ले़बि 16 - लिम्बुआप्तिक्लाम् सुत्थो पोङ्मा याःम्बक् चोःक्मा ये़न् 1 हारुने़ल्ले़ कुस्सा ने़त्छि यहवे दाङ्बे़ल्ले़ कुबेसाङ् पेसे़त्छिल्ले़ खुन्छिॽ स्ये़सि हे़क्क्याङ् खे़न् एगाङ् यहवे दाङ्बे़न् मोसाःन्नु पारे़॥ 2 यहवे दाङ्बे़ल्ले़ मोसान् मे़त्तु, “खे़ने़ॽ के़म्भुॽ हारुने़न् सन्दोक्किल्ले़ कुसम्धाङ् के़युङ्बा कुदे़प्फेल्ले़ कुदगि फोःन्दा सिगाङ्बा साॽरिक् सेसेबादे़न्नो कुनिङ्वाॽ पाःत्पाःत् मे़दाने़न्ल फाॽआङ् मे़त्ते़ॽ॥ मेःन्ने़भग्र खुने़ॽ सिरो, थेआङ्भे़ल्ले़ आङ्गाॽ सन्दोक्किल्ले़ कुसम्मोबा लायोलाम् ले़प्मि खोमा कुदे़प्फेःल्ले़ कुसम्धाङ् खाॽमिःत्तो आङ्गाॽ ओसेःन्धाङ् पोङ्ङा॥ 3 “हारुने़न् सेसेदे़न्नो लाःप्मानुःल्ले़ तगि लायोलाम् ले़प्मि खोमा सिदुङ्जभारे़ लागि लत्छा से़गम्बा नु मिधिङ्मनादेमनाबा वयागे़न् सिदुङ्जभारे़ लागि लत्छा मे़ल्लुक् याङ्सिङ्ङाङ् खुने़ॽ ताररो॥” 4 नैनासुत् चिरिक्किल्ले़न् सेसेबा लगेःप्, नैनासुत् चिरिक्किल्ले़न् सिगाङ् चाङ्मा चाङ्, नैनासुत् चिरिक्किल्ले़न् फॽइ, हे़क्क्याङ् नैनासुत् चिरिक्किल्ले़न् पागरि खुःक्सुआङ् तार॥ खे़ङ्हाॽ सेसेबा चाङ्लो॥ कल्ले़चोगुल्ले़ खुने़ॽ वारुःम्सिङ्ङाङ्लक् खे़न् चाङ्हाॽ चाक्खुर॥ 5 इस्राइलिहाॽरे़ खुन्छिॽ सङ्जुम्भोओलाम् लायोलाम् ले़प्मि खोमा सिदुङ्जभारे़ लागि कुम्बाबा मे़ःन्दा ने़त्छि नु मिधिङ्मनादेमनाबा सिदुङ्जभारे़ लागि लत्छा मे़ल्लुक् खे़ल्ले़ तारुर॥ 6 “खे़न् एगाङ् हारुने़ल्ले़ खुने़ॽ लायोलाम् ले़प्मि खोमा सिदुङ्जभा से़गम्बान् तोःन्दुर, हे़क्क्याङ् खुने़ॽ आबाङे नु आबाङे कुहिम्सयङ्ले़ लागि लायोलाम् ले़प्मि नाःक्तुर॥ 7 खे़ब्याङ् खे़ल्ले़ खे़न् ने़प्माङ् कुम्बाबा मे़ःन्दाहाॽ याङ्सिङ्ङाङ् तुम्मादे़न् साःङ्गाहिम्मोबा लाःप्मादे़न्नो यहवे दाङ्बे़ल्ले़ कुदगि तारुर॥ 8 खे़न् एगाङ् हारुने़ल्ले़ ने़प्माङ् कुम्बाबा मे़ःन्दाहाॽओ तॽयाःन्सोन् के़सुर, लत्छा यहवे दाङ्बे़ल्ले़ कुलागि नु वेॽइन् ले़प्मनादेमनाबा मे़ःन्दबका पोङ्मारे़ लागि॥ 9 तॽयाःन्सोःन्नो यहवे दाङ्बे़ल्ले़ कुलक्को के़धाबा कुम्बाबा मे़ःन्दाःन् चाहे हारुने़ल्ले़ निःत्ताङ् तारुआङ् लायोलाम् ले़प्मि खोमा सिदुङ्जभाःल्ले़ लागि खे़न् तोःन्दुर॥ 