खाहुन् 10 - लिम्बुसोलोमनरे़ कुघाहुन्हाॽ 1 सोलोमनरे़ साप्तुबा खाहुन्हाॽ कन्हाॽरो— सिक्कुम्साबा साःल्ले़ कुम्बारे़ कुनिङ्वाॽ तासुरो, कर अदङ् साःल्ले़ कुम्मा तुक्खे चाःत्तुरो॥ 2 मे़न्वाॽमनालाम् थक्मनाबा याङ्साकुन्धेःल्ले़ कुमे़ल्लुङ् थे़माआङ् मे़बोङ्ने़ल्लो, कर साम्योबा पाःन्निल्ले़ सिमालाम् ताङ्आसे़ःप्लो॥ 3 यहवे दाङ्बे़ल्ले़ साम्योबा मनाहाॽ साक्मे़न्जा मे़जोगुन्सिल्लो, कर खुने़ॽ ताक्के़भे़बे़ल्ले़ चाङ्गो थुङुङ्गो के़लॽबा कुनिङ्वाॽबान् कुसुम् मे़न्दम्मनाबा चोगुरो॥ 4 ले़म्सुवाबा हुक्हाॽरे़ मनान् याङ्गे़साॽबा चोगुरो, कर याःम्बुदिक्पा हुक्हाॽरे़ याङ्साकुन्धे थगुरो॥ 5 चासुम्मा ये़म्मो चागे़सुम्बा साःङ्ग सिक्कुम्साबारो, कर खे़न् ये़म्मो के़इम्बा साःङ्ग चाःत्थि के़देबारो॥ 6 साम्योबा मनाःल्ले़ कुसम्धाङ् मुॽइसाम्बा तिचःन् युङ्सिङ्लो, कर कुॽइगे़भे़म्बे़ल्ले़ कुम्ब्राओ मना से़प्मान् चिङ्सिङ्ङाङ् युङ्लो॥ 7 साम्योबा मनान् निङ्वाॽ इःप्माग मुॽइसाम् पोङ्लो, कर ताक्के़भे़बे़ल्ले़ कुमिङ्ङिन्ग वरे़ङ्ले़ङ् माबेःक्लो॥ 8 सिक्लुम्मो सिक्कुम्निबा के़बोङ्बे़ल्ले़ इङ्जाङ्हाॽ इःप्मा नाःप्मा ते़न्लो, कर कुम्ब्रा के़लाःङ्बा अदङ्ङिन् खाप्पुथ्यःङ् मे़क्लो॥ 9 आप्तिक् मेःन्नेबा मनान् मे़ङ्गिए लाङ्घेःक्लो, कर पे़र्गे़क् वर्गे़क् लाङ्गे़घेःक्पा मनान् मे़दे़म्सुरो॥ 10 फे़न्निङ्वाःल्ले़ कुमिक् चिघिम् के़मे़प्पे़ल्ले़ निङ्वाॽ तुक्खे तारुरो, हे़क्क्याङ् कुम्ब्रा के़लाःङ्बा अदङ्ङिल्ले़ मे़क्मासिमा तारुरो॥ 11 साम्योनिबे़ल्ले़ कुम्ब्रान् हिङ्मन्ले़ कुबुन्लो, कर कुॽइगे़भे़म्बे़ल्ले़ कुम्ब्राःल्ले़ मनासे़प्मा पाःन्निन् चिक्खुरो॥ 12 चिःत्छिङ्मा पाःन्निल्ले़ खे़माॽ फोःक्खुरो कर लुङ्माॽ तुक्सिङ्मे़ल्ले़ काक् फे़न्याःम्बक्हाॽ ते़प्तुरो॥ 13 सिङ्सिङ् ये़क्ये़क्पा मनाहाॽरे़ खुन्छिॽ मुराओ सिक्कुम्दिङ् निङ्वाॽरे़ पाःन्हाॽ खोदे़त्लो, कर तक्काःत्तिङ्ग खासिङ् मे़न्निःप्मनाबे़ल्ले़ कुलागिरो॥ 14 सिक्कुम्निबा मनाःल्ले़ ने़हिनिङ्वाॽ सुप्सुरो, कर अदङ्ङिल्ले़ कुम्ब्राःल्ले़ खाप्पुथ्यःङ् पोङ्मे़न् तारुरो॥ 15 याङ्साकुन्धेसाबे़ल्ले़ कुयाङ्साकुन्धेःन्ने़ खे़ङ्हाॽरे़ खुन्छिॽ लागि कब्रिङ् से़ःप्मनाबा हाङ्यक्लो, कर याङ्साॽमाल्ले़ याङ्गे़साॽबान् मे़क्खुरो॥ 16 साम्योबा मनाःल्ले़ कुधुम्घोन् हिङ्मन्लो, कर कुॽइगे़भे़म्बे़ल्ले़ चोगुबा याःम्बक्किल्ले़ कुले़क्वा खुम्दिङ् खोसुरो॥ 