाक्खेलाम् खे़त्छिङ्लो॥ 14 मनान् आप्फेक् कुम्ब्राःल्ले़ पाःत्तुबा पाःन्हाॽ लाम्बाए नुबा चिगक्वा पाःन्हाॽरे़ काप्तुरो, कुहुक्किल्ले़ कुयाःम्बक्किल्ले़ थुम्घोन् खुने़ॽ से़क्खा खोसुरो॥ 15 अदङ् मनाःल्ले़ कुलाम्मिन् खुने़ॽ कुनिमो नुबाए निसुरो, कर खासिङ् के़निःप्पा मनाःल्ले़ वेॽहाॽरे़ खुन्छिॽ सुजाहाॽ खे़प्सुरो॥ 16 अदङ् मनाःल्ले़ कुसाक्के़न्निन् खिमो ओसेःन्धाङ् चोगुरो॥ कर खासिङ्गे़निःप्पा मनाःल्ले़ कुनामे़न्छाॽ पोङ्ङिल्ले़ खुने़ॽ कुमिक्किन् इम् मे़त्तु फत्छुरो॥ 17 से़क्खाबा तसिःल्ले़ के़वाॽबा तोःन्दि आबिरो, कर इङ्ले़क्पा तसिःल्ले़ मे़न्वाॽमनाबा पान् पाःत्तुरो॥ 18 मे़न्इःत्छिङ्ङे पाःप्मनाबा पाःन्सुत्लाःल्ले़ ताभे हे़क्के आधुप्लो, कर सिक्कुम्दिङ् निङ्वाॽरे़ पाःप्मनाबा पाःन्निल्ले़ आवेःन्लो॥ 19 से़क्खा के़बाःप्पा मुरासेॽइन् आभे़ल्ले़साङ् वाॽरो, कर इङ्ले़क् के़बाःप्पा ले़सोःत्ते़न् सप्फाधिक्लक् वाॽरो॥ 20 ताप्फे़ःम्बा चे़म्भन् के़जोःक्पाहाॽरे़न् निङ्वान् इङ्ले़क्पा चोक्लो, कर सनारुङ्ङाङ् वाॽमारे़ लागि पान् के़भोबे़न् सःत्लो॥ 21 साम्योबा सम्धाङ् थेआङ् हान्ति मे़बोङ्ने़न्लो, कर ताक्के़भे़ॽबाहाॽ तुक्खे लाक्खेःल्ले़ ते़त्तुसिआङ् मे़वाॽरो॥ 22 इङ्ले़क् के़बाःप्पा मुरासेॽइन् यहवे दाङ्बे़ल्ले़ कुसिक्के़ले़ःङ्लो, कर खुने़ॽ निङ्वाॽइऱे खोःप्तुबा मनाःन्नु कुनिङ्वाॽ तारो॥ 23 खासिङ्गे़निःप्पे़ल्ले़ कुने़हि कुनिङ्वान् खुने़ॽ आप्फेक् कत्तुरो, कर अदङ् मनाःल्ले़ कुअदङ् पाःन्निन् खिमो आप्फेक् ओसेःन्धाङ् चोगुरो॥ 24 याःम्बुदिक्काङ् याःम्बक् के़जोःक्पा हुक्किल्ले़ युक् चोगुरो, कर ले़म्सुवाबे़ल्ले़ कुनुप्माङ्ग योग्बा पोङ्लो॥ 25 सिक्लुङ्माॽओ तुक्खे के़जाबा मनान् मे़न्धुम्मनाबा पोङ्लो, कर लुङ्माॽ तुक्सिङ्मा पाःन्निल्ले़ हाङ्हाङ् आमे़त्लो॥ 26 साम्योबा मनान् चुम्देङ्ले़ लागि सिङ्सिङ् ये़क्ये़क् लॽरो, कर ताप्फे़ःम्बा मनाहाॽऱे खुन्छि लाम्मिल्ले़ खे़ङ्हाॽ आबाङे लाम्भोःत्तुसिरो॥ 27 ले़म्सुवाबा सावागे़म्बे़ल्ले़ सावान् मे़घोसुन्लो, कर याःम्बुदिक्पा मनाःल्ले़ याङ्साकुन्धे थगुरो॥ 28 साम्योबा लाम्मो हिङ्मन् वाॽरो, खे़न् माराम्मिन्नु सोसोरिक् नुप्मे़न्दिङ् हिङ्मन् वाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.