10 कर तॽयाःन्सोःन्नो ले़प्मनादेमनाबा कुम्बाबा मे़ःन्दाःल्ले़ कुलक्को के़धाबा कुम्बाबा मे़ःन्दाःन् यहवे दाङ्बे़ल्ले़ कुदगि कुहिङ्वे़त्ते मे़दारुर, हे़क्क्याङ् खे़न् एगाङ् लायोलाम् ले़प्मि नाःक्मारे़ लागि मुरे़क् खारे़क् थेआङ् के़होप्पादे़न्नो मे़ले़रु मे़देसुर॥ 11 “हारुने़ल्ले़ लायोलाम् ले़प्मि खोमा कुसिदुङ्जभा से़गम्बान् तारुर, हे़क्क्याङ् खुने़ॽ आबाङे नु खुने़ॽ कुहिम्सयङ्ले़ लागि लायोलाम् ले़प्मि नाःक्तुर॥ खे़ल्ले़ लायोलाम् ले़प्मि खोमा सिदुङ्जभारे़ लागि से़गम्बान् से़रुर॥ 12 खे़ल्ले़ यहवे दाङ्बे़ल्ले़ कुदगिबा ले़त्ति तोःम्मादे़न्नोलाम् हुरुरुना के़दिःप्पा मिःल्ले़ के़दिम्बा साङ्ते़रे़ःङ्ङिन् नु मे़हागुबा के़साःम्बा कुनाम्गे़नुॽबा सुक्पे़न् पे़ःङ्गोॽ थिक् कुले़ःम् याङ्सिङ्ङाङ् फोःन्दा सिगाङ् तारुर॥ 13 खे़ल्ले़ यहवे दाङ्बे़ल्ले़ कुदगिबा मिओ सुक्पा केःत्तुर, हे़क्क्याङ् सुक्पाओबा मिःक्खुल्ले़ माङ्हुप् सन्दोक्किल्ले़ कुसम्धाङ् के़युङ्बा कुदे़प्फेन् ते़प्तुर, मेःन्ने़भग्र खे़न् सिरो॥ 14 खे़न् एगाङ् खुने़ॽ से़गम्बे़ल्ले़ कुमाक्खिॽओलाम् कुभा याङ्सिङ्ङाङ् खुने़ॽ कुहुक्चोःल्ले़ कुदे़प्फेःल्ले़ कुदगि साक्खुर, हे़क्क्याङ् लायोलाम् ले़प्मि खोमा कुदे़प्फेःल्ले़ कुदगि ले़प्माङ् खुने़ॽ कुहुक्चोःल्ले़ खे़न् माक्खिन् नुसिले़ङ् थारिक् साक्खुर॥ 15 “खे़ब्याङ् खुने़ॽ मनाहाॽरे़ खुन्छिॽ लागि सिदुङ्जभा कुम्बाबा मे़ःन्दाःन् से़रुर, हे़क्क्याङ् खे़ल्ले़ कुमाक्खिन् फोःन्दा सिगाङ् तारुआङ् से़गम्बे़ल्ले़ कुमाक्खिन् हे़क्के कुदे़प्फेःल्ले़ कुसम्धाङ् नु कुदे़प्फेःल्ले़ कुदगाङ् साक्खुर॥ 16 कम्भलॽरिक् इस्राइलिहाॽरे़ खुन्छिॽ आसुत्थो, फे़न्याःम्बक् नु खे़ङ्हाॽरे़ खुन्छिॽ के़रे़क् लायोल्ले़ चोगुल्ले़ साॽरिक् सेसेबादे़न्निल्ले़ लागि खे़ल्ले़ लायोलाम् ले़प्मि नाःक्तुर॥ खे़ङ्हाॽरे़ खुन्छिॽ आसुत्थो लुम्मो तुम्मादे़न् साःङ्गाहिम्मिल्ले़ लागिआङ् खे़ल्ले़ हे़क्केए चोगुर॥ 17 आल्ल हारुने़न् लायोलाम् ले़प्मि नाःक्मारे़ लागि साॽरिक् सेसेबादे़न्नो लाःत्, हे़क्क्याङ् खुने़ॽ आबाङे लागि, खुने़ॽ आबाङे कुहिम्सयङ्ले़ लागि नु इस्राइलबा के़रे़क् सङ्जुम्भोहाॽरे़ लागि लायोलाम् ले़प्मि नाःक्तुआङ् मे़न्नुःङ् मे़ल्लःन्ने थारिक् तुम्मादे़न् साःङ्गाहिम्मो हाःत्ताङ् मे़लाःत्ने़न्ल॥ 