17 आत्तिल्ले़ हे़न्थिम्मिन् इःत्तु नाःत्तुॽ, खे़ल्ले़ हिङ्मन्ले़ लाम्मिन् ओसेःन्धाङ् चोगुरो, कर तोःम्मारे़ लागि फे़ःक्मनाबा पाःन्निन् निनि खे़म्घे़म् मे़ल्लाॽमनाबा मनाःल्ले़ वेॽहाॽआङ् हुसुसि पक्सुसिरो॥ 18 आत्तिल्ले़ खुने़ॽओ चिःत्छिङ्मान् चिक्खु कत्तुॽ, खे़ल्ले़ कुम्ब्रान् इङ्ले़क्पा चोक्लो, हे़क्क्याङ् हाःत्ले़ हने़बा पाःन्हाॽ से़सुॽ, खे़न् अदङ्लो॥ 19 यरिक् पान् पाःप्मे़ल्ले़, यरिक् लायो पोङ्लो, कर हाःत्ले़ कुल्सोःत्ते़न् से़ःप्तुॽ, खे़न् खासिङ् क़ेनिःप्पारो॥ 20 साम्योबा मनाःल्ले़ कुल्सोःत्ते़न् इसेःङ्बा युप्पारो, कर ताक्के़भे़ॽबे़ल्ले़ कुनिङ्वान् हने़बा चोक्लो॥ 21 साम्योबा मनाःल्ले़ कुबाःन्निल्ले़ यरिक् मनाहाॽ खुन्छिॽ सिक्एःप्तुर याःन्दुसिरो, कर ने़हिनिङ्वाॽ होःप्मारे़ए अदङ्हाॽ मे़मे़क्लो॥ 22 यहवे दाङ्बे़ल्ले़ कुहाङ्वा कुमुॽइःल्ले़ याङ्साकुन्धे तारुरो, हे़क्क्याङ् याःम्बुधिक्किल्ले़ याङ्साकुन्धेबा के़न्जोःक्ने़ल्लो॥ 23 याक्तुक्पा अदङ्ङिन् ताप्फे़ःम्बा ये़प्ले़क्को सःत्लो, कर खासिङ्गे़निःप्पा निङ्वाॽ के़गप्पा मनान् सिक्कुम्दिङ् निङ्वाॽओ ये़ये़ लॽरो॥ 24 ताक्के़भे़ॽबा मनाःल्ले़ किरुबा पाःन्निन्ने कुसम्धाङ् इदारो, कर साम्योबा मनाःल्ले़ खोमा निङ्वाॽ चोगुबा पाःन्निन्ने खोसुरो॥ 25 सुरित् केजङ्ङिन् इक्सिङ्ङाङ् ताःल्ले़ ताक्के़भे़ॽबाहाॽ मे़न्दाङ्ने़न्लो, कर साम्योबा मनान् कुनुप्मो थारिक् थधप् मे़ल्लॽए वाॽरो॥ 26 के़सुःप्पाल्ले़ हाबोॽबान् यासुबा नु मिःक्खुल्ले़ मिक्किन् ले़सुबा हे़क्के ले़म्सुवाबा मनान् खुने़ॽ के़बाङ्बे़ल्ले़ कुलागि हे़क्तङ्बाए पोङ्लो॥ 27 यहवे दाङ्बे़न्नु किमे़ल्ले़ हिङ्मन्ले़ थाःक्के़न् पोरो, कर कुॽइगे़भे़म्बे़ल्ले़ कुधाःक्के़न् ताङ्बा खक्पेःक्लो॥ 28 साम्योनिबे़ल्ले़ निङ्साङ् चोगुबा पाःन्निल्ले़ कुनिङ्वाॽ सःत्ल चोगुरो, कर ताक्के़भे़बे़ल्ले़ चोगुबा निङ्साङ्हाॽ हने़बा पोङ्लो॥ 29 यहवे दाङ्बे़ल्ले़ कुलाम्मिन् आप्तिक्म़ेःन्ऩेबाहाॽरे़ खुन्छिॽ लागि लत्छा से़ःप्सिङ्मादे़न्लो, कर फे़न्याःम्बक् के़जोःक्पाहाॽरे़ खुन्छिॽ लागि मे़क्मा सिमारो॥ 30 साम्योबा मनान् आभे़ल्ले़आङ् मे़न्आःक्खुन्लो, कर ताक्के़भे़ॽबा मनान् इक्सादिङ् खाम्बेःक्मो मे़वाॽने़न्लो॥ 31 साम्योनिबे़ल्ले़ कुम्ब्राओलाम् सिक्कुम्दिङ् निङ्वाॽबा पान् लःन्लो, कर फे़क्के़लाॽबा पान् के़बाःप्पा ले़सोःप्पान् मे़घक्तुरो॥ 32 साम्योनिबे़ल्ले़ कुम्ब्रासेॽइल्ले़ सुदाःक्मा के़लाॽबा पान् ले़सुरो, कर ताक्के़भे़बे़ल्ले़ कुम्ब्राःल्ले़ पे़र्गे़क् वर्गे़क्पा पाःन्लक् पाःत्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.