खानिःत् 17 - लिम्बुहारुनरे़ कुदक्काःत् 1 यहवे दाङ्बे़ल्ले़ मोसान् मे़त्तु, 2 “खे़ने़ॽ इस्राइलिहाॽ मे़त्ते़से़ॽआङ् खे़ङ्हाॽरे़ खुन्छिॽ थाःक्थक्मा लत्छा लत्छा लॽरिक् थिबोङ्ङाङ् ने़त्छि तक्काःत्हाॽ तारे़ॽ, हे़क्क्याङ् खे़ङ्हाॽ के़रे़क्ले़ खुन्छिॽ मिङ्हाॽ खे़ने़ॽ खे़ङ्हाॽरे़ खुन्छिॽ आप्फेक् आप्फेक् तक्काःत्हाॽओ साप्ते़ॽ॥ 3 ले़बि थाःक्कोबा तक्काःत्तो खे़ने़ॽ हारुनरे़ कुमिङ् साप्ते़ॽ, थेआङ्भे़ल्ले़ के़रे़क् थाःक्थक्माबा लाम्लोबा मनाःल्ले़ लागि लत्छा तक्कात् कप्मा पोङ्ॽ॥ 4 तुम्मादे़न् साःङ्गाहिम्मो माङ्हुप् साप्लुङ्हाॽ के़याक्पा निङ्वाॽफुमाङ् सन्दोक्किल्ले़ कुबेसाङ् आङ्गाॽ खिनिॽ तुम्निङ्बादे़न्नो खे़न् तक्काःत्हाॽ ने़स्से़ॽ॥ 5 आङ्गाॽ आत्तिन् मनान् सेगुङ्ॽ, खे़ल्ले़ कुदक्काःत्तिन् कुजःक् लःन्ॽ॥ कम्भलॽरिक् खे़ने़ॽ के़दक्ले़ङ्वाओ इस्राइलिहाॽ मने़धिक्मा मे़नाॽर चोगुङ्ॽ॥” 6 खे़ब्याङ् मोसाःल्ले़ इस्राइलिहाॽ कन् पाःन्निन् चे़क्तुसि, हे़क्क्याङ् खे़ङ्हाॽरे़ खुन्छिॽ लाम्लोबाहाॽरे़ खुन्छिॽ आप्फेक् आप्फेक् पाधे़बाहाॽरे़ खुन्छिॽ थाःक् कुइसिक् थाःक्लाम्लोबाहाॽरे़ खुन्छिॽ लागि लत्छा लत्छा लॽरिक् थिबोङ्ङाङ् ने़त्छि तक्काःत्हाॽ खुने़ॽ मे़बिरु॥ हारुनरे़ कुदक्काःत्तिन्नाङ् खे़ङ्हाॽरे़ खुन्छिॽ तक्काःत्तिल्ले़ कुलुम्मो ये़बे़॥ 7 मोसाःल्ले़ खे़न् तक्काःत्हाॽ याङ्सिङ् हे़क्क्याङ् माङ्हुप् साप्लुङ्हाॽ के़याक्पा निङ्वाॽफुमाङ् सन्दोक् के़युङ्बा साःङ्गाहिम्मो यहवे दाङ्बे़ल्ले़ कुदगि ने़स्सु॥ 8 कुदाःक्दिक्मा मोसान् माङ्हुप् साप्लुङ् के़याक्पा निङ्वाॽफु सन्दोक् के़युङ्बा साःङ्गाहिम्मो पे॥ हे़क्क्याङ् ले़बि थाःक्किल्ले़ लागि मे़ने़स्सुबा हारुनरे़ कुदक्काःत्तो कुभे़क्मे़त् लःन्दे़आङ् पत्छे़, हे़क्क्याङ् कुभे़क्मे़त् लःन्दे़आङ् कुभुङ् फे़क्ते़ खे़ब्याङ् खजङ्सेॽआङ्नि तुम्से़ चुरे़आङ् पत्छे़! 9 खे़ब्याङ् मोसाःल्ले़ के़रे़क् तक्काःत्हाॽ यहवे दाङ्बे़ल्ले़ कुदगिलाम् इस्राइलिहाॽओ तारु हे़क्क्याङ् ओमे़मे़त्तुआङ् के़रे़क्ले़ खुन्छिॽ आप्फेक् आप्फेक् तक्काःत्हाॽ मे़मे़त्छिङ्॥ 10 यहवे दाङ्बे़ल्ले़ मोसान् मे़त्तु, “पिफ्युङ् के़जोःक्पा थाःक्हाॽरे़ खुन्छिॽ तक्ले़ङ्वाओ मिक्सेःन्ले़ लागि हारुनरे़ कुदक्काःत्तिन् माङ्हुप् साप्लुङ् के़याक्पा निङ्वाॽफुमाङ् सन्दोक्को कुदगि तेॽरे़आङ् ये़प्से़ॽ, खे़ब्याङ् आङ्गाॽ आदक्ले़ङ्वाओ खे़ङ्हाॽ मने़धिक्मा मे़नाॽर चोगे़ पिरे़से़ॽ, मेःन्ने़भग्र खे़ङ्हाॽ मे़सिरो॥” 11 यहवे दाङ्बे़ल्ले़ इङ्जाङ् चोगुबा कुसिङ् मोसाःल्ले़ के़रे़क् चोगु॥ 12 इस्राइलिहाॽरे़ मोसान् मे़मे़त्तु, “ओमे़त्ते़साॽरे़, आनिगे मे़गिगे़, फे़त्लाॽरिगे़, आनिगे के़रे़क् थेनाधेबा पोःक्खिगे़! 13 यहवे दाङ्बे़ल्ले़ कुसेसे युङ्दे़न्निल्ले़ कुबेसाङ् के़दाबा के़रे़क् थिक्काङ् मेःन्ने मे़सिरो॥ थे आनिगे़आङ् के़रे़क् मे़क्मा पोङ्बाबि?” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.