18 “खे़ब्याङ् खे़ल्ले़ लाःक्कात् ले़त्ति तोःम्मादे़न्नो पेःक्काङ् यहवे दाङ्बे़ल्ले़ कुदगि खे़ल्ले़ लागि लायोलाम् ले़प्मि नाःक्तुर॥ हे़क्क्याङ् से़गम्बान् नु कुम्बाबा मे़ःन्दाःल्ले़ कुमाक्खिॽओलाम् कुभा आजे़ःत्छिक् याङ्सिङ्ङाङ् के़रे़क् पिसाङ्बा ताङ्हाॽओ हुःत्तुर॥ 19 माक्खिॽओलाम् कुहुक्चोःल्ले़ नुसिले़ङ् थारिक् खे़ल्ले़ कुसम्धाङ् साक्खुआङ् इस्राइलिहाॽरे़ खुन्छिॽ आसुत्थोलाम् ले़त्ति तोःम्मादे़न्निन् सुत्थो नु सेसे चोगुररो॥ 20 “आल्ल हारुने़ल्ले़ साॽरिक् सेसेबादे़न्, तुम्मादे़न् साःङ्गाहिम् नु ले़त्ति तोःम्मादे़न्निल्ले़ लागि लायोलाम् ले़प्मि नाःक्मा सुरुआङ् खे़ल्ले़ कुहिङ्वे़त् कुम्बाबा मे़ःन्दाःन् तारुर॥ 21 हे़क्क्याङ् हारुने़ल्ले़ खुने़ॽ ने़प्माङ् कुहुक्हाॽ कुहिङ्वे़त् कुम्बाबा मे़ःन्दाःल्ले़ कुधे़गेःक्पो ने़स्सुर, खे़ब्याङ् इस्राइलिहाॽरे़ खुन्छिॽ के़रे़क् फे़न्याःम्बक्, पिफ्युङ् नु लायो चोगुम्बे़ लॽरिक् पाःप्मा मे़दे़न्नाङ् खे़न् कुम्बाबा मे़ःन्दाःल्ले़ कुधे़गेःक्पो मे़धासुर॥ खुने़ॽ खे़न् लायोहाॽ कुम्बाबा मे़न्दाःल्ले़ कुधे़गेःक्पो ने़स्सुआङ् खुने़ॽ तगिआङ्धोए मुरामे़त्तुबा मनाःन्नु सोरिक् मुरे़क् खारे़क् थेआङ् के़होप्पादे़न्नो खे़न् मे़ःन्दाःन् पाङ्घुदेसुर॥ 22 कम्भलॽरिक् खे़न् कुम्बाबा मे़ःन्दाःल्ले़ए खे़ङ्हाॽरे़ खुन्छिॽ के़रे़क् लायो लासोःत्हाॽ चिजि खक्खक्पादे़न्नो कुयुदेॽरुर, हे़क्क्याङ् खे़न् मनाःल्ले़ खे़न् कुम्बाबा मे़ःन्दाःन् मुरे़क् खारे़क् थेआङ् के़होप्पादे़न्नो ले़रुदेसुर॥ 23 “खे़न् एगाङ् हारुने़न् साॽरिक् सेसेबादे़न्नो लाःप्मानुःल्ले़ तगि खुने़ॽ नैनासुत् कुजाङ्हाॽ चाक्सिङ्ल॥ खुने़ॽ तुम्मादे़न् साःङ्गाहिम्मोलाम् लःन्निल्ले़ खुने़ॽ चाक्खुबा नैनासुत् चाङ्हाॽ फे़न्दुआङ् आम्भा खे़प्मो ने़स्सुधर॥ 24 खुने़ॽ कुभा सेसेबा च्वाःत् के़ने़बादे़न्नो वारुःम्सिङ्ल, हे़क्क्याङ् कुजाङ्हाॽ चाक्सिङ्ङाङ् ताररो॥ खे़ब्याङ् आबाङे कुलागि मिधिङ्मनादेमनाबा वयागे़न् सिदुङ्जभा नु मनाहाॽरे़ खुन्छिॽ लागि मिधिङ्मनादेमनाबा वयागे़न् सिदुङ्जभा तोःन्दुआङ् लायोलाम् ले़प्मि नाःक्तुर॥ 25 लायोलाम् ले़प्मि खोमा सिदुङ्जभाःल्ले़ कुसोःत्तिन्नाङ् खे़ल्ले़ ले़त्ति तोःम्मादे़न्नो मिधिक्खुर॥ 26 “कुबाःप्पाःत् वाॽमा के़घोबा कुम्बाबा मे़ःन्दा ले़त्छे़ के़बेःक्पा मनाःल्ले़ कुजाङ्ङिन् वाहप्तुआङ् खुने़ॽ वारुःम्सिङ्ल, खे़ब्याङ् खे़न् एगाङ् खे़न् साःङ्गाहिम्मो नुःङ्दार॥ 27 लायोलाम् ले़प्मि नाःक्मारे़ लागि तोःम्मनाबा से़गम्बान् नु कुम्बाबा मे़ःन्दाःल्ले़ कुमाक्खिन् साॽरिक् सेसेबादे़न्नो मे़दारुआङ् वये़, खे़न् वयागे़न् सिदुङ्जभाहाॽरे़ खुन्छिॽ थक्हाॽ साःङ्गाहिम्हाॽलाम् लाःक्कात् तेॽरुआङ् साहोरिक्हाॽ, साहाॽ नु पिॽहिहाॽ साःङ्गाहिम्हाॽलाम् लाःक्कात् मिधिक्खुदेसुर पोङ्ॽ॥ 28 खे़न् मिगे़धिङ्बाल्ले़ कुजाङ्ङिन् वाहप्तुआङ् खुने़ॽ वारुःम्सिङ्ल, हे़क्क्याङ् खे़न् एगाङ् खुने़ॽ साःङ्गाहिम्हाॽओ ताररो॥ आप्तिक्लाम् सुत्थो पोङ्मा याःम्बक् चोःक्मा ये़न् तोमा थिम् 29 “खिनिॽ लागि कन् सदादिङ्बा थिम् पोङ्ल॥ नुसिगेक्पा ला थिबोङ् ये़न्नो खिनिॽ आप्फेक् आप्फेक् नाॽआसिम्मे़ॽ॥ लाजेॽओ खिनिॽ सागे़वाःन्छिङ्बानिङ्साङ्, इग्र खिनिॽलुम्मो के़वाॽबा वेॽ लाजेॽबासाङ्, खिनिॽ आत्तिन्हाॽरे़आङ् थे़मा परिक्ले़न्नाङ् याःम्बक् मे़जोगे़म्मिन्ने़ॽ, 30 थेआङ्भे़ल्ले़ हाबा खे़न् ये़न्नो खिनिॽ सुत्थो चोःक्मानिङ् फाॽआङ् खिनिॽ लागि लायोलाम् ले़प्मि नाःक्मा पोङ्ॽ॥ खे़ब्याङ् यहवे दाङ्बे़ल्ले़ कुदगि के़रे़क् लायोलाम् खिनिॽ सुत्थो के़बोःक्खिॽ॥ 31 खे़न् ये़न्निङ्ग साॽरिक् सेसेबा ये़न्लो॥ खे़ल्ले़ याःन्दिक् खिनिॽ तःक्ने़त् युङे़म्मे़ॽ हे़क्क्याङ् याःम्बक् थेआङ् मे़जोगे़म्मिन्ने़ॽ॥ कन् थिम्हाॽ सदादिङ् आभे़ल्ले़साङ् इःप्मा नाःप्मा पोङ्ॽ॥ 32 माङ्थोःक्ना मे़बिरुबा नु कुम्बारे़ कुले़क्वाओ तुम् निङ्वाॽफुसाम्बा पोङ्मारे़ लागि हात् युक्तिङ् पोःक्खे़आङ् वाॽ, आम्भा खुने़ॽ लायोलाम् ले़प्मि नाःक्तुर, हे़क्क्याङ् खे़ल्ले़ सेसे नैनासुत् चाङ्हाॽ चाक्खुर॥ 33 खे़ल्ले़ साॽरिक् सेसेबादे़न्, तुम्मादे़न् साःङ्गाहिम् नु ले़त्ति तोःम्मादे़न्निल्ले़ लागि लायोलाम् ले़प्मि नाःक्तुर॥ हे़क्क्याङ् खे़ल्ले़ निङ्वाॽफुसाम्बाहाॽ नु सङ्जुम्भोबा के़रे़क् मनाहाॽरे़ लागिआङ् लायोलाम् ले़प्मि नाःक्तुर॥ 34 “कन् खे़ङ्हाॽरे़ खुन्छिॽ लागि आभे़ल्ले़साङ् के़वाॽबा सदादिङ्बा थिम् पोङ्ल—तङ्बेरे़ थिक्ले़ङ् इस्राइलिहाॽरे़ खुन्छिॽ के़रे़क् लायोल्ले़ लागि ले़प्मि नाःक्तुर॥” हे़क्क्याङ् यहवे दाङ्बे़ल्ले़ मोसान् मे़त्तुबा कुइसिक् खुने़ॽ हे़क्केए चोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.